ന്യൂഡല്ഹി: കേരളത്തിന്റെ പുതിയ മുഖ്യമന്ത്രിയെ കണ്ടെത്താനുള്ള ഹൈക്കമാന്ഡ് ചര്ച്ചകള് ക്ലൈമാക്സിലേക്ക്. ചെന്നൈയില് തമിഴ്നാട് മുഖ്യമന്ത്രിയായി വിജയ്യുടെ സത്യപ്രതിജ്ഞാ ചടങ്ങില് പങ്കെടുത്ത ശേഷം മടങ്ങിയെത്തുന്ന രാഹുല് ഗാന്ധി, സോണിയാ ഗാന്ധിയുമായി നേരിട്ട് കൂടിക്കാഴ്ച നടത്തും. ഈ നിര്ണ്ണായക ചര്ച്ചയ്ക്ക് ശേഷമായിരിക്കും കേരളത്തിന്റെ അമരക്കാരന് ആരെന്ന് എഐസിസി ഔദ്യോഗികമായി പ്രഖ്യാപിക്കുക.
മല്ലികാര്ജുന് ഖര്ഗെയുടെ വസതിയില് നടന്ന മൂന്ന് മണിക്കൂര് നീണ്ട ചര്ച്ചകളില് തീരുമാനമാകാത്ത സാഹചര്യത്തിലാണ് രാഹുല് ഗാന്ധിയുടെ ഇടപെടല്. കെ.സി. വേണുഗോപാല്, വി.ഡി. സതീശന്, രമേശ് ചെന്നിത്തല എന്നീ മൂന്ന് പേരും ഒന്നിനൊന്ന് മെച്ചമാണെന്നും അന്തിമ തീരുമാനം ഹൈക്കമാന്ഡിന്റേതായിരിക്കുമെന്നും രാഹുല് വ്യക്തമാക്കിയിട്ടുണ്ട്. ആര്ക്കും മുഖ്യമന്ത്രിയാകാമെന്ന അവസ്ഥയില് നിന്നും മെറിറ്റും ഘടകകക്ഷികളുടെ താല്പ്പര്യവും മുന്നിര്ത്തിയുള്ള ഒരു പ്രഖ്യാപനത്തിനാണ് അണികള് കാത്തിരിക്കുന്നത്.
മുഖ്യമന്ത്രി പദത്തിനായി അണികള് തെരുവില് നടത്തുന്ന ശക്തിപ്രകടനങ്ങളില് രാഹുല് ഗാന്ധി കടുത്ത അതൃപ്തി രേഖപ്പെടുത്തിയിട്ടുണ്ട്. പ്രഖ്യാപനം വന്നാല് യാതൊരുവിധ പ്രതിഷേധങ്ങളും ഉണ്ടാകാന് പാടില്ലെന്ന് മൂന്ന് നേതാക്കള്ക്കും കര്ശന നിര്ദ്ദേശം നല്കി. ആര്ക്ക് വേണ്ടി പ്രകടനം നടത്തിയാലും അത് അവര്ക്കുള്ള ‘അയോഗ്യത’യായി കണക്കാക്കുമെന്ന രാഹുലിന്റെ താക്കീത് ഗ്രൂപ്പ് മാനേജര്മാരെ തണുപ്പിച്ചിട്ടുണ്ട്. പോസ്റ്ററുകളും ബാനറുകളും നീക്കം ചെയ്യാന് കെപിസിസി അധ്യക്ഷന് അഡ്വ. സണ്ണി ജോസഫും നേതാക്കളും ഒറ്റക്കെട്ടായി ആഹ്വാനം ചെയ്തു.
കെ.സി. വേണുഗോപാലിന് നിലവില് മുന്തൂക്കമുണ്ടെന്ന സൂചനകള് ഡല്ഹിയില് ശക്തമാണ്. എന്നാല് സമുദായ സംഘടനകളുടെ പിന്തുണയും ഭരണപരിചയവും ഉയര്ത്തി വി.ഡി. സതീശനും, സീനിയോറിറ്റിയും വിശ്വസ്തതയും മുന്നിര്ത്തി രമേശ് ചെന്നിത്തലയും പോരാട്ടത്തില് സജീവമാണ്. ചെന്നിത്തല തന്റെ ഭാഗം ഹൈക്കമാന്ഡിനെ കൃത്യമായി ധരിപ്പിച്ചിട്ടുണ്ട്. മെയ് 23-നകം ഭൂരിപക്ഷം തെളിയിക്കേണ്ടതിനാല് പ്രഖ്യാപനം ഇനി അധികം വൈകില്ലെന്ന് എഐസിസി ജനറല് സെക്രട്ടറി ദീപാ ദാസ്മുന്ഷി അറിയിച്ചു.
മുസ്ലീം ലീഗ് ഉള്പ്പെടെയുള്ള ഘടകകക്ഷികളുമായി രാഹുല് ഗാന്ധി സംസാരിക്കും. ആലപ്പുഴയിലെ ഉപതിരഞ്ഞെടുപ്പ് സംബന്ധിച്ച ലീഗിന്റെ ആശങ്കകള് പരിഹരിക്കുക എന്നതാകും രാഹുലിന് മുന്നിലുള്ള പ്രധാന വെല്ലുവിളി. സോണിയാ ഗാന്ധിയുടെ നിലപാട് കൂടി അറിയുന്നതോടെ കേരളത്തിലെ അധികാര തര്ക്കത്തിന് ശുഭപര്യവസാനമാകുമെന്നാണ് കോണ്ഗ്രസ് കേന്ദ്രങ്ങള് വിശ്വസിക്കുന്നത്.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
“സിപിഎമ്മുകാർക്ക് പോലും അദ്ദേഹത്തെ തിരിച്ചറിയാതായോ?” സൈബർ സഖാക്കളെ തിരുത്തി മുഖ്യമന്ത്രി; വയനാട് ടൗൺഷിപ്പ് വിവാദത്തിൽ മമ്മൂട്ടിയോട് പരസ്യമായി ക്ഷമ ചോദിച്ചു!
