തിരുവനന്തപുരം: കേരളത്തിന്റെ പുതിയ മുഖ്യമന്ത്രിയായി വി.ഡി. സതീശന് ഇന്ന് സത്യപ്രതിജ്ഞ ചെയ്ത് അധികാരമേല്ക്കുമ്പോള്, രാഷ്ട്രീയ കേരളം ഉറ്റുനോക്കുന്നത് മുഖ്യമന്ത്രിയുടെ ഓഫീസിലെ നിര്ണ്ണായക പദവികളിലേക്കാണ്. സതീശന്റെ ഓഫീസിലെ ഏറ്റവും ഉയര്ന്ന രാഷ്ട്രീയ പദവിയായ പൊളിറ്റിക്കല് സെക്രട്ടറി സ്ഥാനത്തേക്ക് മുന് എം.എല്.എയും യൂത്ത് കോണ്ഗ്രസ് മുന് സംസ്ഥാന വൈസ് പ്രസിഡന്റുമായ കെ.എസ്. ശബരീനാഥന് വരുമെന്നാണ് ഏറ്റവും പുതിയ റിപ്പോര്ട്ടുകള്. ശബരീനാഥനെ മുഖ്യമന്ത്രിയുടെ ഓഫീസില് ഉന്നത പദവിയില് നിയമിക്കുമെന്ന മംഗളം പത്രത്തിന്റെ വാര്ത്ത പുറത്തുവന്നതോടെയാണ്, ആ പദവി മറ്റൊന്നുമല്ല, ആഭ്യന്തര വകുപ്പിന്റെ അടക്കം നയരൂപീകരണത്തില് പങ്കാളിയാകുന്ന പൊളിറ്റിക്കല് സെക്രട്ടറി സ്ഥാനം തന്നെയാണെന്ന വിലയിരുത്തല് ശക്തമായത്.
കേവലം ഒരു രാഷ്ട്രീയ നിയമനത്തിനപ്പുറം വൈകാരികവും രാഷ്ട്രീയവുമായ ഒട്ടേറെ പ്രത്യേകതകള് നിറഞ്ഞതാണ് ഈ നീക്കം. വി.ഡി. സതീശന്റെ രാഷ്ട്രീയ ഗുരുവായ മുന് നിയമസഭാ സ്പീക്കര് അന്തരിച്ച ജി. കാര്ത്തികേയന്റെ മകനാണ് കെ.എസ്. ശബരീനാഥന്. മുഖ്യമന്ത്രിയായി പ്രഖ്യാപിക്കപ്പെട്ട ശേഷം കാര്ത്തികേയന്റെ തിരുവനന്തപുരത്തെ വീട്ടിലെത്തിയ സതീശന്, ഗുരുവിന്റെ ചിത്രത്തിന് മുന്നില് വിതുമ്പിക്കൊണ്ട് പറഞ്ഞത് ‘എന്നെ എല്ലാമെല്ലാമാക്കിയത് സാറല്ലേ’ എന്നായിരുന്നു. തന്നെ കൈപിടിച്ചുയര്ത്തിയ രാഷ്ട്രീയ ഗുരുവിനോടുള്ള കടപ്പാട്, അദ്ദേഹത്തിന്റെ മകന് തന്റെ ഭരണകൂടത്തിലെ ഏറ്റവും നിര്ണ്ണായകമായ താക്കോല് സ്ഥാനം നല്കിക്കൊണ്ട് സതീശന് വീട്ടുകയാണെന്നാണ് രാഷ്ട്രീയ കേന്ദ്രങ്ങള് സൂചിപ്പിക്കുന്നത്.
പോലീസിന്റെ നയപരമായ കാര്യങ്ങളും ഫയലുകളും മുഖ്യമന്ത്രിക്ക് വേണ്ടി പ്രാഥമികമായി പരിശോധിക്കുക ഇനി ശബരീനാഥനായിരിക്കും. ഇതിന് മറ്റൊരു രാഷ്ട്രീയ മധുരപ്രതികാരത്തിന്റെ മുഖം കൂടിയുണ്ട്. മുന് മുഖ്യമന്ത്രി പിണറായി വിജയനെതിരെ വിമാനത്തിനുള്ളില് യൂത്ത് കോണ്ഗ്രസ് പ്രവര്ത്തകര് കരിങ്കൊടി പ്രതിഷേധം നടത്തിയ സംഭവത്തില്, ഗൂഢാലോചന കുറ്റം ചുമത്തി ശബരീനാഥനെ പിണറായിയുടെ പോലീസ് നാടകീയമായി അറസ്റ്റ് ചെയ്തിരുന്നു. ചോദ്യം ചെയ്യലിന് വിളിച്ചുവരുത്തി വധശ്രമ ഗൂഢാലോചനയെന്ന കള്ളക്കേസ് ചുമത്തിയ അന്നത്തെ പോലീസ് വേട്ടയ്ക്ക്, അതേ പോലീസിനെ നിയന്ത്രിക്കുന്ന മുഖ്യമന്ത്രിയുടെ പൊളിറ്റിക്കല് സെക്രട്ടറി പദവിയിലൂടെ ശബരീനാഥന് മറുപടി നല്കുന്നു എന്നത് കോണ്ഗ്രസ് അണികള്ക്ക് വലിയ ആവേശമാണ് നല്കുന്നത്.
