ന്യൂഡല്ഹി: പശ്ചിമേഷ്യയിലെ സംഘര്ഷങ്ങളെത്തുടര്ന്ന് ആഗോള വിപണിയില് ക്രൂഡ് ഓയില് വില കുതിച്ചുയരുന്ന സാഹചര്യത്തില് രാജ്യത്ത് പെട്രോള്, ഡീസല് വിലയില് വന് വര്ധനവിന് സാധ്യതയെന്ന് കേന്ദ്ര സര്ക്കാര് വൃത്തങ്ങള്. അന്താരാഷ്ട്ര വിപണിയിലെ വിലവര്ധനവ് പ്രതിഫലിപ്പിക്കാത്തതിനാല് പൊതുമേഖലാ എണ്ണക്കമ്പനികള് നേരിടുന്ന കനത്ത സാമ്പത്തിക പ്രതിസന്ധിയാണ് വില കൂട്ടാന് സര്ക്കാരിനെ പ്രേരിപ്പിക്കുന്നത്. ബംഗാള് നിയമസഭാ തിരഞ്ഞെടുപ്പ് പൂര്ത്തിയായ പശ്ചാത്തലത്തില് വരും ദിവസങ്ങളില് ഇന്ധനവിലയില് മാറ്റമുണ്ടാകാനാണ് സാധ്യത.
അന്താരാഷ്ട്ര വിപണിയില് ക്രൂഡ് ഓയില് വില നാല് വര്ഷത്തെ ഏറ്റവും ഉയര്ന്ന നിരക്കായ ബാരലിന് 126 ഡോളറില് എത്തിയതോടെയാണ് ഇന്ധനവില വര്ധിപ്പിക്കണമെന്ന സമ്മര്ദ്ദം ശക്തമായത്. നിലവിലെ കണക്കുകള് പ്രകാരം പെട്രോളിന് ലിറ്ററിന് 20 രൂപയും ഡീസലിന് 100 രൂപയും വരെ എണ്ണക്കമ്പനികള്ക്ക് നഷ്ടം സംഭവിക്കുന്നുണ്ടെന്നാണ് പെട്രോളിയം മന്ത്രാലയം വ്യക്തമാക്കുന്നത്. വിപണി നിരീക്ഷകരുടെ വിലയിരുത്തല് പ്രകാരം ലിറ്ററിന് 25 രൂപ മുതല് 28 രൂപ വരെ വര്ധനവ് വരാന് സാധ്യതയുണ്ട്.
ഫെബ്രുവരി 28-ന് ഇറാനെതിരായ ആക്രമണത്തിന് ശേഷം ഹോര്മുസ് കടലിടുക്കിലൂടെയുള്ള എണ്ണക്കടത്ത് തടസ്സപ്പെട്ടതാണ് ആഗോള വിപണിയെ പ്രക്ഷുബ്ധമാക്കിയത്. ലോകത്തെ എണ്ണക്കടത്തിന്റെ അഞ്ചിലൊന്ന് നടക്കുന്ന ഈ പാത അടഞ്ഞതോടെ എണ്ണ വിതരണം താളം തെറ്റി. അമേരിക്കയും ഇറാനും തമ്മിലുള്ള സമാധാന ചര്ച്ചകള് വഴിമുട്ടിയതും ഇസ്രായേല്-ഇറാന് സംഘര്ഷം തുടരുന്നതും അന്താരാഷ്ട്ര വിപണിയില് എണ്ണവില 110 ഡോളറിന് മുകളില് നിലനില്ക്കാന് കാരണമാകുന്നു.
2022 ഏപ്രില് മുതല് രാജ്യത്ത് പെട്രോള്, ഡീസല് വിലയില് കാര്യമായ മാറ്റം വരുത്തിയിരുന്നില്ല. ക്രൂഡ് ഓയില് വില കുറഞ്ഞപ്പോള് ലഭിച്ച ലാഭം ഉപയോഗിച്ചാണ് മുന്പ് കമ്പനികള് നഷ്ടം നികത്തിയിരുന്നത്. എന്നാല് ഇപ്പോള് ബാരലിന് 70 ഡോളറില് നിന്ന് 114 ഡോളറിലേക്ക് ശരാശരി വില ഉയര്ന്നതോടെ പഴയ രീതിയില് മുന്നോട്ട് പോകാന് കഴിയില്ലെന്ന് കമ്പനികള് അറിയിച്ചു. നിലവില് ഡല്ഹിയില് പെട്രോളിന് 94.77 രൂപയും ഡീസലിന് 87.67 രൂപയുമാണ് നിരക്ക്.
ഇന്ധനവിലയിലെ മാറ്റങ്ങള് ഗാര്ഹിക ഉപഭോക്താക്കളെ ബാധിക്കാത്ത രീതിയില് പിടിച്ചുനിര്ത്താന് ശ്രമം നടക്കുന്നുണ്ടെങ്കിലും വാണിജ്യ സിലിണ്ടറുകളുടെയും വിമാന ഇന്ധനത്തിന്റെയും വില ഇതിനോടകം വര്ധിപ്പിച്ചിട്ടുണ്ട്. എണ്ണക്കമ്പനികളുടെ നഷ്ടം നികത്താന് ഇന്ധനവില വര്ധനവ് അനിവാര്യമാണെന്ന നിലപാടിലാണ് സര്ക്കാര് വൃത്തങ്ങള്. ഇന്ധനവില വര്ധിച്ചാല് അത് നിത്യോപയോഗ സാധനങ്ങളുടെ വിലക്കയറ്റത്തിനും ഇടയാക്കുമെന്ന ആശങ്ക പൊതുജനങ്ങള്ക്കിടയിലുണ്ട്.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
Also Read
കേരളത്തിൽ റെക്കോർഡ് പോളിംഗിലേക്ക്; ഉയർന്ന വോട്ടിംഗ് ശതമാനം എൽഡിഎഫിന് കരുത്താകുമെന്ന് എം.വി. ഗോവിന്ദൻ
കേരളത്തിൽ റെക്കോർഡ് പോളിംഗിലേക്ക്; ഉയർന്ന വോട്ടിംഗ് ശതമാനം എൽഡിഎഫിന് കരുത്താകുമെന്ന് എം.വി. ഗോവിന്ദൻ
