കണ്ണൂര്: ‘ഞാന് അമ്മയെ കൊന്നു…’ കോഴിക്കോട്ടുള്ള സഹോദരിയുടെ ഫോണിലേക്ക് ക്രിസ്റ്റി വിളിച്ചു പറഞ്ഞത് ഒരു മരണവാര്ത്തയായിരുന്നില്ല, താന് നടത്തിയ ക്രൂരമായ കൊലയായിരുന്നു. സ്വന്തം അമ്മയെ കഴുത്തറുത്ത് കൊലപ്പെടുത്തിയ ശേഷം ഒട്ടും പരിഭ്രമമില്ലാതെ അയാള് ആദ്യം ചെയ്തത് ഈ ഫോണ് വിളിയായിരുന്നു. സഹോദരി നല്കിയ വിവരമനുസരിച്ച് ബന്ധുക്കള് വീട്ടിലെത്തുമ്പോള് ചോരയില് കുളിച്ചു കിടക്കുന്ന ഗീതമ്മയുടെ മൃതദേഹത്തിനരികെ ഭാവവ്യത്യാസമില്ലാതെ ക്രിസ്റ്റിയുണ്ടായിരുന്നു. ലഹരിയുടെ കരാളഹസ്തങ്ങളില് പെട്ട് ഒരു മകന് എത്രത്തോളം ക്രൂരനാകാം എന്നതിന്റെ ഭീതിദമായ നേര്ക്കാഴ്ചയായി മാറി താന്നിക്കുന്നിലെ ഗീതമ്മയുടെ മരണം.
കഴുത്തറുക്കാന് ഉപയോഗിച്ച കത്തിയുമായി അയല്വാസിയുടെ സ്കൂട്ടറിന് പിന്നിലിരിക്കുമ്പോഴും അയാളുടെ ഉള്ളില് പിതാവിനെക്കൂടി വകവരുത്താനുള്ള പക എരിയുകയായിരുന്നു. റിസോര്ട്ട് നിര്മ്മാണത്തിനായി പുറത്തുപോയ പിതാവ് തങ്കച്ചന് തിരിച്ചെത്താന് കുറച്ചുനേരം കൂടി അയാള് കാത്തിരുന്നു. ‘അപ്പനെ കിട്ടിയില്ല, അയാളെക്കൂടി കൊല്ലണം’ എന്നായിരുന്നു അയല്വാസിയായ നിപുണിനോട് ഇയാള് വെളിപ്പെടുത്തിയത്. സ്റ്റേഷന് തൊട്ടടുത്തെത്തിയപ്പോള് സ്കൂട്ടര് നിര്ത്താന് ആവശ്യപ്പെട്ട്, ശാന്തനായി കടയില് നിന്ന് സിഗരറ്റ് വാങ്ങി അത് കത്തിച്ചു വലിച്ച് സ്റ്റേഷനിലേക്ക് നടന്നു കയറിയ ക്രിസ്റ്റി നാടിനെയാകെ അമ്പരപ്പിച്ചു.
വെള്ളിയാഴ്ച വൈകിട്ട് ആറരയോടെയാണ് വീടിന് മുന്നിലെത്തിയ വണ്ടിയില് നിന്ന് ഗീതമ്മ മകന് പ്രിയപ്പെട്ട അയല മീന് വാങ്ങിയത്. ‘മകന് ഇത് വലിയ ഇഷ്ടമാണ്’ എന്ന് മീന് വില്പനക്കാരനോട് സ്നേഹത്തോടെ പങ്കുവെച്ച ആ അമ്മ, അവന് തന്നെ തന്റെ ജീവനെടുക്കുമെന്ന് കരുതിയിരുന്നില്ല. മകനോടുള്ള വാത്സല്യം കൊണ്ട് അവന് പ്രിയപ്പെട്ട വിഭവം അടുക്കളയില് ഒരുക്കുമ്പോഴാണ് ക്രിസ്റ്റി ആ കടുംകൈ ചെയ്തത്. 90 വയസ്സുള്ള മുത്തശ്ശിയെ മുറിയില് പൂട്ടിയിട്ട ശേഷമായിരുന്നു ഈ അരുംകൊല.
മകന്റെ ലഹരി ഉപയോഗത്തെച്ചൊല്ലി വീട്ടില് നിലനിന്നിരുന്ന തര്ക്കങ്ങളാണ് കൊലപാതകത്തില് കലാശിച്ചത്. ലഹരിയുടെ മയക്കത്തില് സ്വബോധം നഷ്ടപ്പെട്ട ക്രിസ്റ്റി, നേര്വഴിക്ക് നടത്താന് ശ്രമിച്ച അമ്മയെ തന്റെ ഒന്നാം നമ്പര് ശത്രുവായി കണ്ടു. തന്റെ സന്തോഷങ്ങള്ക്ക് തടസ്സം നില്ക്കുന്നത് വീട്ടുകാരാണെന്ന വികലമായ ചിന്തയാണ് അയാളെ നയിച്ചത്. ലഹരി വിമുക്ത കേന്ദ്രത്തില് ചികിത്സ തേടാന് മാതാപിതാക്കള് നിര്ബന്ധിച്ചതും വൈരാഗ്യത്തിന് ആക്കം കൂട്ടി.
