തിരുവനന്തപുരം: പത്തു വര്ഷത്തെ ഏകഛത്രാധിപത്യത്തിന് ശേഷം ഭരണത്തിന് പുറത്തായ സി.പി.എമ്മില് പിണറായി വിജയന്റെ അധികാരത്തുടര്ച്ചയ്ക്കെതിരെ പടയൊരുക്കം. തിരഞ്ഞെടുപ്പിലേറ്റ കനത്ത പ്രഹരത്തിന് പിന്നാലെ, പിണറായി വിജയനെ തന്നെ പ്രതിപക്ഷ നേതാവാക്കി വാഴിക്കാനുള്ള ഔദ്യോഗിക പക്ഷത്തിന്റെ നീക്കത്തിനെതിരെ പാര്ട്ടിയില് കലാപം പുകയുകയാണ്. പിണറായിയെ പ്രതിപക്ഷ നേതാവാക്കുന്നത് പരാജയത്തിന്റെ ഉത്തരവാദിത്തത്തില് നിന്നുള്ള ‘രാഷ്ട്രീയ ഒളിച്ചോട്ടം’ ആണെന്നും, പി. ജയരാജന് നേതൃത്വത്തിലേക്ക് വരണമെന്നും ആവശ്യപ്പെട്ട് കണ്ണൂരിലെ അണികള് രംഗത്തെത്തിക്കഴിഞ്ഞു.
തോല്വിക്ക് പിന്നാലെ മുഖ്യമന്ത്രി സ്ഥാനം ഒഴിഞ്ഞെങ്കിലും, ക്യാബിനറ്റ് പദവിയുള്ള പ്രതിപക്ഷ നേതൃസ്ഥാനം കൈക്കലാക്കി കൊടിവച്ച കാറും ഔദ്യോഗിക വസതിയായ കന്റോണ്മെന്റ് ഹൗസും നിലനിര്ത്താനാണ് പിണറായിയുടെയും അനുയായികളുടെയും ശ്രമം. സജി ചെറിയാനും കെ.എന്. ബാലഗോപാലും അടങ്ങുന്ന സംഘം ഈ നീക്കത്തിന് പിന്നിലുണ്ടെങ്കിലും, എം.വി. ഗോവിന്ദനെതിരെയും പിണറായിയുടെ ശൈലിക്കെതിരെയും സംസ്ഥാന സമിതിയില് വലിയ പൊട്ടിത്തെറിയുണ്ടാകുമെന്നാണ് സൂചന. വിജയത്തിലും പരാജയത്തിലും പിണറായി എന്ന ഒരൊറ്റ കേന്ദ്രത്തിലേക്ക് പാര്ട്ടി ചുരുങ്ങുന്നതിനെതിരെ ‘ചെന്താരകം’ പി. ജയരാജന് നിലപാട് കടുപ്പിക്കുന്നത് ഔദ്യോഗിക പക്ഷത്തെ വിറളിപിടിപ്പിച്ചിട്ടുണ്ട്.
പാര്ട്ടിക്ക് ലഭിച്ച 34 സീറ്റുകളെന്ന ദയനീയ സംഖ്യ പിണറായി വിജയന്റെ ധാര്ഷ്ട്യത്തിനും എം.വി. ഗോവിന്ദന്റെ സംഘടനാ പരാജയത്തിനും ലഭിച്ച തിരിച്ചടിയാണെന്നാണ് അണികളുടെ പക്ഷം. ‘ക്യാപ്റ്റന്’ ഇമേജിനെതിരെ പരസ്യമായി രംഗത്തെത്തിയ പി. ജയരാജന്, വിജയപരാജയങ്ങള് വ്യക്തിപൂജയില് അധിഷ്ഠിതമാകരുതെന്ന് ഓര്മ്മിപ്പിച്ചത് പിണറായിക്കുള്ള കനത്ത പ്രഹരമാണ്. വ്യക്തിപൂജയെ പ്രോത്സാഹിപ്പിച്ചവര്ക്ക് ജനങ്ങള് നല്കിയ മറുപടിയാണ് ഈ പരാജയമെന്ന് ജയരാജന് പക്ഷം വാദിക്കുന്നു. പാര്ട്ടി സെക്രട്ടറി സ്ഥാനത്തേക്ക് ജയരാജന് വരണമെന്ന മുറവിളി സൈബര് ഇടങ്ങളില് ‘പി.ജെ ആര്മി’ സജീവമാക്കിയിട്ടുണ്ട്.
