തിരുവനന്തപുരം: പ്രതിപക്ഷ നേതാവ് പിണറായി വിജയന്റെ വീട്ടില് എന്ഫോഴ്സ്മെന്റ് ഡയറക്ടറേറ്റ് (ഇഡി) നടത്തിയ റെയ്ഡും അതിനുപിന്നാലെയുണ്ടായ സംഘര്ഷവും കേരള രാഷ്ട്രീയത്തെ ഉലയ്ക്കുമ്പോള്, വി.ഡി. സതീശന് മന്ത്രിസഭയെ മുനയില് നിര്ത്തി പുതിയ ചോദ്യങ്ങള് ഉയരുന്നു. പിണറായി വിജയന്റെ വീട്ടില് നിന്ന് ഇഡിക്ക് ലഭിച്ചുവെന്ന് പറയപ്പെടുന്ന ഡയറിയില് ആഭ്യന്തര മന്ത്രി രമേശ് ചെന്നിത്തലയുടെയും, വ്യവസായ മന്ത്രിയും മന്ത്രിസഭയിലെ രണ്ടാമനുമായ പി.കെ. കുഞ്ഞാലിക്കുട്ടിയുടെയും പേരുകള് ഉണ്ടെന്നാണ് ദല്ഹിയില് നിന്നുള്ള സൂചനകള്. ഇതോടെ, കേന്ദ്ര ഏജന്സിയുടെ അടുത്ത ലക്ഷ്യം ഈ രണ്ട് പ്രമുഖ മന്ത്രിമാരാണോ എന്ന ചോദ്യം രാഷ്ട്രീയ വൃത്തങ്ങളില് സജീവമായിരിക്കുകയാണ്.
ശനിയാഴ്ച പണി വേണ്ട, പകരം സമയം കൂട്ടാം; ഹൈക്കോടതി നിര്ദ്ദേശത്തിനെതിരെ അഭിഭാഷകര്; സര്ക്കാരിനോട് നിലപാട് കടുപ്പിച്ച് ജീവനക്കാരും; ശനിയാഴ്ച പൊതു അവധിയാകുമ്പോള്
പ്രതിപക്ഷ നേതാവിന്റെ വീട്ടിലെ റെയ്ഡ് വിവരം സംസ്ഥാന ആഭ്യന്തര വകുപ്പ് അറിഞ്ഞില്ലെന്ന വാദം നിലനില്ക്കെത്തന്നെയാണ്, ആഭ്യന്തര മന്ത്രി രമേശ് ചെന്നിത്തലയുടെ വീട്ടിലേക്കും ഇഡി എത്തിയേക്കുമെന്ന അഭ്യൂഹങ്ങള് ശക്തമാകുന്നത്. ഭരണപക്ഷത്തെ പ്രമുഖര്ക്കെതിരെ കേന്ദ്ര ഏജന്സികള് വലമുറുക്കുന്നത് വി.ഡി. സതീശന് സര്ക്കാരിനെ കടുത്ത പ്രതിരോധത്തിലാക്കിയിട്ടുണ്ട്. അതിനിടെ, പിണറായി വിജയന്റെ വീട്ടിലെ റെയ്ഡിന് ശേഷം പുറത്തിറങ്ങിയ ഇഡി ഉദ്യോഗസ്ഥര്ക്ക് നേരെ ഉണ്ടായ ആക്രമണത്തില് പോലീസിന് സുരക്ഷാവീഴ്ച പറ്റിയിട്ടില്ലെന്ന് ഡിജിപി റവാഡ ചന്ദ്രശേഖര് വ്യക്തമാക്കി. വ്യാഴാഴ്ച രാവിലെ ആഭ്യന്തരമന്ത്രി രമേശ് ചെന്നിത്തലയുമായി നടത്തിയ അടിയന്തര കൂടിക്കാഴ്ചയ്ക്ക് ശേഷമാണ് ഡിജിപി മാധ്യമങ്ങളോട് പ്രതികരിച്ചത്.
