ആദിത്യന്റേത് കൊലപാതകമോ? കേസ് ഒതുക്കാന്‍ രാഷ്ട്രീയ നീക്കം; നീതി അകലുന്നു, ദുരൂഹതയൊഴിയാതെ ബംഗളൂരു മരണം

തിരുവനന്തപുരം: നെടുമങ്ങാട്ടെ ഒരു സാധാരണ കുടുംബത്തിന്റെ പ്രതീക്ഷകളാണ് ബംഗളൂരുവിലെ നഴ്‌സിംഗ് കോളേജ് ഹോസ്റ്റലില്‍ ഒരു മുഴം കയറില്‍ ഒടുങ്ങിയത്. അരുവിക്കര സ്വദേശി ആദിത്യന്റെ മരണം ആത്മഹത്യയാണെന്ന് കോളേജ് അധികൃതര്‍ ഉറപ്പിച്ചു പറയുമ്പോഴും, കുടുംബം ഉന്നയിക്കുന്ന ഗൗരവകരമായ ആരോപണങ്ങള്‍ വിരല്‍ ചൂണ്ടുന്നത് വലിയൊരു ഗൂഢാലോചനയിലേക്കാണ്. രാഷ്ട്രീയ സ്വാധീനമുപയോഗിച്ച് കേസ് അട്ടിമറിക്കപ്പെടുമെന്ന ഭയത്തിലാണ് ഈ നിര്‍ദ്ധന കുടുംബം ഇപ്പോള്‍ കഴിയുന്നത്. കര്‍ണാടക ഉപമുഖ്യമന്ത്രി ഡി.കെ. ശിവകുമാറിന്റെ ബന്ധുവിന്റെ ഉടമസ്ഥതയിലുള്ളതാണ് കോളേജ് എന്ന വസ്തുത പുറത്തു വന്നതോടെ, അന്വേഷണം വഴിമുട്ടുമോ എന്ന ആശങ്ക ശക്തമായിരിക്കുകയാണ്.

‘അവന്‍ ഒരിക്കലും മയക്കുമരുന്ന് ഉപയോഗിക്കില്ല,’ ആദിത്യന്റെ സഹോദരന്‍ ദേവന്റെ വാക്കുകളില്‍ ഉറച്ച വിശ്വാസമുണ്ട്. ആദിത്യനെ മയക്കുമരുന്ന് കേസില്‍ കുടുക്കുമെന്ന അധ്യാപകന്‍ സന്ദീപ് പാണ്ഡെയുടെ ഭീഷണിയാണ് മരണത്തിന് പിന്നിലെന്ന് കുടുംബം ഉറച്ചു വിശ്വസിക്കുന്നു. കോളേജിലെ മയക്കുമരുന്ന് മാഫിയയെക്കുറിച്ചുള്ള വിവരങ്ങള്‍ നല്‍കാന്‍ ആദിത്യന് മേല്‍ കടുത്ത സമ്മര്‍ദ്ദമുണ്ടായിരുന്നു. വിവരം നല്‍കിയില്ലെങ്കില്‍ ആദിത്യനെ പ്രതിയാക്കുമെന്നായിരുന്നു ഭീഷണി. സന്ദീപ് പാണ്ഡെയില്‍ നിന്ന് സമാനമായ പീഡനം നേരിട്ട് പഠനം പാതിവഴിയില്‍ ഉപേക്ഷിച്ച മറ്റ് വിദ്യാര്‍ത്ഥികളും ഉണ്ടെന്ന വെളിപ്പെടുത്തല്‍ അധ്യാപകന്റെ ക്രൂരതയ്ക്ക് തെളിവായി കുടുംബം ഉയര്‍ത്തിക്കാട്ടുന്നു.

മരണത്തിന് പിന്നാലെ കോളേജ് മാനേജ്മെന്റ് സ്വീകരിച്ച നടപടികള്‍ ദുരൂഹത വര്‍ദ്ധിപ്പിക്കുന്നു. ആദിത്യന്റെ മരണവിവരം പുറംലോകം അറിയാതിരിക്കാനും സഹപാഠികള്‍ സത്യം പറയാതിരിക്കാനും എല്ലാവരുടെയും മൊബൈല്‍ ഫോണുകള്‍ കോളേജ് അധികൃതര്‍ പിടിച്ചുവെച്ചു. നാല് പേര്‍ താമസിക്കുന്ന മുറിയില്‍ നിന്ന് മാറി, തൊട്ടടുത്തുള്ള ചെറിയ മുറിയില്‍ ആദിത്യന്‍ എങ്ങനെ എത്തിയെന്നതിനും കൃത്യമായ മറുപടിയില്ല. ആത്മഹത്യയെന്ന് വരുത്തിത്തീര്‍ക്കാന്‍ ഹോസ്റ്റല്‍ മുറി അകത്തുനിന്ന് പൂട്ടിയതാണെന്ന കെട്ടിച്ചമച്ച കഥയാണ് മാനേജ്മെന്റ് പ്രചരിപ്പിക്കുന്നതെന്ന് കുടുംബം ആരോപിക്കുന്നു.

