തിരുവനന്തപുരം: മുന് പിണറായി സര്ക്കാരിന്റെ കാലത്ത് പ്രതിപക്ഷം വലിയ രാഷ്ട്രീയ ആയുധമാക്കിയ ‘ആകാശ ധൂര്ത്ത്’ വരുംദിവസങ്ങളില് യു.ഡി.എഫ്. സര്ക്കാരിന്റെ വലിയൊരു പരീക്ഷണമായി മാറുന്നു. നിലവിലുള്ള വാടക ഹെലികോപ്റ്ററിന്റെ കരാര് കാലാവധി വരുന്ന ഓഗസ്റ്റില് അവസാനിക്കാനിരിക്കെ, ഹെലികോപ്റ്റര് സേവനം ഇനിയും തുടരണമെന്ന ആവശ്യവുമായി സംസ്ഥാന പോലീസ് മേധാവി (ഡി.ജി.പി.) റവാഡ ചന്ദ്രശേഖര് സര്ക്കാരിന് ഔദ്യോഗികമായി കത്ത് നല്കിയതാണ് പുതിയ രാഷ്ട്രീയ ചര്ച്ചകള്ക്ക് വഴിതുറന്നിരിക്കുന്നത്. സര്ക്കാരിന്റെയും പൊലീസിന്റെയും അതിവേഗ പ്രവര്ത്തനങ്ങള്ക്ക് ഹെലികോപ്റ്റര് അനിവാര്യമാണെന്നാണ് കത്തിലെ ന്യായമെങ്കിലും യു.ഡി.എഫ്. ഭരണകൂടം ഈ ആവശ്യം തള്ളിക്കളയാനാണ് സാധ്യതയേറെ.
യുഎസ് നാവികസേനയുടേത് ‘കടല്ക്കൊള്ള’; ട്രംപിന്റേത് കുറ്റസമ്മതമെന്ന് ഇറാന്, ഐക്യരാഷ്ട്രസഭയുടെ ഇടപെടല് തേടി ടെഹ്റാന്; പശ്ചിമേഷ്യയില് അനിശ്ചിതത്വം മാത്രം
കഴിഞ്ഞ ഇടതുപക്ഷ ഭരണകാലത്ത് കോടികള് വാടക നല്കി പവന് ഹാന്സ് കമ്പനിയില് നിന്നും ചിപ്സണ് എവിയേഷനില് നിന്നും ഹെലികോപ്റ്റര് വാടകയ്ക്കെടുത്ത നടപടിയെ അനാവശ്യ ധൂര്ത്തെന്നാണ് അന്ന് പ്രതിപക്ഷ നേതാവായിരുന്ന വി.ഡി. സതീശനും യു.ഡി.എഫ്. നേതാക്കളും വിശേഷിപ്പിച്ചത്. ഖജനാവ് കത്തുമ്പോള് ഭരണാധികാരികള്ക്ക് ആകാശയാത്ര നടത്താനുള്ള സുഖസൗകര്യമൊരുക്കുകയാണെന്ന കടുത്ത വിമര്ശനവും അന്ന് നിയമസഭയിലടക്കം ഉയര്ന്നിരുന്നു. അന്ന് ധൂര്ത്തായി പ്രഖ്യാപിച്ച അതേ ഹെലികോപ്റ്ററിന്റെ കരാര് നീട്ടാന് സ്വന്തം പൊലീസ് മേധാവി തന്നെ ഇപ്പോള് കത്ത് നല്കുമ്പോള്, അത് എങ്ങനെ സ്വീകരിക്കുമെന്ന വലിയ രാഷ്ട്രീയ പ്രതിസന്ധിയിലാണ് ആഭ്യന്തരവകുപ്പ്.