കേന്ദ്ര ഏജന്സിയുടെ റെയ്ഡിനെ സംബന്ധിച്ച് സംസ്ഥാന പോലീസിന് മുന്കൂട്ടി അറിയിപ്പൊന്നും ലഭിച്ചിരുന്നില്ലെന്ന് ഡിജിപി പറഞ്ഞു. വിവരം അറിഞ്ഞ ഉടന് തന്നെ ആവശ്യത്തിന് പോലീസുകാരെ സ്ഥലത്ത് വിന്യസിച്ചിരുന്നു. പ്രതിഷേധം നടന്ന വിവിധ സ്ഥലങ്ങളിലായി മുന്നൂറിലധികം പോലീസുകാരെയാണ് നിയോഗിച്ചത്. ആക്രമണം നടന്ന സ്ഥലത്ത് മാത്രം അമ്പതോളം പോലീസുകാരുണ്ടായിരുന്നുവെന്നും ഡിജിപി വിശദീകരിച്ചു. സംഭവത്തില് കര്ശനമായ നിയമനടപടികളുമായി മുന്നോട്ടുപോകാനാണ് ആഭ്യന്തരമന്ത്രി രമേശ് ചെന്നിത്തല നിര്ദേശം നല്കിയിരിക്കുന്നത്. അക്രമവുമായി ബന്ധപ്പെട്ട് എട്ട് പ്രതികളെ ഇതിനകം അറസ്റ്റ് ചെയ്തിട്ടുണ്ടെന്നും, ദൃശ്യങ്ങള് പരിശോധിച്ച് ബാക്കിയുള്ളവരെ ഉടന് പിടികൂടുമെന്നും ഡിജിപി കൂട്ടിച്ചേര്ത്തു.
ശബരിമല സ്വര്ണക്കവര്ച്ച കേസ്: തന്ത്രി കണ്ഠരര് രാജീവരരുടെ ജാമ്യം റദ്ദാക്കില്ലെന്ന് ഹൈക്കോടതി; അന്വേഷണസംഘത്തിന് വിമര്ശനം
എട്ടുമണിക്കൂര് നീണ്ട റെയ്ഡിനൊടുവില് ഇഡി ഉദ്യോഗസ്ഥര് പുറത്തേക്കിറങ്ങിയപ്പോള് പോലീസ് മനഃപൂര്വം മാറിനിന്നു എന്ന ആരോപണം ശക്തമാണ്. ഉദ്യോഗസ്ഥരുടെ വാഹനങ്ങള്ക്ക് നേരെ ആക്രമണമുണ്ടായപ്പോഴും പോലീസ് ഇരുവശത്തേക്കും മാറിനില്ക്കുകയായിരുന്നുവെന്ന് ദൃശ്യങ്ങളില് വ്യക്തമാണ്. അക്രമികളെ പിടിച്ചുമാറ്റാന് പോലും പോലീസ് തയ്യാറായില്ലെന്ന ആക്ഷേപമാണ് ഉയരുന്നത്. കഴിഞ്ഞദിവസം ഇതേക്കുറിച്ച് പ്രതികരിച്ച എഡിജിപി സുരക്ഷാവീഴ്ചയുണ്ടായെന്ന സൂചന നല്കിയിരുന്നെങ്കിലും, അതിനെ പാടേ തള്ളിക്കളയുന്ന നിലപാടാണ് ഇന്ന് ഡിജിപി സ്വീകരിച്ചത്. പോലീസിന്റെ ഭാഗത്ത് വീഴ്ചയുണ്ടായോ എന്ന് പ്രത്യേകം പരിശോധിക്കുമെന്നും ഡിജിപി വ്യക്തമാക്കിയിട്ടുണ്ട്.
പിണറായി വിജയന്റെ വീട്ടിലെ റെയ്ഡിന് പിന്നാലെ ഭരണ മുന്നണിയിലെ രണ്ടാം കക്ഷിയായ മുസ്ലിം ലീഗിന്റെ നേതാവും വ്യവസായ മന്ത്രിയുമായ പി.കെ. കുഞ്ഞാലിക്കുട്ടിയുടെ പേരും ഡയറിയിലുണ്ടെന്ന വാര്ത്തകള് പുറത്തുവന്നത് സര്ക്കാരിനെ ഞെട്ടിച്ചിരിക്കുകയാണ്. വി.ഡി. സതീശന് മന്ത്രിസഭയിലെ രണ്ടാമനായ കുഞ്ഞാലിക്കുട്ടിയെയും, ആഭ്യന്തര മന്ത്രി രമേശ് ചെന്നിത്തലയെയും ലക്ഷ്യമിട്ടാണ് കേന്ദ്ര നീക്കമെങ്കില് സംസ്ഥാന ഭരണം വരും ദിവസങ്ങളില് കൂടുതല് പ്രതിസന്ധിയിലാകും.
ക്രമസമാധാന പാലനത്തില് പോലീസിന് വീഴ്ച പറ്റിയിട്ടില്ലെന്ന് വരുത്തിത്തീര്ക്കാന് ആഭ്യന്തര വകുപ്പ് ശ്രമിക്കുമ്പോഴും, രാഷ്ട്രീയമായി വരാനിരിക്കുന്ന വലിയ കൊടുങ്കാറ്റിന്റെ ആശങ്കയിലാണ് ഭരണകേന്ദ്രം.
