വാഷിംഗ്ടണ്/ദോഹ: പശ്ചിമേഷ്യയില് യുദ്ധമേഘങ്ങള് കനക്കുന്നു. ഇറാനെതിരെ ശക്തമായ കരയുദ്ധത്തിന് കോപ്പുകൂട്ടി അമേരിക്കന് പ്രസിഡന്റ് ഡൊണാള്ഡ് ട്രംപ്. ഇറാന്റെ ഊര്ജ്ജനിലയങ്ങള് തകര്ക്കുമെന്ന ഭീഷണിയില് നിന്ന് താല്ക്കാലികമായി പിന്മാറിയത് ഇറാനെതിരെ അപ്രതീക്ഷിതമായ കരയാക്രമണം നടത്താനുള്ള തന്ത്രപരമായ നീക്കമാണെന്നാണ് പുറത്തുവരുന്ന സൂചനകള്. ഹോര്മുസ് കടലിടുക്ക് തുറന്നുകൊടുക്കാന് തയ്യാറായില്ലെങ്കില് ഇറാനെ ‘ചാമ്പലാക്കും’ എന്ന മുന്നറിയിപ്പിന് പിന്നാലെ, ഇറാന്റെ സാമ്പത്തിക നട്ടെല്ലായ ഖാര്ഗ് ദ്വീപ് പിടിച്ചെടുക്കാന് അമേരിക്കന് പാരാട്രൂപ്പുകള് സജ്ജമാവുകയാണ്.
ഇറാന്റെ ക്രൂഡ് ഓയില് കയറ്റുമതിയുടെ 90 ശതമാനവും നടക്കുന്നത് ഖാര്ഗ് ദ്വീപ് വഴിയാണ്. വെറും അഞ്ച് മൈല് മാത്രം നീളമുള്ള ഈ ചെറിയ ദ്വീപ് പിടിച്ചടക്കുന്നതിലൂടെ ഇറാനെ സാമ്പത്തികമായി പൂര്ണ്ണമായും തകര്ക്കാമെന്നാണ് വാഷിംഗ്ടണ് കണക്കുകൂട്ടുന്നത്. ഇതിനായി 2,200 മറൈന് സൈനികരടങ്ങുന്ന ’31-ാമത് മറൈന് എക്സ്പെഡിഷണറി യൂണിറ്റ്’ ഇതിനോടകം പേര്ഷ്യന് ഗള്ഫിലേക്ക് നീങ്ങിക്കഴിഞ്ഞു.
കരയുദ്ധത്തിന് ശക്തി പകരാന് ലോകത്തെവിടെയും 18 മണിക്കൂറിനുള്ളില് പറന്നെത്താന് ശേഷിയുള്ള അമേരിക്കയുടെ എലൈറ്റ് വിഭാഗമായ 82-ാം എയര്ബോണ് ഡിവിഷനെ വിന്യസിക്കാനും പെന്റഗണ് ആലോചിക്കുന്നുണ്ട്. അഞ്ച് ദിവസത്തെ താല്ക്കാലിക ഇടവേള സേനാ വിന്യാസം പൂര്ത്തിയാക്കാന് ട്രംപിനെ സഹായിക്കുമെന്നാണ് അന്താരാഷ്ട്ര നിരീക്ഷകരുടെ വിലയിരുത്തല്.
ഹോര്മുസ് കടലിടുക്ക് ഇറാന് അടച്ചതോടെ 1970-കള്ക്ക് ശേഷമുള്ള ഏറ്റവും വലിയ ഇന്ധന പ്രതിസന്ധിയാണ് ലോകം നേരിടുന്നത്. യൂറോപ്പില് പ്രകൃതിവാതക വില 35 ശതമാനം വര്ദ്ധിച്ചപ്പോള് അന്താരാഷ്ട്ര വിപണിയില് ബ്രെന്റ് ക്രൂഡ് ഓയില് വില ബാരലിന് 110 ഡോളറിലേക്ക് കുതിച്ചുയര്ന്നു. പ്രതിസന്ധി രൂക്ഷമായതോടെ ലോകരാജ്യങ്ങള് കടുത്ത നിയന്ത്രണങ്ങളിലേക്ക് നീങ്ങുകയാണ്:
ശ്രീലങ്ക: ഊര്ജ്ജ ഉപഭോഗം കുറയ്ക്കാന് തെരുവ് വിളക്കുകളും നിയോണ് ബോര്ഡുകളും ഓഫ് ചെയ്യാന് ഉത്തരവിട്ടു. നാല് ദിവസത്തെ പ്രവൃത്തി ആഴ്ചയും വര്ക്ക് ഫ്രം ഹോം സംവിധാനവും പുനഃസ്ഥാപിച്ചു.
