തിരുവനന്തപുരം: പത്തനംതിട്ടയുടെ രാഷ്ട്രീയ ഹൃദയമായ ആറന്മുളയില് ഇടതുമുന്നണിയുടെ ഉരുക്കുകോട്ട തകര്ത്തത് വെറുമൊരു രാഷ്ട്രീയ തരംഗമല്ല, മറിച്ച് ആരോഗ്യവകുപ്പിന്റെയും സര്ക്കാരിന്റെയും അവഗണനയ്ക്കെതിരെ പടപൊരുതിയ ആയിരക്കണക്കിന് ആശ വര്ക്കര്മാരുടെ കനത്ത പ്രതിഷേധമാണെന്ന് വ്യക്തമാകുന്നു. എല്ഡിഎഫ് സ്ഥാനാര്ത്ഥിയും ആരോഗ്യ മന്ത്രിയുമായിരുന്ന വീണാ ജോര്ജിനെ 18,985 വോട്ടുകള്ക്ക് അട്ടിമറിച്ച് യുഡിഎഫിന്റെ അബിന് വര്ക്കി നടത്തിയ വന് മുന്നേറ്റം കേരള രാഷ്ട്രീയത്തിലെ തന്നെ വലിയ അത്ഭുതമായി മാറിയിരിക്കുകയാണ്. ഈ വിജയത്തിന് പിന്നിലെ യഥാര്ത്ഥ ചാലകശക്തി ആശ വര്ക്കര്മാരുടെ കൂട്ടായ്മയാണെന്ന തിരിച്ചറിവ് ഇടതുമുന്നണിയില് വലിയ കലഹത്തിന് കാരണമായിട്ടുണ്ട്.
തിരഞ്ഞെടുപ്പ് തോല്വിക്ക് പിന്നാലെ ആശ വര്ക്കര്മാരുടെ സമരത്തെ കൈകാര്യം ചെയ്തത് തെറ്റായിപ്പോയെന്ന സിപിഐ സംസ്ഥാന സെക്രട്ടറി ബിനോയ് വിശ്വത്തിന്റെ കുറ്റസമ്മതം രാഷ്ട്രീയ തട്ടിപ്പാണെന്ന ആരോപണവുമായി ആശ ഹെല്ത്ത് വര്ക്കേഴ്സ് അസോസിയേഷന് നേതാവ് എസ്. മിനി രംഗത്തെത്തിയത് സിപിഐയെ വെട്ടിലാക്കിയിരിക്കുകയാണ്. തങ്ങളെ തെരുവില് തല്ലിച്ചതയ്ക്കുകയും അപമാനിക്കുകയും ചെയ്തപ്പോള് ഭരണത്തിന്റെ തണലില് മൗനം പാലിച്ചവര് ഇപ്പോള് തോല്വി ഭയന്നാണ് ഇങ്ങനെയൊരു ‘വെളിപാട്’ നടത്തുന്നതെന്ന് മിനി തുറന്നടിക്കുന്നു.
ആറന്മുള മണ്ഡലത്തില് വീണാ ജോര്ജിനെതിരെ വീടുവീടാന്തരം കയറി ആശ വര്ക്കര്മാര് നടത്തിയ നിശബ്ദ പ്രചാരണം ഇടത് വോട്ടുകളില് വിള്ളലുണ്ടാക്കി. സമരകാലത്ത് തങ്ങളെ പരിഹസിച്ച മന്ത്രിയെ പരാജയപ്പെടുത്തുമെന്ന് ശപഥം ചെയ്താണ് ഇവര് കളത്തിലിറങ്ങിയത്. ‘സമരത്തെ പുച്ഛിച്ചവര്ക്ക് വോട്ടില്ല’ എന്ന മുദ്രാവാക്യമുയര്ത്തി പത്തനംതിട്ട നഗരത്തിലും ഗ്രാമപ്രദേശങ്ങളിലും ഇവര് നടത്തിയ പ്രചാരണം സ്ത്രീ വോട്ടര്മാരെ സ്വാധീനിക്കുന്നതില് വലിയ പങ്കുവഹിച്ചു. ഇടതുപക്ഷത്തിന്റെ ഉറച്ച വോട്ടുകള് പോലും അബിന് വര്ക്കിയിലേക്ക് മറിയാന് ഇത് കാരണമായി.
