ശബരിമല സ്വര്‍ണ്ണക്കൊള്ള: അന്വേഷണം മുന്‍ ദേവസ്വം മന്ത്രിമാരിലേക്ക്; കടകംപള്ളിക്കും വാസവനും കുരുക്ക് മുറുകിയേക്കും; രണ്ടും കല്‍പ്പിച്ചുള്ള നീക്കങ്ങള്‍ക്ക് യുഡിഎഫ് സര്‍ക്കാര്‍

തിരുവനന്തപുരം: രാഷ്ട്രീയ കേരളത്തെ പിടിച്ചുകുലുക്കിയ ശബരിമല സ്വര്‍ണ്ണക്കൊള്ളക്കേസിന്റെ അന്വേഷണം മുന്‍ ഇടത് സര്‍ക്കാരിലെ ദേവസ്വം മന്ത്രിമാരിലേക്ക് നീളുന്നു. കഴിഞ്ഞ എല്‍ഡിഎഫ് ഭരണകാലത്ത് ദേവസ്വം വകുപ്പ് കൈകാര്യം ചെയ്തിരുന്ന മുതിര്‍ന്ന സിപിഎം നേതാക്കളായ കടകംപള്ളി സുരേന്ദ്രന്‍, വി.എന്‍. വാസവന്‍ എന്നിവരിലേക്കാണ് പ്രത്യേക അന്വേഷണസംഘത്തിന്റെ (എസ്‌ഐടി) അന്വേഷണക്കണ്ണുകള്‍ നീളുന്നത്. ഇരുവരുടെയും മന്ത്രിപ്പണി കാലത്തുണ്ടായ സാമ്പത്തിക ആരോപണങ്ങളും ദേവസ്വം ബോര്‍ഡിലെ ക്രമക്കേടുകളും വരും ദിവസങ്ങളില്‍ പ്രത്യേക അന്വേഷണ സംഘം വിശദമായി പരിശോധിക്കും. കോട്ടയം ജില്ലാ കമ്മിറ്റിക്ക് കീഴിലെ ഏരിയ കമ്മിറ്റികളില്‍ പാര്‍ട്ടിക്കുള്ളില്‍ നിന്നുതന്നെ കടുത്ത ആഭ്യന്തര വിമര്‍ശനം നേരിടുന്ന മുന്‍ മന്ത്രി വി.എന്‍. വാസവനെ കേന്ദ്രീകരിച്ച് അതീവ നിര്‍ണ്ണായക നീക്കങ്ങള്‍ നടത്താനാണ് പുതിയ യുഡിഎഫ് സര്‍ക്കാരിന്റെ ഭാവം.

കേസിന്റെ ഭാവി നിര്‍ണ്ണയിക്കുന്ന അതീവ പ്രാധാന്യമുള്ള ഉന്നതതല യോഗം ഇന്ന് പോലീസ് ആസ്ഥാനത്ത് ചേരും. ആഭ്യന്തരമന്ത്രി രമേശ് ചെന്നിത്തലയുടെ അധ്യക്ഷതയില്‍ ചേരുന്ന യോഗത്തില്‍ ഡിജിപിയും പ്രത്യേക അന്വേഷണസംഘത്തിലെ മുതിര്‍ന്ന ഉദ്യോഗസ്ഥരും പങ്കെടുക്കും. കേസുമായി ബന്ധപ്പെട്ട് ഇതുവരെ ഉയര്‍ന്നുവന്ന എല്ലാ സാമ്പത്തിക ആരോപണങ്ങളും അട്ടിമറി സാധ്യതകളും ഒട്ടും സമയം കളയാതെ കൃത്യമായി പരിശോധിക്കണമെന്ന കര്‍ശന നിര്‍ദ്ദേശമാണ് ആഭ്യന്തരമന്ത്രി അന്വേഷണസംഘത്തിന് നല്‍കിയിരിക്കുന്നത്. ഹൈക്കോടതിയുടെ നേരിട്ടുള്ള നിരീക്ഷണത്തില്‍ നടക്കുന്ന അന്വേഷണമായതിനാല്‍ ഭരണതലത്തില്‍ നിന്നുള്ള യാതൊരുവിധ ഇടപെടലുകളും പാടില്ലെന്ന് സര്‍ക്കാര്‍ കര്‍ശന നിലപാടെടുത്തിട്ടുണ്ട്. എങ്കിലും, രാഷ്ട്രീയ പദവികളോ വ്യക്തിപ്രഭാവമോ നോക്കാതെ സുതാര്യവും കണിശവുമായ അന്വേഷണവുമായി മുന്നോട്ടുപോകണമെന്ന ശക്തമായ സന്ദേശമാണ് ആഭ്യന്തരമന്ത്രി ഉദ്യോഗസ്ഥര്‍ക്ക് കൈമാറിയിരിക്കുന്നത്.

