കെ എസ് ആര് ടി സി ഓര്ഡിനറി ബസുകളില് മൂന്നിലൊന്നും തിരുവനന്തപുരത്തും കൊല്ലത്തും; വടക്കന് ജില്ലകളില് സര്വീസുകള് വെട്ടിച്ചുരുക്കുന്നു; മലബാറില് പ്രതിഷേധം ശക്തം; തിരഞ്ഞെടുപ്പ് കാലത്തെ സൗജന്യയാത്രാ പ്രഖ്യാപനം ഓര്ഡിനറി ബസുകളില് മാത്രമായി ഒതുക്കിയെന്ന് ആക്ഷേപം
തിരുവനന്തപുരം : സംസ്ഥാനത്തെ കെഎസ്ആര്ടിസി ഓര്ഡിനറി ബസുകളുടെ വിന്യാസത്തില് വടക്കന് കേരളത്തോട് കടുത്ത അവഗണന തുടരുന്നതായി ആക്ഷേപം. ആകെ സര്വീസ് നടത്തുന്ന ഓര്ഡിനറി ബസുകളില് മൂന്നിലൊന്നും തിരുവനന്തപുരം, കൊല്ലം ജില്ലകളില് കേന്ദ്രീകരിച്ചിരിക്കുമ്പോള് മലബാര് മേഖലയിലെ ജില്ലകളില് സര്വീസുകള് തീരെയില്ലാത്ത അവസ്ഥയാണ്. ഇതോടെ യുഡിഎഫ് സര്ക്കാര് തിരഞ്ഞെടുപ്പ് കാലത്ത് കൊട്ടിഘോഷിച്ച് പ്രഖ്യാപിച്ച സ്ത്രീകളുടെ സൗജന്യയാത്രാ പദ്ധതിയുടെ ആനുകൂല്യം സംസ്ഥാനത്തെ ബഹുഭൂരിപക്ഷം സ്ത്രീകള്ക്കും ലഭിക്കാത്ത സാഹചര്യമാണ് നിലവിലുള്ളത്. പദ്ധതി ഓര്ഡിനറി ബസുകളില് മാത്രമായി ഒതുക്കിയതാണ് മലബാര് മേഖലയിലെ യാത്രക്കാര്ക്ക് തിരിച്ചടിയായത്.
നിലവില് സംസ്ഥാനത്താകെ ആയിരത്തില് താഴെ ഓര്ഡിനറി ബസുകള് മാത്രമാണ് കെഎസ്ആര്ടിസി സര്വീസിനായി നിരത്തിലിറക്കുന്നത്. ഇതില് നിന്നും സിറ്റി ഫാസ്റ്റ്, അന്തര് ജില്ലാ സര്വീസുകള്, ലിമിറ്റഡ് സ്റ്റോപ്പ് സര്വീസുകള് എന്നിവ മാറ്റിവെച്ചാല് യഥാര്ത്ഥ ഓര്ഡിനറി ബസുകളുടെ എണ്ണം വീണ്ടും തുച്ഛമായി ചുരുങ്ങും. ഈ പരിമിതമായ ബസുകളില് മാത്രമായി സൗജന്യ യാത്രാ പദ്ധതി പരിമിതപ്പെടുത്താനാണ് സര്ക്കാര് നീക്കം നടത്തുന്നത്. ഇതില് വലിയൊരു പങ്കും തിരുവനന്തപുരം, കൊല്ലം ജില്ലകളില് മാത്രമായി സര്വീസ് നടത്തുമ്പോള് വടക്കന് ജില്ലകളില് ആകെ ഇരുന്നൂറില് താഴെ ഓര്ഡിനറി ബസുകള് മാത്രമാണ് അവശേഷിക്കുന്നത്.
റോഡ് ട്രാന്സ്പോര്ട്ട് കോര്പ്പറേഷന്റെ ഔദ്യോഗിക കണക്കുകള് പ്രകാരം കേരളത്തിലാകെയുള്ള പതിനാറായിരത്തി അഞ്ഞൂറ്റി നാല്പ്പത്തിയഞ്ച് റൂട്ടുകളില് നാലായിരത്തി ആറൂറ്റി ഒന്പത് എണ്ണം മാത്രമാണ് കെഎസ്ആര്ടിസിയുടെ അധീനതയിലുള്ളത്. ഇതില് നിലവില് സര്വീസ് നടത്തുന്ന നാലായിരത്തി അഞ്ഞൂറോളം ബസുകളില് മൂന്നിലൊന്നും തലസ്ഥാന ജില്ലയായ തിരുവനന്തപുരത്താണ് സര്വീസ് നടത്തുന്നത്. ഈ അശാസ്ത്രീയമായ ബസ് വിന്യാസം കാരണം പുതിയ യാത്രാ ആനുകൂല്യങ്ങളുടെ പരമാവധി ഗുണം ലഭിക്കുന്നതും തലസ്ഥാന ജില്ലയിലെ യാത്രക്കാര്ക്കാണെന്നത് മലബാറിലെ ജനങ്ങളില് വലിയ പ്രതിഷേധത്തിന് കാരണമായിട്ടുണ്ട്.
