മോസ്കോ/കീവ്: റഷ്യ-യുക്രെയ്ന് യുദ്ധം അഞ്ചാം വര്ഷത്തിലേക്ക് കടക്കുമ്പോള് ക്രെംലിന് കൊട്ടാരത്തെയും പ്രസിഡന്റ് വ്ലാഡിമിര് പുടിനെയും കാത്തിരിക്കുന്നത് കനത്ത തിരിച്ചടികളെന്ന് അന്താരാഷ്ട്ര മാധ്യമ റിപ്പോര്ട്ടുകള്. യുക്രെയ്നുമായുള്ള തീരാപ്പോരാട്ടം റഷ്യന് സമ്പദ്വ്യവസ്ഥയെ പൂര്ണ്ണമായ തകര്ച്ചയുടെ വക്കിലേക്ക് തള്ളിവിട്ടിരിക്കുകയാണെന്ന് റഷ്യയുടെ ധനമന്ത്രാലയവും സെന്ട്രല് ബാങ്കും തന്നെ മുന്നറിയിപ്പ് നല്കുന്നു. യുദ്ധമുന്നണിയില് റഷ്യന് സൈന്യത്തിന് വന് ഭൂപ്രദേശം നഷ്ടമാകുന്നതിനൊപ്പം, റഷ്യ പിടിച്ചെടുത്ത ക്രിമിയയില് ഇന്ധനക്ഷാമം രൂക്ഷമായതോടെ പരിഭ്രാന്തരാകരുതെന്ന് ഭരണകൂടത്തിന് ജനങ്ങളോട് പരസ്യമായി അഭ്യര്ത്ഥിക്കേണ്ടി വന്നിരിക്കുകയാണ്. പുടിന്റെ യുദ്ധതന്ത്രങ്ങള്ക്ക് ഒന്നിനു പുറകെ ഒന്നായി ഏല്ക്കുന്ന ഈ പ്രഹരങ്ങളെ ‘ത്രികോണ നാണക്കേട്’ (Triple Humiliation) എന്നാണ് ആഗോള മാധ്യമങ്ങള് വിശേഷിപ്പിക്കുന്നത്.
പ്രതിരോധ മേഖലയിലെ അനിയന്ത്രിതമായ ചെലവുകള് റഷ്യയുടെ ബജറ്റ് കമ്മി (ഡെഫിസിറ്റ്) അപകടകരമായ നിലയിലേക്ക് എത്തിച്ചിരിക്കുകയാണ്. നിലവിലെ സാഹചര്യത്തില് റഷ്യന് സമ്പദ്വ്യവസ്ഥയെ മുന്നോട്ട് കൊണ്ടുപോകണമെങ്കില് പ്രതിരോധച്ചെലവുകളില് കനത്ത വെട്ടിക്കുറയ്ക്കല് വരുത്തണമെന്ന് ധനമന്ത്രി അന്തോണ് സിലുവാനോവ് ഉള്പ്പെടെയുള്ള ഉദ്യോഗസ്ഥര് നിര്ദ്ദേശിച്ചതായാണ് ബ്ലൂംബെര്ഗ് റിപ്പോര്ട്ട് ചെയ്യുന്നത്. ‘നമ്മുടെ റിസര്വുകള് അനന്തമല്ല, ആഗോളതലത്തില് വലിയ മാറ്റങ്ങള് സംഭവിക്കുമ്പോള് സാമ്പത്തികമായി ദുര്ബലപ്പെടുന്നത് അനുവദിക്കാനാകില്ല,’ എന്ന് ധനമന്ത്രി പരസ്യമായി വ്യക്തമാക്കിയത് റഷ്യ നേരിടുന്ന സാമ്പത്തിക പ്രതിസന്ധിയുടെ ആഴം വ്യക്തമാക്കുന്നു.
