കാസര്കോട്: വടക്കന് മലബാറിലെ രാഷ്ട്രീയ പരീക്ഷണശാലയായ മഞ്ചേശ്വരത്ത് ഇത്തവണ അങ്കം മുറുകുമ്പോള് വിജയിയെ നിശ്ചയിക്കുന്നത് വോട്ടര്മാരല്ല, മറിച്ച് ‘അപരന്മാരും’ വോട്ട് ഭിന്നിപ്പിക്കാന് എത്തിയവരുമാണോ? മഞ്ചേശ്വരത്ത് നിന്ന് പിന്മാറില്ലെന്ന് എസ്ഡിപിഐ സ്ഥാനാര്ത്ഥി കെ.എം. അഷ്റഫ് ഉറപ്പിച്ചു പറയുമ്പോള് ചിരിക്കുന്നത് ബിജെപി ക്യാമ്പാണ്. കേവലം 2000 വോട്ടുകള് എസ്ഡിപിഐ പിടിച്ചാല് പോലും കെ. സുരേന്ദ്രന് നിയമസഭ കാണുമെന്ന കണക്കൂട്ടലില് യുഡിഎഫ് കേന്ദ്രങ്ങള് അങ്കലാപ്പിലായിക്കഴിഞ്ഞു. ഇതിന് പിന്നില് ബിജെപിയുടെ വോട്ട് ഭിന്നിപ്പിക്കല് തന്ത്രമാണോ എന്ന ‘ഒവൈസി മോഡല്’ സംശയമാണ് ഇപ്പോള് കോണ്ഗ്രസ് ഉയര്ത്തുന്നത്.
കഴിഞ്ഞ തവണ തലനാരിഴയ്ക്കാണ് (745 വോട്ട്) കെ. സുരേന്ദ്രന് മഞ്ചേശ്വരം നഷ്ടമായത്. അതിന് മുമ്പ് അതിലും കുറഞ്ഞ വോട്ടിന്. അന്നെല്ലാം യുഡിഎഫിനെ പിന്തുണച്ച എസ്ഡിപിഐ ഇത്തവണ തനിച്ച് മത്സരിക്കാന് തീരുമാനിച്ചത് ആര്ക്ക് വേണ്ടിയാണെന്ന ചോദ്യം രാഷ്ട്രീയ കേന്ദ്രങ്ങളില് സജീവമാണ്. മഞ്ചേശ്വരത്ത് എസ്ഡിപിഐക്ക് പറയത്തക്ക വോട്ടുകള് ഉണ്ടെന്ന് അവകാശപ്പെടുമ്പോഴും, അവര് പിടിക്കുന്ന ഓരോ വോട്ടും എ.കെ.എം. അഷ്റഫിന്റെ പെട്ടിയില് നിന്നുള്ള ചോര്ച്ചയാകും. ഉത്തരേന്ത്യയില് മുസ്ലീം വോട്ടുകള് ഭിന്നിപ്പിച്ച് ബിജെപിക്ക് വഴിയൊരുക്കുന്ന ഒവൈസി മോഡല് തന്ത്രം കാസര്കോട്ടും പയറ്റുകയാണോ എന്നാണ് കോണ്ഗ്രസ് നേതാക്കളുടെ ചോദ്യം.
സിറ്റിംഗ് എംഎല്എ എ.കെ.എം. അഷ്റഫിന് ഇത്തവണ വലിയൊരു ചതിക്കുഴി ഒരുങ്ങുന്നത് പേരിലെ സാമ്യതയിലാണ്. മുമ്പ് ‘അഷ്റഫ് ബഡാജെ’ എന്ന് അറിയപ്പെട്ടിരുന്ന എസ്ഡിപിഐ നേതാവ് ഇപ്പോള് ‘കെ.എം. അഷ്റഫ്’ എന്ന പേരില് വോട്ടു ചോദിക്കുന്നത് ബോധപൂര്വ്വമാണെന്ന് മുസ്ലീം ലീഗ് ആരോപിക്കുന്നു. ഇതുകൂടാതെ മറ്റ് രണ്ട് മുഹമ്മദ് അഷ്റഫുമാര് കൂടി സ്വതന്ത്രരായി രംഗത്തുണ്ട്. ആകെ നാല് അഷ്റഫുമാര് മത്സരരംഗത്തുള്ളപ്പോള് വോട്ടര്മാര്ക്ക് മാറിപ്പോകുന്ന ഓരോ വോട്ടും സുരേന്ദ്രന് ലഭിക്കുന്ന ബോണസായി മാറും.
