ടെഹ്റാൻ: ലോകവ്യാപകമായി എണ്ണവ്യാപാരത്തിന്റെ ജീവനാഡിയായ ഹോർമുസ് കടലിടുക്ക് വാണിജ്യ കപ്പലുകൾക്കായി വീണ്ടും തുറന്നുകൊടുക്കുന്നതായി ഇറാൻ വിദേശകാര്യ മന്ത്രി അബ്ബാസ് അരാഗ്ചി ഔദ്യോഗികമായി അറിയിച്ചു. ഇസ്രായേലും ലെബനനും തമ്മിലുള്ള പത്തുദിവസത്തെ വെടിനിർത്തൽ പ്രാബല്യത്തിൽ വന്ന ആദ്യ ദിനമായ വെള്ളിയാഴ്ചയാണ് (ഇന്നലെ) ഈ സുപ്രധാന പ്രഖ്യാപനം ഉണ്ടായത്. കഴിഞ്ഞ ഫെബ്രുവരി 28-ന് അമേരിക്കയും ഇസ്രായേലും ഇറാനെതിരെ നടത്തിയ സൈനിക നീക്കത്തെത്തുടർന്നായിരുന്നു തന്ത്രപ്രധാനമായ ഈ എണ്ണക്കടത്തുപാത ഇറാൻ അടച്ചത്. എന്നാൽ കടലിടുക്ക് തുറന്നുവെങ്കിലും കപ്പലുകൾക്ക് കർശനമായ നിബന്ധനകൾ ഇറാൻ ഏർപ്പെടുത്തിയിട്ടുണ്ട്.
ഇറാൻ കത്തുന്നു! ടെഹ്റാനിൽ മാത്രം 200 മരണം; യുവജനങ്ങളെ വെടിവെച്ചിട്ട് ഭരണകൂടം; ഇന്റർനെറ്റും ഫോണും നിശ്ചലം
സുരക്ഷാ കാരണങ്ങളാൽ നിർദ്ദേശിക്കപ്പെട്ട പ്രത്യേക പാതകളിലൂടെ മാത്രമേ കപ്പലുകൾ സഞ്ചരിക്കാവൂ എന്നതാണ് പ്രധാന നിർദ്ദേശം. അമേരിക്കയും ഇറാനും തമ്മിലുള്ള താൽക്കാലിക വെടിനിർത്തൽ കരാർ ഏപ്രിൽ 22-ന് അവസാനിക്കാനിരിക്കെയാണ് ഇറാന്റെ ഈ നീക്കം എന്നത് ആഗോളതലത്തിൽ വലിയ പ്രാധാന്യത്തോടെയാണ് നോക്കിക്കാണുന്നത്.
ഇറാന്റെ ഈ തീരുമാനത്തെ സ്വാഗതം ചെയ്തുകൊണ്ട് അമേരിക്കൻ പ്രസിഡന്റ് ഡൊണാൾഡ് ട്രംപ് രംഗത്തെത്തി. ലോകത്തിന് തന്നെ അഭിമാനകരമായ ദിവസമാണിതെന്ന് വിശേഷിപ്പിച്ച ട്രംപ്, തന്ത്രപ്രധാനമായ ഈ ജലപാത ഇനി ഒരിക്കലും അടയ്ക്കില്ലെന്ന് ഇറാൻ സമ്മതിച്ചതായി സോഷ്യൽ മീഡിയയിലൂടെ അവകാശപ്പെട്ടു. എങ്കിലും ഇറാനിയൻ തുറമുഖങ്ങളിൽ അമേരിക്ക ഏർപ്പെടുത്തിയിട്ടുള്ള നാവിക ഉപരോധം സമാധാന കരാർ ഉണ്ടാകുന്നത് വരെ തുടരുമെന്ന് അദ്ദേഹം വ്യക്തമാക്കിയിട്ടുണ്ട്. അതേസമയം കടലിടുക്കിലൂടെയുള്ള യാത്ര നിലവിൽ എത്രത്തോളം സുരക്ഷിതമാണെന്ന് അന്താരാഷ്ട്ര സമുദ്ര സുരക്ഷാ ഏജൻസികൾ സൂക്ഷ്മമായി പരിശോധിച്ചുവരികയാണ്. കപ്പലുകളുടെ നീക്കം നിലവിൽ വളരെ കുറഞ്ഞ തോതിൽ മാത്രമാണ് റിപ്പോർട്ട് ചെയ്യപ്പെടുന്നത്.
ഇറാന്റെ ‘ബ്ലാക്ക് മെയിലിംഗിന്’ വഴങ്ങില്ല; സമാധാന ചര്ച്ചകള്ക്കിടയിലും നിലപാട് കടുപ്പിച്ച് ട്രംപ്; ആണവ കരാറിലും കടലിടുക്ക് അവകാശത്തിലും ഭിന്നത; വിദേശകാര്യ മന്ത്രിയുടെ ട്വീറ്റ് തള്ളി ഇറാന് സൈന്യം; ഉപരോധം മാറാതെ പാത തുറക്കില്ല; ആഗോള എണ്ണ വിപണി സ്തംഭനത്തില്; വെടിനിര്ത്തല് കാലാവധി തീരാന് ദിവസങ്ങള് മാത്രം
ഇറാന്റെ ഭരണകൂടത്തിനുള്ളിൽ തന്നെ ഈ വിഷയത്തിൽ വ്യത്യസ്തമായ അഭിപ്രായങ്ങൾ ഉയരുന്നുണ്ട് എന്നത് ശ്രദ്ധേയമാണ്. വിദേശകാര്യ മന്ത്രിയുടെ പ്രഖ്യാപനത്തിന് ഇസ്ലാമിക് റെവല്യൂഷണറി ഗാർഡ് കോർപ്സ് (IRGC) പരിമിതമായ പിന്തുണ മാത്രമാണ് നൽകിയിട്ടുള്ളത്. അമേരിക്കയുടെ ഉപരോധം തുടരുകയാണെങ്കിൽ ഹോർമുസ് കടലിടുക്ക് അധികകാലം തുറന്നിടില്ലെന്ന് ഇറാന്റെ പാർലമെന്ററി സ്പീക്കർ മുഹമ്മദ് ബാഗർ ഗാലിബാഫ് പിന്നീട് മുന്നറിയിപ്പ് നൽകി.
കടലിടുക്ക് തുറക്കുന്നതും നിയന്ത്രിക്കുന്നതും യുദ്ധക്കളത്തിലെ സാഹചര്യങ്ങൾക്കനുസരിച്ചായിരിക്കുമെന്നും അല്ലാതെ സോഷ്യൽ മീഡിയയിലെ പ്രഖ്യാപനങ്ങൾ വഴിയല്ലെന്നും ട്രംപിനെ ലക്ഷ്യം വെച്ചുകൊണ്ട് അദ്ദേഹം കൂട്ടിച്ചേർത്തു. ഇറാന്റെ ആഭ്യന്തര രാഷ്ട്രീയത്തിലെ ഈ ഭിന്നതകൾ ഹോർമുസ് കടലിടുക്കിന്റെ സുരക്ഷയിൽ വരുംദിവസങ്ങളിൽ എന്ത് മാറ്റമുണ്ടാക്കുമെന്ന ആശങ്കയിലാണ് ആഗോള വിപണി.