യുദ്ധച്ചെലവ് ചുരുക്കുന്നതിനെച്ചൊല്ലി റഷ്യന് നയരൂപീകരണ വിദഗ്ദ്ധര്ക്കിടയില് കടുത്ത ഭിന്നതയാണ് ഉടലെടുത്തിരിക്കുന്നത്. പ്രതിരോധച്ചെലവ് വെട്ടിക്കുറയ്ക്കുന്നത് സൈനിക കരാറുകളെ ആശ്രയിച്ചു കഴിയുന്ന ലക്ഷക്കണക്കിന് ബിസിനസ്സുകളെ ബാധിക്കുമെന്നും അത് സമ്പദ്വ്യവസ്ഥയ്ക്ക് കൂടുതല് ആഘാതമുണ്ടാക്കുമെന്നുമാണ് പ്രതിരോധ മന്ത്രാലയത്തിലെ ഉന്നതരും ചില ക്രെംലിന് ഉദ്യോഗസ്ഥരും വാദിക്കുന്നത്. പ്രതിരോധ ബജറ്റില് കൈവെക്കുന്നതിന് മുന്പായി മറ്റ് മേഖലകളില് എവിടെയൊക്കെ തുക കണ്ടെത്താമെന്ന് പരിശോധിക്കാന് പുടിന് ധനമന്ത്രാലയത്തിന് നിര്ദ്ദേശം നല്കിയിട്ടുണ്ട്. ബജറ്റിലെ ഈ കനത്ത സാമ്പത്തിക സമ്മര്ദ്ദങ്ങളെക്കുറിച്ച് കഴിഞ്ഞ വര്ഷം മുതല് പുടിന് കൃത്യമായ വിവരമുണ്ടായിരുന്നെങ്കിലും, പ്രതിസന്ധി ഇത്രത്തോളം രൂക്ഷമാകുമെന്ന് ക്രെംലിന് കണക്കുകൂട്ടിയിരുന്നില്ല.
കഴിഞ്ഞ വര്ഷം ഓഗസ്റ്റില് അലാസ്കയില് വെച്ച് യുഎസ് പ്രസിഡന്റ് ഡൊണാള്ഡ് ട്രംപും വ്ലാഡിമിര് പുടിനും തമ്മില് നടത്തിയ കൂടിക്കാഴ്ചയ്ക്ക് ശേഷം യുദ്ധം അവസാന ഘട്ടത്തിലേക്ക് നീങ്ങുമെന്നായിരുന്നു റഷ്യന് സാമ്പത്തിക വിദഗ്ദ്ധരുടെ കണക്കുകൂട്ടല്. ഈ പ്രതീക്ഷയിലാണ് 2026-ലെ ബജറ്റ് രൂപീകരണ വേളയില് പ്രതിരോധച്ചെലവുകള് കുറയ്ക്കാമെന്ന് അവര് വിചാരിച്ചത്. എന്നാല്, ഈ പ്രതീക്ഷകള് അസ്ഥാനത്താകുകയും യുദ്ധം നീണ്ടുപോകുകയും ചെയ്തതോടെ ബജറ്റ് കമ്മി 3 ട്രില്യണ് റൂബിള്സ് (ഏകദേശം £31 ബില്യണ്) വരെ ഉയര്ന്നേക്കാമെന്നാണ് പുതിയ വിലയിരുത്തല്. ഇതിനിടെ മധ്യപൂര്വേഷ്യയില് പൊട്ടിപ്പുറപ്പെട്ട യുഎസ്-ഇറാന് സംഘര്ഷം മൂലം എണ്ണവില വര്ദ്ധിച്ചെങ്കിലും, അത് റഷ്യന് സമ്പദ്വ്യവസ്ഥയ്ക്ക് താല്ക്കാലിക ആശ്വാസം പോലും നല്കുന്നില്ല. ഘടനാപരമായ തകര്ച്ചയും ബാങ്കിംഗ് പ്രതിസന്ധിയും പരിഹരിക്കാന് എണ്ണവില ബാരലിന് 100 ഡോളറിന് മുകളില് ഒരു വര്ഷമെങ്കിലും തുടരേണ്ടതുണ്ട്.
ഇന്സ്റ്റിറ്റ്യൂട്ട് ഫോര് ദി സ്റ്റഡി ഓഫ് വാര് (ISW) പുറത്തുവിട്ട വിവരങ്ങള് പ്രകാരം യുദ്ധമുന്നണിയില് റഷ്യയ്ക്ക് തുടര്ച്ചയായ രണ്ടാം മാസവും കനത്ത ഭൂപ്രദേശങ്ങള് നഷ്ടമായി. മെയ് മാസത്തില് മാത്രം 282 ചതുരശ്ര കിലോമീറ്റര് (109 ചതുരശ്ര മൈല്) ഭൂപ്രദേശമാണ് യുക്രെയ്ന് സൈന്യം റഷ്യയില് നിന്ന് തിരിച്ചുപിടിച്ചത്. ഏപ്രില്, മെയ് മാസങ്ങളിലായി ആകെ 403 ചതുരശ്ര കിലോമീറ്റര് ഭൂമി യുക്രെയ്ന് തിരിച്ചുപിടിച്ചുകഴിഞ്ഞു. റഷ്യ കൈവശം വെച്ചിരിക്കുന്ന ആകെ ഭൂപ്രദേശവുമായി താരതമ്യം ചെയ്യുമ്പോള് ഇത് ചെറിയൊരു ശതമാനമാണെങ്കിലും, യുദ്ധത്തിന്റെ ഗതി യുക്രെയ്ന് അനുകൂലമായി മാറുന്നു എന്നതിന്റെ കൃത്യമായ സൂചനയാണിത്. യുക്രെയ്ന്റെ ഡ്രോണ് ആക്രമണങ്ങള് റഷ്യന് സൈന്യത്തിന് മുന്നണിയിലേക്ക് ആയുധങ്ങളും സൈനികരെയും എത്തിക്കുന്നതിന് വലിയ തടസ്സമാണ് സൃഷ്ടിക്കുന്നത്.
