“ട്രെയിനിൽ കയറരുത്, ട്രാക്കിൽ നിന്നും മാറിനിൽക്കുക”; ഇറാനിൽ ട്രെയിൻ യാത്ര ഒഴിവാക്കാൻ ഇസ്രയേലിന്റെ മുന്നറിയിപ്പ്;; ടെഹ്‌റാനിലെ സിനഗോഗ് തകർത്തു; ട്രംപിന്റെ സമയപരിധി ഇന്ന് അവസാനിക്കുന്നു

ടെഹ്‌റാൻ: പശ്ചിമേഷ്യൻ സംഘർഷം അതീവ ഗുരുതരമായ ഘട്ടത്തിലേക്ക് കടക്കുന്നു. ഇറാനിലെ ജനങ്ങൾ ട്രെയിൻ യാത്രകൾ പൂർണ്ണമായും ഒഴിവാക്കണമെന്നും റെയിൽവേ പാളങ്ങളിൽ നിന്ന് അകലം പാലിക്കണമെന്നും ഇസ്രയേൽ സൈന്യം അടിയന്തര മുന്നറിയിപ്പ് നൽകി. ഇന്ന് രാത്രി 9 മണിവരെ രാജ്യത്തുടനീളം ട്രെയിനുകൾ ഉപയോഗിക്കുന്നത് ജീവന് ഭീഷണിയാണെന്നാണ് ഇസ്രയേലിന്റെ സന്ദേശം. റെയിൽവേ ശൃംഖലകളെ ലക്ഷ്യം വെച്ച് വൻതോതിലുള്ള ആക്രമണം ഉണ്ടാകുമെന്ന സൂചനയാണ് ഈ മുന്നറിയിപ്പ് നൽകുന്നത്.

അതേസമയം, ഇന്ന് പുലർച്ചെ യുഎസ്-ഇസ്രയേൽ സേനകൾ സംയുക്തമായി നടത്തിയ വ്യോമാക്രമണത്തിൽ ടെഹ്‌റാനിലെ പ്രശസ്തമായ റാഫി നിയ സിനഗോഗ് പൂർണ്ണമായും തകർന്നു. ഇറാനിലെ വാർത്താ ഏജൻസിയായ മെഹ്ർ ആണ് ഈ വിവരം പുറത്തുവിട്ടത്. രാജ്യത്ത് ജൂതവിഭാഗം കുറവാണെങ്കിലും ചരിത്രപരമായി ഏറെ പ്രാധാന്യമർഹിക്കുന്ന ദേവാലയമായിരുന്നു ഇത്. ഇറാനിലെ വൈദ്യുതി നിലയങ്ങളും പാലങ്ങളും തകർക്കുമെന്ന അമേരിക്കൻ പ്രസിഡന്റ് ഡൊണാൾഡ് ട്രംപിന്റെ അന്ത്യശാസനം അവസാനിക്കുന്ന ദിവസം ഇന്നാണ്.

അമേരിക്ക മുന്നോട്ടുവെച്ച വെടിനിർത്തൽ നിർദ്ദേശം ഇറാൻ പൂർണ്ണമായും തള്ളിക്കളഞ്ഞു. തങ്ങളുടെ താല്പര്യങ്ങൾ കൂടി പരിഗണിച്ചുകൊണ്ട് യുദ്ധം പൂർണ്ണമായി അവസാനിപ്പിക്കണമെന്നാണ് ഇറാന്റെ നിലപാട്.

 “ട്രെയിനിലോ റെയിൽവേ ട്രാക്കിന് സമീപമോ നിങ്ങളുടെ സാന്നിധ്യമുണ്ടായാൽ ജീവൻ നഷ്ടപ്പെടാം” എന്ന ഇസ്രയേൽ സൈന്യത്തിന്റെ കർശന നിർദ്ദേശം ഇറാൻ ജനതയ്ക്കിടയിൽ വലിയ പരിഭ്രാന്തി സൃഷ്ടിച്ചിട്ടുണ്ട്.

ഹോർമുസ് കടലിടുക്കിനെച്ചൊല്ലിയുള്ള തർക്കം ഒരു പൂർണ്ണ യുദ്ധത്തിലേക്ക് നീങ്ങുന്ന കാഴ്ചയാണ് നിലവിലുള്ളത്. അമേരിക്കയും ഇസ്രയേലും ആക്രമണം കടുപ്പിച്ചതോടെ ഇറാന്റെ തിരിച്ചടി എങ്ങനെയായിരിക്കുമെന്ന ആശങ്കയിലാണ് ലോകരാജ്യങ്ങൾ. അടുത്ത മണിക്കൂറുകൾ പശ്ചിമേഷ്യയെ സംബന്ധിച്ചിടത്തോളം നിർണ്ണായകമാണ്.