അന്വേഷണത്തിന്റെ ആദ്യഘട്ടമെന്ന നിലയില്‍ മുന്‍ ദേവസ്വം മന്ത്രിമാരായ കടകംപള്ളി സുരേന്ദ്രനും വി.എന്‍. വാസവനും ചോദ്യം ചെയ്യലിന് ഹാജരാകാന്‍ പ്രത്യേക അന്വേഷണ സംഘം ഉടന്‍ തന്നെ ഔദ്യോഗിക നോട്ടീസ് അയക്കുമെന്നാണ് വിശ്വസനീയ കേന്ദ്രങ്ങളില്‍ നിന്ന് ലഭിക്കുന്ന വിവരം. വരും ദിവസങ്ങളില്‍ ഹൈക്കോടതിക്ക് സമര്‍പ്പിക്കാനിരിക്കുന്ന ഇടക്കാല റിപ്പോര്‍ട്ടില്‍, മുന്‍ മന്ത്രിമാരുടെ പങ്കിനെക്കുറിച്ചുള്ള സംശയങ്ങളും പുതിയ അന്വേഷണ ദിശകളെക്കുറിച്ചുള്ള നിര്‍ണ്ണായക വിവരങ്ങളും എസ്‌ഐടി ഉള്‍പ്പെടുത്തിയേക്കും. ശബരീശന്റെ തിരുവാഭരണങ്ങളിലും ദേവസ്വം സ്‌ട്രോങ് റൂമുകളില്‍ സൂക്ഷിച്ചിരുന്ന സ്വര്‍ണ്ണ ഉരുപ്പടികളുടെ കണക്കുകളിലും വലിയ രീതിയിലുള്ള തിരിമറികളും അട്ടിമറികളും നടന്നതായാണ് പ്രത്യേക അന്വേഷണ സംഘത്തിന്റെ പ്രാഥമിക വിലയിരുത്തല്‍.

മുന്‍ ഇടത് സര്‍ക്കാരിന്റെ കാലത്ത് ശബരിമലയിലെ സ്വര്‍ണ്ണ ഉരുപ്പടികളുടെയും തിരുവാഭരണങ്ങളുടെയും കണക്കെടുപ്പില്‍ വന്‍ സുതാര്യതക്കുറവ് ഉണ്ടായതായി നേരത്തെ തന്നെ ആക്ഷേപങ്ങള്‍ ഉയര്‍ന്നിരുന്നു. ഭക്തര്‍ നടയ്ക്കുവെച്ച സ്വര്‍ണ്ണാഭരണങ്ങള്‍ സ്‌ട്രോങ് റൂമുകളിലേക്ക് മാറ്റുന്നതിലും അവ പുനര്‍നിര്‍മ്മാണത്തിന് ഉപയോഗിച്ചതിലും കൃത്യമായ ഓഡിറ്റിങ് നടന്നിട്ടില്ലെന്നാണ് എസ്‌ഐടിയുടെ കണ്ടെത്തല്‍. ദേവസ്വം ബോര്‍ഡിന്റെ ഉയര്‍ന്ന ഉദ്യോഗസ്ഥരുടെ ഒത്താശയോടെ കോടിക്കണക്കിന് രൂപയുടെ സ്വര്‍ണ്ണം കടത്താന്‍ വലിയൊരു ലോബി തന്നെ തിരുവിതാകൂര്‍ ദേവസ്വം ബോര്‍ഡിനെ കേന്ദ്രീകരിച്ച് പ്രവര്‍ത്തിച്ചിരുന്നു എന്നാണ് നിലവിലെ സൂചനകള്‍ വ്യക്തമാക്കുന്നത്.