2014-ല് റഷ്യ നിയമവിരുദ്ധമായി കൂട്ടിച്ചേര്ത്ത ക്രിമിയന് പെനിന്സുലയിലാണ് ഇപ്പോള് യുദ്ധത്തിന്റെ ആഘാതം ജനങ്ങള് നേരിട്ടനുഭവിക്കുന്നത്. റഷ്യന് അധീനതയിലുള്ള പ്രദേശങ്ങളിലെ എണ്ണ ശുദ്ധീകരണ ശാലകള്ക്ക് നേരെ യുക്രെയ്ന് നടത്തുന്ന തുടര്ച്ചയായ ഡ്രോണ് ആക്രമണങ്ങള് ക്രിമിയയിലേക്കുള്ള ഇന്ധന സപ്ലൈ പൂര്ണ്ണമായി തടസ്സപ്പെടുത്തിയിരിക്കുകയാണ്. ഇതോടെ ക്രിമിയന് നഗരങ്ങളിലെ ഗ്യാസ് സ്റ്റേഷനുകളില് കിലോമീറ്ററുകളോളം നീളത്തിലാണ് വാഹനങ്ങളുടെ ക്യൂ പ്രത്യക്ഷപ്പെട്ടിരിക്കുന്നത്. ഏറ്റവും കൂടുതല് ഉപയോഗിക്കപ്പെടുന്ന എഐ-95 (Ai-95) പെട്രോളിന്റെ വില്പ്പനയ്ക്ക് കടുത്ത നിയന്ത്രണങ്ങള് ഏര്പ്പെടുത്തിയിരിക്കുകയാണ്.
ക്രിമിയയിലെ റഷ്യന് അനുകൂല ഗവര്ണ്ണര് സെര്ജി അക്സ്യോനോവിനും സെവാസ്റ്റോപോള് ഗവര്ണ്ണര് മിഖായേല് റസ്വോ ഷായേവിനും ജനങ്ങളോട് പരിഭ്രാന്തരാകരുതെന്ന് ഔദ്യോഗികമായി അഭ്യര്ത്ഥിക്കേണ്ടി വന്നിട്ടുണ്ട്. നിലവില് കൂപ്പണുകള് ഉള്ളവര്ക്ക് മാത്രമേ ഇന്ധനം നല്കുന്നുള്ളൂ. ഇന്ധനത്തിനായി അതിരാവിലെ തന്നെ വരിനില്ക്കേണ്ടതില്ലെന്നും ഇതൊരു താല്ക്കാലിക പ്രതിസന്ധി മാത്രമാണെന്നുമാണ് ഭരണകൂടത്തിന്റെ വിശദീകരണം. എന്നാല് രണ്ട് ദിവസമായി ഇന്ധനം കിട്ടാതെ അലയുകയാണെന്ന് പ്രാദേശിക ജനങ്ങള് സാക്ഷ്യപ്പെടുത്തുന്നു. റഷ്യയുടെ അഭിമാനമായ ബ്ലാക്ക് സീ ഫ്ലീറ്റിന്റെ ആസ്ഥാനമായ സെവാസ്റ്റോപോള് നഗരത്തില് പോലും ഇന്ധനക്ഷാമം രൂക്ഷമായത് പുടിന് ഭരണകൂടത്തിന് വലിയ നാണക്കേടായി മാറിയിട്ടുണ്ട്.
