തിരുവനന്തപുരം: യുഡിഎഫ് സര്ക്കാര് അധികാരമേല്ക്കുന്നതോടെ സംസ്ഥാനത്തെ ഉന്നത ഉദ്യോഗസ്ഥതലത്തില് അപ്രതീക്ഷിതമായ അഴിച്ചുപണികള്ക്ക് കളമൊരുങ്ങുന്നു. ഐഎഎസ്, ഐപിഎസ് തലങ്ങളില് വന് മാറ്റങ്ങള് വരുത്തിക്കൊണ്ട് ഭരണയന്ത്രം അടിമുടി പരിഷ്കരിക്കാനാണ് പുതിയ നീക്കം. ഇതില് ഏറ്റവും നിര്ണ്ണായകമാകുന്നത് മുതിര്ന്ന ഐപിഎസ് ഉദ്യോഗസ്ഥന് യോഗേഷ് ഗുപ്തയുടെ മടങ്ങിവരവാണ്. പിണറായി സര്ക്കാരിന്റെ കാലത്ത് അപ്രധാന തസ്തികയിലേക്ക് മാറ്റപ്പെട്ട ഗുപ്തയെ വിജിലന്സ് മേധാവിയായി തിരികെ കൊണ്ടുവരാനാണ് യുഡിഎഫ് ആലോചിക്കുന്നത്.
യോഗേഷ് ഗുപ്ത വിജിലന്സ് തലപ്പത്തെത്തുന്നത് മുന് മുഖ്യമന്ത്രി പിണറായി വിജയന് ഉള്പ്പെടെയുള്ള ഇടത് നേതാക്കള്ക്ക് വലിയ തിരിച്ചടിയാകും. കഴിഞ്ഞ സര്ക്കാരിന്റെ കാലത്ത് ഒതുക്കിത്തീര്ത്ത അഴിമതി കേസുകള് വീണ്ടും സജീവമാക്കാനും പുതിയ അന്വേഷണങ്ങള് ആരംഭിക്കാനും ഇത് വഴിവെക്കും. അഴിമതിക്കെതിരെ വിട്ടുവീഴ്ചയില്ലാത്ത നിലപാടുകാരനായ ഗുപ്തയുടെ മടങ്ങിവരവ് വരുംദിവസങ്ങളില് കേരള രാഷ്ട്രീയത്തില് വലിയ ചലനങ്ങള് സൃഷ്ടിക്കുമെന്നുറപ്പാണ്. ആഭ്യന്തരമന്ത്രി ആരെന്നതും നിര്ണ്ണായകമാകും.
നിലവിലെ പോലീസ് മേധാവി രവഡാ ചന്ദ്രശേഖറിനെ കാലാവധി തീരും വരെ തുടരാന് അനുവദിക്കാനാണ് സര്ക്കാരിന്റെ തീരുമാനം. എന്നാല് ചീഫ് സെക്രട്ടറി ഡോ. എ. ജയതിലകിനെതിരെ നിരവധി ആരോപണങ്ങള് ഉയര്ന്നിട്ടുള്ള സാഹചര്യത്തില് അദ്ദേഹത്തിന്റെ കാര്യത്തില് ഹൈക്കമാന്ഡും പുതിയ സര്ക്കാരും അതൃപ്തിയിലാണ്. ജൂണില് അദ്ദേഹം വിരമിക്കുമ്പോള് കേന്ദ്ര ഡെപ്യൂട്ടേഷനിലുള്ള മനോജ് ജോഷിയെ ചീഫ് സെക്രട്ടറിയാക്കി കൊണ്ടുവരാനാണ് നീക്കം. ആഭ്യന്തര സെക്രട്ടറി ബിശ്വനാഥ് സിന്ഹയെയും പദവിയില് നിന്ന് മാറ്റിയേക്കും.
ഇടതുപക്ഷ സര്ക്കാരിനോട് കടുത്ത വിയോജിപ്പ് പുലര്ത്തിയിരുന്നതും എന്നാല് പ്രഗത്ഭരുമായ ഉദ്യോഗസ്ഥരെ താക്കോല് സ്ഥാനങ്ങളില് പ്രതിഷ്ഠിക്കാനാണ് മുഖ്യമന്ത്രിയും പുതിയ മന്ത്രിസഭയും ലക്ഷ്യമിടുന്നത്. ഇതിന്റെ ഭാഗമായി ഇന്റലിജന്സ് മേധാവി പി. വിജയനെ ക്രമസമാധാന ചുമതലയുള്ള എഡിജിപിയാക്കും. നിലവില് ക്രൈംബ്രാഞ്ച് മേധാവിയുടെ അധിക ചുമതല വഹിക്കുന്ന എച്ച്. വെങ്കടേഷിന് പകരം പുതിയ നിയമനം നടക്കും.
