വാഷിംഗ്ടണ്/ടെഹ്റാന്: പശ്ചിമേഷ്യയില് ആഴ്ചകള് നീണ്ട രക്തരൂക്ഷിതമായ പോരാട്ടത്തിന് വിരാമമിട്ട് അമേരിക്കന് പ്രസിഡന്റ് ഡൊണാള്ഡ് ട്രംപ് പ്രഖ്യാപിച്ച വെടിനിര്ത്തല് കരാര് തകര്ച്ചയുടെ വക്കില്. കരാര് നിലവില് വന്ന് വെറും രണ്ട് ദിവസത്തിനുള്ളില് ഇസ്രായേലും ഇറാനും പരസ്പരം ആക്രമണങ്ങള് തുടരുന്നതാണ് ലോകത്തെ ആശങ്കയിലാഴ്ത്തുന്നത്.
ഹോര്മുസ് കടലിടുക്കിലൂടെയുള്ള എണ്ണക്കപ്പലുകളുടെ സുഗമമായ യാത്ര ഇറാന് തടയുകയാണെന്ന് ട്രംപ് രൂക്ഷമായി വിമര്ശിച്ചു. ഇറാന് കാണിക്കുന്നത് ‘അന്തസ്സില്ലാത്ത’ പ്രവൃത്തിയാണെന്നും ഇത് തങ്ങള് തമ്മിലുള്ള ധാരണയ്ക്ക് വിരുദ്ധമാണെന്നും ട്രംപ് തന്റെ സോഷ്യല് മീഡിയ പോസ്റ്റിലൂടെ വ്യക്തമാക്കി. ഹോര്മുസ് കടലിടുക്കിലെ ഉപരോധം നീക്കാത്തതിന് കാരണമായി ലബനനിലെ ഇസ്രായേല് ആക്രമണത്തെയാണ് ഇറാന് ചൂണ്ടിക്കാട്ടുന്നത്. ഇതിനിടെ, യുഎസ്-ഇസ്രായേല് ആക്രമണങ്ങളില് കൊല്ലപ്പെട്ടവര്ക്കായി ‘രക്തപ്പണം’ (ബ്ലഡ് മണി) നല്കണമെന്ന് ഇറാന്റെ പരമോന്നത നേതാവ് ആയത്തുള്ള മൊജ്തബ ഖമേനി ആവശ്യപ്പെട്ടു.
‘ക്രിമിനല് അഗ്രസേഴ്സ്’ എന്ന് വിശേഷിപ്പിച്ച അദ്ദേഹം, നാശനഷ്ടങ്ങള്ക്ക് കൃത്യമായ നഷ്ടപരിഹാരം നല്കാതെ വിട്ടുവീഴ്ചയില്ലെന്ന കര്ശന നിലപാടിലാണ്. കപ്പലുകളില് നിന്ന് ഇറാന് വലിയ തുക ടോള് ഈടാക്കുന്നതായും റിപ്പോര്ട്ടുകളുണ്ട്. ലബനനില് ഹിസ്ബുള്ള കേന്ദ്രങ്ങള്ക്ക് നേരെ ഇസ്രായേല് സൈന്യം ബോംബാക്രമണം തുടരുകയാണ്. ഹിസ്ബുള്ളയെ നിരായുധരാക്കും വരെ പിന്മാറില്ലെന്ന് ഇസ്രായേല് പ്രധാനമന്ത്രി ബെഞ്ചമിന് നെതന്യാഹു പ്രഖ്യാപിച്ചു. കഴിഞ്ഞ രാത്രിയിലും ബെയ്റൂട്ടിന്റെ പ്രാന്തപ്രദേശങ്ങളില് ഇസ്രായേല് വ്യോമാക്രമണം നടത്തി.
ഇതിന് തിരിച്ചടിയായി ഹിസ്ബുള്ള ഇസ്രായേലിലെ ഹൈഫ നഗരത്തിലേക്ക് മിസൈലുകള് തൊടുത്തു. ലബനനില് ഇസ്രായേല് നടത്തിയ ആക്രമണങ്ങളില് ഇതിനോടകം മുന്നൂറിലധികം പേര് കൊല്ലപ്പെട്ടതായാണ് കണക്കുകള്. മേഖലയിലെ സംഘര്ഷം കൂടുതല് രാജ്യങ്ങളിലേക്ക് വ്യാപിക്കുന്നതിന്റെ സൂചനയായി കുവൈറ്റിലെ നാഷണല് ഗാര്ഡ് കേന്ദ്രങ്ങള്ക്ക് നേരെ ഡ്രോണ് ആക്രമണമുണ്ടായി. ആക്രമണത്തിന് പിന്നില് ഇറാന് അനുകൂലികളാണെന്ന് കുവൈറ്റ് വിദേശകാര്യ മന്ത്രാലയം ആരോപിച്ചു. ഇത് അന്താരാഷ്ട്ര നിയമങ്ങളുടെ ലംഘനമാണെന്നും വെടിനിര്ത്തല് കരാറിനെ അട്ടിമറിക്കുന്ന നീക്കമാണെന്നും കുവൈറ്റ് വ്യക്തമാക്കി.
അടുത്തയാഴ്ച വാഷിംഗ്ടണില് വെച്ച് ഇസ്രായേലും ലബനനും നേരിട്ടുള്ള ചര്ച്ചകള് നടത്താന് തീരുമാനിച്ചിട്ടുണ്ടെങ്കിലും നിലവിലെ സാഹചര്യം ഈ ചര്ച്ചകളുടെ വിജയത്തില് നിഴല് വീഴ്ത്തുന്നു.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
Also Read
ഗള്ഫ് യുദ്ധപ്രതിസന്ധി: ഇന്ത്യക്ക് കനത്ത പ്രഹരമേല്ക്കും; സ്വയംപര്യാപ്തതയല്ലാതെ മറ്റ് വഴികളില്ല
ഗള്ഫ് യുദ്ധപ്രതിസന്ധി: ഇന്ത്യക്ക് കനത്ത പ്രഹരമേല്ക്കും; സ്വയംപര്യാപ്തതയല്ലാതെ മറ്റ് വഴികളില്ല
