തിരുവനന്തപുരം: പത്തു വര്ഷത്തെ ഇടവേളയ്ക്ക് ശേഷം കേരളം ഭരിക്കാന് ജനവിധി നേടിയ യുഡിഎഫില് മുഖ്യമന്ത്രിയെ നിശ്ചയിക്കാനുള്ള ചര്ച്ചകള് ക്ലൈമാക്സിലേക്ക്. വി.ഡി. സതീശന്, രമേശ് ചെന്നിത്തല, കെ.സി. വേണുഗോപാല് എന്നിവരില് ആര് കേരളത്തിന്റെ അമരത്തെത്തുമെന്ന് എഐസിസി അധ്യക്ഷന് മല്ലികാര്ജുന് ഖാര്ഗെ വരും മണിക്കൂറുകളില് പ്രഖ്യാപിക്കും. ഞായറാഴ്ചയോടെ പുതിയ മുഖ്യമന്ത്രിയെ പ്രഖ്യാപിക്കുമെന്നാണ് സൂചന. തിരുവനന്തപുരത്ത് എഐസിസി നിരീക്ഷകര് എംഎല്എമാരുടെ അഭിപ്രായം തേടുന്നത് പൂര്ത്തിയാക്കി റിപ്പോര്ട്ടുമായി ഡല്ഹിക്ക് തിരിച്ചു.
2021-ല് രമേശ് ചെന്നിത്തലയെ മാറ്റി വി.ഡി. സതീശനെ പ്രതിപക്ഷ നേതാവാക്കിയ ഹൈക്കമാന്ഡ് ശൈലി ഇത്തവണയും ആവര്ത്തിക്കുമോ എന്നതാണ് പ്രധാന ചോദ്യം. അന്ന് ഖാര്ഗെ നിരീക്ഷകനായി എത്തിയപ്പോള് ‘തുറന്ന മനസ്സോടെയാണ്’ എത്തിയതെന്ന് പറഞ്ഞെങ്കിലും ഒടുവില് സതീശനെ വാഴിക്കുകയായിരുന്നു. ഇത്തവണയും അത്തരമൊരു ‘ഹൈക്കമാന്ഡ് അട്ടിമറി’ ഉണ്ടാകുമോ എന്ന ആശങ്ക മുതിര്ന്ന നേതാക്കള്ക്കുണ്ട്. 2021-ലെ രീതി ആവര്ത്തിക്കരുതെന്ന് വി.എം. സുധീരനും പി.ജെ. കുര്യനും നിരീക്ഷകര്ക്ക് കര്ശന മുന്നറിയിപ്പ് നല്കി. മുഖ്യമന്ത്രിയെ നിശ്ചയിക്കുമ്പോള് ബാക്കിയുള്ളവരെ കൂടി വിശ്വാസത്തിലെടുക്കണമെന്നാണ് ഇവരുടെ ആവശ്യം.
മുന്നില് മൂന്നുപേര്:-
വി.ഡി. സതീശന്: 63-ല് 35 എംഎല്എമാരുടെ പിന്തുണ സതീശന് അവകാശപ്പെടുന്നു. കഴിഞ്ഞ അഞ്ചു വര്ഷം സഭയില് നടത്തിയ പോരാട്ടവും ജനപിന്തുണയും സതീശന് മുന്തൂക്കം നല്കുന്നു. മുസ്ലിം ലീഗ് ഉള്പ്പെടെയുള്ള ഘടകകക്ഷികളുടെ പ്രീതിയും സതീശന്റെ കരുത്താണ്.
കെ.സി. വേണുഗോപാല്: എംഎല്എമാരുടെ എണ്ണത്തില് താനാണ് മുന്പന്തിയിലെന്ന സന്ദേശമാണ് കെ.സി. വേണുഗോപാല് നല്കുന്നത്. 52 എംഎല്എമാരുടെ പിന്തുണയുണ്ടെന്ന് കെ.സി. പക്ഷം ഉറപ്പിച്ചു പറയുന്നു. കെ. സുധാകരന് പരസ്യമായി വേണുഗോപാലിന് വേണ്ടി കത്ത് നല്കിയത് നിര്ണ്ണായകമാണ്. ഹൈക്കമാന്ഡിലുള്ള സ്വാധീനമാണ് കെ.സിയുടെ തുറുപ്പുചീട്ട്.
രമേശ് ചെന്നിത്തല: ഉമ്മന് ചാണ്ടിക്ക് ശേഷം അവസരം ലഭിക്കേണ്ടത് തനിക്കാണെന്ന നിലപാടിലാണ് ചെന്നിത്തല. 25 എംഎല്എമാരുടെ പിന്തുണയും സീനിയോറിറ്റിയും മുന്നിര്ത്തി അദ്ദേഹം ഹൈക്കമാന്ഡിനെ സമീപിച്ചിട്ടുണ്ട്. എ.കെ. ആന്റണിയുടെ പിന്തുണയും ചെന്നിത്തല പ്രതീക്ഷിക്കുന്നു.
ഘടകകക്ഷികളുടെ നിലപാട്
മുസ്ലിം ലീഗ് നേതാക്കളായ പി.കെ. കുഞ്ഞാലിക്കുട്ടി ഉള്പ്പെടെയുള്ളവര് നിരീക്ഷകരുമായി നടത്തിയ ചര്ച്ചയില് സതീശന് അനുകൂലമായ പൊതുവികാരം അറിയിച്ചതായാണ് വിവരം. എന്നാല് കോണ്ഗ്രസിന്റെ ആഭ്യന്തര കാര്യങ്ങളില് ലീഗ് ഇടപെടേണ്ടെന്ന മാത്യു കുഴല്നാടന്റെ പ്രസ്താവന മുന്നണിയില് ചര്ച്ചയായിട്ടുണ്ട്.
രാഹുല് ഗാന്ധിയുടെ നിര്ദ്ദേശപ്രകാരം ‘മെറിറ്റ്’ മാത്രമായിരിക്കും മാനദണ്ഡമെന്ന് നിരീക്ഷകര് വ്യക്തമാക്കുന്നു. കേരളത്തിന്റെ സാമ്പത്തിക പ്രതിസന്ധി പരിഹരിക്കാന് പ്രാപ്തിയുള്ള നായകനെയാകും ഹൈക്കമാന്ഡ് തിരഞ്ഞെടുക്കുക. ഗ്രൂപ്പ് താത്പര്യങ്ങള്ക്ക് അപ്പുറം ആര്ക്കായിരിക്കും ഖാര്ഗെയും രാഹുലും പച്ചക്കൊടി കാട്ടുക എന്നത് രാഷ്ട്രീയ കേരളം ശ്വാസമടക്കിപ്പിടിച്ച് കാത്തിരിക്കുകയാണ്.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
ആഗോള ബോക്സ് ഓഫീസില് പാപ്പന്റെ തേരോട്ടം; വെറും ഏഴ് ദിവസം കൊണ്ട് 100 കോടി കടന്ന് ‘ആട് 3’; ജയസൂര്യയുടെ കരിയറിലെ ആദ്യ സെഞ്ച്വറി!
