തിരുവനന്തപുരം: ആലപ്പുഴയിലെ വിവാദമായ ‘രക്ഷാപ്രവര്ത്തന’ കേസ് അട്ടിമറിച്ച സംഭവത്തില് അന്വേഷണം നേരിടുന്ന എ.ഡി.ജി.പി. എം.ആര്. അജിത് കുമാര് നിലവിലെ ഡി.ജി.പി. സ്ഥാനക്കയറ്റ പട്ടികയില് നിന്ന് പുറത്തായേക്കുമെന്ന് സൂചന. ഈ മാസം 31-ന് ഫയര്ഫോഴ്സ് മേധാവി നിതിന് അഗര്വാള് വിരമിക്കുന്ന ഒഴിവിലേക്ക് സീനിയോറിറ്റി അടിസ്ഥാനത്തില് ഡി.ജി.പി. പദവിയിലെത്തേണ്ടത് നിലവിലെ സീനിയര് എ.ഡി.ജി.പിയായ അജിത് കുമാറായിരുന്നു.
എന്നാല്, ഗുരുതരമായ കേസട്ടിമറി ആരോപണത്തില് അന്വേഷണം നേരിടുന്ന ഉദ്യോഗസ്ഥന് സ്ഥാനക്കയറ്റം നല്കുന്നത് സര്ക്കാരിന് വലിയ രാഷ്ട്രീയ തിരിച്ചടിയാകുമെന്ന വിലയിരുത്തലിലാണ് ആഭ്യന്തര വകുപ്പ്. അതിനാല് തൊട്ടുതാഴെയുള്ള ഐ.പി.എസ്. ബാച്ചിലെ എ.ഡി.ജി.പിയായ എസ്. ശ്രീജിത്തിന് ഡി.ജി.പി. സ്ഥാനക്കയറ്റം നല്കാനാണ് നിലവില് സാധ്യത കല്പ്പിക്കപ്പെടുന്നത്.
ഇതോടൊപ്പം കേന്ദ്ര ഡെപ്യൂട്ടേഷനിലുള്ള മുതിര്ന്ന ഐ.പി.എസ്. ഉദ്യോഗസ്ഥനായ സുരേഷ് രാജ് പുരോഹിതിനും ഡി.ജി.പി. പദവി നല്കിയേക്കും. അജിത് കുമാറിനെതിരെയുള്ള വകുപ്പുതല അന്വേഷണ റിപ്പോര്ട്ടും തുടര്ന്നുള്ള ആഭ്യന്തര വകുപ്പിന്റെ തീരുമാനവുമാകും സ്ഥാനക്കയറ്റ പട്ടികയുടെ അന്തിമരൂപം തീരുമാനിക്കുക.
കേസ് അട്ടിമറി ആരോപണത്തില് അന്വേഷണം നടത്തുന്ന പ്രത്യേക അന്വേഷണ സംഘം സംസ്ഥാന പോലീസ് മേധാവിക്ക് സമര്പ്പിച്ച റിപ്പോര്ട്ടില് അന്ന് ക്രമസമാധാന ചുമതല വഹിച്ചിരുന്ന എ.ഡി.ജി.പി. എം.ആര്. അജിത് കുമാറിന്റെ പങ്ക് വ്യക്തമായി ചൂണ്ടിക്കാണിച്ചിട്ടുണ്ട്. കേസ് അന്വേഷണത്തിന്റെ മേല്നോട്ടത്തില് അജിത് കുമാറിന്റെ ഭാഗത്തുനിന്ന് ഗുരുതരമായ വീഴ്ചയും ഇടപെടലുമുണ്ടായെന്നാണ് റിപ്പോര്ട്ടിലെ പ്രധാന കണ്ടെത്തല്.
റിപ്പോര്ട്ടിന്റെ അടിസ്ഥാനത്തില് സംസ്ഥാന പോലീസ് മേധാവി അജിത് കുമാറിനോട് ഔദ്യോഗിക വിശദീകരണം തേടിയിരുന്നു. എന്നാല്, ഡി.ജി.പി. അനുവദിച്ച സമയം കഴിഞ്ഞിട്ടും കേസ് അട്ടിമറി ആരോപണത്തിലും യൂത്ത് കോണ്ഗ്രസ് പ്രവര്ത്തകര് മര്ദ്ദനത്തിനിരയായ സംഭവത്തിലും കൃത്യമായ വിശദീകരണം നല്കാന് എം.ആര്. അജിത് കുമാര് ഇതുവരെ തയ്യാറായിട്ടില്ല.
