തിരുവനന്തപുരം: പതിനാറാം കേരള നിയമസഭയുടെ പ്രോടെം സ്പീക്കറായി മുതിര്ന്ന കമ്മ്യൂണിസ്റ്റ് നേതാവും നിയമസഭാംഗവുമായ ജി. സുധാകരന് സത്യപ്രതിജ്ഞ ചെയ്ത് അധികാരമേറ്റു. രാജ്ഭവനില് (ലോക്ഭവന്) നടന്ന അതീവ പ്രാധാന്യമുള്ള ഔദ്യോഗിക ചടങ്ങില് ഗവര്ണര് ആണ് അദ്ദേഹത്തിന് സത്യവാചകം ചൊല്ലിക്കൊടുത്തത്. പുതിയ മുഖ്യമന്ത്രി വി.ഡി. സതീശന്, മന്ത്രിസഭയിലെ മറ്റ് സുപ്രധാന അംഗങ്ങള്, ഉന്നത ഉദ്യോഗസ്ഥര് തുടങ്ങിയവര് ചടങ്ങില് നേരിട്ട് സംബന്ധിച്ചു. പതിനാറാം നിയമസഭയിലെ ആദ്യ അംഗമായാണ് ജി. സുധാകരന് ഗവര്ണര്ക്ക് മുന്നില് സത്യപ്രതിജ്ഞ ചെയ്തത്.
വ്യാഴാഴ്ച നടക്കാനിരിക്കുന്ന മുഴുവന് പുതിയ എം.എല്.എമാരുടെയും ഔദ്യോഗിക സത്യപ്രതിജ്ഞാ ചടങ്ങുകള് ഇനി പ്രോടെം സ്പീക്കറായ ജി. സുധാകരന്റെ സാനിധ്യത്തിലും നേതൃത്വത്തിലുമായിരിക്കും നിയമസഭയില് നടക്കുക. സഭയില് പുതിയ സ്പീക്കര് തെരഞ്ഞെടുപ്പ് നടന്നു കഴിയുന്നത് വരെ സഭയെ നിയന്ത്രിക്കാനുള്ള പൂര്ണ്ണ ചുമതലയും സുധാകരനായിരിക്കും. സ്പീക്കര് സ്ഥാനത്തേക്ക് മുതിര്ന്ന കോണ്ഗ്രസ് നേതാവ് തിരുവഞ്ചൂര് രാധാകൃഷ്ണനെയും ഡെപ്യൂട്ടി സ്പീക്കറായി ഷാനിമോള് ഉസ്മാനെയും മത്സരിപ്പിച്ച് വിജയിപ്പിക്കാനാണ് പുതിയ ഭരണപക്ഷമായ യു.ഡി.എഫ് ഇപ്പോള് നീക്കങ്ങള് നടത്തുന്നത്.
ജി. സുധാകരന് പ്രോടെം സ്പീക്കറായി ചുമതലയേറ്റതോടെ നാളെ നിയമസഭയില് നടക്കാനിരിക്കുന്ന സമ്മേളനത്തിന് രാഷ്ട്രീയമായി വലിയൊരു കൗതുകം കൂടി കൈവന്നിരിക്കുകയാണ്. മുന് മുഖ്യമന്ത്രിയും സി.പി.എമ്മിന്റെ മുതിര്ന്ന നേതാവുമായ പിണറായി വിജയന് നാളെ പുതിയ എം.എല്.എയായി സത്യപ്രതിജ്ഞ ചെയ്യാന് നിയമസഭയില് എത്തുമോ ഇല്ലയോ എന്നതാണ് ഇപ്പോള് രാഷ്ട്രീയ കേന്ദ്രങ്ങളിലെ പ്രധാന ചര്ച്ചാവിഷയം. നിയമസഭാ തെരഞ്ഞെടുപ്പിലെ കനത്ത തിരിച്ചടിക്കും ഭരണമാറ്റത്തിനും ശേഷം പിണറായി വിജയന് നിയമസഭയിലേക്ക് എത്തുമ്പോള് അത് കേരള രാഷ്ട്രീയം ഉറ്റുനോക്കുന്ന ഒരു വലിയ കാഴ്ചയായി മാറും.
ദീര്ഘകാലം പിണറായി വിജയന്റെ വിശ്വസ്തനും അദ്ദേഹത്തിന്റെ ആദ്യ മന്ത്രിസഭയിലെ ശക്തനായ പൊതുമരാമത്ത് മന്ത്രിയുമായിരുന്ന ജി. സുധാകരന് തന്നെയാണ് ഇപ്പോള് പ്രോടെം സ്പീക്കറുടെ കസേരയിലുള്ളത് എന്നത് ഈ കൗതുകത്തിന്റെ ആഴം കൂട്ടുന്നു. പാര്ട്ടിയിലെ ആഭ്യന്തര സമവാക്യങ്ങളുടെ മാറ്റങ്ങള്ക്കിടയില് കഴിഞ്ഞ കുറച്ചുകാലമായി ഔദ്യോഗിക നേതൃത്വവുമായി അത്ര നല്ല ബന്ധത്തിലായിരുന്നില്ല ജി. സുധാകരന്. പിണറായിയെ വെല്ലുവിളിച്ച് വിമതനായി മത്സരിച്ചു ജയിക്കുകയും ചെയ്തു. ഭരണമാറ്റത്തിന് പിന്നാലെ സഭയിലെ സീനിയോറിറ്റി പരിഗണിച്ച് സുധാകരനെ പ്രോടെം സ്പീക്കറാക്കാന് വി.ഡി. സതീശന് സര്ക്കാര് തീരുമാനിക്കുകയായിരുന്നു.
