കൊല്ലം: കലാലയ മുറ്റങ്ങളിലും നാടന്പാട്ട് വേദികളിലും വിപ്ലവവീര്യം തുളുമ്പുന്ന മുദ്രാവാക്യങ്ങള്ക്കിടയിലും ആവേശമായിരുന്ന ലക്ഷ്മി ഇനി ഓര്മ്മ. ശാസ്താംകോട്ട സിനിമാപറമ്പിലുണ്ടായ ദാരുണമായ വാഹനാപകടത്തില് കൊട്ടാരക്കരയിലെ എസ്.എഫ്.ഐയുടെ കരുത്തുറ്റ പെണ്കരുത്ത്, 20-കാരിയായ ലക്ഷ്മി വിടപറഞ്ഞു. പരിപാടി കഴിഞ്ഞ് പുലര്ച്ചെ മടങ്ങിയ നാടന്പാട്ട് സംഘത്തിന്റെ വാഹനം നിയന്ത്രണം വിട്ട് മരത്തിലിടിച്ചായിരുന്നു ദുരന്തം.
മരണത്തിന് മണിക്കൂറുകള്ക്ക് മുന്പ് ലക്ഷ്മി തന്റെ ഇന്സ്റ്റഗ്രാമില് പങ്കുവെച്ച വീഡിയോ ഇപ്പോള് ഒരു നാടിന്റെയാകെ നോവായി മാറുകയാണ്. ചടയമംഗലത്തെ വേദിയില് നാടന്പാട്ടു പാടി കാണികളെ കയ്യിലെടുത്ത ശേഷം, പുലര്ച്ചെ രണ്ട് മണിക്ക് തളര്ച്ചയോടെ സുഹൃത്തുക്കള്ക്കൊപ്പം വിശ്രമിക്കുന്ന വീഡിയോയായിരുന്നു അത്. ‘പരിപാടി കഴിഞ്ഞു, ഇനി വീട്ടിലേക്ക് പോകാന് ഒരുങ്ങുകയാണ്’ എന്ന് ചിരിയോടെ പറയുന്ന ലക്ഷ്മി, അത് തന്റെ അവസാന യാത്രയാകുമെന്ന് സ്വപ്നത്തില് പോലും കരുതിയിരുന്നില്ല.
സ്കൂള് കാലഘട്ടം മുതല് മിമിക്രി വേദികളിലെ മിന്നുംതാരമായിരുന്നു ലക്ഷ്മി. വാണി ജയറാം, ലതാ മങ്കേഷ്കര്, വൈക്കം വിജയലക്ഷ്മി എന്നിവരുടെ പാട്ടുകള് മാത്രമല്ല, വെള്ളാപ്പള്ളി നടേശന്റെ ശബ്ദം പോലും അതിമനോഹരമായി ഈ പെണ്കുട്ടി അനുകരിക്കുമായിരുന്നു. രണ്ട് വട്ടം സംസ്ഥാന സ്കൂള് കലോത്സവത്തില് ഒന്നാം സ്ഥാനം നേടിയ ലക്ഷ്മി, മഴവില് മനോരമയിലെ ‘ഒരു ചിരി ഇരു ചിരി ബമ്പര് ചിരി’യിലൂടെ ലക്ഷക്കണക്കിന് പ്രേക്ഷകരുടെ പ്രിയങ്കരിയായി മാറി. ടിവി കണ്ടാണ് താന് ഈ കല പഠിച്ചെടുത്തതെന്ന് ലക്ഷ്മി അഭിമാനത്തോടെ പറയുമായിരുന്നു.
കുഞ്ഞിലേ അച്ഛനെ നഷ്ടപ്പെട്ട ലക്ഷ്മി, അമ്മ ഷീബയ്ക്ക് തണലായി നിന്നാണ് വളര്ന്നത്. എസ്.എഫ്.ഐ കൊട്ടാരക്കര ഏരിയ കമ്മിറ്റി അംഗമെന്ന നിലയില് രാഷ്ട്രീയത്തിലും സജീവമായിരുന്നു. ‘മിമിക്രി കൊണ്ട് ഒന്നും നേടാനാവില്ല, വല്ല തൂപ്പ് ജോലിക്കും പൊയ്ക്കൂടെ’ എന്ന് ചോദിച്ച് തളര്ത്താന് നോക്കിയവര്ക്ക് മുന്നില് തലയുയര്ത്തി നിന്ന് പോരാടിയ കലാകാരിയായിരുന്നു അവള്. ‘എന്നെ അംഗീകരിക്കുന്ന ഒരു നാള് വരും’ എന്ന് ലക്ഷ്മി കുറിച്ച വരികള് സത്യമായി; പക്ഷേ ലോകമറിയുന്ന വലിയ കലാകാരിയാകണമെന്ന മോഹം ബാക്കിയാക്കി അവള് പാതിവഴിയില് യാത്ര അവസാനിപ്പിച്ചു.
കൊട്ടാരക്കര സെന്റ് ഗ്രിഗേറിയസ് കോളേജിലെ ബി.എ പൊളിറ്റിക്സ് അവസാന വര്ഷ വിദ്യാര്ത്ഥിയായ ലക്ഷ്മിയുടെ വേര്പാട് സഹപാഠികള്ക്കും നാടിനും താങ്ങാനാവുന്നതിലും അപ്പുറമാണ്. കടയ്ക്കല് ചിതറ മാടന്കാവ് ലക്ഷ്മി ഭവനത്തില് ഇപ്പോള് വേദന മാത്രമാണ്.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
‘സര്വ്വം മായ’യ്ക്ക് ശേഷം ഹിറ്റടിക്കാന് നിവിന് പോളി വീണ്ടും വരുന്നു! ബോബി-സഞ്ജയ് ടീമിന്റെ ‘ബേബി ഗേള്’
