എ.ഡി.ജി.പി എം.ആര്‍ അജിത് കുമാര്‍ ഇനി ബെവ്കോ സി.എം.ഡി; ഹര്‍ഷിത അട്ടല്ലൂരി ട്രാഫിക് ഐ.ജി

തിരുവനന്തപുരം: സംസ്ഥാന ഐ.പി.എസ് തലപ്പത്ത് സുപ്രധാന അഴിച്ചുപണി നടത്തി സര്‍ക്കാര്‍ ഉത്തരവിറക്കി. പുതിയ നിയമനത്തിനായി കാത്തിരുന്ന എ.ഡി.ജി.പി എം.ആര്‍ അജിത് കുമാറിനെ കേരള സ്റ്റേറ്റ് ബിവറേജസ് കോര്‍പ്പറേഷന്‍ ലിമിറ്റഡിന്റെ (ബെവ്കോ) ചെയര്‍മാന്‍ ആന്‍ഡ് മാനേജിംഗ് ഡയറക്ടറായി (സി.എം.ഡി) നിയമിച്ചു. നിലവില്‍ ബെവ്കോ എം.ഡിയായിരുന്ന ഹര്‍ഷിത അട്ടല്ലൂരിയെ ട്രാഫിക് ആന്‍ഡ് റോഡ് സേഫ്റ്റി മാനേജ്‌മെന്റ് ഐജിയാക്കി മാറ്റിയാണ് പുതിയ നിയമനം.

പൊതുഭരണ വകുപ്പാണ് (ജി.എ.ഡി) ഇത് സംബന്ധിച്ച ഉത്തരവിറക്കിയത്. ഹൈക്കോടതി നിര്‍ദ്ദേശത്തെ തുടര്‍ന്ന് എം.ആര്‍ അജിത് കുമാറിനെ എക്സൈസ് കമ്മീഷണര്‍ തസ്തികയില്‍ നിന്നും അടുത്തിടെ മാറ്റേണ്ടി വന്നിരുന്നു. ഈ സാഹചര്യത്തിലാണ് സംസ്ഥാനത്തെ പ്രധാന പൊതുമേഖലാ സ്ഥാപനങ്ങളിലൊന്നിന്റെ ചുമതല അദ്ദേഹത്തിന് നല്‍കിയിരിക്കുന്നത്.

എം.ആര്‍ അജിത് കുമാറിന് പുതിയ ചുമതല: 1995 ബാച്ച് കേരള കേഡര്‍ ഐ.പി.എസ് ഉദ്യോഗസ്ഥനായ എം.ആര്‍ അജിത് കുമാറിനെ നികുതി വകുപ്പിന്റെ കീഴില്‍ സംസ്ഥാന ഡെപ്യൂട്ടേഷന്‍ വ്യവസ്ഥയിലാണ് സി.എം.ഡി-യായി നിയമിച്ചിരിക്കുന്നത്. പോലീസ് ആസ്ഥാനത്തെ എ.ഡി.ജി.പി റാങ്കിനും ശമ്പള സ്‌കെയിലിനും (പേ മാട്രിക്സ് ലെവല്‍ 15 – 182,200-224,100 രൂപ) തുല്യമായ പദവിയായി ബെവ്കോ സി.എം.ഡി പോസ്റ്റിനെ സര്‍ക്കാര്‍ ഔദ്യോഗികമായി പ്രഖ്യാപിച്ചിട്ടുണ്ട്.

2002 ബാച്ച് ഐ.പി.എസ് ഉദ്യോഗസ്ഥയായ ഹര്‍ഷിത അട്ടല്ലൂരി ബെവ്കോ മാനേജിംഗ് ഡയറക്ടര്‍ സ്ഥാനത്ത് മികച്ച പ്രവര്‍ത്തനം കാഴ്ചവെച്ചതിന് ശേഷമാണ് ട്രാഫിക് ആന്‍ഡ് റോഡ് സേഫ്റ്റി വിഭാഗം ഐ.ജി-യായി ചുമതലയേല്‍ക്കുന്നത്. സംസ്ഥാനത്തെ ഗതാഗത സുരക്ഷയുമായി ബന്ധപ്പെട്ട സുപ്രധാന ചുമതലയാണിത്. ഇന്ത്യന്‍ പോലീസ് സര്‍വീസ് ചട്ടങ്ങള്‍ (2016) പ്രകാരമാണ് ഈ മാറ്റങ്ങള്‍.

ഗവര്‍ണര്‍ക്ക് വേണ്ടി പൊതുഭരണ വകുപ്പ് അഡീഷണല്‍ സെക്രട്ടറി രാജേഷ് ജി.ആര്‍ ആണ് ഈ സ്ഥലംമാറ്റ ഉത്തരവ് പുറപ്പെടുവിച്ചിരിക്കുന്നത്. എക്‌സൈസ് കമ്മീഷണര്‍ സ്ഥാനത്ത് നിന്നുള്ള മാറ്റത്തിന് ശേഷം എം.ആര്‍ അജിത് കുമാറിന് എന്ത് പദവി നല്‍കുമെന്ന ചര്‍ച്ചകള്‍ക്കിടെയാണ് അദ്ദേഹത്തെ ബെവ്‌കോയുടെ തലപ്പത്തേക്ക് കൊണ്ടുവന്നിരിക്കുന്നത്. ഏറ്റവും പ്രധാനപ്പെട്ട പൊതു മേഖലാ സ്ഥാപനമാണ് ഇത്.