സ്വകാര്യ യാത്രയുമായി ബന്ധപ്പെട്ട് നിലവില് കേരളത്തിന് പുറത്താണെന്നും, തിരികെ എത്തിയ ശേഷം മറുപടി നല്കാം എന്നുമാണ് അജിത് കുമാര് നല്കിയ വിശദീകരണം. അദ്ദേഹം ഇന്ന് തിരുവനന്തപുരത്ത് മടങ്ങിയെത്തുമെന്നാണ് വിവരം. അതിനാല് ഇന്നോ നാളെയോ ആയി ഡി.ജി.പിക്ക് നേരിട്ടോ എഴുതിയോ വിശദീകരണം നല്കിയേക്കും.
അജിത് കുമാറിന്റെ വിശദീകരണം ലഭിച്ചയുടന് സംസ്ഥാന പോലീസ് മേധാവി സ്വന്തം ശുപാര്ശ സഹിതമുള്ള സമഗ്രമായ റിപ്പോര്ട്ട് സംസ്ഥാന ആഭ്യന്തര വകുപ്പിന് കൈമാറും. തുടര്ന്ന് മുഖ്യമന്ത്രിയും ആഭ്യന്തര മന്ത്രിയും പങ്കെടുക്കുന്ന ഉന്നതതല യോഗത്തിലാകും എ.ഡി.ജി.പിക്കെതിരെയുള്ള നടപടികളും സ്ഥാനക്കയറ്റ കാര്യത്തിലെ അന്തിമ തീരുമാനവും കൈക്കൊള്ളുക.
വിവാദത്തിന് ആസ്പദമായ സംഭവം നടന്നത് മുന് സര്ക്കാരിന്റെ കാലത്തെ നവകേരള യാത്രയ്ക്കിടെയാണ്. യാത്രയ്ക്കിടെ മുഖ്യമന്ത്രി പിണറായി വിജയനും മന്ത്രിമാരും സഞ്ചരിച്ച വാഹനത്തിന് നേരെ കരിങ്കൊടി കാട്ടിയ കെ.എസ്.യു – യൂത്ത് കോണ്ഗ്രസ് നേതാക്കളെ മുഖ്യമന്ത്രിയുടെ ഗണ്മാന്മാരും സുരക്ഷാ ജീവനക്കാരും ചേര്ന്ന് അതിക്രൂരമായി മര്ദ്ദിച്ചെന്നായിരുന്നു പരാതി.
അന്ന് ഈ സംഭവം വലിയ രാഷ്ട്രീയ വിവാദങ്ങള്ക്ക് വഴിവെക്കുകയും ഭരണപക്ഷത്തിന്റെ ‘രക്ഷാപ്രവര്ത്തനം’ എന്ന ന്യായീകരണം വന് അമര്ഷത്തിന് ഇടയാക്കുകയും ചെയ്തിരുന്നു. തുടര്ന്ന് കോടതി ഇടപെടലിനെത്തുടര്ന്നാണ് ഗണ്മാന്മാര്ക്കെതിരെ കേസ് എടുക്കാനും അന്വേഷണത്തിനും വഴിതുറന്നത്.
എന്നാല്, ഈ കേസ് അന്വേഷിച്ച പ്രത്യേക പോലീസ് സംഘത്തെ എ.ഡി.ജി.പി സ്വന്തം ഓഫീസിലേക്ക് വിളിച്ചുവരുത്തി ഭീഷണിപ്പെടുത്തുകയും സമ്മര്ദ്ദം ചെലുത്തി കേസ് അന്വേഷണം പൂര്ണ്ണമായും അട്ടിമറിക്കുകയും ചെയ്തു എന്നാണ് ഉയര്ന്ന പ്രധാന ആരോപണം. അന്വേഷണ ഉദ്യോഗസ്ഥരെ സ്വാധീനിക്കാന് ശ്രമിച്ചുവെന്ന ഈ കണ്ടെത്തലാണ് ഇപ്പോള് എ.ഡി.ജി.പിയുടെ ഉന്നത സ്ഥാനക്കയറ്റത്തിന് തന്നെ കരിനിഴലായി മാറിയിരിക്കുന്നത്.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
തലശ്ശേരിയില് ജോണ് ബ്രിട്ടാസ്? പി ശശിക്കും ഷംസീറിനും സീറ്റില്ല; കണ്ണൂര് സി.പി.എമ്മില് വമ്പന് ആലോചനകള്; നിര്ണ്ണായക നീക്കങ്ങള്ക്ക് പിണറായി
