തിരുവനന്തപുരം: പശ്ചിമേഷ്യയില് യുദ്ധമേഘങ്ങള് ഉരുണ്ടുകൂടുന്നതിനൊപ്പം കേരളത്തില് വേനല്ച്ചൂട് കടുത്തതോടെ സംസ്ഥാനം വലിയൊരു ഊര്ജ്ജപ്രതിസന്ധിയിലേക്ക് നീങ്ങുന്നു. ഗള്ഫ് മേഖലയിലെ സംഘര്ഷം ഇന്ധന ഇറക്കുമതിയെ ബാധിക്കുമെന്ന ആശങ്ക ശക്തമായതോടെ പെട്രോള്, ഡീസല് വില വര്ധനവിന് പിന്നാലെ വൈദ്യുതി നിരക്കും വര്ധിപ്പിക്കേണ്ടി വരുമെന്ന സൂചനയാണ് പുറത്തുവരുന്നത്. സാധാരണക്കാരന്റെ കുടുംബ ബജറ്റിനെ താളംതെറ്റിക്കുന്ന ഇരട്ടപ്രഹരമാണ് വരാനിരിക്കുന്നത്.
സംസ്ഥാനത്തെ വൈദ്യുതി ഉപയോഗം സകല റെക്കോര്ഡുകളും തകര്ത്ത് മുന്നേറുകയാണ്. ബുധനാഴ്ച രാത്രിയിലെ കണക്കനുസരിച്ച് വൈദ്യുതി ആവശ്യകത എക്കാലത്തെയും ഉയര്ന്ന നിലയായ 5802 മെഗാവാട്ടിലെത്തി. 2024 മേയ് മാസത്തിലുണ്ടായ 5797 മെഗാവാട്ടിന്റെ റെക്കോര്ഡാണ് ഇതോടെ പഴങ്കഥയായത്. വരും ദിവസങ്ങളില് ചൂട് ഇനിയും വര്ധിക്കുന്നതോടെ ആവശ്യകത 6000 മെഗാവാട്ട് കടക്കുമെന്നാണ് കെ.എസ്.ഇ.ബി.യുടെ വിലയിരുത്തല്.
ഗള്ഫ് മേഖലയിലെ സംഘര്ഷം അയവില്ലാതെ തുടരുന്നത് ആഗോള വിപണിയില് ക്രൂഡ് ഓയില് വില കുതിച്ചുയരാന് കാരണമായിട്ടുണ്ട്. ഇന്ത്യയിലേക്കുള്ള ഇന്ധന ഇറക്കുമതിയുടെ വലിയൊരു പങ്കും ഈ മേഖലയില് നിന്നായതിനാല്, ഇന്ധനക്ഷാമം ഉണ്ടാകാനുള്ള സാധ്യത തള്ളിക്കളയാനാവില്ല. സ്വകാര്യ എണ്ണക്കമ്പനികള് ഇതിനോടകം തന്നെ വില വര്ധിപ്പിച്ചു കഴിഞ്ഞു. വോട്ടെടുപ്പ് പൂര്ത്തിയാകുന്നതോടെ പൊതുമേഖലാ കമ്പനികളും ലിറ്ററിന് അഞ്ച് രൂപയിലധികം വര്ധിപ്പിച്ചേക്കും.
ഇന്ധനവില ഉയരുന്നത് ചരക്കുനീക്കത്തെ ബാധിക്കുന്നതിനൊപ്പം താപനിലയങ്ങളിലെ ഉല്പ്പാദനച്ചെലവും വര്ധിപ്പിക്കും. പുറത്തുനിന്ന് വന്വില കൊടുത്ത് വൈദ്യുതി വാങ്ങേണ്ടി വരുന്നത് കെ.എസ്.ഇ.ബി.യുടെ സാമ്പത്തിക അടിത്തറയെ ബാധിച്ചിട്ടുണ്ട്. ഉപഭോഗം കുതിച്ചുയരുന്ന സാഹചര്യത്തില് സര്ചാര്ജ് ഇനത്തിലോ അല്ലാതെയോ വൈദ്യുതി നിരക്ക് വര്ധിപ്പിക്കാതെ മുന്നോട്ടുപോകാന് കഴിയില്ലെന്ന നിലപാടിലാണ് ബോര്ഡ്.
സംസ്ഥാനത്തെ ഡാമുകളിലെ ജലനിരപ്പ് ആശങ്കാജനകമായി കുറഞ്ഞുകൊണ്ടിരിക്കുകയാണ്. ആഭ്യന്തര ഉല്പ്പാദനം കുറയുന്നതോടെ കേന്ദ്ര വിഹിതത്തെയും പുറം കരാറുകളെയുമാണ് കേരളത്തിന് പ്രധാനമായും ആശ്രയിക്കേണ്ടി വരുന്നത്. എന്നാല് കടുത്ത ചൂടില് ഉത്തരേന്ത്യന് സംസ്ഥാനങ്ങളിലും വൈദ്യുതി ആവശ്യകത കൂടിയതോടെ പുറത്തുനിന്ന് വൈദ്യുതി ലഭിക്കുന്നതിനും വലിയ തടസ്സങ്ങള് നേരിടുന്നുണ്ട്.
