ആലപ്പുഴ: 2016-2021 കാലയളവില് പൊതുമരാമത്ത് മന്ത്രിയായിരിക്കെ ശബരിമലയില് യുവതി പ്രവേശനത്തിന് പിന്നാലെ നടയടച്ച് ‘ശുദ്ധിക്രിയ’ നടത്തിയപ്പോള്, തന്ത്രിയെ ‘ബ്രാഹ്മണ രാക്ഷസന്’ എന്ന് വിശേഷിപ്പിച്ചത് വലിയ വിവാദമായിരുന്നു. 1975-ല് അടിയന്തരാവസ്ഥയ്ക്കെതിരെ തലസ്ഥാനത്ത് പ്രകടനം നടത്തിയതിന് ജയില്വാസമനുഭവിച്ചിട്ടുണ്ട്; അന്ന് പൊലീസ് മര്ദനത്തിനിടെ വാച്ച് പൊട്ടിയതിന് ശേഷം ഇതുവരെ വാച്ച് കെട്ടിയിട്ടില്ല. കറപുരളാത്ത വ്യക്തിമൂല്യങ്ങള് മുറുകെപ്പിടിച്ചാണ് പാര്ട്ടിയുമായി ആറര പതിറ്റാണ്ടോളം നീണ്ട ജൈവബന്ധം അറുത്തുമാറ്റി ജി. സുധാകരന് പുതിയ രാഷ്ട്രീയ വഴിയിലേക്ക് ചുവടുവെക്കുന്നത്.
ഇണങ്ങിയും പിണങ്ങിയും പാര്ട്ടി ചട്ടക്കൂടുകള്ക്കുള്ളില് ഒതുങ്ങുമ്പോഴും നിലപാടുകളുടെ കരുത്തും തനിമയാര്ന്ന ശൈലിയുമായിരുന്നു സുധാകരന്റെ മുഖമുദ്ര. ചുവപ്പ് കോട്ടയ്ക്കുള്ളില് നിന്നുകൊണ്ടുതന്നെ ചുവപ്പുനാടകള്ക്കെതിരെ കലഹിച്ച ചരിത്രമാണ് അദ്ദേഹത്തിന്റേത്. 1967-ല് സി.പി.എമ്മില് അംഗമായ സുധാകരന്, എം.എം. ബേബിക്ക് എസ്.എഫ്.ഐ അംഗത്വം നല്കിയ ആദ്യ സംസ്ഥാന പ്രസിഡന്റായിരുന്നു. 40 വര്ഷത്തോളം സംസ്ഥാന കമ്മിറ്റിയിലുണ്ടായിട്ടും ഒരിക്കല്പോലും പാര്ട്ടി സെക്രട്ടേറിയറ്റില് അദ്ദേഹത്തെ എത്തിച്ചില്ലെന്നത് പാര്ട്ടിക്കുള്ളിലെ നിശബ്ദമായ അവഗണനയുടെ സാക്ഷ്യപത്രമാണ്.
അടിയന്തരാവസ്ഥയ്ക്കെതിരായ പോരാട്ടത്തില് തകര്ന്ന വാച്ചിനൊപ്പം തന്റെ വാച്ച് കെട്ടല് മോഹവും ഉപേക്ഷിച്ചു. പോരാളി, ഭരണാധികാരി, കവി എന്നീ വേഷപ്പകര്ച്ചകളിലൂടെ ആറര പതിറ്റാണ്ട് അദ്ദേഹം പാര്ട്ടിയെ നയിച്ചു. കായംകുളത്തും അമ്പലപ്പുഴയിലുമായി അഞ്ചുതവണ നിയമസഭയിലെത്തിയ സുധാകരന്, ദേവസ്വം മന്ത്രിയായിരിക്കെ ദലിതരെ പൂജാരിമാരായി നിയമിച്ചുകൊണ്ട് നടത്തിയ ‘നിശബ്ദ വിപ്ലവം’ ചരിത്രത്തിന്റെ ഭാഗമാണ്. എന്നിട്ടും, സ്വന്തം പാര്ട്ടിയില് നിന്ന് അദ്ദേഹം നേരിട്ടത് കടുത്ത പരീക്ഷണങ്ങളായിരുന്നു.