തിരഞ്ഞെടുപ്പ് ഫലം വന്ന് ദിവസങ്ങള് പിന്നിടുമ്പോഴാണ് ബിനോയ് വിശ്വം തിരുത്തലുമായി വരുന്നത്. ആശമാരുടെ സമരം കൈകാര്യം ചെയ്ത രീതി വലതുപക്ഷ സര്ക്കാരിനെപ്പോലെയായിരുന്നുവെന്നും ഇടതുപക്ഷം തൊഴിലാളികളെ അപഹസിക്കാന് പാടില്ലായിരുന്നുവെന്നുമുള്ള ബിനോയിയുടെ പരാമര്ശം പരോക്ഷമായി മുഖ്യമന്ത്രി പിണറായി വിജയനെയും സി.പി.എം നേതൃത്വത്തെയുമാണ് ലക്ഷ്യം വെക്കുന്നത്. എന്നാല്, സമരസമയത്ത് ബിനോയ് വിശ്വത്തെ നേരിട്ട് കണ്ട് സഹായം അഭ്യര്ത്ഥിച്ചപ്പോള് ‘താന് നിസ്സഹായനാണ്’ എന്ന് പറഞ്ഞ് കൈകഴുകിയ ചതിക്കഥയാണ് മിനി ഇപ്പോള് ഓര്മ്മിപ്പിക്കുന്നത്.
ആരോഗ്യവകുപ്പ് മന്ത്രി എന്ന നിലയില് വീണാ ജോര്ജ് സ്വീകരിച്ച കര്ക്കശ നിലപാടുകള് പത്തനംതിട്ടയിലെ ഇടത് അണികള്ക്കിടയില് പോലും അതൃപ്തിയുണ്ടാക്കിയിരുന്നു. സെക്രട്ടേറിയറ്റിന് മുന്നില് മാസങ്ങളോളം പട്ടിണി സമരം നടത്തിയ സ്ത്രീകളെ കാണാനോ അവരുടെ പ്രശ്നങ്ങള് കേള്ക്കാനോ മന്ത്രി തയ്യാറായില്ല. ഇതേ നീരസം ആറന്മുളയിലെ സ്ത്രീ വോട്ടര്മാര്ക്കിടയില് ഒരു ‘ആന്റി വീണ’ വികാരം സൃഷ്ടിച്ചു. ഇത് കൃത്യമായി വിനിയോഗിക്കാന് യുവനേതാവായ അബിന് വര്ക്കിക്ക് കഴിഞ്ഞു.
ഭരണത്തിലിരുന്നപ്പോള് സി.പി.എമ്മിന്റെ എല്ലാ തീരുമാനങ്ങള്ക്കും മൂളിയടിച്ച് നിന്ന സിപിഐ ഇപ്പോള് കുറ്റസമ്മതം നടത്തുന്നത് പ്രതിപക്ഷ ഉപനേതാവ് സ്ഥാനം ലക്ഷ്യം വെച്ചാണെന്ന ആക്ഷേപം ശക്തമാണ്. മുന്നണിക്കുള്ളില് തന്റെ വിലപേശല് ശേഷി വര്ദ്ധിപ്പിക്കാന് ബിനോയ് വിശ്വം തൊഴിലാളി വികാരം ഉപയോഗിക്കുകയാണെന്ന് രാഷ്ട്രീയ നിരീക്ഷകര് വിലയിരുത്തുന്നു. മിനിയുടെ വെളിപ്പെടുത്തലോടെ ബിനോയിയുടെ ഈ നാടകം പാളുകയും സിപിഐക്കുള്ളില് തന്നെ അദ്ദേഹത്തിനെതിരെ അതൃപ്തി പുകയുകയും ചെയ്യുകയാണ്.