മാവോയിസ്റ്റ് നിരീക്ഷണം, ദുരന്തനിവാരണം, പ്രളയകാലത്തെ അടിയന്തര രക്ഷാപ്രവര്ത്തനങ്ങള്, അവയവദാനം തുടങ്ങിയ സുപ്രധാന ആവശ്യങ്ങള്ക്ക് ഹെലികോപ്റ്ററിന്റെ സേവനം അത്യന്താപേക്ഷിതമാണെന്നാണ് ഡി.ജി.പി. തന്റെ കത്തിലൂടെ സര്ക്കാരിനെ ബോധ്യപ്പെടുത്താന് ശ്രമിക്കുന്നത്. മുന്കാലങ്ങളില് അവയവദാന പ്രക്രിയയ്ക്ക് ഹെലികോപ്റ്റര് ഉപയോഗിച്ചത് വലിയ ജനശ്രദ്ധ നേടിയിരുന്നു എന്നതും പൊലീസ് ചൂണ്ടിക്കാണിക്കുന്നു. എന്നാല്, ഈ ആവശ്യങ്ങളെല്ലാം വളരെ അപൂര്വ്വമായി മാത്രം ഉണ്ടാകുന്നതാണെന്നും, അതിനായി മാസം തോറും കോടികള് വാടകയിനത്തില് നല്കി ഹെലികോപ്റ്റര് നിലനിര്ത്തുന്നത് സാമ്പത്തിക പ്രതിസന്ധിയിലായ സംസ്ഥാനത്തിന് താങ്ങാന് കഴിയില്ലെന്നുമാണ് ധനവകുപ്പിന്റെയും പ്രാഥമിക വിലയിരുത്തല്.
പ്രതിശ്രുത വരന് പിന്മാറിയ വിഷമം കാരണം ആത്മഹത്യയ്ക്ക് ശ്രമിച്ച യുവതി റൂറല് ജില്ലാ പോലീസ് മേധാവിക്ക് പരാതി നല്കി, ആത്മഹത്യപ്രേരണക്കുറ്റത്തിന് കേസെടുക്കാന് നിയമോപദേശം തേടി
മുഖ്യമന്ത്രി വി.ഡി. സതീശനും പുതിയ ആഭ്യന്തരമന്ത്രിയും ഈ വിഷയത്തില് എന്ത് തീരുമാനമെടുക്കും എന്നതിനെ ആശ്രയിച്ചായിരിക്കും വരും ദിവസങ്ങളിലെ രാഷ്ട്രീയ അന്തരീക്ഷം. മുന് സര്ക്കാരിന്റെ നയങ്ങളെ കടുത്ത ഭാഷയില് എതിര്ത്ത യു.ഡി.എഫിന്, അധികാരത്തിലെത്തിയ ഉടന് അതേ ഹെലികോപ്റ്റര് കരാര് ഒപ്പിട്ടു നീട്ടുക എന്നത് രാഷ്ട്രീയമായി വലിയ തിരിച്ചടിയാകും. സി.പി.എം. ഇതിനെ യു.ഡി.എഫിന്റെ ഇരട്ടത്താപ്പായി ഉയര്ത്തിക്കാട്ടാന് കാത്തിരിക്കുകയാണ്. അതുകൊണ്ടുതന്നെ സ്വന്തം മുഖം രക്ഷിക്കാന് വേണ്ടി മാത്രം പൊലീസിന്റെ ഈ ‘ആകാശ മോഹം’ ആദ്യഘട്ടത്തില് തന്നെ വെട്ടിനിരത്താനാണ് മുഖ്യമന്ത്രിയുടെ ഓഫീസില് നിന്നുള്ള നീക്കം.