വി.എസ്. അച്യുതാനന്ദന്റെ വിശ്വസ്തനായിരുന്ന സുധാകരന് പിന്നീട് ഔദ്യോഗിക പക്ഷത്തിനൊപ്പം ഉറച്ചുനിന്നെങ്കിലും ആലപ്പുഴയിലെ പ്രാദേശിക രാഷ്ട്രീയ പോരില് അദ്ദേഹം പലപ്പോഴും ഒറ്റപ്പെട്ടു. 2021-ല് അമ്പലപ്പുഴയില് സീറ്റ് നിഷേധിക്കപ്പെട്ടതും, തുടര്ന്ന് തിരഞ്ഞെടുപ്പ് പ്രചാരണത്തില് സജീവമായില്ലെന്ന എളമരം കരീം റിപ്പോര്ട്ടിന്റെ പേരില് പരസ്യമായി ശാസിക്കപ്പെട്ടതും സുധാകരനെ മുറിപ്പെടുത്തി. കരീമിന്റേത് കള്ള റിപ്പോര്ട്ടാണെന്ന് തുറന്നടിച്ചുകൊണ്ടാണ് അദ്ദേഹം ഇപ്പോള് പടിയിറങ്ങുന്നത്.
നിയമസഭാ തിരഞ്ഞെടുപ്പ് പടിവാതില്ക്കല് എത്തിനില്ക്കെ സി.പി.എമ്മിനെ സംബന്ധിച്ചിടത്തോളം ഈ കൊഴിഞ്ഞുപോക്ക് നിസ്സാരമല്ല. സുധാകരനൊപ്പം ഐഷാ പോറ്റി, എസ്. രാജേന്ദ്രന്, പി.കെ. ശശി തുടങ്ങി നാല് മുന് എം.എല്.എമാരാണ് പാര്ട്ടി വിട്ടിരിക്കുന്നത്. കൊട്ടാരക്കരയില് യു.ഡി.എഫ് സ്ഥാനാര്ത്ഥിയായി ഐഷാ പോറ്റിയും ദേവികുളത്ത് എന്.ഡി.എയ്ക്കായി എസ്. രാജേന്ദ്രനും ജനവിധി തേടുന്നത് പാര്ട്ടിയെ പ്രതിരോധത്തിലാക്കുന്നു.
ആലപ്പുഴയില് ജി. സുധാകരന് സ്വതന്ത്ര സ്ഥാനാര്ത്ഥിത്വം പ്രഖ്യാപിച്ചതോടെ ജില്ലയിലെ സി.പി.എം വോട്ടുബാങ്കില് വലിയ വിള്ളലുണ്ടാകുമെന്ന് ഉറപ്പാണ്. പയ്യന്നൂരില് വി. കുഞ്ഞികൃഷ്ണന് ഉയര്ത്തുന്ന ഭീഷണിയും പാര്ട്ടിക്ക് തലവേദനയാകുന്നു. വി.എസ് പക്ഷക്കാരനായിരുന്ന എ. സുരേഷ് മലമ്പുഴയില് യു.ഡി.എഫിനായി മത്സരിച്ചേക്കുമെന്ന റിപ്പോര്ട്ടുകള് കൂടി വരുമ്പോള് സി.പി.എമ്മിന്റെ കോട്ടകള് ഒന്നൊന്നായി ഇളകുകയാണ്.
വിഭാഗീയത ഉന്മൂലനം ചെയ്ത കരുത്തനായ നേതാവായി മുഖ്യമന്ത്രി പിണറായി വിജയന് വാഴ്ത്തപ്പെടുമ്പോഴാണ് പാര്ട്ടിക്കുള്ളില് ഇത്രയും വലിയ വിള്ളലുകള് പ്രത്യക്ഷപ്പെടുന്നത്. ചാനല് ചര്ച്ചകളില് പാര്ട്ടിയെ പ്രതിരോധിച്ചിരുന്ന റെജി ലൂക്കോസ് ബി.ജെ.പിയിലേക്കും ബി.എന്. ഹസ്കര് ആര്.എസ്.പിയിലേക്കും പോയത് രാഷ്ട്രീയ കേരളത്തെ ഞെട്ടിച്ചു. തിരുവനന്തപുരത്തെ മധു മുല്ലശ്ശേരിയും കൊല്ലത്തെ സുജാ ചന്ദ്രബാബുവും പാര്ട്ടിയുടെ ഉരുക്കുകോട്ടകളില് നിന്ന് പുറത്തുപോയവരാണ്.
സംസ്ഥാന നേതൃത്വത്തിന്റെ വീഴ്ചകളും അവഗണനയുമാണ് ഈ കൊഴിഞ്ഞുപോക്കിന് ആക്കം കൂട്ടുന്നത്. അമ്പലപ്പുഴയില് ഭൂരിപക്ഷം കുറഞ്ഞതിന് തന്നെ ബലിയാടാക്കിയ എളമരം കരീമിനെതിരെ സുധാകരന് നടത്തിയ വെളിപ്പെടുത്തലുകള് പാര്ട്ടിക്കുള്ളിലെ ജനാധിപത്യം ചോദ്യം ചെയ്യുന്നതാണ്. തന്നെ പുറത്താക്കാന് തയ്യാറാക്കിയ 22 ആരോപണങ്ങളുള്ള കള്ള റിപ്പോര്ട്ടാണ് കരീമിന്റേതെന്ന് അദ്ദേഹം വാര്ത്താസമ്മേളനത്തില് തുറന്നടിച്ചു.