ആറന്മുളയില് അബിന് വര്ക്കിക്ക് ലഭിച്ച വന് ഭൂരിപക്ഷം യുവജനങ്ങളുടെയും സ്ത്രീകളുടെയും വലിയ പിന്തുണയുടെ സൂചനയാണ്. മിനി ഉള്പ്പെടെയുള്ള നേതാക്കളെ പോലീസ് ബലം പ്രയോഗിച്ച് കസ്റ്റഡിയിലെടുത്തതും വാട്ടര് കാനന് പ്രയോഗിച്ചതും കേരളത്തിലെ ഓരോ ആശ വര്ക്കര്ക്കും മറക്കാന് കഴിയില്ല. ഇതിന്റെ പ്രതിഫലനമാണ് വീണാ ജോര്ജിന്റെ കനത്ത പരാജയം. മുഖ്യമന്ത്രിയുടെ വസതിയിലേക്ക് നടത്തിയ മാര്ച്ചില് ഇവര് അനുഭവിച്ച ക്രൂരതകള് ഇടത് വഞ്ചനയുടെ വലിയൊരു അധ്യായമായി ഇവര് ജനങ്ങള്ക്ക് മുന്നില് തുറന്നുകാട്ടി.
തിരഞ്ഞെടുപ്പിന് മുന്പ് എളമരം കരീമിനെപ്പോലുള്ള മുതിര്ന്ന നേതാക്കള് സമരക്കാരെ അപഹസിച്ച് സംസാരിച്ചത് വോട്ട് ബാങ്കില് വലിയ ചോര്ച്ചയുണ്ടാക്കി. കമ്മ്യൂണിസ്റ്റ് രീതി അതല്ലെന്ന് ഇപ്പോള് ബിനോയ് വിശ്വം ആവര്ത്തിക്കുമ്പോഴും, ഭരണസ്വാധീനത്തില് തൊഴിലാളികളെ അവഗണിക്കുന്ന രീതി സി.പി.ഐക്കും ബാധകമായിരുന്നുവെന്ന് എസ്. മിനി ചൂണ്ടിക്കാട്ടുന്നു. ഈ തിരിച്ചറിവ് വൈകിവന്നതാണെന്നും ജനങ്ങള് ബാലറ്റിലൂടെ നല്കിയ ശിക്ഷയാണിതെന്നും ആശ സംഘടനകള് പറയുന്നു.
ആറന്മുളയിലെ ഫലം കേരളത്തിലെ വരാനിരിക്കുന്ന രാഷ്ട്രീയ മാറ്റത്തിന്റെ സൂചന കൂടിയാണ്. ഒരു വിഭാഗം തൊഴിലാളികളെ വെറുപ്പിച്ചുകൊണ്ട് ഒരു സര്ക്കാരിനും മുന്നോട്ട് പോകാനാവില്ലെന്ന് ആറന്മുള തെളിയിക്കുന്നു. അബിന് വര്ക്കിയുടെ വിജയം കേവലം യുഡിഎഫിന്റെ വിജയമല്ല, മറിച്ച് നീതിക്ക് വേണ്ടി പോരാടിയ സ്ത്രീശക്തിയുടെ വിജയമാണ്. ബിനോയ് വിശ്വത്തിന്റെ കുറ്റസമ്മതം സിപിഐയെയും സര്ക്കാരിനെയും ഇത്രകാലം വേട്ടയാടിയ പാപഭാരത്തില് നിന്ന് രക്ഷിക്കില്ലെന്ന് ഉറപ്പായിക്കഴിഞ്ഞു.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
മകനെ സ്ഥാനാര്ത്ഥിയാക്കരുത്; ഇരവിപുരത്ത് ‘നോ’ പറഞ്ഞ് എന്.കെ. പ്രേമചന്ദ്രന്; രാഷ്ട്രീയ പാരമ്പര്യം ഉള്ളവര് മത്സരിക്കട്ടെയെന്ന് നിലപാട്; ആര് എസ് പിയില് ‘മക്കള് രാഷ്ട്രീയം’ അതിരുവിടില്ല
