രാജീവ് ചന്ദ്രശേഖറിന്റെ സമ്മര്‍ദ്ദം ഫലിച്ചു; അവസാന നിമിഷം മോദി ഇടപെട്ടു; അങ്ങനെ എഫ് സി ആര്‍ എ ബില്‍ തല്‍കാലത്തേക്ക് കോള്‍ഡ് സ്‌റ്റോറേജില്‍; ക്രൈസ്തവ വോട്ടുകള്‍ മുഖ്യം; കേരളത്തില്‍ എത്തുമ്പോള്‍ പ്രധാനമന്ത്രി നിര്‍ണ്ണായക പ്രഖ്യാപനം നടത്തും

ന്യൂഡല്‍ഹി: ക്രൈസ്തവ സഭകളും സന്നദ്ധ സംഘടനകളും വലിയ ആശങ്ക പ്രകടിപ്പിച്ച വിദേശസംഭാവന നിയന്ത്രണ ഭേദഗതി ബില്‍ (എഫ്.സി.ആര്‍.എ.) പാര്‍ലമെന്റില്‍ അവതരിപ്പിക്കുന്നത് കേന്ദ്രസര്‍ക്കാര്‍ താല്‍ക്കാലികമായി മാറ്റിവെച്ചതിന് കാരണം കേരളത്തിലെ ബിജെപി നേതൃത്വത്തിന്റെ സമ്മര്‍ദ്ദം. ഈ ആഴ്ച അവസാനം തിരഞ്ഞെടുപ്പ് പ്രചാരണത്തിനായി കേരളത്തിലെത്തുന്ന പ്രധാനമന്ത്രി നരേന്ദ്ര മോദി ബില്ലുമായി ബന്ധപ്പെട്ട കേന്ദ്ര നിലപാടില്‍ വ്യക്തത വരുത്തിയേക്കും.

ബിജെപി സംസ്ഥാന അധ്യക്ഷന്‍ രാജീവ് ചന്ദ്രശേഖര്‍ കേന്ദ്രമന്ത്രി കിരണ്‍ റിജിജു, ആഭ്യന്തരമന്ത്രി അമിത് ഷാ എന്നിവരുമായി നടത്തിയ ചര്‍ച്ചകളെത്തുടര്‍ന്നാണ് നിര്‍ണ്ണായകമായ ഈ പിന്മാറ്റം. ഈ ബില്‍ ഇപ്പോഴത്തെ രീതിയില്‍ കേന്ദ്ര സര്‍ക്കാര്‍ നടപ്പിലാക്കില്ല. ക്രൈസ്തവ സഭകളുടെ വിശദീകരണം തേടും. ഏകപക്ഷീയ നീക്കം കേരളത്തില്‍ ബിജെപിയുടെ സാധ്യതകളെ ബാധിക്കും. ഈ സാഹചര്യത്തിലാണ് മോദി വിശദീകരണം നല്‍കുക. സഭയെ ചേര്‍ത്ത് നിര്‍ത്താന്‍ ബിജെപി ശ്രമിക്കും.

ബില്ലിനെച്ചൊല്ലി കേരളത്തില്‍ കോണ്‍ഗ്രസും സിപിഐഎമ്മും വ്യാപകമായ തെറ്റിദ്ധാരണ പരത്തുന്നുവെന്നും പള്ളികള്‍ പിടിച്ചെടുക്കാനുള്ള നീക്കമെന്ന തരത്തിലുള്ള പ്രചരണം ക്രൈസ്തവ വോട്ടുകളെ ബാധിക്കുമെന്നും സംസ്ഥാന ഘടകം കേന്ദ്രത്തെ അറിയിച്ചിരുന്നു. ഇതിന്റെ അടിസ്ഥാനത്തിലാണ് സഭകളുടെ ന്യായമായ ആശങ്കകള്‍ പരിഹരിക്കാന്‍ കേന്ദ്രം തയ്യാറായത്. രാജ്യസുരക്ഷയെയും ഭീകരവാദ ഫണ്ടിംഗിനെയും ലക്ഷ്യമിട്ടുള്ളതാണ് ബില്ലെന്നും സുതാര്യമായി പ്രവര്‍ത്തിക്കുന്ന സ്ഥാപനങ്ങള്‍ക്ക് ആശങ്ക വേണ്ടെന്നും പ്രധാനമന്ത്രി കേരളത്തിലെ പ്രസംഗത്തില്‍ വിശദീകരിച്ചേക്കും. കൃത്യമായ കണക്കുകള്‍ ഉള്ളവര്‍ക്ക് ബില്‍ ഒരു പ്രശ്‌നമല്ലെന്നായിരുന്നു വിഷയത്തില്‍ സുരേഷ് ഗോപിയുടെ പ്രതികരണം.