കൊട്ടാരക്കരയില് താന് കൊണ്ടുവന്ന പദ്ധതികളുടെ ഉദ്ഘാടനത്തില് പോലും തന്നെ ഒഴിവാക്കി അപമാനിച്ചതാണ് ഐഷാ പോറ്റിയെ കോണ്ഗ്രസിലേക്ക് നയിച്ചത്. കണ്ണൂരില് രക്തസാക്ഷി ഫണ്ട് ക്രമക്കേട് ആരോപിച്ച വി. കുഞ്ഞികൃഷ്ണനെ സംരക്ഷിക്കുന്നതിന് പകരം ഒറ്റപ്പെടുത്തിയതാണ് അവിടുത്തെ പ്രശ്നങ്ങള്ക്ക് കാരണം. ഇടുക്കിയിലെ പ്രാദേശിക പ്രശ്നങ്ങള് പരിഹരിക്കുന്നതില് നേതൃത്വം പരാജയപ്പെട്ടതോടെ എസ്. രാജേന്ദ്രന് ബി.ജെ.പി പാളയത്തിലെത്തി.
ബേപ്പൂരില് പി.വി. അന്വര് ഉയര്ത്തുന്ന വെല്ലുവിളിയും പാര്ട്ടിയെ വിറപ്പിക്കുന്നുണ്ട്. മുമ്പൊരിക്കലും ഉണ്ടായിട്ടില്ലാത്ത വിധം ഇടതുപക്ഷ പാളയത്തില് നിന്ന് പ്രമുഖ നേതാക്കള് കൂട്ടത്തോടെ പുറത്തുപോകുമ്പോള്, പാര്ട്ടിയുടെ അടിത്തറ തന്നെയാണ് ഇളകുന്നത്. ഇനിയാരൊക്കെ പടിയിറങ്ങും എന്ന ഭീതിയിലാണ് എ.കെ.ജി സെന്റര്.
ആറര പതിറ്റാണ്ടിന്റെ ചുവപ്പ് ചരിത്രം നെഞ്ചേറ്റിയ സുധാകരന് ഇനി സ്വതന്ത്ര പോരാട്ടത്തിന്റെ വഴിയിലാണ്. ഭരണനിപുണതയും കവിതയും നിലപാടുകളും ഒത്തുചേര്ന്ന സുധാകരന്റെ പടിയിറക്കം ആലപ്പുഴയുടെ രാഷ്ട്രീയ ഭൂമികയെ മാറ്റിവരയ്ക്കുമെന്ന് തീര്ച്ച. പാര്ട്ടി തിരുത്തല് ശക്തിയായി അദ്ദേഹം തുടരുമെന്ന് പ്രഖ്യാപിക്കുമ്പോള്, അത് വരാനിരിക്കുന്ന നിയമസഭാ തിരഞ്ഞെടുപ്പില് സി.പി.എമ്മിന് കനത്ത വെല്ലുവിളിയാകും.
പാര്ട്ടി സെക്രട്ടറി എന്ന നിലയില് വിഭാഗീയത അവസാനിപ്പിച്ചെന്ന് അവകാശപ്പെടുന്നവര്ക്ക് മുന്നില്, നേതാക്കളുടെ ഈ പരസ്യമായ പടനീക്കം വലിയൊരു ചോദ്യചിഹ്നമാണ്. സംഘടനാ ശേഷി ഉപയോഗിച്ച് വിയോജിപ്പുകളെ അടിച്ചമര്ത്തുന്ന രീതി ഇനി എത്രകാലം ഫലിക്കുമെന്നത് കണ്ടറിയണം. പത്തനംതിട്ടയില് പത്മകുമാറിന്റെ പുറത്താക്കലോടെ തുടങ്ങിയ ശുദ്ധീകരണം പാര്ട്ടിയെ രക്ഷിക്കുമോ അതോ കൂടുതല് തളര്ത്തുമോ എന്നതാണ് വരുംദിനങ്ങളിലെ ചര്ച്ച.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
രാഹുൽ മാങ്കൂട്ടത്തിന്റെ ജാമ്യ വിധിയിൽ നിർണായക നിരീക്ഷണങ്ങളുമായി ഹൈക്കോടതി ; ബന്ധം തകരുമ്പോൾ അത് പീഡനക്കേസാക്കരുത്’, ലൈംഗിക ബന്ധം ഉഭയസമ്മതപ്രകാരമെന്ന് സൂചന
