രാഷ്ട്രീയ സമവാക്യങ്ങളും അച്ഛന്‍ മകന്‍ ബന്ധവും; ബോക്‌സ് ഓഫീസില്‍ തരംഗമായി ബി. ഉണ്ണിക്കൃഷ്ണന്‍ – നിവിന്‍ പോളി ചിത്രം ‘പ്രതിഛായ’

തിരുവനന്തപുരം: രാഷ്ട്രീയ ചതുരംഗക്കളത്തിലെ കരുനീക്കങ്ങളും കുടുംബബന്ധങ്ങളുടെ വൈകാരികതയും ഇഴചേർത്ത് ബി. ഉണ്ണിക്കൃഷ്ണൻ സംവിധാനം ചെയ്ത ‘പ്രതിഛായ’ തിയറ്ററുകളിൽ ആവേശമാകുന്നു. കേവലം ഒരു രാഷ്ട്രീയ സിനിമ എന്നതിലുപരി, ഭരണകൂടത്തിനെതിരെ ഉയരുന്ന ആരോപണങ്ങളും അതിനെത്തുടർന്നുള്ള അന്വേഷണങ്ങളും പ്രമേയമാക്കുന്ന ചിത്രം പ്രേക്ഷകനെ മുൾമുനയിൽ നിർത്തുന്ന അനുഭവമാണ് സമ്മാനിക്കുന്നത്.

ടൈറ്റിൽ കാർഡ് മുതൽ രാഷ്ട്രീയ സൂചനകൾ നൽകുന്ന ചിത്രം, കേരള മുഖ്യമന്ത്രിക്ക് നേരിടേണ്ടി വരുന്ന അപ്രതീക്ഷിത ആരോപണത്തിലൂടെയാണ് വികസിക്കുന്നത്. ആരോപണത്തെത്തുടർന്ന് മുഖ്യമന്ത്രി രാജിവെക്കുന്നതും, തുടർന്ന് തന്റെ അച്ഛനെതിരെയുള്ള ഗൂഢാലോചനകൾ പുറത്തുകൊണ്ടുവരാൻ മകൻ നടത്തുന്ന പോരാട്ടവുമാണ് ചിത്രത്തിന്റെ കാതൽ. കോർപ്പറേറ്റ് താത്പര്യങ്ങളും രാഷ്ട്രീയ നാടകങ്ങളും കൃത്യമായ അളവിൽ ചേർത്തുവെച്ച ഒരു വലിയ ക്യാൻവാസിലാണ് ബി. ഉണ്ണിക്കൃഷ്ണൻ ഈ കഥ പറഞ്ഞിരിക്കുന്നത്.

തിരക്കഥയിലെ സൂക്ഷ്മതയാണ് ചിത്രത്തിന്റെ ഏറ്റവും വലിയ കരുത്ത്. ചെറിയൊരു പാളിച്ചയുണ്ടായാൽ പോലും ഒരു പ്രൊപ്പഗാണ്ട സിനിമയായി മാറാമായിരുന്ന പ്രമേയത്തെ അതിവിദഗ്ധമായാണ് സംവിധായകനും സംഘവും കൈകാര്യം ചെയ്തിരിക്കുന്നത്. ഓരോ രംഗത്തിനും കഥാഗതിയിൽ വ്യക്തമായ സ്ഥാനമുണ്ടെന്ന് ഉറപ്പുവരുത്തുന്ന രീതിയിലാണ് ‘വേൾഡ് ബിൽഡിംഗ്’ നടത്തിയിരിക്കുന്നത്.

മുഖ്യമന്ത്രി കെ.എൻ. വർഗീസായി എത്തുന്ന ബാലചന്ദ്രമേനോൻ കരിയറിലെ മികച്ച പ്രകടനങ്ങളിലൊന്നാണ് കാഴ്ചവെച്ചിരിക്കുന്നത്. രാഷ്ട്രീയത്തിൽ വ്യക്തികളല്ല, പ്രതിഛായകൾക്കാണ് പ്രാധാന്യമെന്ന് വിശ്വസിക്കുന്ന മുഖ്യമന്ത്രിയുടെ ഭാവപ്പകർച്ചകൾ അദ്ദേഹം മനോഹരമാക്കി. ഐടി മേഖലയിൽ നിന്ന് രാഷ്ട്രീയത്തിന്റെ അടിയൊഴുക്കുകളിലേക്ക് കടന്നുവരുന്ന ജോൺ വർഗീസ് എന്ന കഥാപാത്രമായി നിവിൻ പോളി ഉജ്ജ്വലമായ പകർന്നാട്ടം നടത്തി. ‘സർവം മായ’ എന്ന ചിത്രത്തിന് ശേഷം തികച്ചും വ്യത്യസ്തമായ ഒരു ഗെറ്റപ്പിലും ശൈലിയിലുമാണ് നിവിൻ ഈ ചിത്രത്തിൽ പ്രത്യക്ഷപ്പെടുന്നത്. മാസ് രംഗങ്ങളും ഇമോഷണൽ രംഗങ്ങളും ഒരുപോലെ കയ്യടക്കത്തോടെ കൈകാര്യം ചെയ്യാൻ താരത്തിന് സാധിച്ചു.

ചിത്രത്തിലെ മറ്റു താരങ്ങളും തങ്ങളുടെ വേഷങ്ങൾ അവിസ്മരണീയമാക്കിയിട്ടുണ്ട്. എം.പി. ടോബിയായി എത്തിയ നിഷാന്ത് സാഗർ വൈകാരികമായ ഒട്ടേറെ നിമിഷങ്ങൾ സ്ക്രീനിലെത്തിച്ചു. ഇതുവരെ കാണാത്ത രീതിയിലുള്ള ഒരു രാഷ്ട്രീയക്കാരനെയാണ് പുരുഷോത്തമൻ എന്ന കഥാപാത്രത്തിലൂടെ ഹരിശ്രീ അശോകൻ അവതരിപ്പിച്ചത്. രവി മാധവനായി എത്തിയ ഷറഫുദ്ദീന്റെ പ്രകടനം അമ്പരപ്പിക്കുന്നതാണ്. അന്നമ്മയായി എത്തിയ സബിത, വിജിത വിജയകുമാർ, ആൻ അഗസ്റ്റിൻ, മണിയൻപിള്ള രാജു തുടങ്ങിയ നീണ്ട താരനിര തന്നെ ചിത്രത്തിലുണ്ട്.

സാങ്കേതിക വശങ്ങളിലും ചിത്രം മികച്ചുനിൽക്കുന്നു. ചന്ദ്രു സെൽവരാജിന്റെ ഛായാഗ്രഹണവും ജസ്റ്റിൻ വർഗീസിന്റെ സംഗീതവും സിനിമയുടെ ദൃശ്യഗാംഭീര്യത്തിന് മാറ്റുകൂട്ടുന്നു. രാഷ്ട്രീയം, കുടുംബം, അന്വേഷണം എന്നിവ കോർത്തിണക്കിയ മികച്ചൊരു സിനിമാനുഭവം ആഗ്രഹിക്കുന്നവർക്ക് ധൈര്യമായി ‘പ്രതിഛായ’യ്ക്ക് ടിക്കറ്റെടുക്കാം. അവതരണശൈലി കൊണ്ടും പ്രകടനങ്ങൾ കൊണ്ടും ചിത്രം ഒരു പക്കാ പൊളിറ്റിക്കൽ ത്രില്ലർ തന്നെയാണെന്ന് നിസംശയം പറയാം.