അഞ്ചു പിടിക്കാന്‍ അമിത് ഷാ; പത്തു കടന്നാല്‍ ‘പടയോട്ടം’; കേരളത്തില്‍ താമര വിരിയുമോ?

തിരുവനന്തപുരം: നിയമസഭാ തിരഞ്ഞെടുപ്പിന്റെ ഗോദയില്‍ ഇത്തവണ അക്കൗണ്ട് തുറക്കുക എന്നതിനപ്പുറം, കേരള രാഷ്ട്രീയത്തിന്റെ ഗതി നിയന്ത്രിക്കുന്ന നിര്‍ണ്ണായക ശക്തിയാകാന്‍ ഉറച്ച് ബിജെപി. ഡല്‍ഹിയിലെ രാഷ്ട്രീയ ചാണക്യന്‍ അമിത് ഷാ നേരിട്ട് വരച്ച വരയിലൂടെ നീങ്ങുന്ന പാര്‍ട്ടിക്ക് ഇത്തവണ ലക്ഷ്യം ഒന്നുമാത്രം-ഭരണസിരാകേന്ദ്രത്തില്‍ സാന്നിധ്യം ഉറപ്പിക്കുക. അഞ്ചിടത്ത് ജയിച്ചേ മതിയാകൂ എന്ന കര്‍ശന നിര്‍ദ്ദേശമാണ് അമിത് ഷാ കേരള ഘടകത്തിന് നല്‍കിയിരിക്കുന്നത്. അതേസമയം, മോദി തരംഗം ആഞ്ഞടിച്ചാല്‍ വിജയം രണ്ടക്കത്തിലേക്ക് കടക്കുമെന്ന കണക്കുകൂട്ടലിലാണ് ദേശീയ നേതൃത്വം.

നേമം, കഴക്കൂട്ടം, പൂഞ്ഞാര്‍, തൃശൂര്‍, പാലക്കാട്, മഞ്ചേശ്വരം, ആറന്മുള എന്നീ ഏഴ് മണ്ഡലങ്ങളിലാണ് ബിജെപി ഇത്തവണ സര്‍വ്വസന്നാഹങ്ങളുമായി ഇറങ്ങുന്നത്. ഈ മണ്ഡലങ്ങളില്‍ പാര്‍ട്ടിക്ക് ശക്തമായ അടിത്തറയുണ്ടെന്നും കരുത്തരായ സ്ഥാനാര്‍ത്ഥികളെ അണിനിരത്തുന്നതിലൂടെ ‘അഞ്ചു സീറ്റ്’ എന്ന കടമ്പ കടക്കാമെന്നുമാണ് കേന്ദ്ര നേതൃത്വത്തിന്റെ വിലയിരുത്തല്‍.

ആറന്മുളയില്‍ കുമ്മനം രാജശേഖരന്റെ വ്യക്തിപ്രഭാവം വോട്ടായി മാറുമെന്ന പ്രതീക്ഷയിലാണ് ബിജെപി. ആറന്മുളയിലെ മണ്ണില്‍ അപ്രതീക്ഷിത വിജയം കൊയ്യാമെന്ന് പാര്‍ട്ടി ഉറച്ചു വിശ്വസിക്കുന്നു. പൂഞ്ഞാറില്‍ പി.സി. ജോര്‍ജിന്റെ കരുത്തും പാലക്കാട്ട് ശോഭാ സുരേന്ദ്രന്റെ ജനസ്വാധീനവും വിജയമുറപ്പിക്കുമെന്ന് നേതൃത്വം കണക്കുകൂട്ടുന്നു. മഞ്ചേശ്വരത്ത് കെ. സുരേന്ദ്രനും തൃശൂരില്‍ പത്മജാ വേണുഗോപാലും താമര വിരിയിക്കുമെന്ന ആത്മവിശ്വാസത്തിലാണ് ബിജെപി കേന്ദ്രങ്ങള്‍. നേമവും കഴക്കൂട്ടവും പാര്‍ട്ടിക്ക് ‘കൈവെള്ളയിലെ നെല്ലിക്ക’ പോലെ ഉറപ്പാണെന്നും അവര്‍ കരുതുന്നു.

സംസ്ഥാനത്ത് അപ്രതീക്ഷിതമായി ഒരു മോദി തരംഗം ആഞ്ഞടിച്ചാല്‍ തിരുവനന്തപുരം സെന്‍ട്രല്‍, കാട്ടാക്കട, ആറ്റിങ്ങല്‍, നെടുമങ്ങാട് എന്നീ മണ്ഡലങ്ങളും ബിജെപിക്കൊപ്പം നില്‍ക്കുമെന്നാണ് വിലയിരുത്തല്‍. പാരമ്പര്യമായി രണ്ടാം സ്ഥാനത്തെത്തുന്ന ഈ മണ്ഡലങ്ങളില്‍ വോട്ടുവിഹിതത്തില്‍ വമ്പന്‍ വര്‍ദ്ധനവുണ്ടായാല്‍ ബിജെപിയുടെ നിയമസഭാ സാന്നിധ്യം പത്തു കടക്കും. ഇതോടെ കേരളം വികസിത കേരളമെന്ന മോദിയുടെ സ്വപ്നത്തിലേക്ക് അടുക്കുമെന്നാണ് പ്രചാരണായുധം.

വിജയസാധ്യതയുള്ള സീറ്റുകള്‍ക്ക് പുറമെ പാലാ, തിരുവല്ല, കാഞ്ഞിരപ്പള്ളി, ഒല്ലൂര്‍, നാട്ടിക, മലമ്പുഴ എന്നിവിടങ്ങളില്‍ വമ്പന്‍ പ്രകടനം കാഴ്ചവെച്ച് പ്രമുഖ രാഷ്ട്രീയ ശക്തിയായി മാറാനാണ് ബിജെപിയുടെ നീക്കം. ഓരോ വോട്ടും കൃത്യമായി എണ്ണിക്കൊണ്ടുള്ള പ്രവര്‍ത്തനമാണ് അമിത് ഷാ വിഭാവനം ചെയ്തിരിക്കുന്നത്.

തിരഞ്ഞെടുപ്പ് പ്രവര്‍ത്തനങ്ങളില്‍ ഒരിടത്തും വീഴ്ച വരുത്തരുതെന്ന കര്‍ശന നിര്‍ദ്ദേശമാണ് അമിത് ഷായും നരേന്ദ്ര മോദിയും നല്‍കിയിട്ടുള്ളത്. തോല്‍വിയുടെ കാരണങ്ങള്‍ ഇഴകീറി പരിശോധിക്കുന്നതില്‍ സിപിഎമ്മിനോളം തന്നെ പ്രാഗത്ഭ്യമുള്ള ബിജെപി, ഇത്തവണ ഓരോ നീക്കവും നടത്തുന്നത് സൂക്ഷ്മമായ കണക്കുകൂട്ടലുകളോടെയാണ്. കേരളത്തില്‍ താമര ഒന്നിലധികം ഇടങ്ങളില്‍ വിരിയുമോ എന്ന ചോദ്യത്തിന് അത് എന്ന് തന്നെയാണ് ബിജെപി നേതൃത്വം നല്‍കുന്ന മറുപടി.