തിരുവനന്തപുരം: നിയമസഭാ തിരഞ്ഞെടുപ്പിന്റെ ചൂടില് നേമം മണ്ഡലം തിളച്ചു മറിയുമ്പോള്, നിര്ണ്ണായകമായ ന്യൂനപക്ഷ വോട്ടുകള് ലക്ഷ്യമിട്ട് വിദ്യാഭ്യാസ മന്ത്രിയും എല്.ഡി.എഫ് സ്ഥാനാര്ത്ഥിയുമായ വി. ശിവന്കുട്ടി. ഒരു പ്രത്യേക വിഭാഗത്തിന്റെയും വോട്ട് വേണ്ടെന്ന് പറയാനാകില്ലെന്ന് അദ്ദേഹം വ്യക്തമാക്കിയതോടെ നേമത്തെ പോരാട്ടം പുതിയ തലത്തിലേക്ക് കടന്നു. എസ്ഡിപിഐയുടെയോ ജമാഅത്തെ ഇസ്ലാമിയുടെയോ വോട്ട് സ്വീകരിക്കുന്നത് ഭരണഘടനാ വിരുദ്ധമല്ലെന്നും, ഇടതുപക്ഷ നിലപാടിനെ അനുകൂലിക്കുന്ന ആര്ക്കും വോട്ട് ചെയ്യാമെന്നും അദ്ദേഹം തുറന്നടിച്ചു. ബി.ജെ.പിക്ക് മുന്പ് അക്കൗണ്ട് തുറക്കാന് അവസരമൊരുക്കിയ മണ്ഡലത്തില് ഇക്കുറി ആ പഴുതുകള് പൂര്ണ്ണമായും അടയ്ക്കാനാണ് സി.പി.എം നീക്കം.
നേമത്ത് മുന്കാലങ്ങളില് ബി.ജെ.പി വിജയിച്ചത് കോണ്ഗ്രസിന്റെ വോട്ട് കച്ചവടം മൂലമാണെന്ന് ശിവന്കുട്ടി ആരോപിച്ചു. യു.ഡി.എഫ് – ബി.ജെ.പി ‘ഡീല്’ രാഷ്ട്രീയത്തെ ജനങ്ങള് തിരിച്ചറിഞ്ഞു കഴിഞ്ഞു. അതുകൊണ്ടുതന്നെ ഇത്തവണ ബി.ജെ.പിക്ക് അക്കൗണ്ട് തുറക്കാമെന്ന മോഹം നടക്കില്ലെന്നും അദ്ദേഹം പരിഹസിച്ചു. ന്യൂനപക്ഷ വോട്ടുകള് ഏകീകരിക്കപ്പെടുന്നതിലൂടെ വര്ഗ്ഗീയ ശക്തികളെ മണ്ഡലത്തില് നിന്ന് അകറ്റി നിര്ത്താന് കഴിയുമെന്നാണ് എല്.ഡി.എഫ് കണക്കുകൂട്ടുന്നത്. ഭരണഘടനാപരമായ അവകാശങ്ങള് ഉയര്ത്തിക്കാട്ടി എല്ലാ വിഭാഗം വോട്ടര്മാരോടും വോട്ട് അഭ്യര്ത്ഥിക്കാനാണ് സ്ഥാനാര്ത്ഥിയുടെ തീരുമാനം.
സംസ്ഥാന സര്ക്കാര് നടപ്പിലാക്കിയ വികസന പ്രവര്ത്തനങ്ങള് ചര്ച്ചയാകാതിരിക്കാനാണ് പ്രതിപക്ഷം എസ്ഡിപിഐ ബന്ധം ആരോപിക്കുന്നത്. എന്നാല്, വികസന ചര്ച്ചകളില് നിന്ന് ഒളിച്ചോടാന് താനില്ലെന്നും നേമത്തെ വോട്ടര്മാര്ക്ക് സര്ക്കാരിന്റെ പ്രവര്ത്തനങ്ങളില് പൂര്ണ്ണ വിശ്വാസമുണ്ടെന്നും ശിവന്കുട്ടി അവകാശപ്പെട്ടു. അഘോരികളുടെയും മറ്റും സാന്നിധ്യം കേരളത്തിന്റെ മതേതര സംസ്കാരത്തിന് യോജിച്ചതല്ലെന്നും, ബി.ജെ.പി നടത്തുന്ന ഇത്തരം നീക്കങ്ങള് വോട്ടര്മാര് തള്ളിക്കളയുമെന്നും അദ്ദേഹം കൂട്ടിച്ചേര്ത്തു.
ബി.ജെ.പി വിരുദ്ധ വോട്ടുകള് ഭിന്നിച്ചുപോകാതിരിക്കാന് മുസ്ലിം വോട്ടുകള് മുഴുവന് പെട്ടിയിലാക്കാനുള്ള തന്ത്രപരമായ നീക്കമാണ് സി.പി.എം നടത്തുന്നത്. മണ്ഡലത്തിലെ ന്യൂനപക്ഷ വോട്ടുകള് ആര്ക്ക് ലഭിക്കുന്നു എന്നത് വിജയപരാജയങ്ങളെ നേരിട്ട് സ്വാധീനിക്കും. ഈ സാഹചര്യത്തിലാണ് വി. ശിവന്കുട്ടിയുടെ പ്രസ്താവന രാഷ്ട്രീയ വൃത്തങ്ങളില് വലിയ ചര്ച്ചയാകുന്നത്. യു.ഡി.എഫും ബി.ജെ.പിയും ഈ നിലപാടിനെതിരെ രംഗത്തെത്തിയെങ്കിലും, മതേതര വോട്ടുകളുടെ ഏകീകരണമാണ് തന്റെ ലക്ഷ്യമെന്ന് ശിവന്കുട്ടി ആവര്ത്തിക്കുന്നു.
ത്രികോണ മത്സരത്തിന്റെ വീറും വാശിയും നിറഞ്ഞ നേമത്ത്, ഓരോ വോട്ടും പിടിച്ചെടുക്കാനുള്ള കഠിന പരിശ്രമത്തിലാണ് മുന്നണികള്. വികസനവും രാഷ്ട്രീയ നിലപാടുകളും വോട്ട് ബാങ്ക് തന്ത്രങ്ങളും ഇടകലരുന്ന നേമത്ത് അന്തിമ വിജയം ആരുടേതാകുമെന്ന് പ്രവചിക്കുക അസാധ്യമാണ്. വരും ദിവസങ്ങളില് പ്രചാരണം കൂടുതല് ശക്തമാകുന്നതോടെ നേമത്തെ രാഷ്ട്രീയ ചിത്രം കൂടുതല് വ്യക്തമാകും.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
അരുമാനൂര് നയിനാര് ദേവ ക്ഷേത്രത്തിലെത് ഗുരുദേവ പ്രതിഷ്ഠ; ആര്ക്കും ആരാധനയ്ക്ക് ഇവിടെ സ്വാതന്ത്രം; ഗുരുദേവ സന്നിധിയില് മതേതര മംഗല്യം; മോണാലിസയും ഫര്മാനും ഒന്നായി; വിദ്വേഷ പ്രചാരണങ്ങളെ തള്ളി ദമ്പതികള്; ഹിന്ദുവിനെ മുസ്ലീം അമ്പലത്തില് താലികെട്ടിയതിന് പിന്നിലെ കഥ
