കൊല്ലം: പാലരുവി എക്സ്പ്രസ്സില് ആറുവയസ്സുകാരിക്ക് നേരെ നടന്ന അതിക്രൂരമായ ലൈംഗികാതിക്രമം പുറംലോകമറിഞ്ഞത് വീണ എന്ന യുവതിയുടെ അസാമാന്യമായ ധൈര്യവും ജാഗ്രതയും കൊണ്ട് മാത്രമാണ്. കൊട്ടാരക്കര കോട്ടാത്തല വിപിന് ഭവനില് വി.എസ്. വീണ (34) പകര്ത്തിയ മൊബൈല് വീഡിയോ ഇപ്പോള് പ്രതി സാനിഷിനെതിരെയുള്ള ഏറ്റവും നിര്ണ്ണായകമായ തെളിവായി മാറിയിരിക്കുകയാണ്. ഉറക്കമില്ലാത്ത ആ രാത്രിയില് വീണ കാട്ടിയ ജാഗ്രത ഒരു പിഞ്ചുബാലികയുടെ ജീവിതമാണ് രക്ഷിച്ചത്.
കൊട്ടാരക്കരയില് നിന്ന് ട്രെയിനില് കയറിയപ്പോള് മുതല് സാനിഷിന്റെ പെരുമാറ്റത്തില് അസ്വാഭാവികത ഉണ്ടായിരുന്നുവെന്ന് വീണ പറയുന്നു. മൂന്നുപേര്ക്ക് ഇരിക്കാവുന്ന സീറ്റില് സൗകര്യമൊരുക്കി നല്കി വീണയെ അരികിലേക്ക് വിളിച്ച സാനിഷ്, ട്രെയിന് തെന്മല എത്തിയപ്പോള് വീണയുടെ കാലില് അസ്വാഭാവികമായി സ്പര്ശിച്ചു. ഇത് ചോദ്യം ചെയ്ത വീണ പിന്നീട് ഉറങ്ങാന് തയ്യാറായില്ല. ഈ ജാഗ്രതയാണ് പുലര്ച്ചെ ഒന്നേമുക്കാലോടെ നടന്ന ക്രൂരതയുടെ സാക്ഷിയാകാന് വീണയെ പ്രാപ്തയാക്കിയത്.
ട്രെയിനിലെ യാത്രക്കാരെല്ലാം ഉറക്കത്തിലായ സമയം നോക്കിയാണ് സാനിഷ് തന്റെ ക്രൂരകൃത്യം ആസൂത്രണം ചെയ്തത്. മുത്തച്ഛനൊപ്പം തറയില് ഉറങ്ങിക്കിടന്ന ആറുവയസ്സുകാരിയെ ബെഡ്ഷീറ്റോടെ എടുത്തുകൊണ്ടുവന്ന സാനിഷ് തന്റെ സീറ്റിലിരുത്തി ഉപദ്രവിക്കാന് തുടങ്ങി. ബെഡ്ഷീറ്റ് ഉപയോഗിച്ച് മറച്ചുവെച്ച് കുഞ്ഞിനെ പീഡിപ്പിക്കുന്നത് ശ്രദ്ധയില്പ്പെട്ട വീണ, ഒട്ടും പരിഭ്രമിക്കാതെ തന്റെ മൊബൈല് ഫോണില് ദൃശ്യങ്ങള് പകര്ത്തി. ഈ വീഡിയോ സാനിഷിന് ഇനിയൊരിക്കലും നിയമത്തിന് മുന്നില് നിന്ന് രക്ഷപ്പെടാന് കഴിയാത്ത വിധം കുരുക്കായി മാറിയിരിക്കുകയാണ്.
കുട്ടി സാനിഷിന്റേതല്ലെന്ന് ഉറപ്പുവരുത്തിയ വീണ ഉടന് തന്നെ ബഹളം വെക്കുകയും സഹയാത്രികരെ ഉണര്ത്തുകയും ചെയ്തു. ഉറക്കമുണര്ന്ന കുട്ടിയുടെ രക്ഷിതാക്കള് സാനിഷിനെ അറിയില്ലെന്ന് വ്യക്തമാക്കിയതോടെയാണ് അതിക്രമത്തിന്റെ ആഴം പുറത്തുവന്നത്. ആദ്യം കുറ്റം നിഷേധിക്കാന് സാനിഷ് ശ്രമിച്ചെങ്കിലും, വീണ പകര്ത്തിയ വീഡിയോ ദൃശ്യങ്ങള് കാണിച്ചതോടെ പ്രതിക്ക് മറുപടിയില്ലാതായി. റെയില്വേ പോലീസിന് വീണ ഉടന് തന്നെ ഈ വീഡിയോ കൈമാറുകയും ചെയ്തു.
പാലരുവി എക്സ്പ്രസ്സിലെ ആ രാത്രിയില് വീണ എന്ന യുവതി കാണിച്ച ആര്ജ്ജവം കേരളക്കരയാകെ ഏറ്റെടുത്തിരിക്കുകയാണ്. സ്വന്തം സുരക്ഷ പോലും നോക്കാതെ, പ്രതികരിക്കാന് കാണിച്ച ആ മനസ്സ് ഒരു കുഞ്ഞിന്റെ ജീവനും മാനവുമാണ് കാത്തത്. സാനിഷിനെതിരെ ശക്തമായ പോക്സോ വകുപ്പുകള് ചുമത്തി പോലീസ് കേസെടുത്തിട്ടുണ്ട്. വീണ നല്കിയ മൊഴിയിന്മേലും വീഡിയോ ദൃശ്യങ്ങളുടെ അടിസ്ഥാനത്തിലും പ്രതിക്ക് കഠിനശിക്ഷ തന്നെ ലഭിക്കുമെന്നാണ് നിയമവിദഗ്ധര് ചൂണ്ടിക്കാട്ടുന്നത്.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
കൊച്ചിയിലെ ആഡംബര ലഹരിവേട്ട കസ്റ്റംസ് ഏറ്റെടുക്കുന്നു; മയക്കുമരുന്ന് എത്തിയത് വിദേശത്തുനിന്ന്; ഷാജി ഫെര്ണാണ്ടോയുടെ ക്രൂയിസ് പാര്ട്ടി ബന്ധങ്ങള് പുറത്ത്; അന്വേഷണം അന്താരാഷ്ട്ര തലത്തിലേക്ക്