മന്ത്രിയെന്ന നിലയില്‍ വി.എന്‍. വാസവന്റെ കാലത്ത് നടന്ന സ്വര്‍ണ്ണ ഇടപാടുകളും സ്‌ട്രോങ് റൂമിലെ ഉരുപ്പടികളുടെ കൃത്യമായ കണക്കുകളുമാകും എസ്‌ഐടി പ്രധാനമായും പരിശോധിക്കുക. കഴിഞ്ഞ നിയമസഭാ തിരഞ്ഞെടുപ്പിലെ കനത്ത തോല്‍വിക്ക് പിന്നാലെ സിപിഎം കോട്ടയം ഏരിയ കമ്മിറ്റികളില്‍ വാസവനെതിരെ വലിയ ജനരോഷവും വിമര്‍ശനവും ഉയര്‍ന്നിരുന്നു. മന്ത്രിയും അദ്ദേഹത്തിന്റെ പേഴ്‌സണല്‍ സ്റ്റാഫും അണികളില്‍ നിന്നും ജനങ്ങളില്‍ നിന്നും അകന്നു നിന്നതാണ് പാര്‍ട്ടിയുടെ തകര്‍ച്ചയ്ക്ക് കാരണമായതെന്ന് സി.പി.എം തന്നെ വിലയിരുത്തിയതിന് തൊട്ടുപിന്നാലെയാണ് സ്വര്‍ണ്ണക്കൊള്ളക്കേസിലെ അന്വേഷണവും അദ്ദേഹത്തിലേക്ക് തിരിയുന്നത്. ഇത് വരും ദിവസങ്ങളില്‍ വാസവന്റെ രാഷ്ട്രീയ ഭാവിയെ കനത്ത നിഴലിലാക്കും.

മറ്റൊരു മുന്‍ മന്ത്രിയായ കടകംപള്ളി സുരേന്ദ്രന്റെ ദേവസ്വം ഭരണകാലത്തുണ്ടായ സമാനമായ നിരവധി പരാതികളും നിലവില്‍ അന്വേഷണസംഘം പൊടിതട്ടിയെടുക്കുന്നുണ്ട്. ശബരിമലയിലെ ആചാരങ്ങളുമായി ബന്ധപ്പെട്ട തര്‍ക്കങ്ങള്‍ നിലനിന്നിരുന്ന കാലയളവില്‍ ദേവസ്വം ബോര്‍ഡിന്റെ സ്വത്തുക്കളിലും സ്വര്‍ണ്ണശേഖരത്തിലും കൃത്യമായ പരിശോധനകള്‍ നടന്നിരുന്നില്ല എന്ന ആക്ഷേപം ശക്തമാണ്. ഭരണസ്വാധീനം ഉപയോഗിച്ച് ഉന്നതര്‍ നടത്തിയ ഈ പകല്‍ക്കൊള്ളയ്ക്ക് രാഷ്ട്രീയ നേതൃത്വത്തിന്റെ പരോക്ഷമായ പിന്തുണയുണ്ടായിരുന്നോ എന്നാണ് പുതിയ ആഭ്യന്തരവകുപ്പ് അന്വേഷിക്കുന്നത്.

കേരളത്തിലെ കോടിക്കണക്കിന് വരുന്ന അയ്യപ്പഭക്തരുടെ വികാരങ്ങളെ വ്രണപ്പെടുത്തിയ ഈ വന്‍ സ്വര്‍ണ്ണക്കൊള്ളയ്ക്ക് പിന്നിലെ യഥാര്‍ത്ഥ ഗൂഢാലോചന പുറത്തുകൊണ്ടുവരുമെന്ന കടുത്ത നിലപാടിലാണ് മുഖ്യമന്ത്രി വി.ഡി. സതീശനും ആഭ്യന്തര മന്ത്രി രമേശ് ചെന്നിത്തലയും. മുന്‍ സര്‍ക്കാരിന്റെ കാലത്തെ ഇത്തരം രാഷ്ട്രീയ ഒത്തുകളികളും അഴിമതികളും നിയമത്തിന് മുന്നില്‍ കൊണ്ടുവരുന്നതിലൂടെ ആഭ്യന്തര വകുപ്പിലും ദേവസ്വം ബോര്‍ഡിലും വലിയൊരു ശുദ്ധീകരണത്തിനാണ് പുതിയ യുഡിഎഫ് ഭരണകൂടം ലക്ഷ്യമിടുന്നത്. ഇതിന്റെ ഭാഗമായി കേസ് അന്വേഷിക്കുന്ന സ്‌പെഷ്യല്‍ ഇന്‍വെസ്റ്റിഗേഷന്‍ ടീമിന് കൂടുതല്‍ സൈബര്‍-ശാസ്ത്രീയ വിദഗ്ദ്ധരെയും ഉള്‍പ്പെടുത്തി വിപുലീകരിച്ചിട്ടുണ്ട്.