നീതി നടപ്പിലാക്കേണ്ട നിയമപാലകരുടെ നിലപാടും ഈ കേസില്‍ സംശയനിഴലിലാണ്. ഹെബ്ബാഗോടി പോലീസ് കുടുംബത്തിന്റെ പരാതി സ്വീകരിക്കാന്‍ ആദ്യം തയ്യാറായില്ല. കോളേജ് ഉടമയുടെ രാഷ്ട്രീയ സ്വാധീനത്തിന് മുന്നില്‍ പോലീസ് മുട്ടുമടക്കിയെന്നാണ് ഇതില്‍ നിന്ന് വ്യക്തമാകുന്നത്. ഒടുവില്‍ അഭിഭാഷകന്‍ വഴി സമ്മര്‍ദ്ദം ചെലുത്തിയപ്പോള്‍ മാത്രമാണ് പരാതി വാങ്ങാന്‍ പോലും പോലീസ് തയ്യാറായത്. എന്നാല്‍, എഫ്.ഐ.ആര്‍ രജിസ്റ്റര്‍ ചെയ്തതല്ലാതെ അധ്യാപകനെയോ കോളേജ് അധികൃതരെയോ ചോദ്യം ചെയ്യാനോ മറ്റ് തുടര്‍നടപടികള്‍ സ്വീകരിക്കാനോ പോലീസ് ഇതുവരെ തയ്യാറായിട്ടില്ല.

പെയിന്റിങ് തൊഴിലാളിയായ പ്രദീപ് കുമാറിന്റെയും അശ്വതിയുടെയും മകനായ ആദിത്യന്‍, ദാരിദ്ര്യത്തോടു പടവെട്ടിയാണ് നഴ്‌സിംഗ് പഠനത്തിനായി ബംഗളൂരുവിലെത്തിയത്. മയക്കുമരുന്ന് എന്ന വ്യാജ ആരോപണം ഉന്നയിച്ച് ഒരു ദളിത് വിദ്യാര്‍ത്ഥിയെ മാനസികമായി തകര്‍ക്കുകയും മരണത്തിലേക്ക് തള്ളിയിടുകയും ചെയ്തത് ആസൂത്രിതമായ നീക്കമാണെന്ന് സംശയിക്കേണ്ടിയിരിക്കുന്നു. സമാനമായ രീതിയില്‍ കണ്ണൂര്‍ അഞ്ചരക്കണ്ടിയിലെ ബി.ഡി.എസ് വിദ്യാര്‍ത്ഥി നിധിന്‍രാജ് മരിച്ചതും ഇതേ പ്രദേശത്താണെന്നത് വിദ്യാര്‍ത്ഥികള്‍ നേരിടുന്ന അരക്ഷിതാവസ്ഥയുടെ ആഴം വ്യക്തമാക്കുന്നു.

കേരളത്തിന് പുറത്ത് പഠിക്കാന്‍ പോകുന്ന മലയാളി വിദ്യാര്‍ത്ഥികള്‍ക്ക് നീതി ഉറപ്പാക്കാന്‍ സംസ്ഥാന സര്‍ക്കാര്‍ ഇടപെടണമെന്ന ആവശ്യം ശക്തമാണ്. രാഷ്ട്രീയ ബന്ധങ്ങളും പണക്കൊഴുപ്പും ഉപയോഗിച്ച് ആദിത്യന്റെ മരണം വെറുമൊരു ആത്മഹത്യയായി ഫയലുകളില്‍ ഒടുങ്ങാന്‍ അനുവദിക്കില്ലെന്ന നിലപാടിലാണ് കുടുംബം. ബംഗളൂരുവിലെ ലഹരി മാഫിയയും കോളേജ് അധികൃതരും തമ്മിലുള്ള അവിശുദ്ധ കൂട്ടുകെട്ടാണോ ആദിത്യന്റെ ജീവനെടുത്തത് എന്ന കാര്യത്തില്‍ നിഷ്പക്ഷമായ ഒരന്വേഷണം നടന്നാല്‍ മാത്രമേ സത്യം പുറത്തുവരികയുള്ളൂ. നീതി നിഷേധിക്കപ്പെട്ട ഈ കുടുംബത്തിന് മുന്നില്‍ ഇനി പോരാട്ടത്തിന്റെ നാളുകളാണ്.