മുഖ്യമന്ത്രിയുടെ ഓഫീസിനെ നിയന്ത്രിച്ചിരുന്ന പി. ശശിക്കെതിരെയും കെ.കെ. രാഗേഷിനെതിരെയും പാര്ട്ടിയില് പടയൊരുക്കം ശക്തമാണ്. പി. ശശിയുടെ പോലീസ് നയങ്ങളാണ് ഭരണവിരുദ്ധ വികാരം ആളിക്കത്തിച്ചതെന്നും അദ്ദേഹത്തെ മാറ്റാതെ ഇനി ജനങ്ങളെ അഭിമുഖീകരിക്കാനാവില്ലെന്നും മുതിര്ന്ന നേതാക്കള് വിശ്വസിക്കുന്നു. സഭയില് കെ.കെ. ശൈലജ ഇല്ലാത്തത് തിരിച്ചടിയാകുമെന്നിരിക്കെ, പിണറായി തന്നെ സര്വ്വാധികാരിയായി തുടരുന്നത് പാര്ട്ടിയെ ‘ബംഗാള് ലൈനിലേക്ക്’ നയിക്കുമെന്ന ആശങ്ക ശക്തമാണ്. ബംഗാളിലും ത്രിപുരയിലും സംഭവിച്ചതുപോലെ പാര്ട്ടി അപ്രസക്തമാകുന്നത് തടയാന് നേതൃമാറ്റം അനിവാര്യമാണെന്നാണ് വിമര്ശകരുടെ പക്ഷം.
കോണ്ഗ്രസ് അതിന്റെ നേതൃത്വത്തില് പുതിയ തലമുറയെയും അനുഭവസമ്പത്തിനെയും ഒന്നിപ്പിക്കുമ്പോള്, സി.പി.എമ്മില് പിണറായി കന്റോണ്മെന്റ് ഹൗസിലേക്ക് മാറുന്നത് നവീകരണത്തിന് തടസ്സമാകുമെന്ന് മുതിര്ന്ന നേതാവായ എം.എ. ബേബി ഉള്പ്പെടെയുള്ളവര് കരുതുന്നു. തിരുത്തല് നടപടികള്ക്ക് നേതൃത്വം നല്കാന് പി. ജയരാജന് തന്നെ വരണമെന്ന വികാരം കേരളത്തിലുടനീളം പടരുകയാണ്.
പരാജയത്തിന്റെ ഉത്തരവാദിത്തം താഴേത്തട്ടില് കെട്ടിവെക്കാതെ നേതൃത്വം തന്നെ ഏറ്റെടുക്കണമെന്ന ഉറച്ച നിലപാടിലാണ് അണികള്. നാളെ ചേരുന്ന സംസ്ഥാന സെക്രട്ടേറിയറ്റ് യോഗം സി.പി.എമ്മിന്റെ രാഷ്ട്രീയ ഭാവി നിര്ണ്ണയിക്കുന്ന അഗ്നിപരീക്ഷയാകും.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
‘ഇതാണ് മോഹന്ലാല് മാജിക്’, ‘സ്നേഹത്തിന്റെ സുപ്പര്സ്റ്റാര്’! ഒരാള്ക്ക് മനുഷ്യ മനസ്സിനെ ഇത്രയേറെ സ്വാധീനിക്കാന് കഴിയുമോ? ലാലേട്ടനെ കണ്ട് വികാരാധീനയായി പൊട്ടിക്കരഞ്ഞ് യുവതി!