പൊതുജനങ്ങള്ക്ക് റേഷന് ആനുകൂല്യങ്ങളും ക്ഷേമപെന്ഷനുകളും നല്കാന് പണമില്ലാതെ വലയുന്ന സാഹചര്യത്തില്, പ്രതിമാസം വന്തുക വാടക നല്കി ഹെലികോപ്റ്റര് പാര്ക്ക് ചെയ്യുന്നത് ജനങ്ങള്ക്കിടയിലും കടുത്ത അതൃപ്തി ഉണ്ടാക്കുമെന്ന് ഭരണമുന്നണിയിലെ പ്രമുഖ കക്ഷികള് മുന്നറിയിപ്പ് നല്കുന്നുണ്ട്. വിമാനത്താവളങ്ങളും റോഡ് സൗകര്യങ്ങളും മികച്ച നിലയിലുള്ള കേരളം പോലെയൊരു ചെറിയ സംസ്ഥാനത്ത് പൊലീസിന് മാത്രമായി പ്രത്യേക ഹെലികോപ്റ്റര് സംവിധാനം ആവശ്യമില്ലെന്ന നിലപാടാണ് മുന്നണിക്കുള്ളത്. അടിയന്തര ഘട്ടങ്ങളില് വ്യോമസേനയുടെയോ മറ്റ് സ്വകാര്യ ഏജന്സികളുടെയോ ഹെലികോപ്റ്റര് താല്ക്കാലികമായി വാടകയ്ക്ക് എടുക്കുന്നതാണ് ബുദ്ധിയെന്ന് പല നേതാക്കളും ചൂണ്ടിക്കാട്ടുന്നു.
രണ്ടാം പിണറായി സര്ക്കാരിന്റെ കാലത്ത് ഹെലികോപ്റ്റര് വാടകയിനത്തില് മാത്രം കോടികളാണ് ഖജനാവില് നിന്ന് ഒഴുക്കിക്കളഞ്ഞത്. ഭൂരിഭാഗം ദിവസങ്ങളിലും യാതൊരുവിധ ഉപയോഗവുമില്ലാതെ വിമാനത്താവളത്തിലെ ഹാങ്ങറില് വിശ്രമിച്ച ഹെലികോപ്റ്ററിന് നിശ്ചിത മണിക്കൂര് പറന്നാലും ഇല്ലെങ്കിലും ലക്ഷക്കണക്കിന് രൂപ ‘മിനിമം ഗ്യാരണ്ടി’യായി നല്കേണ്ടി വന്നിരുന്നു. ഈ സാമ്പത്തിക നഷ്ടത്തിന്റെ കണക്കുകള് പുതിയ സര്ക്കാര് കൃത്യമായി പരിശോധിച്ചുവരികയാണ്. ഒരു ജനകീയ സര്ക്കാരിന് യോജിച്ച ശൈലിയല്ല ഇതെന്ന വികാരം മന്ത്രിസഭയിലുമുണ്ട്.
പൊലീസ് നവീകരണത്തിന്റെ പേര് പറഞ്ഞ് ആഡംബര വാഹനങ്ങളും ഹെലികോപ്റ്ററുകളും വാങ്ങിക്കൂട്ടുന്ന മുന്കാല ശൈലിക്ക് പുതിയ ആഭ്യന്തര നയത്തില് കടുത്ത നിയന്ത്രണങ്ങള് ഏര്പ്പെടുത്താനാണ് സര്ക്കാര് ആലോചിക്കുന്നത്. ക്രമസമാധാന പാലനത്തിനും സൈബര് സുരക്ഷയ്ക്കും മുന്ഗണന നല്കുന്നതിന് പകരം ആകാശ നിരീക്ഷണത്തിന് വലിയ തുക ചിലവഴിക്കുന്നത് യുക്തിരഹിതമാണ്. കൂടാതെ, നിലവിലെ ഹെലികോപ്റ്റര് കരാര് തുടര്ന്നാല് അത് മുന് മുഖ്യമന്ത്രി പിണറായി വിജയന്റെ ശൈലിയെ യു.ഡി.എഫ്. സാധൂകരിക്കുന്നതിന് തുല്യമായി മാറുമെന്ന ഭയവും കോണ്ഗ്രസ് നേതൃത്വത്തിനുണ്ട്.
