ന്യൂഡല്ഹി/തിരുവനന്തപുരം: കേന്ദ്ര മന്ത്രിസഭാ പുനഃസംഘടനയും ബിജെപി ദേശീയ നേതൃത്വത്തിലെ അഴിച്ചുപണികളും സജീവ ചര്ച്ചയാകുന്നതിനിടെ, കേരള ബിജെപിയിലെ വിട്ടുമാറാത്ത ഗ്രൂപ്പിസത്തിന്റെ ഞെട്ടിക്കുന്ന കഥകള് വീണ്ടും പുറത്തേക്ക്. മൂന്നാം മോദി സര്ക്കാരിന്റെ രണ്ടാം വാര്ഷികത്തോട് അനുബന്ധിച്ച് കേന്ദ്ര മന്ത്രിസഭയിലും പാര്ട്ടി ഭാരവാഹിത്വത്തിലും വലിയ മാറ്റങ്ങള് ഉറപ്പായ പശ്ചാത്തലത്തിലാണ് കേരള ഘടകത്തെ പിടിച്ചുകുലുക്കുന്ന പുതിയ വിവാദങ്ങള് പുകയുന്നത്. പാര്ട്ടിയിലെ മുതിര്ന്ന നേതാവും മുന് സംസ്ഥാന അധ്യക്ഷനുമായ വി. മുരളീധരനെ ഒതുക്കാന് പാര്ട്ടിയിലെ ഒരു വിഭാഗം സംസ്ഥാന-ദേശീയ തലങ്ങളില് ശക്തമായ കരുനീക്കം നടത്തിയതായാണ് ലഭിക്കുന്ന വിവരങ്ങള്.
കേരളത്തില് ഇത്തവണ ബിജെപി ചരിത്രവിജയം നേടിയ മൂന്ന് സീറ്റുകളില് ഏറ്റവും ശക്തവും കടുത്തതുമായ പോരാട്ടം നടന്നത് തിരുവനന്തപുരത്തെ കഴക്കൂട്ടം മണ്ഡലത്തിലായിരുന്നു. സി.പി.എമ്മിന്റെ കരുത്തനായ നേതാവും മുന് മന്ത്രിയുമായ കടകംപള്ളി സുരേന്ദ്രനെ അട്ടിമറിച്ചാണ് വി. മുരളീധരന് നിയമസഭയിലേക്ക് വിജയം നേടിയത്. ഇത്രയും വലിയൊരു രാഷ്ട്രീയ പോരാട്ടം നയിച്ച് ജയിച്ചുകയറിയ വി. മുരളീധരനെ കേരള ബിജെപിയുടെ നിയമസഭാ കക്ഷി നേതാവാക്കുമെന്നാണ് രാഷ്ട്രീയ കേന്ദ്രങ്ങള് ഒന്നടങ്കം കരുതിയിരുന്നത്. എന്നാല് എല്ലാ അണികളെയും അമ്പരപ്പിച്ചുകൊണ്ട് മുരളീധരനെ വെട്ടി ബി.ബി. ഗോപകുമാറിനെ നിയമസഭാ കക്ഷി നേതാവായി നിശ്ചയിക്കുകയായിരുന്നു. ഈ വെട്ടിനിരത്തലിന് പിന്നില് കേന്ദ്രമന്ത്രി രാജീവ് ചന്ദ്രശേഖറിന്റെ ശക്തമായ ഇടപെടലുകളാണെന്ന ആക്ഷേപമാണ് ഇപ്പോള് മുരളീധരന് പക്ഷം ഉയര്ത്തുന്നത്.
കേരളത്തില് പാര്ട്ടിക്ക് അടിത്തറയുണ്ടാക്കാന് വര്ഷങ്ങളായി തെരുവില് പോരാടിയ നേതാവാണ് വി. മുരളീധരന്. സി.പി.എമ്മിന്റെ ശക്തമായ കോട്ടയായ കഴക്കൂട്ടത്ത് അത്യന്തം വാശിയേറിയ പോരാട്ടത്തിനൊടുവിലാണ് മുരളീധരന് താമര വിരിയിച്ചത്. മുന് സംസ്ഥാന അധ്യക്ഷന്, മുന് കേന്ദ്രമന്ത്രി എന്നീ നിലകളില് തിളങ്ങിയ ഒരു മുതിര്ന്ന നേതാവിനോട് പാര്ട്ടി ഇത്തരമൊരു ക്രൂരത കാട്ടിയത് അണികള്ക്കിടയില് കടുത്ത അമര്ഷത്തിന് കാരണമായിട്ടുണ്ട്. ബിജെപിയില് സംഘടനാ ശേഷി ശക്തിപ്പെടുത്തിയ സംസ്ഥാന അധ്യക്ഷനായിരുന്നു മുരളീധരന്. നെയ്യാറ്റിന്കര, അരുവിക്കര ഉപതിരഞ്ഞെടുപ്പുകളില് നടത്തിയ ഇടപെടലാണ് കേരളത്തില് ബിജെപിയുടെ കെട്ടുറപ്പ് കൂട്ടിയത്. ഇതൊന്നും അംഗീകരിക്കാതെയാണ് വെട്ടിയൊതുക്കിയത്.