ഉന്നത വിദ്യാഭ്യാസ യോഗ്യതകളും കോര്പ്പറേറ്റ് പശ്ചാത്തലവുമുള്ള ശബരീനാഥന് ഭരണം കൂടുതല് കാര്യക്ഷമമാക്കാന് സതീശന് തുണയാകും. തിരുവനന്തപുരം ലയോള സ്കൂള്, സി.ഇ.ടി എന്നിവിടങ്ങളിലെ പഠനത്തിന് ശേഷം ഗുഡ്ഗാവിലെ പ്രശസ്തമായ എം.ഡി.ഐയില് നിന്ന് എം.ബി.എ പൂര്ത്തിയാക്കിയ അദ്ദേഹം മുംബൈയില് ടാറ്റാ ഗ്രൂപ്പിലും ടാറ്റാ ട്രസ്റ്റിന്റെ ഡെവലപ്മെന്റ് പ്രൊജക്ടുകളിലും ഉയര്ന്ന ഉദ്യോഗസ്ഥനായിരുന്നു. ഇതിനുപുറമെ നിയമ ബിരുദവും (എല്.എല്.ബി) ശബരീനാഥനുണ്ട്. വിഴിഞ്ഞം അന്താരാഷ്ട്ര തുറമുഖ കമ്പനിയുടെ സി.ഇ.ഒയും മുന് തിരുവനന്തപുരം കളക്ടറുമായ ഡോ. ദിവ്യ എസ്. അയ്യര് ഐ.എ.എസ് ആണ് ഭാര്യ.
2015-ല് പിതാവ് ജി. കാര്ത്തികേയന്റെ വിയോഗത്തെ തുടര്ന്ന് രാഷ്ട്രീയത്തിലെത്തിയ ശബരീനാഥന് അരുവിക്കര ഉപതിരഞ്ഞെടുപ്പിലും, 2016-ലെ പൊതുതിരഞ്ഞെടുപ്പിലും വന് ഭൂരിപക്ഷത്തോടെ വിജയിച്ച് നിയമസഭയിലെത്തിയിരുന്നു. പതിനാലാം നിയമസഭയിലെ ഏറ്റവും പ്രായം കുറഞ്ഞ പ്രതിപ്രവര്ത്തകരില് ഒരാളായിരുന്നു അദ്ദേഹം. 2021-ല് അരുവിക്കരയിലും, 2026-ലെ നിയമസഭാ തിരഞ്ഞെടുപ്പില് നേമത്തും പരാജയം രുചിച്ചെങ്കിലും പൊതുരംഗത്ത് അദ്ദേഹം സജീവമായി തുടര്ന്നു. നിലവില് തിരുവനന്തപുരം കോര്പ്പറേഷനിലെ കവടിയാര് വാര്ഡില് നിന്നുള്ള ജനപ്രിയ കൗണ്സിലര് കൂടിയാണ് കെ.എസ്. ശബരീനാഥന്. ശബരീനാഥന്റെ ഭരണപരമായ മികവും രാഷ്ട്രീയ പാരമ്പര്യവും വി.ഡി. സതീശന്റെ ഓഫീസിന് പുതിയൊരു കരുത്ത് നല്കുമെന്നുറപ്പാണ്.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
കൊച്ചി കമ്മീഷണറും കൊച്ചി റേഞ്ച് ഡിഐജിയും എസ് ഹരിശങ്കര്; കാര്ത്തിക്ക് തിരുവനന്തപുരം കമ്മീഷണര്; നിശാന്തിനിയ്ക്ക് പോലീസ് ആസ്ഥാനത്ത് ഐജി പദം; സിപിഐയുടെ എതിര്പ്പ് ‘എംആറിന്’ തിരിച്ചടി; പോലീസ് തലപ്പത്ത് അഴിച്ചു പണി