നിലവില് കെഎസ്ആര്ടിസി നിരത്തിലിറക്കുന്ന ബസുകളില് മൂന്നിലൊന്നും സൂപ്പര്ഫാസ്റ്റ്, സൂപ്പര് എക്സ്പ്രസ്സ് ഉള്പ്പെടെയുള്ള സൂപ്പര്ക്ലാസ് സര്വീസുകളാണ്. ഇത്തരം സൂപ്പര്ക്ലാസ് ബസുകളില് യാത്രക്കാരെ നിര്ത്തിക്കൊണ്ടുപോകാന് മോട്ടോര് വാഹന വകുപ്പിന്റെ നിയമപ്രകാരം അനുവാദമില്ലാത്തതാണ്. കൂടാതെ മുന്കൂട്ടി സീറ്റ് റിസര്വേഷന് സൗകര്യമുള്ള ഇത്തരം ദീര്ഘദൂര ബസുകളില് സാധാരണക്കാരായ യാത്രക്കാര്ക്ക് പ്രഖ്യാപിച്ചിട്ടുള്ള സൗജന്യയാത്ര പ്രായോഗികവുമല്ല. ഇതും സാധാരണക്കാരായ കര്ഷകരും തൊഴിലാളികളും ഏറെയുള്ള വടക്കന് കേരളത്തിലെ മലയോര നിവാസികളെ പദ്ധതിയില് നിന്നും അകറ്റി നിര്ത്തുന്നു.
കെഎസ്ആര്ടിസിയുടെ ഉപകമ്പനിയായ സ്വിഫ്റ്റിന് കീഴില് നിലവില് ഓടിക്കൊണ്ടിരിക്കുന്ന അഞ്ഞൂറോളം ആധുനിക ബസുകളിലും സൗജന്യ യാത്രാ പദ്ധതി നടപ്പാക്കാന് സാധ്യതയില്ലെന്നാണ് കെഎസ്ആര്ടിസി മാനേജ്മെന്റില് നിന്നും ലഭിക്കുന്ന സൂചനകള്. സ്വിഫ്റ്റ് ബസുകള് പൂര്ണ്ണമായും ദീര്ഘദൂര സൂപ്പര്ക്ലാസ് സര്വീസുകളായിട്ടാണ് ക്രമീകരിച്ചിരിക്കുന്നത് എന്നതിനാലാണ് ഇത്. ചുരുക്കത്തില് ഗ്രാമീണ മേഖലകളെ ബന്ധിപ്പിക്കുന്ന ഓര്ഡിനറി ബസുകള് മാത്രം ആശ്രയിക്കുന്ന മലബാറിലെ ഭൂരിഭാഗം യാത്രക്കാര്ക്കും ഈ പുതിയ സര്ക്കാര് പദ്ധതികള് കേവലം പ്രഖ്യാപനങ്ങള് മാത്രമായി അവശേഷിക്കുകയാണ്.
വടക്കന് ജില്ലകളിലെ കെഎസ്ആര്ടിസി ഡിപ്പോകളില് ആവശ്യത്തിന് ഓര്ഡിനറി ബസുകളില്ലാത്തതിനാല് ജനങ്ങള് സ്വകാര്യ ബസുകളെയാണ് പൂര്ണ്ണമായും ആശ്രയിക്കുന്നത്. സ്വകാര്യ ബസുകളില് ഇത്തരം സര്ക്കാര് സൗജന്യങ്ങള് ലഭ്യമല്ലാത്തതിനാല് മലബാറിലെ സ്ത്രീകള്ക്ക് യാത്രാച്ചെലവില് യാതൊരുവിധ ഇളവുകളും ലഭിക്കുന്നില്ല. തലസ്ഥാന നഗരത്തിലും പരിസരപ്രദേശങ്ങളിലും കുറഞ്ഞ ദൂരത്തില് പോലും ഒന്നിലധികം കെഎസ്ആര്ടിസി ഓര്ഡിനറി ബസുകള് ലഭ്യമാകുമ്പോഴാണ് വടക്കന് കേരളത്തോട് ഈ വിവേചനം കാട്ടുന്നത്.
ഈ സാഹചര്യത്തില് മലബാര് മേഖലയില് കെഎസ്ആര്ടിസി ഓര്ഡിനറി സര്വീസുകളുടെ എണ്ണം അടിയന്തിരമായി വര്ദ്ധിപ്പിക്കണമെന്ന ആവശ്യം ശക്തമായിട്ടുണ്ട്. മലബാറിലെ വിവിധ യാത്രാ കൂട്ടായ്മകളും ജനപ്രതിനിധികളും വനമേഖലയോട് ചേര്ന്നുകിടക്കുന്ന പ്രദേശങ്ങളിലേക്ക് കൂടുതല് ഓര്ഡിനറി ബസുകള് അനുവദിക്കണമെന്ന് ആവശ്യപ്പെട്ട് ഗതാഗത മന്ത്രിക്ക് നിവേദനം നല്കിയിട്ടുണ്ട്. വടക്കന് ജില്ലകളിലെ ഓര്ഡിനറി ബസുകളുടെ കുറവ് പരിഹരിക്കാന് കെഎസ്ആര്ടിസി മറ്റ് ഡിപ്പോകളില് നിന്നും ബസുകള് പുനര്വിന്യസിക്കണമെന്നാണ് ഇവരുടെ പ്രധാന ആവശ്യം.
