കൊച്ചി: പരിഹാസത്തിന്റെ മൂര്ച്ചയുള്ള വാക്കുകള്ക്കൊണ്ട് മലയാളിയെ ചിന്തിപ്പിക്കുകയും ചിരിപ്പിക്കുകയും ചെയ്ത സിനിമാ പ്രതിഭ ശ്രീനിവാസന് (69) കണ്ണീരോടെ വിട നല്കി കേരളം. തൃപ്പൂണിത്തുറ കണ്ടനാട്ടെ ‘പാലാഴി’ വീട്ടുവളപ്പില് പൂര്ണ്ണ ഔദ്യോഗിക ബഹുമതികളോടെയായിരുന്നു ചടങ്ങുകള്. ‘എന്നും എല്ലാവര്ക്കും നന്മകള് മാത്രം ഉണ്ടാകട്ടെ’ എന്ന് കുറിച്ച ഒരു കടലാസും പേനയും ഭൗതിക ശരീരത്തില് വെച്ച ശേഷമാണ് ചിതയ്ക്ക് തീകൊളുത്തിയത്. മൂത്തമകന് വിനീത് ശ്രീനിവാസന് ചിതയ്ക്ക് തീകൊളുത്തി.
അങ്ങേയറ്റം വൈകാരികമായ നിനിമയങ്ങള്ക്കാണ് കണ്ടനാട്ടെ വീട് സാക്ഷ്യം വഹിച്ചത്. ആത്മസുഹൃത്ത് സത്യന് അന്തിക്കാട് തന്റെ പ്രിയപ്പെട്ടവനെ യാത്രയാക്കിയത് നെഞ്ചോട് ചേര്ത്തുപിടിച്ച പേനയും പേപ്പറും നല്കിക്കൊണ്ടാണ്. സിനിമ, രാഷ്ട്രീയ, സാംസ്കാരിക രംഗത്തെ പ്രമുഖര്ക്കൊപ്പം ആയിരക്കണക്കിന് ആരാധകരും തങ്ങളുടെ പ്രിയപ്പെട്ട ‘ശ്രീനി’യെ ഒരുനോക്ക് കാണാന് ഒഴുകിയെത്തി. ശനിയാഴ്ച എറണാകുളം ടൗണ്ഹാളില് നടന്ന പൊതുദര്ശനത്തിലും വന് ജനപ്രവാഹമാണ് ദൃശ്യമായത്.
ശനിയാഴ്ച രാവിലെ ഡയാലിസിസിനായി ആശുപത്രിയിലേക്ക് കൊണ്ടുപോകും വഴിയാണ് ശ്രീനിവാസന് ശ്വാസതടസ്സം അനുഭവപ്പെട്ടത്. തുടര്ന്ന് തൃപ്പൂണിത്തുറ താലൂക്ക് ആശുപത്രിയില് എത്തിച്ചെങ്കിലും മരണം സംഭവിക്കുകയായിരുന്നു. മമ്മൂട്ടി, മോഹന്ലാല് തുടങ്ങിയ സൂപ്പര് താരങ്ങള് നേരിട്ടെത്തി അന്ത്യോപചാരമര്പ്പിച്ചു. തമിഴ് താരം സൂര്യയും കണ്ടനാട്ടെ വീട്ടിലെത്തി ആദരാഞ്ജലി അര്പ്പിച്ചു. മുഖ്യമന്ത്രി പിണറായി വിജയന്, മന്ത്രിമാര്, ജനപ്രതിനിധികള് എന്നിവരും മലയാളത്തിന്റെ പ്രിയ കലാകാരന് അന്ത്യാഞ്ജലി അര്പ്പിക്കാന് എത്തിയിരുന്നു.
കണ്ണൂര് പാട്യം സ്വദേശിയായ ശ്രീനിവാസന് പി.എ. ബക്കറിന്റെ ‘മണിമുഴക്കം’ എന്ന ചിത്രത്തിലൂടെയാണ് അഭിനയരംഗത്തെത്തിയത്. 48 വര്ഷം നീണ്ട സിനിമാ ജീവിതത്തില് 54 സിനിമകള്ക്ക് തിരക്കഥയെഴുതി. ‘ചിന്താവിഷ്ടയായ ശ്യാമള’, ‘വടക്കുനോക്കിയന്ത്രം’, ‘സന്ദേശം’ തുടങ്ങി മലയാളികള് ഹൃദയത്തോട് ചേര്ത്തുവെച്ച അനവധി ചിത്രങ്ങള് അദ്ദേഹത്തിന്റേതായുണ്ട്. അഞ്ച് തവണ സംസ്ഥാന പുരസ്കാരങ്ങളും ദേശീയ പുരസ്കാരങ്ങളും അദ്ദേഹത്തെ തേടിയെത്തി. സാധാരണക്കാരന്റെ പ്രശ്നങ്ങള് നര്മ്മത്തില് ചാലിച്ച് അവതരിപ്പിച്ച ശ്രീനിവാസന്, വെള്ളിത്തിരയിലെ കഥാപാത്രങ്ങള് മാത്രമല്ല, മലയാളിയുടെ നിത്യജീവിതത്തിലെ ഒരു ഭാഗം തന്നെയായിരുന്നു.
ചിരിയുടെയും ചിന്തയുടെയും വലിയൊരു ലോകം ബാക്കിയാക്കിയാണ് ശ്രീനിവാസന് മടങ്ങുന്നത്. ഗാന്ധിനഗര് സെക്കന്റ് സ്ട്രീറ്റും നാടോടിക്കാറ്റും സന്ദേശവും വടക്കുനോക്കിയന്ത്രവും പോലെ മലയാളികള് ഒരിക്കലും മറക്കാത്ത ഒരുപിടി ചിത്രങ്ങളിലൂടെ ശ്രീനിവാസന് എന്നും പ്രേക്ഷകമനസ്സുകളില് ജീവിക്കും.
Disclaimer: The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
കൊച്ചിയിലെ ലഹരി മാഫിയയും സിനിമയിലെ ഉന്നതരും; പിടിയിലായ കെവിനുമായി യുവനടന് അടുത്ത ബന്ധം; തിരുവനന്തപുരത്തെ നടന് കുടുങ്ങുമോ?
