തിരുവനന്തപുരം: അറബിക്കടലിന്റെ അന്തരീക്ഷച്ചുഴികളും പശ്ചിമഘട്ട മലനിരകളിലെ കാറ്റിന്റെ ഗതിമാറ്റങ്ങളും പുതിയൊരു മഴക്കാലത്തേക്ക് കേരളത്തെ കൂട്ടിക്കൊണ്ടുപോവുകയാണ്. വരുംദിവസങ്ങളില് സംസ്ഥാനത്ത് പരക്കെ കനത്ത മഴ പെയ്യുമെന്ന കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ് വെറുമൊരു മഴക്കാല പ്രവചനമല്ല, മറിച്ച് വരാനിരിക്കുന്ന പ്രകൃതിവ്യതിയാനങ്ങളുടെ ഒരു സൂചനപത്രം കൂടിയാണ്. ഇതിന്റെ പശ്ചാത്തലത്തില് സംസ്ഥാനത്തെ എട്ട് ജില്ലകളില് ഇതിനകം തന്നെ യെല്ലോ അലര്ട്ട് പ്രഖ്യാപിച്ചുകഴിഞ്ഞു. തിരുവനന്തപുരം മുതല് കോഴിക്കോട് വരെയുള്ള തെക്കന്-മധ്യ കേരളത്തിലാണ് പ്രകൃതി ആദ്യം കനക്കാന് പോകുന്നത്.
കേവലം ഒരു ദിവസത്തെ മഴ മുന്നറിയിപ്പില് ഒതുങ്ങുന്നതല്ല ഇപ്പോഴത്തെ അന്തരീക്ഷ സാഹചര്യം. ജൂണ് മാസത്തിന്റെ ആദ്യവാരം അവസാനിക്കുന്നതുവരെ നീളുന്ന കനത്ത മഴയ്ക്കുള്ള സാധ്യതയാണ് ഉപഗ്രഹചിത്രങ്ങള് നല്കുന്നത്. ഞായറാഴ്ചയോടെ മഴയുടെ കേന്ദ്രം വടക്കന് കേരളത്തിലേക്കും മലയോര മേഖലകളിലേക്കും മാറും. കോട്ടയം, എറണാകുളം, ഇടുക്കി, കോഴിക്കോട്, വയനാട്, കണ്ണൂര് ജില്ലകളില് ഞായറാഴ്ച അതീവ ജാഗ്രതാ നിര്ദ്ദേശം നല്കിയിട്ടുണ്ട്. പെയ്യുന്ന മഴയുടെ അളവിലുണ്ടാകുന്ന പെട്ടെന്നുള്ള വര്ദ്ധനവ് മലയോര മേഖലകളെ എങ്ങനെ ബാധിക്കുമെന്ന ആശങ്ക അധികൃതര്ക്കുണ്ട്.
ജൂണ് ഒന്നിന് പത്തനംതിട്ട, ആലപ്പുഴ, കോട്ടയം, എറണാകുളം, തൃശൂര്, മലപ്പുറം, കോഴിക്കോട്, വയനാട് ജില്ലകളിലും, തൊട്ടടുത്ത ദിവസം കാസര്ഗോഡ് അടക്കമുള്ള വടക്കന് അതിര്ത്തി ജില്ലകളിലും യെല്ലോ അലര്ട്ട് നീളുന്നുണ്ട്. തുടര്ച്ചയായ ദിവസങ്ങളില് ഒരേ പ്രദേശങ്ങളില് മഴ പെയ്യുമ്പോള് അത് മണ്ണിന്റെ ഘടനയെയും ജലാശയങ്ങളിലെ ജലനിരപ്പിനെയും എങ്ങനെ സ്വാധീനിക്കുമെന്നതാണ് പ്രധാന പ്രതിസന്ധി. കഴിഞ്ഞ കുറച്ചുകാലങ്ങളായി കേരളം നേരിടുന്ന ‘മേഘവിസ്ഫോടന’ സമാനമായ പ്രതിഭാസങ്ങള് ഇത്തവണയും ആവര്ത്തിക്കുമോ എന്ന ഭീതിയിലാണ് കാലാവസ്ഥാ നിരീക്ഷകര്.