തന്റെ മുന് സഹപ്രവര്ത്തകനും പാര്ട്ടിയിലെ സമകാലികനുമായ ജി. സുധാകരന് മുന്നിലേക്ക് ഒരു സാധാരണ എം.എല്.എയായി പിണറായി വിജയന് സത്യപ്രതിജ്ഞയ്ക്കായി നടന്നു നീങ്ങുന്ന കാഴ്ച നാളെ നിയമസഭയില് ഉണ്ടാകുമോ എന്നാണ് അണിയറയില് ഉയരുന്ന ചോദ്യം. പാര്ട്ടി ഭരണത്തില് നിന്നും പ്രതിപക്ഷ നിരയിലേക്ക് മാറേണ്ടി വന്നതിന്റെ രാഷ്ട്രീയ വിയോജിപ്പുകളും വ്യക്തിപരമായ താല്പര്യങ്ങളും മുന്നിര്ത്തി പിണറായി വിജയന് നാളത്തെ ചടങ്ങില് നിന്നും വിട്ടുനില്ക്കാനുള്ള സാധ്യതകളും ചില രാഷ്ട്രീയ നിരീക്ഷകര് തള്ളിക്കളയുന്നില്ല. ആരോഗ്യപരമായ കാരണങ്ങളോ മറ്റ് അസൗകര്യങ്ങളോ ചൂണ്ടിക്കാട്ടി അദ്ദേഹം നാളെ മാറിനിന്നേക്കുമെന്ന അഭ്യൂഹങ്ങളും ശക്തമാണ്.
യു.ഡി.എഫ് മുന്നണിയെ സംബന്ധിച്ചടത്തോളം ഇനി സഭയ്ക്കുള്ളിലെ തങ്ങളുടെ പുതിയ അധികാരം ഉറപ്പിക്കുന്നതിനുള്ള വേദിയാണ്. സ്പീക്കര് സ്ഥാനത്തേക്ക് തിരുവഞ്ചൂര് രാധാകൃഷ്ണനെ കൊണ്ടുവരുന്നതിലൂടെ സഭാനടപടികള് സുഗമമായി മുന്നോട്ട് കൊണ്ടുപോകാന് കഴിയുമെന്നാണ് കോണ്ഗ്രസ് കണക്കുകൂട്ടുന്നത്. ഡെപ്യൂട്ടി സ്പീക്കര് സ്ഥാനത്തേക്ക് വനിതാ പ്രാതിനിധ്യം ഉറപ്പാക്കിക്കൊണ്ട് ഷാനിമോള് ഉസ്മാനെ നിശ്ചയിച്ചതും യു.ഡി.എഫിന്റെ തന്ത്രപരമായ നീക്കമാണ്. ഭൂരിപക്ഷത്തിന്റെ ബലത്തില് ഈ രണ്ട് പദവികളും എളുപ്പത്തില് കൈക്കലാക്കാന് ഭരണപക്ഷത്തിന് സാധിക്കും.
ജി. സുധാകരന്റെ അധ്യക്ഷതയില് പുതിയ എം.എല്.എമാര് ഓരോരുത്തരായി സത്യപ്രതിജ്ഞ ചെയ്ത് അധികാരം ഏല്ക്കുമ്പോള് ഇടത് പക്ഷ നിരയിലെ പ്രമുഖ നേതാക്കളുടെ സാന്നിധ്യവും പ്രത്യേകം നിരീക്ഷിക്കപ്പെടും. കഴിഞ്ഞ മന്ത്രിസഭയിലെ പ്രമുഖരായ പല മന്ത്രിമാരും ഇത്തവണ സാധാരണ എം.എല്.എമാരായി പ്രതിപക്ഷ നിരയില് ഒതുങ്ങേണ്ടി വന്നിട്ടുണ്ട്. പുതിയ ഭരണപക്ഷത്തിന്റെ ആദ്യ നിയമസഭാ സമ്മേളനം എന്ന നിലയില് സഭയിലെ സീറ്റ് ക്രമീകരണങ്ങളും പ്രതിപക്ഷത്തിന്റെ പുതിയ നേതാവ് ആരായിരിക്കുമെന്ന കാര്യത്തിലും നാളെയോടെ ഏകദേശ ധാരണയാകും.
സഭയിലെ കടുത്ത രാഷ്ട്രീയ ശത്രുതകള് നിലനില്ക്കുമ്പോഴും വ്യക്തിപരമായ സൗഹൃദങ്ങള്ക്കും കീഴ്വഴക്കങ്ങള്ക്കും വലിയ പ്രാധാന്യം നല്കുന്നൊരിടമാണ് കേരള നിയമസഭ. അതുകൊണ്ടുതന്നെ ജി. സുധാകരന് എന്ന തലമുതിര്ന്ന നേതാവിനെ പ്രോടെം സ്പീക്കറായി ആദരിക്കാന് പ്രതിപക്ഷ നിരയിലുള്ളവര് തയ്യാറാകുമെന്നാണ് പൊതുവേയുള്ള വിലയിരുത്തല്. എന്നാല് കനത്ത രാഷ്ട്രീയ പരാജയത്തിന്റെ പശ്ചാത്തലത്തില് കമ്മ്യൂണിസ്റ്റ് പാര്ട്ടിക്കുള്ളില് പുകയുന്ന ആഭ്യന്തര തര്ക്കങ്ങള് നാളത്തെ സഭയിലെ അംഗങ്ങളുടെ ശരീരഭാഷയില് പ്രകടമാകാന് സാധ്യതയുണ്ട്.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
കേരളത്തിൽ കുറ്റകൃത്യങ്ങൾ വർദ്ധിക്കുന്നു; കഴിഞ്ഞ വർഷം രജിസ്റ്റർ ചെയ്തത് 5.14 ലക്ഷം കേസുകൾ
