കൊച്ചി: ലൈംഗികാതിക്രമ കേസില് റിമാന്ഡില് കഴിയുന്ന സംവിധായകന് രഞ്ജിത്തിന്റെ പുതിയ സിനിമയുടെ ഡബിംഗ് ജോലികള് ഇപ്പോഴും സജീവം. അതിനിടെ പരാതിക്കാരിയായ നടിക്കെതിരെ ഗുരുതര ആരോപണങ്ങളുമായി സംവിധായകന് കോടതിയില്. നടിയുടെ അഭിനയം മോശമായതിനാലാണ് പല സീനുകളും വെട്ടിമാറ്റിയതെന്നും ഇതിലുള്ള പകയാണ് പരാതിക്ക് പിന്നിലെന്നുമാണ് രഞ്ജിത്തിന്റെ പുതിയ വാദം.
രഞ്ജിത്ത് ജയിലിലായെങ്കിലും അദ്ദേഹം സംവിധാനം ചെയ്യുന്ന സിനിമയുടെ പോസ്റ്റ് പ്രൊഡക്ഷന് ജോലികള് തടസ്സമില്ലാതെ നടക്കുകയാണ്. ചിത്രത്തിന്റെ ഡബ്ബിംഗ് ഉള്പ്പെടെയുള്ള പ്രധാന ഘട്ടങ്ങള് അണിയറയില് പുരോഗമിക്കുകയാണെന്നാണ് വിവരം. എഡിറ്റിംഗ് വേളയില് ചില ഷോട്ടുകള് കൂടി പുനര്ചിത്രീകരിക്കണം എന്ന് സംവിധായകന് നിര്ദ്ദേശിച്ചിരുന്നു. എന്നാല് നിലവിലെ സാഹചര്യത്തില് അവ ഒഴിവാക്കിയാലും സിനിമയുടെ പൂര്ണ്ണതയെ ബാധിക്കില്ലെന്നാണ് സാങ്കേതിക പ്രവര്ത്തകരുടെ വിലയിരുത്തല്.
സിനിമയുടെ അവസാനഘട്ട ജോലികള് നടക്കുമ്പോള് സംവിധായകന് ജയിലിലായത് നിര്മ്മാതാക്കളെയും മറ്റ് പ്രവര്ത്തകരെയും ആശങ്കയിലാക്കിയിട്ടുണ്ട്. സംവിധായകന്റെ അസാന്നിധ്യത്തിലും സിനിമ പൂര്ത്തിയാക്കാനുള്ള ശ്രമങ്ങളാണ് നടക്കുന്നത്. സിനിമയെ വെല്ലുന്ന നാടകീയമായ നീക്കങ്ങളാണ് കോടതിയിലും ജയിലിലും അരങ്ങേറുന്നത്. ഒരു വശത്ത് സിനിമ പൂര്ത്തിയാക്കാനുള്ള നെട്ടോട്ടം നടക്കുമ്പോള് മറുവശത്ത് നിയമപോരാട്ടം കടുക്കുകയാണ്. സംവിധായകന്റെ ഓരോ നീക്കവും സിനിമാ ലോകം അതീവ ജാഗ്രതയോടെയാണ് നിരീക്ഷിക്കുന്നത്.
തന്റെ പുതിയ ചിത്രത്തില് അഭിനയിച്ച നടിയുടെ പ്രകടനം പ്രതീക്ഷയ്ക്കൊത്ത് ഉയര്ന്നില്ലെന്ന് രഞ്ജിത്ത് ആരോപിക്കുന്നു. അഭിനയത്തിലെ പോരായ്മകള് ചൂണ്ടിക്കാട്ടി നടിയെ വിമര്ശിച്ചിരുന്നു. ഇതില് പ്രകോപിതയായാണ് നടി തനിക്കെതിരെ വ്യാജ പരാതി നല്കിയതെന്നാണ് രഞ്ജിത്ത് കോടതിയെ അറിയിച്ചത്.
ജനുവരിയില് നടന്നുവെന്ന് പറയുന്ന സംഭവത്തില് മാര്ച്ച് മാസത്തിലാണ് നടി പരാതി നല്കിയത്. ഈ കാലതാമസം ബോധപൂര്വ്വമാണെന്നും ആരുടെയൊക്കെയോ പ്രേരണയാലാണ് പരാതി നല്കിയതെന്നും രഞ്ജിത്തിന്റെ അഭിഭാഷകന് ജാമ്യാപേക്ഷയില് വാദിച്ചു. കൃത്യമായ തിരക്കഥയുടെ അടിസ്ഥാനത്തില് തന്നെ ജയിലിലടയ്ക്കാന് ഗൂഢാലോചന നടന്നതായും അദ്ദേഹം ആരോപിക്കുന്നു.
അതേസമയം, രഞ്ജിത്ത് അന്വേഷണവുമായി ഒട്ടും സഹകരിക്കുന്നില്ലെന്ന് പ്രോസിക്യൂഷന് കോടതിയില് വ്യക്തമാക്കി. ജയിലില് ഡോക്ടര്മാര് നിര്ദ്ദേശിക്കുന്ന മരുന്നുകള് പോലും കഴിക്കാന് അദ്ദേഹം തയ്യാറാകുന്നില്ല. ഈ നിസ്സഹകരണം മൂലമാണ് കസ്റ്റഡി കാലാവധി തീരുന്നതിന് മുന്പേ അദ്ദേഹത്തെ കോടതിയില് ഹാജരാക്കേണ്ടി വന്നതെന്നും പോലീസ് അറിയിച്ചു.
തന്റെ അറസ്റ്റും ജയില്വാസവും രാഷ്ട്രീയ പ്രേരിതമാണെന്ന നിലപാടിലാണ് രഞ്ജിത്ത്. വരാനിരിക്കുന്ന നിയമസഭാ തിരഞ്ഞെടുപ്പ് കഴിയുന്നത് വരെ തന്നെ ജയിലില് അടയ്ക്കാനാണ് പോലീസ് നീക്കമെന്ന് അദ്ദേഹം കോടതിയില് നേരിട്ട് പറഞ്ഞു. സര്ക്കാരിനും പോലീസിനുമെതിരെ രാഷ്ട്രീയ ഗൂഢാലോചന എന്ന ആയുധമാണ് രഞ്ജിത്ത് കോടതിയില് പ്രയോഗിച്ചത്.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
ശബ്ദം മോഷ്ടിക്കുന്ന കള്ളന്മാര്ക്ക് പൂട്ടിടാന് സൂപ്പര് താരം; എഐ മാഫിയയ്ക്കെതിരെ മോഹന്ലാലിന്റെ തീപ്പൊരി പോരാട്ടം; ഇത് ‘റിയല് ലൈഫ്’ പോരാട്ടം; മോഹന്ലാല് രണ്ടും കല്പ്പിച്ച്