ഭരണഘടനാവിരുദ്ധമായ വ്യവസ്ഥകള്‍ പിന്‍വലിക്കണമെന്ന് ലത്തീന്‍, സിറോ മലബാര്‍, മലങ്കര കത്തോലിക്കാ സഭകള്‍ ഒറ്റക്കെട്ടായി ആവശ്യപ്പെട്ടിരുന്നു. നിസ്സാര കാരണങ്ങള്‍ പറഞ്ഞ് ലൈസന്‍സ് റദ്ദാക്കാനും ആസ്തികള്‍ കണ്ടുകെട്ടാനും ഉദ്യോഗസ്ഥര്‍ക്ക് അധികാരം നല്‍കുന്ന വ്യവസ്ഥകള്‍ ജീവകാരുണ്യ പ്രവര്‍ത്തനങ്ങളെ തകര്‍ക്കുമെന്ന് കര്‍ദിനാള്‍ മാര്‍ ബസേലിയോസ് ക്ലീമിസ് ബാവായും മേജര്‍ ആര്‍ച്ച്ബിഷപ്പ് മാര്‍ റാഫേല്‍ തട്ടിലും മുന്നറിയിപ്പ് നല്‍കിയിരുന്നു. സഭകളുടെ എതിര്‍പ്പ് ഏകോപിപ്പിക്കാന്‍ സി.ബി.സി.ഐ. രൂപീകരിച്ച എട്ടംഗ സമിതി പ്രധാനമന്ത്രിയെ കാണാന്‍ സമയം തേടിയിട്ടുണ്ട്.

അതേസമയം, തിരഞ്ഞെടുപ്പ് പടിവാതില്‍ക്കല്‍ എത്തിനില്‍ക്കെ ന്യൂനപക്ഷ വോട്ടുകള്‍ നഷ്ടപ്പെടുമെന്ന ഭയമാണ് കേന്ദ്രത്തിന്റെ പിന്മാറ്റത്തിന് പിന്നിലെന്ന് പ്രതിപക്ഷം ആരോപിച്ചു. ബില്‍ അവതരിപ്പിക്കുന്നതിനെതിരെ ഹൈബി ഈഡന്‍ എം.പി, എന്‍.കെ. പ്രേമചന്ദ്രന്‍ എം.പി എന്നിവര്‍ സഭയില്‍ ശക്തമായ പ്രതിഷേധം ഉയര്‍ത്തിയിരുന്നു. ഇത് രാഷ്ട്രീയ ഗിമ്മിക്കാണെന്നും തിരഞ്ഞെടുപ്പ് കഴിഞ്ഞാല്‍ കേന്ദ്രം വീണ്ടും ബില്ലുമായി വരുമെന്നുമാണ് പ്രതിപക്ഷത്തിന്റെ കുറ്റപ്പെടുത്തല്‍.

എന്നാല്‍, സംസ്ഥാന നേതൃത്വത്തിന്റെ ഇടപെടലിലൂടെ സഭകളുടെ ആശങ്ക പരിഹരിക്കപ്പെടുമെന്ന പ്രതീക്ഷയിലാണ് കേരളത്തിലെ ബിജെപി നേതൃത്വം. ബില്‍ അവതരണം വേണ്ടെന്ന് വച്ചതു തന്നെ ബിജെപി സംസ്ഥാന നേതൃത്വത്തിന് ആശ്വാസമാണ്. ബിജെപി സംസ്ഥാന അധ്യക്ഷന്‍ രാജീവ് ചന്ദ്രശേഖറിന്റെ ശക്തമായ സമ്മര്‍ദ്ദത്തിന് വഴങ്ങി അവസാന നിമിഷം പ്രധാനമന്ത്രി നരേന്ദ്ര മോദി നേരിട്ട് ഇടപെട്ടതോടെയാണ് ലോക്‌സഭയില്‍ ഇന്ന് നടക്കാനിരുന്ന ബില്‍ അവതരണം മാറ്റിവെച്ചത്. വരാനിരിക്കുന്ന നിയമസഭാ തിരഞ്ഞെടുപ്പില്‍ ക്രൈസ്തവ വോട്ടുകള്‍ നിര്‍ണ്ണായകമാണെന്നിരിക്കെ, സഭകളുടെ പ്രതിഷേധം തിരിച്ചടിയാകുമെന്ന് കണ്ടാണ് കേന്ദ്രത്തിന്റെ ഈ തന്ത്രപരമായ പിന്മാറ്റം.

ഈ ആഴ്ച അവസാനം തിരഞ്ഞെടുപ്പ് പ്രചാരണത്തിനായി പ്രധാനമന്ത്രി നരേന്ദ്ര മോദി വീണ്ടും കേരളത്തിലെത്തുന്നുണ്ട്. ഈ സന്ദര്‍ശന വേളയില്‍ ക്രൈസ്തവ സഭകളുടെ ആശങ്കകള്‍ ദൂരീകരിക്കുന്ന തരത്തിലുള്ള നിര്‍ണ്ണായക പ്രഖ്യാപനങ്ങള്‍ പ്രധാനമന്ത്രിയുടെ ഭാഗത്തുനിന്നുണ്ടാകുമെന്നാണ് സൂചന.