സസ്പെന്ഷനിലുള്ള പ്രിന്സിപ്പല് സെക്രട്ടറി ഡോ. ബി. അശോക്, എന്. പ്രശാന്ത് എന്നിവരെ ഉടന് തിരിച്ചെടുക്കുമെന്നും ഇവര്ക്ക് മികച്ച തസ്തികകള് നല്കുമെന്നും സൂചനയുണ്ട്. കഴിഞ്ഞ സര്ക്കാരിന്റെ കാലത്ത് കേന്ദ്ര ഡെപ്യൂട്ടേഷനിലേക്ക് പോയ പല ഉദ്യോഗസ്ഥരും പുതിയ സര്ക്കാരിന് കീഴില് പ്രവര്ത്തിക്കാന് താല്പ്പര്യം പ്രകടിപ്പിച്ചു മടങ്ങിയെത്തും. ഇതോടെ സെക്രട്ടേറിയറ്റിലും പോലീസ് ആസ്ഥാനത്തും വന് മാറ്റങ്ങള് ദൃശ്യമാകും.
വകുപ്പ് മേധാവിമാര്, ജില്ലാ കളക്ടര്മാര്, ജില്ലാ പോലീസ് മേധാവികള് എന്നിവരെ പൂര്ണ്ണമായും മാറ്റാനാണ് ആഭ്യന്തര വകുപ്പിന്റെ തീരുമാനം. ഇടത് പക്ഷത്തോട് ആഭിമുഖ്യം പുലര്ത്തുന്ന ഉദ്യോഗസ്ഥരെ ഫീല്ഡ് പോസ്റ്റിംഗുകളില് നിന്ന് നീക്കി ലൂപ്പ് ലൈന് തസ്തികകളിലേക്ക് മാറ്റും. ഭരണത്തിന്റെ തുടക്കത്തില് തന്നെ ഉദ്യോഗസ്ഥതലത്തില് ശുദ്ധീകരണം നടത്തി ജനവിശ്വാസം ആര്ജ്ജിക്കാനാണ് പുതിയ സര്ക്കാരിന്റെ പ്ലാന്.
പോലീസ് സേനയിലെ രാഷ്ട്രീയവല്ക്കരണം അവസാനിപ്പിക്കുക എന്നതാണ് ആഭ്യന്തര വകുപ്പിന് മുന്നിലുള്ള പ്രധാന വെല്ലുവിളി. ഇതിനായി കര്ക്കശക്കാരായ ഐപിഎസ് ഉദ്യോഗസ്ഥരെ ജില്ലാ തലപ്പത്ത് വിന്യസിക്കും. ഉദ്യോഗസ്ഥര്ക്കിടയിലെ വിഭാഗീയത അവസാനിപ്പിക്കാന് ഡെപ്യൂട്ടേഷന് കഴിഞ്ഞ് മടങ്ങിയെത്തുന്നവര്ക്ക് മുന്ഗണന നല്കും.
ഭരണകൂടം മാറുമ്പോള് ഉദ്യോഗസ്ഥര് മാറുന്നത് സ്വാഭാവികമാണെങ്കിലും, ഇത്തവണത്തെ മാറ്റം കൃത്യമായ രാഷ്ട്രീയ ലക്ഷ്യങ്ങളോടെയുള്ളതാണ്. മുന് സര്ക്കാരിന്റെ കാലത്തെ വഴിവിട്ട തീരുമാനങ്ങളും അഴിമതികളും വെളിച്ചത്തുകൊണ്ടുവരാന് പ്രാപ്തിയുള്ളവരെയാണ് അന്വേഷണ ഏജന്സികളുടെ തലപ്പത്ത് നിയമിക്കുന്നത്. ഇത് ഭരണപക്ഷത്തിന് കരുത്തും പ്രതിപക്ഷത്തിന് നെഞ്ചിടിപ്പും നല്കുന്ന ഒന്നാണ്.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
ഐജി കാളിരാജ് മഹേഷ് കുമാർ പുതിയ കൊച്ചി കമ്മീഷണർ; ഹരിശങ്കർ അവധിയിൽ