ചൂട് കടുത്തതോടെ വീടുകളിലും ഓഫീസുകളിലും എയര്കണ്ടീഷണറുകളുടെ ഉപയോഗം ക്രമാതീതമായി വര്ധിച്ചു. ഇതാണ് രാത്രികാലങ്ങളില് പീക്ക് ലോഡ് ഉയരാന് പ്രധാന കാരണം. നിലവിലെ റെക്കോര്ഡ് മറികടന്ന് ബുധനാഴ്ച 10.803 കോടി യൂണിറ്റ് വൈദ്യുതിയാണ് സംസ്ഥാനം ആകെ ഉപയോഗിച്ചത്. വരും ആഴ്ചകളില് ഇത് 12 കോടി യൂണിറ്റിലേക്ക് നീങ്ങിയാല് ലോഡ് ഷെഡിംഗ് ഉള്പ്പെടെയുള്ള നിയന്ത്രണങ്ങളിലേക്ക് കടക്കേണ്ടി വരുമെന്ന് ആശങ്കയുണ്ട്.
ഗള്ഫ് യുദ്ധഭീതി പ്രവാസികളെയും ആശങ്കയിലാക്കുന്നുണ്ട്. കേരളത്തിന്റെ സാമ്പത്തിക നട്ടെല്ലായ പ്രവാസി വരുമാനത്തില് കുറവുണ്ടായാല് അത് സംസ്ഥാനത്തിന്റെ വിപണിയെയും ബാധിക്കും. വിമാന ടിക്കറ്റ് നിരക്കിലെ വര്ധനവും ഇന്ധനവിലക്കയറ്റവും പ്രവാസികളുടെ നാട്ടിലേക്കുള്ള യാത്രകളെയും അനിശ്ചിതത്വത്തിലാക്കി.
വൈദ്യുതി പ്രതിസന്ധി മറികടക്കാന് ഉപഭോക്താക്കള് സ്വയം നിയന്ത്രണം ഏര്പ്പെടുത്തണമെന്ന് അധികൃതര് അഭ്യര്ത്ഥിക്കുന്നു. രാത്രി ഏഴ് മുതല് 11 വരെയുള്ള സമയങ്ങളില് അമിതമായി വൈദ്യുതി വലിച്ചെടുക്കുന്ന ഉപകരണങ്ങള് ഒഴിവാക്കണമെന്നാണ് നിര്ദ്ദേശം. എന്നാല് കത്തുന്ന ചൂടില് ഫാനോ എ.സിയോ ഇല്ലാതെ ഇരിക്കാന് കഴിയില്ലെന്നത് ജനങ്ങളെ ദുരിതത്തിലാക്കുന്നു.
ഇന്ധനവില വര്ധനവ് അവശ്യസാധനങ്ങളുടെ വിലക്കയറ്റത്തിലേക്കും നയിക്കും. പച്ചക്കറി മുതല് നിത്യോപയോഗ സാധനങ്ങള് വരെ അന്യസംസ്ഥാനങ്ങളില് നിന്ന് ലോറികളിലെത്തുന്ന കേരളത്തിന് ഡീസല് വില വര്ധനവ് ഇടിത്തീയാകും. തിരഞ്ഞെടുപ്പിന് ശേഷം വരാനിരിക്കുന്ന വിലക്കയറ്റത്തിന്റെ കാഠിന്യം എത്രത്തോളമുണ്ടാകുമെന്ന ഭീതിയിലാണ് വിപണി.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
പണ്ട് ‘നിങ്ങളെന്നെ കമ്മ്യൂണിസ്റ്റാക്കി’ എന്ന നാടകത്തിലൂടെ കേരളത്തില് കമ്മ്യൂണിസ്റ്റ് പ്രസ്ഥാനങ്ങള് വളര്ന്നതു പോലെ ഇന്ന് തങ്ങള്ക്ക് അനഭിമതരായവരെ എല്ലാം ഗവര്ണറുമായി ചേര്ന്ന് നാടകം കളിച്ച് ‘ബിജെപിക്കാര് ആക്കി ‘ തീര്ക്കുകയാണ് സിപിഎം; ആരാണ് സാങ്കേതിക സര്വ്വകലാശാല വിസി സിസാ തോമസ്? ആ കഥ ഷിബു ബേബി ജോണ് പറയുമ്പോള്
