കൊച്ചി: വി.ഡി. സതീശനെ കേരളത്തിന്റെ പുതിയ മുഖ്യമന്ത്രിയായി പ്രഖ്യാപിച്ചതിന് പിന്നാലെ എറണാകുളം ജില്ലയുടെ വിവിധ ഭാഗങ്ങളിൽ വൻ ആഘോഷപ്രകടനങ്ങൾ അരങ്ങേറുന്നു. സതീശന്റെ നെട്ടൂരിലെ തറവാട് വീടിന് മുന്നിൽ തടിച്ചുകൂടിയ നൂറുകണക്കിന് കോൺഗ്രസ് പ്രവർത്തകർ മുദ്രാവാക്യം വിളിച്ചും പടക്കം പൊട്ടിച്ചും ആഹ്ലാദം പങ്കുവെക്കുന്നു. സതീശന്റെ ജന്മനാടായ നെട്ടൂരിന് പുറമെ എറണാകുളം നോർത്ത്, മൂവാറ്റുപുഴ, കോതമംഗലം, കൊച്ചി നഗരത്തിന്റെ വിവിധ ഭാഗങ്ങൾ എന്നിവിടങ്ങളിലും മധുരപലഹാരങ്ങൾ വിതരണം ചെയ്തും പ്രകടനങ്ങൾ നടത്തിയും പ്രവർത്തകർ വിജയം ആഘോഷിക്കുകയാണ്. വരാനിരിക്കുന്ന തിങ്കളാഴ്ച കേരളത്തിന്റെ പതിനാറാമത് മുഖ്യമന്ത്രിയായി വി.ഡി. സതീശൻ സത്യപ്രതിജ്ഞ ചെയ്ത് അധികാരമേൽക്കും.
ശബരിമലയെ ‘ഉരുക്കിയ’ സ്വര്ണ്ണ മാഫിയ; തങ്കപ്പാളികള് കടത്തിയത് ദേവസ്വം ഉന്നതരുടെ ഒത്താശയോടെ; പാപം തീര്ക്കാന് വീണ്ടും സ്വര്ണ്ണം പൂശുന്ന വിചിത്ര രീതി; അസുഖം പറഞ്ഞ് ശങ്കര്ദാസിനെ പോലീസ് രക്ഷിക്കുമോ?
കോൺഗ്രസിനുള്ളിലെ ഗ്രൂപ്പ് സമവാക്യങ്ങളെയും നീണ്ട രാഷ്ട്രീയ ചർച്ചകളെയും അപ്രസക്തമാക്കിയാണ് കേരളത്തിന്റെ നായകനായി വി.ഡി. സതീശൻ തിരഞ്ഞെടുക്കപ്പെട്ടത്. പതിനൊന്ന് ദിവസം നീണ്ടുനിന്ന അനിശ്ചിതത്വങ്ങൾക്കും കാത്തിരിപ്പിനും വിരാമമിട്ട് എഐസിസി ആസ്ഥാനത്ത് നടന്ന വാർത്താസമ്മേളനത്തിൽ ഹൈക്കമാൻഡ് പ്രതിനിധി ദീപാദാസ് മുൻഷിയാണ് ഈ പ്രഖ്യാപനം നടത്തിയത്. കഴിഞ്ഞ അഞ്ച് വർഷക്കാലം പ്രതിപക്ഷ നേതാവെന്ന നിലയിൽ നിയമസഭയ്ക്കകത്തും പുറത്തും സർക്കാരിനെതിരെ അദ്ദേഹം നടത്തിയ വിട്ടുവീഴ്ചയില്ലാത്ത പോരാട്ടങ്ങൾക്കുള്ള അംഗീകാരമായാണ് ഈ പുതിയ പദവിയെ രാഷ്ട്രീയ കേരളം വിലയിരുത്തുന്നത്. താഴെത്തട്ടിലെ സാധാരണക്കാരായ പ്രവർത്തകരുടെ വികാരവും പൊതുസമൂഹത്തിൽ അദ്ദേഹത്തിന് ലഭിച്ച വലിയ സ്വീകാര്യതയും കണക്കിലെടുത്താണ് ഹൈക്കമാൻഡ് ഈ നിർണ്ണായക തീരുമാനമെടുത്തത്.
ഭൂരിഭാഗം എംഎൽഎമാരുടെ പിന്തുണ കെ.സി. വേണുഗോപാലിനായിരുന്നുവെങ്കിലും, ജനവികാരവും യുഡിഎഫിലെ ഘടകകക്ഷികളുടെ ഉറച്ച പിന്തുണയും സതീശന് തുണയായി മാറുകയായിരുന്നു. മുൻ കെപിസിസി അധ്യക്ഷന്മാരുൾപ്പെടെയുള്ള മുതിർന്ന നേതാക്കളുടെ നിലപാടും സതീശന് അനുകൂലമായതോടെ ഹൈക്കമാൻഡിന് മുന്നിൽ മറ്റ് വഴികളില്ലാതായി. എന്നാൽ അധികാരം ഏറ്റെടുക്കുമ്പോൾ പാർട്ടിയിലെ വിഭാഗീയതയും രമേശ് ചെന്നിത്തല അടക്കമുള്ള മുതിർന്ന നേതാക്കളുടെ അതൃപ്തിയും പരിഹരിച്ച് എല്ലാവരെയും ഒന്നിച്ച് കൊണ്ടുപോവുക എന്നതാകും സതീശൻ നേരിടുന്ന ഏറ്റവും വലിയ രാഷ്ട്രീയ വെല്ലുവിളി. എറണാകുളം ജില്ലയിൽ നിന്നുള്ള ഒരു നേതാവ് മുഖ്യമന്ത്രി പദവിയിലെത്തുന്നതിന്റെ വലിയ ആവേശത്തിലാണ് ജില്ലയിലെ യുഡിഎഫ് പ്രവർത്തകർ.
‘പോടാ പുല്ലേ’ പ്രയോഗം അതിരുവിട്ടു; മേയര് പദവിയില് വാഗ്ദാന ലംഘനം; ബിജെപി നേതൃത്വത്തിനെതിരെ ആഞ്ഞടിച്ച് ആര്. ശ്രീലേഖ; തുറന്നുപറച്ചിലില് കടുപ്പിച്ച് ആര് എസ് എസ്; നിയമസഭയില് സീറ്റുണ്ടാകില്ല