ഫിലിപ്പീന്സ്: രാജ്യത്ത് ഒരു വര്ഷത്തേക്ക് ‘ദേശീയ ഊര്ജ്ജ അടിയന്തരാവസ്ഥ’ പ്രഖ്യാപിച്ചു. നിലവില് 45 ദിവസത്തേക്കുള്ള ഇന്ധനം മാത്രമാണ് രാജ്യത്ത് സ്റ്റോക്കുള്ളത്.
സ്ലോവേനിയ: യൂറോപ്യന് യൂണിയനില് ആദ്യമായി ഇന്ധന റേഷനിംഗ് ഏര്പ്പെടുത്തി. സ്വകാര്യ വാഹനങ്ങള്ക്ക് പ്രതിദിനം 50 ലിറ്ററായി ഇന്ധന വിതരണം പരിമിതപ്പെടുത്തി.
വിയറ്റ്നാം: ഇന്ധനക്ഷാമത്തെത്തുടര്ന്ന് വിയറ്റ്നാം എയര്ലൈന്സ് ആഭ്യന്തര റൂട്ടുകളില് ആഴ്ചയില് 23 സര്വീസുകള് റദ്ദാക്കി.
ഫെബ്രുവരി 28-ന് ആരംഭിച്ച *’ഓപ്പറേഷന് എപിക് ഫ്യൂറി’*യുടെ ഭാഗമായി ഇതുവരെ 13 അമേരിക്കന് സൈനികര് കൊല്ലപ്പെട്ടതായാണ് വിവരം. ഖാര്ഗ് ദ്വീപ് പിടിച്ചെടുക്കാനുള്ള നീക്കം അമേരിക്കന് സേനയ്ക്ക് കനത്ത നാശനഷ്ടങ്ങള് വരുത്തിവെക്കുമെന്ന് ഇന്റലിജന്സ് വൃത്തങ്ങള് മുന്നറിയിപ്പ് നല്കുന്നുണ്ട്. ഇറാന്റെ ബാലിസ്റ്റിക് മിസൈലുകളും ആത്മഹത്യാ ഡ്രോണുകളും അമേരിക്കന് കപ്പലുകളെ ലക്ഷ്യമിട്ടേക്കാം.
അതേസമയം, ഇറാന് ഭരണകൂടവുമായി ചര്ച്ചകള് നടക്കുന്നുണ്ടെന്ന് ട്രംപ് അവകാശപ്പെട്ടെങ്കിലും ഇറാന് അത് നിഷേധിച്ചു. വിയറ്റ്നാം യുദ്ധത്തിന് സമാനമായ സാഹചര്യം ഇറാനില് ഉണ്ടാകില്ലെന്നും താന് ഒന്നിനെയും ഭയപ്പെടുന്നില്ലെന്നും ട്രംപ് വ്യക്തമാക്കി. അമേരിക്കന് മറൈന് സേന ഗള്ഫ് മേഖലയില് എത്തുന്നതോടെ വരും ദിവസങ്ങളില് യുദ്ധം കൂടുതല് ഭീതിദമായ തലത്തിലേക്ക് നീങ്ങുമെന്ന് ഉറപ്പായി.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
നേമത്തെ ന്യൂനപക്ഷ വോട്ടുകള് നിര്ണ്ണായകം; ‘ഒരു വിഭാഗത്തിന്റെയും വോട്ട് വേണ്ടെന്നു പറയില്ല’; എസ്ഡിപിഐ പിന്തുണയില് നിലപാട് വ്യക്തമാക്കി വി. ശിവന്കുട്ടി; ബിജെപിയുടെ ആക്കൗണ്ട് തുറക്കല് മോഹം നടക്കില്ലേ? മുസ്ലീം വോട്ട് മുഴുവന് നേടാന് സിപിഎം; ത്രികോണ ചൂടില് നേമം തിളയ്ക്കുമ്പോള്
