ഡല്ഹി/തിരുവനന്തപുരം: കേരളത്തിന്റെ മുഖ്യമന്ത്രി പദവിക്കായി വി.ഡി. സതീശനുവേണ്ടി അണികള് നടത്തുന്ന പരസ്യമായ മുറവിളി ഹൈക്കമാന്ഡിനെ വെട്ടിലാക്കുന്നു. രാഹുല് ഗാന്ധിയുടെ ഔദ്യോഗിക ഫെയ്സ്ബുക്ക് പേജിലടക്കം സതീശനെ അനുകൂലിച്ച് തള്ളിക്കയറുന്ന കമന്റുകള് നേതൃത്വത്തെ വല്ലാതെ അസ്വസ്ഥമാക്കിയിട്ടുണ്ട്. പാര്ട്ടിക്കുള്ളിലെ ചര്ച്ചകളിലൂടെ തീരുമാനിക്കേണ്ട വിഷയത്തില് സോഷ്യല് മീഡിയ വഴി സമ്മര്ദ്ദം ചെലുത്തുന്നത് അംഗീകരിക്കാനാവില്ലെന്ന കര്ക്കശ നിലപാടിലാണ് രാഹുല് ഗാന്ധി. ഇതോടെ, അതിരുവിട്ട ഈ സ്തുതിപാഠങ്ങള് സതീശന്റെ മുഖ്യമന്ത്രി സാധ്യതകള്ക്ക് മങ്ങലേല്പ്പിക്കുമോ എന്ന ആശങ്കയും ശക്തമായി.
കേരളത്തിലെ വിജയത്തില് പ്രവര്ത്തകരെ അഭിനന്ദിച്ച് രാഹുല് ഗാന്ധി ഇട്ട പോസ്റ്റിന് താഴെയാണ് ‘സതീശന് തരംഗം’ ദൃശ്യമായത്. ‘പട നയിച്ചവന് നാട് നയിക്കട്ടെ’ എന്ന മുദ്രാവാക്യവുമായി ആയിരക്കണക്കിന് കമന്റുകളാണ് ഇംഗ്ലീഷിലും മലയാളത്തിലുമായി പ്രത്യക്ഷപ്പെടുന്നത്. രാജസ്ഥാനിലെയും മധ്യപ്രദേശിലെയും പോലെ അണികളുടെ താല്പ്പര്യം അവഗണിക്കരുതെന്ന താക്കീതും ചിലര് നല്കുന്നുണ്ട്. എന്നാല്, ഹൈക്കമാന്ഡിന്റെ അധികാരത്തിന് മേലുള്ള കടന്നുകയറ്റമായാണ് കേന്ദ്ര നേതൃത്വം ഇതിനെ കാണുന്നത്.
സോഷ്യല് മീഡിയ ക്യാമ്പയിനുകള് വഴി മുഖ്യമന്ത്രിയെ തീരുമാനിക്കുന്ന രീതി കോണ്ഗ്രസിനില്ലെന്ന് ഹൈക്കമാന്ഡ് വൃത്തങ്ങള് സൂചിപ്പിച്ചു. കെ.സി. വേണുഗോപാലും രമേശ് ചെന്നിത്തലയും പോലെയുള്ള മുതിര്ന്ന നേതാക്കളെ തഴഞ്ഞുകൊണ്ട് ഇത്തരമൊരു സമ്മര്ദ്ദത്തിന് വഴങ്ങുന്നത് തെറ്റായ കീഴ്വഴക്കം സൃഷ്ടിക്കുമെന്ന് രാഹുല് കരുതുന്നു. സംഘടിതമായ നീക്കത്തിലൂടെ നേതൃത്വത്തെ മുള്മുനയില് നിര്ത്താന് ശ്രമിക്കുന്നത് ഗുണത്തേക്കാളേറെ ദോഷം ചെയ്യുമെന്ന മുന്നറിയിപ്പാണ് ഡല്ഹി നല്കുന്നത്.
കോണ്ഗ്രസിനുള്ളില് തര്ക്കം മുറുകുമ്പോഴും മുസ്ലിം ലീഗ് ഉള്പ്പെടെയുള്ള ഘടകകക്ഷികള് സതീശനോടുള്ള ആഭിമുഖ്യം പരസ്യമാക്കിയിട്ടുണ്ട്. മോന്സ് ജോസഫ്, ഷിബു ബേബി ജോണ്, അനൂപ് ജേക്കബ് തുടങ്ങിയ പ്രമുഖ നേതാക്കള് സതീശനെ നേരില് കണ്ട് ചര്ച്ച നടത്തിയത് ഇതിന്റെ സൂചനയാണ്. വയനാട്ടിലടക്കം സതീശനായി ഫ്ലക്സ് ബോര്ഡുകള് ഉയര്ന്നതും ഹൈക്കമാന്ഡിന്റെ ശ്രദ്ധയില്പ്പെട്ടിട്ടുണ്ട്. എന്നാല് ഘടകകക്ഷികളുടെ ഈ നീക്കവും കോണ്ഗ്രസ് ഹൈക്കമാന്ഡിനെ അലോസരപ്പെടുത്തുന്നുണ്ട്.
ഡല്ഹിയിലെ സമവാക്യങ്ങളില് വിശ്വസ്തനായ കെ.സി. വേണുഗോപാലും സീനിയോറിറ്റി ഉയര്ത്തിക്കാട്ടുന്ന രമേശ് ചെന്നിത്തലയും ഹൈക്കമാന്ഡ് തീരുമാനത്തിനായി കാത്തിരിക്കുകയാണ്. അണികളുടെ ഈ ‘കമന്റ് യുദ്ധം’ സതീശന്റെ സ്വാഭാവികമായ അവകാശവാദത്തെപ്പോലും തകര്ക്കാന് കാരണമാകുമോ എന്നാണ് രാഷ്ട്രീയ നിരീക്ഷകര് ഉറ്റുനോക്കുന്നത്. അച്ചടക്കത്തിന് മുന്ഗണന നല്കുന്ന രാഹുല് ഗാന്ധി ഇത്തരം ബാഹ്യസമ്മര്ദ്ദങ്ങളെ തള്ളിക്കളയാനാണ് സാധ്യത.
നിരീക്ഷകരായ അജയ് മാക്കനും മുകുള് വാസ്നിക്കും കേരളത്തിലെത്തി എംഎല്എമാരുടെ അഭിപ്രായം തേടുമെങ്കിലും, അന്തിമ തീരുമാനം ഹൈക്കമാന്ഡിന്റേത് മാത്രമായിരിക്കും. സോഷ്യല് മീഡിയയിലെ ആവേശം വോട്ടാക്കി മാറ്റിയ സതീശന് അതേ സോഷ്യല് മീഡിയ തന്നെ വില്ലനാകുമോ എന്ന ചോദ്യത്തിന് വരും മണിക്കൂറുകളില് ഉത്തരമുണ്ടാകും.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
കോഴിക്കോട് തീകൊളുത്തി ജീവനൊടുക്കി യുവാവ് ; ഗുരുതര പൊള്ളലേറ്റ മകൾ ചികിത്സയിൽ
