തിരുവനന്തപുരം: കേരള രാഷ്ട്രീയത്തില് വര്ഗീയതയും വോട്ടുബാങ്ക് രാഷ്ട്രീയവും വീണ്ടും ചര്ച്ചയാകുമ്പോള്, എസ്.ഡി.പി.ഐയുമായുള്ള ബന്ധത്തെച്ചൊല്ലി ഇടതുമുന്നണി പ്രതിരോധത്തില്. ലോക്സഭാ-തദ്ദേശ തിരഞ്ഞെടുപ്പുകളില് യു.ഡി.എഫ് വിജയത്തിന് പിന്നില് എസ്.ഡി.പി.ഐ വോട്ടാണെന്ന് ആക്രോശിച്ച സി.പി.എം, ഇപ്പോള് സ്വന്തം പാളയത്തിലേക്ക് ഒഴുകുന്ന അതേ വോട്ടുകളെ തള്ളിപ്പറയാന് മടിക്കുന്നത് രാഷ്ട്രീയ വൃത്തങ്ങളില് വന് ചര്ച്ചയാണ്. നേമത്ത് എല്.ഡി.എഫ് സ്ഥാനാര്ത്ഥി വി. ശിവന്കുട്ടിയെ പിന്തുണയ്ക്കുമെന്ന് എസ്.ഡി.പി.ഐ പരസ്യമായി പ്രഖ്യാപിച്ചതോടെ സി.പി.എം നിലപാട് വെട്ടിലായിരിക്കുകയാണ്.
‘എല്ലാ വോട്ടും സ്വീകരിക്കും’ എന്ന ശിവന്കുട്ടിയുടെ പ്രതികരണം തീവ്രനിലപാടുകാരുമായുള്ള അവിശുദ്ധ കൂട്ടുകെട്ടിന്റെ തെളിവാണെന്ന് പ്രതിപക്ഷം ആരോപിക്കുന്നു. നേരത്തെ വെല്ഫെയര് പാര്ട്ടിയുമായുള്ള സഖ്യത്തിന്റെ പേരില് കോണ്ഗ്രസിനെ കുരിശിലേറ്റിയ മുഖ്യമന്ത്രി പിണറായി വിജയന്, ഇപ്പോള് എസ്.ഡി.പി.ഐയുടെ പിന്തുണയെക്കുറിച്ചുള്ള ചോദ്യങ്ങളില് നിന്ന് ക്ഷുഭിതനായി ഒഴിഞ്ഞുമാറുകയാണ്. കഴിഞ്ഞ ദിവസം കൊല്ലത്ത് നടന്ന വാര്ത്താസമ്മേളനത്തില് ഇതുസംബന്ധിച്ച ചോദ്യങ്ങള് ഉയര്ന്നപ്പോള് മറുപടി നല്കാതെ മുഖ്യമന്ത്രി എഴുന്നേറ്റുപോയത് വലിയ വിവാദത്തിന് തിരികൊളുത്തി.
ലോക്സഭാ തിരഞ്ഞെടുപ്പ് വേളയില് എസ്.ഡി.പി.ഐയുടെ വോട്ട് വേണ്ടെന്ന് അസന്നിഗ്ദ്ധമായി പ്രഖ്യാപിച്ച പ്രതിപക്ഷ നേതാവ് വി.ഡി. സതീശന്റെ ആര്ജ്ജവം എന്തുകൊണ്ട് മുഖ്യമന്ത്രിക്കില്ലെന്ന് കോണ്ഗ്രസ് ചോദിക്കുന്നു. 36 ഇടങ്ങളില് മാത്രം സ്ഥാനാര്ത്ഥികളെ നിര്ത്തി ബാക്കിയിടങ്ങളില് ഇടതുപക്ഷത്തിന് പരോക്ഷ പിന്തുണ നല്കാനാണ് എസ്.ഡി.പി.ഐ നീക്കം. ‘പൊതുസമൂഹത്തെ അറിയിക്കേണ്ടതില്ലെങ്കില് പ്രഖ്യാപിക്കില്ല’ എന്ന എസ്.ഡി.പി.ഐ അഖിലേന്ത്യാ പ്രസിഡന്റ് എം.കെ. ഫൈസിയുടെ വാക്കുകള് രഹസ്യസഖ്യം ശരിവെക്കുന്നതാണ്.
ജമാഅത്തെ ഇസ്ലാമിയെയും മുസ്ലിം ലീഗിനെയും കടന്നാക്രമിച്ചുകൊണ്ട് ഹിന്ദു, ക്രിസ്ത്യന് വോട്ട് ബാങ്കുകള് തങ്ങളിലേക്ക് അടുപ്പിക്കാനായിരുന്നു സി.പി.എം തുടക്കത്തില് ശ്രമിച്ചത്. എന്നാല് എസ്.ഡി.പി.ഐയുടെ ഈ ‘മനസ്സില്ലാ മനസ്സോടെയുള്ള’ പിന്തുണ സി.പി.എമ്മിന്റെ ഈ തന്ത്രങ്ങളെ പാളിച്ചേക്കും. വര്ഗീയതയുമായി വിട്ടുവീഴ്ചയില്ലെന്ന് പറയുമ്പോഴും എസ്.ഡി.പി.ഐ വോട്ട് വേണ്ടെന്ന് തറപ്പിച്ചു പറയാന് സി.പി.ഐ സംസ്ഥാന സെക്രട്ടറി ബിനോയ് വിശ്വത്തിന് മാത്രമാണ് നേരിയ ധൈര്യമെങ്കിലും ഉണ്ടായത്. ഇതിനെ മുഖ്യമന്ത്രി പരിഹസിക്കുകയും ചെയ്തു.
മഞ്ചേശ്വരത്ത് ബി.ജെ.പി സ്ഥാനാര്ത്ഥിയെ തോല്പ്പിക്കാനെന്ന പേരില് എസ്.ഡി.പി.ഐ സ്ഥാനാര്ത്ഥിയെ പിന്വലിച്ചതും എല്.ഡി.എഫിന് അനുകൂലമായ സാഹചര്യമൊരുക്കാനാണെന്ന ആരോപണം ശക്തമാണ്. കടുത്ത മത്സരം നടക്കുന്ന മണ്ഡലങ്ങളില് എസ്.ഡി.പി.ഐയുടെ കേഡര് വോട്ടുകള് നിര്ണ്ണായകമാകുമെന്ന തിരിച്ചറിവിലാണ് സി.പി.എം മൗനം പാലിക്കുന്നത്. എന്നാല്, ഈ നിലപാട് ഭൂരിപക്ഷ സമുദായങ്ങള്ക്കിടയില് സി.പി.എമ്മിന് അവമതിപ്പുണ്ടാക്കുമെന്ന ആശങ്ക ഇടത് കേന്ദ്രങ്ങളില് തന്നെയുണ്ട്. വരും ദിവസങ്ങളില് എസ്.ഡി.പി.ഐ ബന്ധം കേരള രാഷ്ട്രീയത്തിലെ പ്രധാന ആയുധമായി മാറുമെന്ന് ഉറപ്പായി.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
സ്പീക്കര് പദവി ഒഴിഞ്ഞു, ‘നീതി’യില് നിന്ന് പടിയിറക്കം; സി.പി.എമ്മില് ഇനി ഷംസീറിന്റെ റോളെന്ത്? കൊടിയേരിയുടെ പ്രിയശിഷ്യനെ കാത്തിരിക്കുന്നതെന്ത്?
