തിരുവനന്തപുരം: സംസ്ഥാനത്തെ വോട്ടെണ്ണല് കേന്ദ്രങ്ങളില് സുരക്ഷാ മുന്കരുതലിന്റെ ഭാഗമായി കര്ശന നിയന്ത്രണങ്ങളുമായി മുഖ്യ തിരഞ്ഞെടുപ്പ് ഓഫീസര് രത്തന് യു. ഖേല്ക്കര്. വോട്ടെണ്ണല് പ്രക്രിയ പൂര്ത്തിയാകുന്നത് വരെ ഒരു മുറിയും തുറക്കാന് പാടില്ലെന്ന് അദ്ദേഹം ഉത്തരവിട്ടു. സീല് ചെയ്യാത്ത മുറികള് പോലും തുറക്കുന്നത് അനാവശ്യ വിവാദങ്ങള്ക്ക് കാരണമാകുമെന്നും നിര്ദ്ദേശം ലംഘിക്കുന്ന ഉദ്യോഗസ്ഥര്ക്കെതിരെ കര്ശന നടപടിയുണ്ടാകുമെന്നും അദ്ദേഹം മുന്നറിയിപ്പ് നല്കി. ഇതുമായി ബന്ധപ്പെട്ട് ജില്ലാ കളക്ടര്മാരുടെ അടിയന്തര യോഗം അദ്ദേഹം വിളിച്ചുചേര്ത്തു.
പേരാമ്പ്രയിലും നെന്മാറയിലും സ്ട്രോങ്ങ് റൂമുകള് തുറക്കാന് നീക്കം നടന്നത് വിവാദമായ പശ്ചാത്തലത്തിലാണ് ഈ നടപടി. വിവരങ്ങള് അപ്ഡേറ്റ് ചെയ്യാനെന്ന പേരില് മുറികള് തുറക്കേണ്ടതില്ലെന്ന് ഖേല്ക്കര് വ്യക്തമാക്കി. വോട്ടെണ്ണല് കഴിഞ്ഞതിന് ശേഷം മാത്രം കണക്കെടുപ്പ് നടത്തിയാല് മതി. തിരഞ്ഞെടുപ്പ് പ്രക്രിയയുടെ സുതാര്യത ചോദ്യം ചെയ്യപ്പെടുന്ന രീതിയിലുള്ള യാതൊരു ഇടപെടലുകളും ഉദ്യോഗസ്ഥരുടെ ഭാഗത്തുനിന്ന് ഉണ്ടാകരുതെന്ന് അദ്ദേഹം നിര്ദ്ദേശിച്ചു.
പാലക്കാട് നെന്മാറയിലെ സ്ട്രോങ്ങ് റൂം തുറക്കാനുള്ള നീക്കം മുഖ്യ തിരഞ്ഞെടുപ്പ് ഓഫീസര് തടഞ്ഞു. പ്രിസൈഡിംഗ് ഓഫീസറുടെ ഡയറി മുറിക്കുള്ളില് മറന്നുവച്ചതിനാലാണ് മുറി തുറക്കേണ്ടി വരുമെന്ന് ജില്ലാ ഭരണകൂടം അറിയിച്ചത്. എന്നാല് യുഡിഎഫ് സ്ഥാനാര്ത്ഥിയുള്പ്പെടെയുള്ളവര് ഇതിനെതിരെ ശക്തമായ പ്രതിഷേധവുമായി രംഗത്തെത്തി. രേഖാമൂലമുള്ള അറിയിപ്പില്ലാതെ മുറി തുറക്കാനുള്ള നീക്കം അട്ടിമറിയാണെന്ന് കോണ്ഗ്രസ് ആരോപിച്ചു. ഇതേത്തുടര്ന്നാണ് ഒരു കാരണവശാലും മുറി തുറക്കരുതെന്ന് കളക്ടര്ക്ക് നിര്ദ്ദേശം നല്കിയത്.
അതേസമയം, പേരാമ്പ്രയില് സ്ട്രോങ്ങ് റൂം തുറന്ന സംഭവത്തില് കോഴിക്കോട് ജില്ലാ കളക്ടറോട് മുഖ്യ തിരഞ്ഞെടുപ്പ് ഓഫീസര് അടിയന്തര റിപ്പോര്ട്ട് തേടി. ഏത് സാഹചര്യത്തിലായാലും മുറി തുറന്നത് ഗുരുതരമായ വീഴ്ചയാണെന്നാണ് തിരഞ്ഞെടുപ്പ് കമ്മീഷന്റെ വിലയിരുത്തല്. സംഭവത്തില് ഉദ്യോഗസ്ഥര്ക്കെതിരെ തുടനടപടികള് ഉണ്ടാകുമെന്നും അദ്ദേഹം വ്യക്തമാക്കി. സ്ട്രോങ്ങ് റൂമല്ല, സമീപത്തെ റിസര്വ് റൂമാണ് തുറന്നതെന്നാണ് റിട്ടേണിംഗ് ഓഫീസറുടെ വിശദീകരണമെങ്കിലും വിവാദം ശമിച്ചിട്ടില്ല.
വോട്ടെടുപ്പുമായി ബന്ധപ്പെട്ട രേഖകള് മറന്നുവെച്ചു എന്ന ഉദ്യോഗസ്ഥരുടെ വിശദീകരണങ്ങളെ കമ്മീഷന് ഗൗരവമായാണ് കാണുന്നത്. ഇത്തരം അശ്രദ്ധകള് തിരഞ്ഞെടുപ്പിന്റെ വിശ്വാസ്യതയെ ബാധിക്കും. സ്ഥാനാര്ത്ഥികളെയും ഏജന്റുമാരെയും അറിയിച്ചാണ് മുറി തുറന്നതെന്ന് അധികൃതര് പറയുന്നുണ്ടെങ്കിലും, വോട്ടെണ്ണല് കേന്ദ്രങ്ങളിലെ ഓരോ നീക്കവും അതീവ ജാഗ്രതയോടെയായിരിക്കണമെന്ന് നിര്ദ്ദേശത്തിലുണ്ട്. വോട്ടെണ്ണല് ദിനം വരെ സുരക്ഷാ ക്രമീകരണങ്ങളില് ഒരു വിട്ടുവീഴ്ചയും പാടില്ലെന്നാണ് മുഖ്യ തിരഞ്ഞെടുപ്പ് ഓഫീസറുടെ നിലപാട്.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
ചര്ച്ചയില്ല, പാക്കിസ്ഥാനില് ഇറാന്റെ ‘കടുവെട്ട്’; മിഡില് ഈസ്റ്റ് ചര്ച്ച വഴിമുട്ടി; ഒരു വശത്ത് ചര്ച്ചകള് വഴിമുട്ടുമ്പോള് മറുവശത്ത് യുദ്ധഭീതി ഒഴിയുന്നില്ല.