അതേസമയം തെക്കന് ജില്ലകളില് ഓര്ഡിനറി സര്വീസുകള് കൂടുതലുള്ളത് അവിടുത്തെ യാത്രക്കാരുടെ എണ്ണക്കൂടുതല് കൊണ്ടും കണ്സെഷന് കാര്ഡുകളുടെ വിതരണത്തിലുള്ള വര്ദ്ധനവ് കൊണ്ടുമാണെന്നാണ് അധികൃതരുടെ വിശദീകരണം. തിരുവനന്തപുരം സിറ്റി സര്വീസുകള് വര്ഷങ്ങളായി കെഎസ്ആര്ടിസിയുടെ ലാഭകരമായ റൂട്ടുകളാണെന്നും അവ പെട്ടെന്ന് നിര്ത്തലാക്കാന് കഴിയില്ലെന്നും മാനേജ്മെന്റ് വ്യക്തമാക്കുന്നു. എന്നാല് ഇത് വടക്കന് ജില്ലകളിലെ പൊതുഗതാഗത സൗകര്യങ്ങളെ മനഃപൂര്വ്വം അവഗണിക്കുന്നതിനുള്ള ന്യായീകരണമല്ലെന്ന് പരക്കെ ആക്ഷേപമുണ്ട്.
മലബാറില് നിലവിലുള്ള ദീര്ഘദൂര സര്വീസുകളില് ചിലതെങ്കിലും ഓര്ഡിനറി പദവിയിലേക്ക് മാറ്റി സര്വീസ് നടത്തിയാല് മാത്രമേ വടക്കന് ജില്ലകളിലെ സ്ത്രീകള്ക്ക് ഈ പദ്ധതിയുടെ പ്രയോജനം ഭാഗികമായെങ്കിലും ലഭ്യമാക്കാന് സാധിക്കുകയുള്ളൂ. നിലവില് കോഴിക്കോട്, കണ്ണൂര്, വയനാട്, കാസര്കോഡ് ജില്ലകളിലെ ഗ്രാമീണ മേഖലകളില് കെഎസ്ആര്ടിസിയുടെ സാന്നിധ്യം വളരെ കുറവാണ്. ഈ ജില്ലകളിലെ സാധാരണക്കാരായ യാത്രക്കാര്ക്ക് അനുകൂലമായ രീതിയില് റൂട്ടുകള് പുനഃക്രമീകരിക്കാന് സര്ക്കാര് തയ്യാറാകണമെന്നാണ് ഉയരുന്ന പ്രധാന നിര്ദ്ദേശം.
വരും ദിവസങ്ങളില് ഈ വിഷയത്തില് ശക്തമായ ജനകീയ പ്രതിഷേധങ്ങള് സംഘടിപ്പിക്കാനാണ് മലബാറിലെ വിവിധ സംഘടനകളുടെ തീരുമാനം. കെഎസ്ആര്ടിസി ബസുകളുടെ അശാസ്ത്രീയമായ വിന്യാസം തിരുത്തണമെന്നും സംസ്ഥാനത്തെ എല്ലാ ജില്ലകള്ക്കും തുല്യമായ പരിഗണന നല്കണമെന്നും ആവശ്യപ്പെട്ട് നിയമസഭയ്ക്കുള്ളിലും പ്രതിഷേധം ഉയര്ത്താന് പ്രതിപക്ഷം ഒരുങ്ങുന്നുണ്ട്. മലബാര് മേഖലയിലെ ഓര്ഡിനറി സര്വീസുകള് വര്ദ്ധിപ്പിക്കുന്ന കാര്യത്തില് ഗതാഗത വകുപ്പ് സ്വീകരിക്കുന്ന നിലപാടുകള് വരും ദിവസങ്ങളില് നിര്ണ്ണായകമാകും.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
വായനക്കാരുടെ അഭിപ്രായങ്ങള് അവരുടേത് മാത്രമാണ്, വയർലെസ്സ് മീഡിയയുടെ അല്ല.
ഇവിടെ കുറിക്കുന്ന പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക.
സമൂഹത്തിൽ ഭിന്നതയോ സ്പർധയോ വളർത്തുന്നതോ, അധിക്ഷേപമാകുന്നതോ,
അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്.
അത്തരം പ്രതികരണങ്ങൾ നിയമനടപടി നേരിടേണ്ടി വരും.
രണ്ടാം പിണറായി സർക്കാരിന്റെ കാലത്ത് വാങ്ങിയത് 11 പുതിയ കാറുകൾ; ചെലവ് 2.71 കോടി രൂപ