തങ്ങളുടെ ഒരു ഇഞ്ച് ഭൂമി പോലും റഷ്യയ്ക്ക് വിട്ടുനല്കില്ലെന്നും ക്രിമിയ ഉള്പ്പെടെയുള്ള മുഴുവന് പ്രദേശങ്ങളുടെയും പരമാധികാരം യുക്രെയ്ന് തിരിച്ചുപിടിക്കുമെന്നും പ്രസിഡന്റ് വൊളോഡിമിര് സെലന്സ്കി ആവര്ത്തിച്ചു വ്യക്തമാക്കി. റഷ്യന് സൈന്യം ഇപ്പോഴും ചെറുകിട ഗ്രൂപ്പുകളായി യുക്രെയ്ന് അതിര്ത്തികളില് ഒളിച്ചിരുന്ന് ആക്രമണം നടത്താന് ശ്രമിക്കുന്നുണ്ടെങ്കിലും, യുക്രെയ്ന്റെ ആധുനിക ഡ്രോണ് സാങ്കേതികവിദ്യയ്ക്ക് മുന്നില് അവര്ക്ക് പിടിച്ചുനില്ക്കാനാകുന്നില്ല. കഴിഞ്ഞ ദിവസം രാത്രിയിലും റഷ്യ നടത്തിയ മിസൈല്-ഡ്രോണ് ആക്രമണങ്ങളില് 11 യുക്രെയ്ന് പൗരന്മാര് കൊല്ലപ്പെട്ടിരുന്നു. ഈ വ്യോമാക്രമണങ്ങള് തുടരുമ്പോഴും ഭൂമിശാസ്ത്രപരമായി റഷ്യന് സൈന്യം പിന്വാങ്ങേണ്ടി വരുന്നു എന്നതാണ് യാഥാര്ത്ഥ്യം.
യുദ്ധത്തിന്റെ ഭാരത്താല് റഷ്യന് സമ്പദ്വ്യവസ്ഥ സാമ്പത്തിക മാന്ദ്യത്തിന്റെ (Recession) നിഴലിലാണെന്ന് റഷ്യയുടെ ഇക്കണോമി മന്ത്രാലയം തന്നെ സമ്മതിക്കുന്നു. ഈ വര്ഷത്തെ രാജ്യത്തിന്റെ ജിഡിപി വളര്ച്ചാ നിരക്ക് മുന്പ് കണക്കാക്കിയിരുന്ന 1.3 ശതമാനത്തില് നിന്നും വെറും 0.4 ശതമാനമായി മന്ത്രാലയം കുറച്ചു. കഴിഞ്ഞ ഏപ്രിലില് സമ്പദ്വ്യവസ്ഥയുടെ മോശം പ്രകടനത്തെക്കുറിച്ച് പുടിന് ഉദ്യോഗസ്ഥരോട് വിശദീകരണം തേടിയിരുന്നു. പാശ്ചാത്യ രാജ്യങ്ങളുടെ ഉപരോധങ്ങള് കടുക്കുന്നതും റഷ്യയുടെ നാഷണല് വെല്ബീയിങ് ഫണ്ടിലെ ദ്രവീകൃത കരുതല് ശേഖരം (Liquid Reserves) 60 ശതമാനത്തോളം ഇടിഞ്ഞതും റഷ്യയെ കൂടുതല് പ്രതിരോധത്തിലാക്കുന്നുണ്ട്.
ഭരണകൂടം നികുതി വര്ദ്ധനവിലൂടെയും കടുത്ത സാമ്പത്തിക അച്ചടക്കത്തിലൂടെയും ബജറ്റ് കമ്മി നികത്താന് ശ്രമിക്കുന്നുണ്ടെങ്കിലും, യുദ്ധം അനിശ്ചിതമായി നീളുന്നത് റഷ്യയുടെ ആഭ്യന്തര സുസ്ഥിരതയെ ബാധിക്കുമെന്നാണ് അന്താരാഷ്ട്ര നിരീക്ഷകരുടെ വിലയിരുത്തല്. യുദ്ധ മുന്നണിയിലെ പരാജയങ്ങളും ആഭ്യന്തര വിപണിയിലെ തകര്ച്ചയും ഒരുപോലെ നേരിടേണ്ടി വരുന്ന വ്ലാഡിമിര് പുടിന് വരും ദിവസങ്ങളില് കടുത്ത രാഷ്ട്രീയ-സാമ്പത്തിക തീരുമാനങ്ങള് കൈക്കൊള്ളേണ്ടി വരും. യുക്രെയ്ന്റെ പുതിയ പ്രതിരോധ തന്ത്രങ്ങള്ക്ക് മുന്നില് റഷ്യന് സാമ്രാജ്യം എങ്ങനെ പിടിച്ചുനില്ക്കുമെന്നാണ് ഇനി ലോകം ഉറ്റുനോക്കുന്നത്.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
ട്രംപിന്റെ റിസോർട്ടിൽ പുലർച്ചെ അതിക്രമിച്ചു കയറിയ തോക്കുധാരിയെ വധിച്ചു; വൻ ദുരന്തം ഒഴിവായത് തലനാരിഴയ്ക്ക്?