ലഭ്യമാകുന്ന പ്രവചനങ്ങള് പ്രകാരം ജൂണ് മൂന്നാം തീയതി വരെ ഒന്നിടവിട്ട ദിവസങ്ങളില് കേരളത്തിന്റെ ഒട്ടുമിക്ക ജില്ലകളിലും ശക്തമായ മഴ തുടരും. സാധാരണയായി മണ്സൂണ് ആരംഭിക്കുമ്പോള് ലഭിക്കുന്ന തണുത്ത കാറ്റും ചിട്ടയായ മഴയുമല്ല സമീപവര്ഷങ്ങളില് കേരളത്തില് കാണുന്നത്. ചുരുങ്ങിയ മണിക്കൂറുകള്ക്കുള്ളില് അതിശക്തമായ മഴ പെയ്യുകയും, പിന്നീട് ദീര്ഘനേരം മഴ മാറിനില്ക്കുകയും ചെയ്യുന്ന പുതിയൊരു രീതിയാണിത്. ഇത് നഗരപ്രദേശങ്ങളില് പെട്ടെന്നുള്ള വെള്ളപ്പൊക്കത്തിനും (എഹമവെ എഹീീറ)െ മലയോരങ്ങളില് ഉരുള്പൊട്ടലിനും കാരണമാകുന്നു.
ഈ മഴക്കാലത്ത് കേരളം ഏറ്റവും കൂടുതല് ഭയപ്പെടേണ്ടത് ദുരന്തനിവാരണ രംഗത്തെ നമ്മുടെ മുന്കരുതലുകളുടെ പോരായ്മകളെയാണ്. യെല്ലോ അലര്ട്ട് എന്നത് ‘മുന്നൊരുക്കങ്ങള് നടത്തുക’ എന്ന ഘട്ടത്തെയാണ് സൂചിപ്പിക്കുന്നത്. എന്നാല് പലപ്പോഴും ഈ മുന്നറിയിപ്പുകളെ ഗൗരവമായി കാണാന് പൊതുസമൂഹം തയ്യാറാകാറില്ല. നദികളിലെ എക്കലും മണലും കൃത്യമായി നീക്കം ചെയ്യാത്തതും, നഗരങ്ങളിലെ ഓടകളുടെ നിര്മ്മാണത്തിലെ അശാസ്ത്രീയതയും ചെറിയൊരു മഴയെപ്പോലും വലിയൊരു ദുരന്തമാക്കി മാറ്റാന് പോന്നവയാണ്.
കാലാവസ്ഥാ വ്യതിയാനത്തിന്റെ പ്രത്യാഘാതങ്ങള് ഏറ്റവും കൂടുതല് അനുഭവിക്കുന്ന ഒരു സംസ്ഥാനമായി കേരളം മാറിയിരിക്കുന്നു എന്നത് ഒരു യാഥാര്ത്ഥ്യമാണ്. അറബിക്കടലിലെ താപനിലയിലുണ്ടാകുന്ന അസ്വാഭാവികമായ വര്ദ്ധനവാണ് ഇത്രയും പെട്ടെന്ന് അന്തരീക്ഷം വലിഞ്ഞുമുറുകാന് കാരണം. ഇതിന്റെ ഫലമായി തീരദേശങ്ങളില് അസാധാരണമായ കടലാക്രമണവും ശക്തമായ കാറ്റും ഉണ്ടാകാന് സാധ്യതയുണ്ട്. മത്സ്യത്തൊഴിലാളികള്ക്കും തീരവാസികള്ക്കും കൃത്യമായ സമയത്ത് സുരക്ഷാ സന്ദേശങ്ങള് എത്തിക്കുക എന്നത് അടിയന്തിര പ്രാധാന്യമുള്ള കാര്യമാണ്.
മഴ കനക്കുന്നതോടെ സംസ്ഥാനത്തെ ഡാമുകളിലെ ജലനിരപ്പ് സൂക്ഷ്മമായി നിരീക്ഷിക്കേണ്ടതുണ്ട്. മുന്വര്ഷങ്ങളിലെ അനുഭവങ്ങളില് നിന്ന് പാഠം ഉള്ക്കൊണ്ട്, ജലസേചന-വൈദ്യുതി വകുപ്പുകള് സംയുക്തമായി അണക്കെട്ടുകളുടെ സംഭരണശേഷി ക്രമീകരിക്കേണ്ടതുണ്ട്. മലയോര മേഖലകളിലേക്ക് കെ.എസ്.ആര്.ടി.സി ഉള്പ്പെടെയുള്ള പൊതുഗതാഗത സംവിധാനങ്ങള്ക്കും വിനോദസഞ്ചാരികള്ക്കും നിയന്ത്രണം ഏര്പ്പെടുത്താന് വൈകരുത്. രാത്രികാല യാത്രകള് പൂര്ണ്ണമായും ഒഴിവാക്കാന് പൊതുജനങ്ങള് തയ്യാറാകണം.