കേരളത്തിലെ ഗ്രൂപ്പ് സമവാക്യങ്ങളില് വി. മുരളീധരനെ മാറ്റിനിര്ത്തിക്കൊണ്ട് സ്വന്തം പിടിമുറുക്കാനാണ് രാജീവ് ചന്ദ്രശേഖറിന്റെ നേതൃത്വത്തിലുള്ള വിഭാഗം ശ്രമിക്കുന്നത്. ഇതിന്റെ ഭാഗമായാണ് നിയമസഭയിലെ നിര്ണ്ണായക പദവിയില് നിന്ന് മുരളീധരനെ ബോധപൂര്വ്വം വെട്ടിമാറ്റിയതെന്നാണ് രാഷ്ട്രീയ നിരീക്ഷകരുടെ വിലയിരുത്തല്. നിയമസഭയില് പാര്ട്ടിയെ നയിക്കാന് ഏറ്റവും യോഗ്യനായ നേതാവിനെ ഗ്രൂപ്പ് കളിയുടെ പേരില് തഴഞ്ഞത് വരും ദിവസങ്ങളില് വലിയ പൊട്ടിത്തെറിക്ക് വഴിതുറക്കും.
കേരളത്തില് നിന്ന് മുരളീധരനെ മാറ്റിനിര്ത്താന് സംസ്ഥാനത്തെ എതിര്ഗ്രൂപ്പ് ശ്രമിക്കുമ്പോഴും ദേശീയ തലത്തില് അദ്ദേഹത്തിന് അര്ഹമായ പരിഗണന നല്കാനാണ് കേന്ദ്ര നേതൃത്വത്തിന്റെ ആലോചന. നാല് സംസ്ഥാനങ്ങളില് പുതിയ അധ്യക്ഷന്മാരെ പ്രഖ്യാപിച്ചുകൊണ്ട് ബിജെപി ദേശീയ നേതൃത്വം അഴിച്ചുപണിക്ക് തുടക്കമിട്ടിട്ടുണ്ട്. ദേശീയ പുനഃസംഘടനയില് കേരളത്തിന് വലിയ പ്രാധാന്യം നല്കാനാണ് പാര്ട്ടി തീരുമാനം. ഇതിന്റെ ഭാഗമായി വി. മുരളീധരന് ബിജെപി ദേശീയ ജനറല് സെക്രട്ടറി പോലെയുള്ള സുപ്രധാന പദവി നല്കിയേക്കുമെന്ന് റിപ്പോര്ട്ടുകളുണ്ട്. കേരളത്തിലെ ഗ്രൂപ്പ് പോര് കാരണം അര്ഹതപ്പെട്ട നിയമസഭാ കക്ഷി നേതാവ് സ്ഥാനം നഷ്ടമായ മുരളീധരനെ ദേശീയ തലത്തിലേക്ക് ഉയര്ത്തി ഡല്ഹിയില് സജീവമാക്കാനാണ് കേന്ദ്രത്തിന്റെ നീക്കം.
ജൂണ് 10-ന് മൂന്നാം മോദി സര്ക്കാരിന്റെ രണ്ടാം വാര്ഷികം പൂര്ത്തിയാകുന്നതോടെ കേന്ദ്ര മന്ത്രിസഭയിലും വന് അഴിച്ചുപണിയുണ്ടാകും. ഡല്ഹി ബിജെപി അധ്യക്ഷനായി കേന്ദ്രമന്ത്രി ഹര്ഷ് മല്ഹോത്രയെ നിയമിച്ചതോടെ മന്ത്രിസഭയില് ഒഴിവുകള് വന്നിട്ടുണ്ട്. വരാനിരിക്കുന്ന യുപി, പഞ്ചാബ്, ഉത്തരാഖണ്ഡ് തുടങ്ങിയ നിയമസഭാ തിരഞ്ഞെടുപ്പുകള് മുന്നില്ക്കണ്ടും, മികച്ച പ്രകടനം കാഴ്ചവെക്കാത്ത മന്ത്രിമാരെ മാറ്റിയും പുതുമുഖങ്ങള്ക്ക് അവസരം നല്കാനുമാണ് പ്രധാനമന്ത്രി നരേന്ദ്ര മോദിയുടെ തീരുമാനം.
കേന്ദ്ര മന്ത്രിസഭയില് കേരളത്തില് നിന്നുള്ള നേതാക്കളില് ആര്ക്കെങ്കിലും ഒരാള്ക്ക് പുതിയതായി പരിഗണന കിട്ടാനുള്ള സാധ്യതയും നിലനില്ക്കുന്നുണ്ട്. എന്നാല് കേരളത്തില് ബിജെപി നേടിയ ചരിത്ര വിജയങ്ങള്ക്ക് പിന്നാലെയും ഗ്രൂപ്പ് പോര് അവസാനിപ്പിക്കാന് നേതാക്കള് തയ്യാറാകാത്തത് കേന്ദ്ര നേതൃത്വത്തിന് തലവേദനയാകുന്നുണ്ട്. കഴക്കൂട്ടം പിടിച്ച കരുത്തനായ നേതാവിനെ സ്വന്തം പാര്ട്ടിയിലെ സഹപ്രവര്ത്തകര് തന്നെ പിന്നില് നിന്ന് കുത്തി ഒതുക്കാന് ശ്രമിക്കുന്നത് വരും ദിവസങ്ങളില് കേരളത്തിലെ ബിജെപിയില് വലിയ ചേരിതിരിവുകള്ക്ക് കാരണമാകുമെന്ന് ഉറപ്പാണ്.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
‘സമരത്തെ പുച്ഛിച്ചവര്ക്ക് വോട്ടില്ല’! ആറന്മുളയില് വീണയെ വീഴ്ത്തിയത് ആശമാരുടെ കലിപ്പ്; അബിന് വര്ക്കിയുടെ വിജയത്തിന് പിന്നിലെ ‘സ്ത്രീശക്തി’; ബിനോയ് വിശ്വത്തിന്റെ കുറ്റസമ്മതം വെറും തട്ടിപ്പെന്ന് മിനി; ചതിക്കഥകള് പുറത്താവുമ്പോള് സിപിഐ പ്രതിരോധത്തില്; ബിനോയിയെ തകര്ത്ത് ആശമാര്