സ്ഥാനാര്ത്ഥിത്വം പിന്വലിക്കാന് വലിയ സമ്മര്ദ്ദമുണ്ടെന്ന് എസ്ഡിപിഐ സ്ഥാനാര്ത്ഥി സമ്മതിക്കുന്നുണ്ടെങ്കിലും പിന്മാറാന് അദ്ദേഹം തയ്യാറല്ല. ബിജെപിയെ സഹായിക്കാനാണ് മത്സരിക്കുന്നതെന്ന ആരോപണം അദ്ദേഹം തള്ളിക്കളയുമ്പോഴും രാഷ്ട്രീയ ഗണിതം മറ്റൊന്നാണ് പറയുന്നത്. മഞ്ചേശ്വരം പോലെ ഒരു അതിര്ത്തി മണ്ഡലത്തില് ചെറിയ വോട്ട് വ്യത്യാസം പോലും നിര്ണ്ണായകമാണ്. ആയിരം വോട്ടുകള് വശത്താക്കാന് കെ.എം. അഷ്റഫിന് കഴിഞ്ഞാല് സുരേന്ദ്രന്റെ വിജയം സുഗമമാകും. ബിജെപിയെ ജയിപ്പിക്കാന് ആരോ തിരശ്ശീലയ്ക്ക് പിന്നില് നിന്ന് ചരടുവലിക്കുന്നു എന്ന സംശയം യുഡിഎഫിനെ വല്ലാതെ അലട്ടുന്നുണ്ട്.
2016-ലും 2021-ലും സുരേന്ദ്രന് പൊരുതി വീണ മണ്ണാണിത്. ഇത്തവണ അപരന്മാരുടെ കടന്നുകയറ്റവും എസ്ഡിപിഐയുടെ നിലപാടും അനുകൂലമായാല് സുരേന്ദ്രന് നിയമസഭയിലേക്കുള്ള ടിക്കറ്റ് മഞ്ചേശ്വരം നല്കും. ബിജെപിയുടെ തന്ത്രങ്ങള് വിജയിച്ചാല്, മുസ്ലീം വോട്ടുകള് ഭിന്നിപ്പിച്ച് അധികാരം പിടിക്കുന്ന ഉത്തരേന്ത്യന് മോഡല് കേരളത്തിലും വിജയകരമായി പരീക്ഷിക്കപ്പെടും. മുസ്ലീം ലീഗിന്റെ കോട്ടയില് അപരന്മാരുടെ കരുത്തില് താമര വിരിയുമോ എന്നാണ് കേരളം ഉറ്റുനോക്കുന്നത്.
‘ഞങ്ങള് ബിജെപിയെ സഹായിക്കാനല്ല മത്സരിക്കുന്നത്’ എന്ന് എസ്ഡിപിഐ പറയുമ്പോഴും, കണക്കുകള് പറയുന്നത് മറ്റൊന്നാണ്. സുരേന്ദ്രന്റെ വിജയം ഉറപ്പാക്കാന് എസ്ഡിപിഐയുടെ 2000 വോട്ടുകള് മാത്രം മതിയെന്ന യാഥാര്ത്ഥ്യം യുഡിഎഫിനെ ഉറക്കം കെടുത്തുന്നുണ്ട്.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
ഭാവിയില് ഹോര്മൂസ് പ്രതിസന്ധിയിലും ഇന്ത്യ ഉലയില്ല; പരിഹാരം ആണവോര്ജ്ജം; 20 ലക്ഷം കോടിയുടെ നിക്ഷേപത്തിന് വഴിതുറക്കുന്നു; എല്ലാ സംസ്ഥാനങ്ങളിലും ആണവനിലയം കേന്ദ്ര ലക്ഷ്യം; സ്വകാര്യ മേഖലയ്ക്കും വിദേശ നിക്ഷേപത്തിനും അനുമതി