തദ്ദേശസ്വയംഭരണ സ്ഥാപനങ്ങളുടെ നേതൃത്വത്തില് വാര്ഡുതല ദുരന്തനിവാരണ സമിതികള് ഉണര്ന്നു പ്രവര്ത്തിക്കേണ്ട സമയമാണിത്. താഴ്ന്ന പ്രദേശങ്ങളില് താമസിക്കുന്നവരെ മാറ്റിപ്പാര്പ്പിക്കാനുള്ള ദുരിതാശ്വാസ ക്യാമ്പുകള് മുന്കൂട്ടി കണ്ടെത്തണം. പകര്ച്ചവ്യാധികള് പടര്ന്നുപിടിക്കാനുള്ള സാധ്യത മുന്നില്ക്കണ്ട് ആരോഗ്യവകുപ്പ് പ്രത്യേക ജാഗ്രതാ നിര്ദ്ദേശം നല്കേണ്ടതുണ്ട്. മഴ തുടങ്ങുന്നതിന് മുന്പ് തന്നെ ശുചീകരണ പ്രവര്ത്തനങ്ങള് പൂര്ത്തിയാക്കാന് സാധിച്ചിട്ടുണ്ടോ എന്നത് പുനഃപരിശോധിക്കപ്പെടണം.
കേന്ദ്ര കാലാവസ്ഥാ വകുപ്പിന്റെ പ്രവചനങ്ങള് പലപ്പോഴും പ്രാദേശിക തലത്തില് വ്യത്യാസപ്പെടാറുണ്ട്. അതിനാല്, ‘ഓറഞ്ച്’ അലര്ട്ട് വന്നാല് മാത്രം മാറിച്ചിന്തിക്കാം എന്ന് കരുതുന്നത് അപകടമാണ്. ഇപ്പോഴത്തെ യെല്ലോ അലര്ട്ട് വരും ദിവസങ്ങളില് കൂടുതല് ശക്തമായ മുന്നറിയിപ്പുകളിലേക്ക് മാറാനുള്ള സാധ്യത തള്ളിക്കളയാനാവില്ല. ദുരന്തം വിതച്ച മുന്വര്ഷങ്ങളിലെ പ്രളയങ്ങളുടെ ഓര്മ്മകള് നമ്മുടെ മുന്നിലുള്ളപ്പോള്, പ്രകൃതി നല്കുന്ന ചെറിയ സൂചനകളെപ്പോലും അതിവിദഗ്ദ്ധമായി പ്രതിരോധിക്കാന് ഭരണകൂടവും ജനങ്ങളും ഒരുപോലെ സജ്ജമാകേണ്ടതുണ്ട്.
പ്രകൃതിയുടെ ഈ മാറ്റങ്ങള്ക്ക് മുന്നില് ഭയപ്പെടുകയല്ല, മറിച്ച് ശാസ്ത്രീയമായ ജാഗ്രത പുലര്ത്തുകയാണ് വേണ്ടത്. വരും ദിവസങ്ങളില് മഴ ശക്തിപ്പെടുമ്പോള് കണ്ട്രോള് റൂമുകളുടെ പ്രവര്ത്തനം 24 മണിക്കൂറാക്കുക, മാധ്യമങ്ങളിലൂടെയുള്ള ഔദ്യോഗിക അറിയിപ്പുകള് കൃത്യമായി പിന്തുടരുക എന്നിവ പ്രധാനമാണ്. പ്രകൃതി ദുരന്തങ്ങളെ തടയാന് നമുക്കാവില്ല, എന്നാല് കൃത്യമായ ആസൂത്രണത്തിലൂടെയും ജാഗ്രതയിലൂടെയും മനുഷ്യജീവനും സ്വത്തിനും സംഭവിക്കുന്ന നാശനഷ്ടങ്ങള് പൂര്ണ്ണമായും ഒഴിവാക്കാന് നമുക്ക് സാധിക്കും. ആ ബോധ്യമാണ് ഈ മഴക്കാലത്ത് കേരളത്തിന് ഉണ്ടാകേണ്ടത്.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
“മുഖ്യമന്ത്രിയുടെ നിർദ്ദേശം പാലിച്ചതിന് , സൽപ്പേര് പോയി”;നടി ശ്രീവിദ്യ മുല്ലച്ചേരി:സോഷ്യൽ മീഡിയയിൽ വൈറലായി വീഡിയോ
