മെഡിക്കല്‍ കോളേജ് മുന്‍ സൂപ്രണ്ടിനെതിരെ പീഡന പരാതി; ബ്ലാക്ക് മെയിലിംഗെന്ന് ഡോക്ടര്‍; വിശദ അന്വേഷണത്തിന് പോലീസ്

തിരുവനന്തപുരം: തിരുവനന്തപുരം മെഡിക്കല്‍ കോളേജ് ആശുപത്രിയെ അക്ഷരാര്‍ത്ഥത്തില്‍ ഞെട്ടിച്ചുകൊണ്ട് മുന്‍ സൂപ്രണ്ടും ന്യൂറോ വിഭാഗം മേധാവിയുമായ ഡോ. സുനില്‍കുമാറിനെതിരെ പീഡന പരാതി. വിദേശത്ത് ജോലിയുള്ള യുവതിയെ വിവാഹവാഗ്ദാനം നല്‍കി ഹോട്ടലുകളിലും ആശുപത്രിയിലെ ക്വാര്‍ട്ടേഴ്‌സിലും എത്തിച്ച് പീഡിപ്പിച്ചു എന്നാണ് ആരോപണം. സംഭവത്തില്‍ മെഡിക്കല്‍ കോളേജ് പോലീസ് കേസെടുത്ത് അന്വേഷണം ഊര്‍ജ്ജിതമാക്കി.

തിരുവനന്തപുരം സ്വദേശിനിയായ യുവതിയുമായി ഡോക്ടര്‍ക്ക് ദീര്‍ഘകാലമായി പരിചയമുണ്ടായിരുന്നു എന്നാണ് സൂചന. 2023-ലാണ് പരാതിക്കാസ്പദമായ സംഭവങ്ങളുടെ തുടക്കം. കോവളത്തെ ആഡംബര ഹോട്ടലിലും തിരുവനന്തപുരം മെഡിക്കല്‍ കോളേജ് പരിസരത്തും വെച്ച് ഡോക്ടര്‍ തന്നെ ശാരീരികമായി ചൂഷണം ചെയ്തുവെന്ന് യുവതി മൊഴി നല്‍കിയിട്ടുണ്ട്. വിദേശത്തെ മികച്ച ജോലി ഉപേക്ഷിച്ച് നാട്ടിലെത്തിയ യുവതിയെ ഡോക്ടര്‍ വിവാഹം കഴിക്കാമെന്ന് വിശ്വസിപ്പിച്ച് വശത്താക്കുകയായിരുന്നുവത്രേ.

എന്നാല്‍, ഈ ആരോപണങ്ങളെല്ലാം തള്ളിക്കളയുകയാണ് ഡോ. സുനില്‍കുമാര്‍. യുവതി തന്നെ കെണിയില്‍ പെടുത്തുകയായിരുന്നുവെന്നും പീഡനക്കേസ് കൊടുക്കുമെന്ന് ഭീഷണിപ്പെടുത്തി തന്റെ കൈയില്‍ നിന്ന് ലക്ഷക്കണക്കിന് രൂപ തട്ടിയെടുത്തതായും ഡോക്ടര്‍ ആരോപിക്കുന്നു. ‘പലപ്പോഴായി ലക്ഷങ്ങള്‍ വാങ്ങിയിട്ടും യുവതിയുടെ ആര്‍ത്തി തീര്‍ന്നില്ല. വീണ്ടും പണം ആവശ്യപ്പെട്ടപ്പോള്‍ നല്‍കാത്തതിലുള്ള വൈരാഗ്യമാണ് ഈ പരാതിക്ക് പിന്നില്‍,’ എന്ന് ഡോക്ടറോട് അടുത്ത വൃത്തങ്ങള്‍ സൂചിപ്പിക്കുന്നു.

നിലവില്‍ അവധിയില്‍ പ്രവേശിച്ചിരിക്കുന്ന ഡോക്ടറെ പോലീസ് സ്റ്റേഷനിലേക്ക് വിളിച്ചുവരുത്തി മണിക്കൂറുകളോളം ചോദ്യം ചെയ്തു. യുവതി നല്‍കിയ മൊഴിയില്‍ വൈരുദ്ധ്യങ്ങളുണ്ടോ എന്നും പോലീസ് പരിശോധിക്കുന്നുണ്ട്. പരാതിക്കാരിയുടെ രഹസ്യമൊഴി രേഖപ്പെടുത്താനുള്ള നീക്കത്തിലാണ് അന്വേഷണ സംഘം.

അത്യുന്നത പദവികള്‍ വഹിച്ചിട്ടുള്ള ഒരു പ്രമുഖ ഡോക്ടര്‍ ഇത്തരമൊരു വിവാദത്തില്‍ അകപ്പെട്ടത് മെഡിക്കല്‍ കോളേജ് വൃത്തങ്ങളിലും വലിയ സംസാരവിഷയമായിട്ടുണ്ട്. പ്രണയപ്പകയാണോ അതോ കൃത്യമായ ബ്ലാക്ക് മെയിലിംഗാണോ ഇതിന് പിന്നിലെന്ന് വരും ദിവസങ്ങളില്‍ പുറത്തുവരും.