ഡി.ജി.പി.യുടെ കത്തിന്മേല് ധനവകുപ്പിന്റെയും ആഭ്യന്തരവകുപ്പിന്റെയും വിശദമായ പരിശോധന ഉടന് ഉണ്ടാകും. കരാര് നീട്ടേണ്ടതില്ലെന്ന കര്ശന നിര്ദ്ദേശമായിരിക്കും മുഖ്യമന്ത്രിയുടെ ഓഫീസ് നല്കുക എന്നാണ് സെക്രട്ടേറിയറ്റ് വൃത്തങ്ങളില് നിന്നുള്ള സൂചന. ഹെലികോപ്റ്റര് ഒഴിവാക്കുന്നതിലൂടെ കോടിക്കണക്കിന് രൂപ ലാഭിക്കാന് കഴിയുമെന്നും, അത് തീരദേശ സുരക്ഷയ്ക്കും പോലീസിന്റെ അടിസ്ഥാന സൗകര്യ വികസനത്തിനും ഉപയോഗിക്കാമെന്നും സര്ക്കാര് കണക്കുകൂട്ടുന്നു. പ്രതിപക്ഷത്തിരുന്നപ്പോള് പറഞ്ഞ വാക്കുകള് ഭരണത്തിലെത്തുമ്പോള് വിസ്മരിക്കില്ലെന്ന സന്ദേശം പൊതുജനങ്ങള്ക്ക് നല്കാനും ഇതിലൂടെ സാധിക്കും.
അതേസമയം, ഹെലികോപ്റ്റര് ഒഴിവാക്കുന്നത് ഭാവിയില് ഏതെങ്കിലും അടിയന്തര രക്ഷാപ്രവര്ത്തനത്തെയോ മെഡിക്കല് എയര് ആംബുലന്സ് സംവിധാനത്തെയോ ബാധിച്ചാല് അത് വലിയ മാധ്യമവിവാദങ്ങള്ക്ക് വഴിതുറക്കുമെന്ന ആശങ്കയും പൊലീസിലെ ഒരു വിഭാഗം പങ്കുവെക്കുന്നുണ്ട്. എന്നാല്, അത്തരം പ്രത്യേക സാഹചര്യങ്ങളെ നേരിടാന് നാവികസേനയുടെയും വ്യോമസേനയുടെയും സഹായം തേടാനുള്ള സ്ഥിരസംവിധാനം ഒരുക്കാനാണ് സര്ക്കാര് താല്പര്യപ്പെടുന്നത്. ഇതിനായി പ്രത്യേക ഏകോപന സമിതി രൂപീകരിക്കുന്ന കാര്യവും പരിഗണനയിലാണ്.
ചുരുക്കത്തില്, കേരള പൊലീസിന്റെ ഹെലികോപ്റ്റര് പ്രണയത്തിന് ഓഗസ്റ്റോടെ പൂര്ണ്ണവിരാമമിടാന് തന്നെയാണ് വി.ഡി. സതീശന് സര്ക്കാരിന്റെ തീരുമാനം. ഫയലുകള് ചുവപ്പുനാടയില് കുടുങ്ങാതെ വേഗത്തില് തീരുമാനമെടുക്കുന്ന പുതിയ ശൈലിയുടെ ഭാഗമായി, ഡി.ജി.പി.യുടെ കത്തിന്മേല് വരും ദിവസങ്ങളില് തന്നെ വ്യക്തമായ മറുപടി നല്കും. ആകാശയാത്രകള് ഒഴിവാക്കി തറയിലിറങ്ങി ഭരിക്കുക എന്ന പുതിയ യു.ഡി.എഫ്. നയത്തിന്റെ ആദ്യത്തെ ഇര ഈ ഹെലികോപ്റ്റര് കരാര് തന്നെയായിരിക്കും എന്നതില് ഇനി തര്ക്കമില്ല.