ബെംഗളൂരുവില് ബി.സി.എ പഠനം പാതിവഴിയില് ഉപേക്ഷിച്ച ക്രിസ്റ്റി, വിദേശത്തും എറണാകുളത്തുമായി കുറച്ചുകാലം ചെലവഴിച്ചിരുന്നു. എവിടെയും ഉറച്ചുനില്ക്കാതെ ലഹരിയുടെ ലോകത്തേക്ക് കൂപ്പുകുത്തിയതോടെയാണ് ഇയാളുടെ സ്വഭാവം മാറിയതെന്ന് നാട്ടുകാര് പറയുന്നു. ഒരു മാസമായി നാട്ടിലുണ്ടായിരുന്ന ഇയാള് വീട്ടുകാരുമായി നിരന്തരം വഴക്കിടാറുണ്ടായിരുന്നു. ആ ഉപദേശങ്ങള് ഒടുവില് ഒരു കൊലപാതകത്തില് ചെന്നവസാനിക്കുകയായിരുന്നു.
നാട്ടുകാര്ക്കെല്ലാം സുപരിചിതയും പ്രിയങ്കരിയുമായിരുന്നു കൊല്ലപ്പെട്ട ഗീതമ്മ. കേളകത്തും താന്നിക്കുന്നിലും ‘മൊണാലിസ’ എന്ന പേരില് ബ്യൂട്ടി പാര്ലറും ടെയ്ലറിംഗ് ഷോപ്പും നടത്തിയിരുന്ന അവര് മൂന്ന് പേര്ക്ക് തൊഴിലും നല്കിയിരുന്നു. പുഞ്ചിരിയോടെയല്ലാതെ ആരോടും സംസാരിക്കാത്ത പ്രകൃതം. ഭര്ത്താവ് വിദേശത്തായിരുന്ന വര്ഷങ്ങളിലെല്ലാം വീടും ബിസിനസ്സും മക്കളുടെ കാര്യങ്ങളും തളരാതെ നോക്കിനടത്തിയ കരുത്തുറ്റ സ്ത്രീയായിരുന്നു അവര്.
പൊതുപ്രവര്ത്തന രംഗത്തും ഗീതമ്മ സജീവമായിരുന്നു. മഹിളാ മോര്ച്ച ജില്ലാ കമ്മിറ്റിയംഗം എന്ന നിലയില് രാഷ്ട്രീയ രംഗത്ത് സജീവമായിരുന്ന ഇവര്, കഴിഞ്ഞ ദിവസങ്ങളില് പേരാവൂര് മണ്ഡലത്തിലെ സ്ഥാനാര്ത്ഥിക്കായി വീടുകള് കയറി വോട്ട് ചോദിക്കുന്ന തിരക്കിലായിരുന്നു. എല്ലാ കാര്യങ്ങളിലും മുന്നിരയില് നിന്നിരുന്ന ഒരു സ്ത്രീയുടെ ജീവന് ലഹരിക്ക് അടിമയായ സ്വന്തം മകന് തന്നെ കവര്ന്നു എന്നത് നാടിന് ഇന്നും ഉള്ക്കൊള്ളാനായിട്ടില്ല.
മകന്റെ ക്രൂരതയറിഞ്ഞ പിതാവ് തങ്കച്ചന് തളര്ന്നു വീണു. റിസോര്ട്ട് നിര്മ്മാണത്തിന്റെ തിരക്കുകള് കഴിഞ്ഞ് സമാധാനത്തോടെ വീട്ടിലേക്ക് മടങ്ങാനിരുന്ന അദ്ദേഹത്തിന് കേള്ക്കേണ്ടി വന്നത് തന്റെ കുടുംബം തകര്ത്തെറിഞ്ഞ വാര്ത്തയാണ്. നെഞ്ചുവേദന അനുഭവപ്പെട്ട അദ്ദേഹത്തെ പേരാവൂരിലെ സ്വകാര്യ ആശുപത്രിയില് പ്രവേശിപ്പിച്ചു. മകനെക്കുറിച്ചുള്ള സകല പ്രതീക്ഷകളും തകര്ന്നു വീണതിന്റെ ആഘാതത്തിലാണ് ആ പിതാവ്.
അമ്മയെ കൊലപ്പെടുത്തിയ കത്തി പോലീസിന് കൈമാറുമ്പോഴും ഇയാള്ക്ക് യാതൊരു കൂസലുമുണ്ടായിരുന്നില്ല. ലഹരി മരുന്നിന്റെ ഉപയോഗം മൂലം യുവാക്കളില് വര്ദ്ധിച്ചു വരുന്ന അക്രമവാസന എത്രത്തോളം ഭീകരമാണെന്ന് ഈ സംഭവം ഓര്മ്മിപ്പിക്കുന്നു. സ്നേഹത്തോടെ മീന് വാങ്ങിക്കൊടുത്ത് പാലൂട്ടി വളര്ത്തിയ മകന്റെ കയ്യില് നിന്നും ജീവനുവേണ്ടി യാചിക്കേണ്ടി വന്ന ഗീതമ്മയുടെ വിധി ഒരു നാടിന്റെയാകെ നൊമ്പരമാണ്.
താന്നിക്കുന്നിലെ ആ വീട് ഇപ്പോള് ലഹരി നല്കിയ ഉണങ്ങാത്ത മുറിപ്പാടുകളുമായി മൂകമായി നില്ക്കുന്നു. അഴിമതിക്കും അനീതിക്കുമെതിരെ സംസാരിക്കാറുള്ള ആ ശബ്ദം ഇനിയില്ല. സ്വന്തം ചോരയെ സ്നേഹിച്ചതിന് ആ അമ്മയ്ക്ക് ലഭിച്ചത് കഴുത്തറുത്തുള്ള മരണമായിരുന്നു. കേസന്വേഷണം ഊര്ജിതമാക്കിയ പോലീസ്, പ്രതിയെ കോടതിയില് ഹാജരാക്കി റിമാന്ഡ് ചെയ്തു.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
നഴ്സ് ലെനയുടെ മരണം: അന്വേഷണം ആശുപത്രിയിലെത്തിയ ‘സുഹൃത്തുക്കളിലേക്ക്’; ദുരൂഹതകള് ഏറെ
