അലി ലാറിജാനിയുടെ വധം: കനത്ത വില നൽകേണ്ടി വരുമെന്ന് മുജ്തബ ഖമനേയി; യുദ്ധം പുതിയ തലത്തിലേക്ക്

ടെഹ്റാൻ: ഇസ്രയേൽ-യുഎസ് സംയുക്താക്രമണത്തിൽ ഉന്നത സുരക്ഷാ ഉദ്യോഗസ്ഥൻ അലി ലാറിജാനി കൊല്ലപ്പെട്ടതിന് പിന്നാലെ ലോകത്തിന് കനത്ത മുന്നറിയിപ്പുമായി ഇറാന്റെ പരമോന്നത നേതാവ് മുജ്തബ ഖമനേയി. ലാറിജാനിയുടെ മരണത്തിന് ശത്രുക്കൾ വലിയ വില നൽകേണ്ടി വരുമെന്നും അദ്ദേഹത്തിന്റെ രക്തത്തിന് അപരാധികൾ ഉടൻ മറുപടി പറയേണ്ടി വരുമെന്നും മുജ്തബ വ്യക്തമാക്കി. നേതൃനിരയിൽ വലിയ നഷ്ടങ്ങൾ സംഭവിച്ചെങ്കിലും തങ്ങളുടെ യുദ്ധനടപടികളിൽ മാറ്റമുണ്ടാകില്ലെന്ന് ഇറാൻ ഔദ്യോഗികമായി അറിയിച്ചു.

 ഇറാനിലെ മതനേതൃത്വത്തിനും ഇസ്ലാമിക് റെവല്യൂഷണറി ഗാർഡ് കോറിനും ഇടയിലുള്ള പ്രധാന കണ്ണിയായിരുന്നു അലി ലാറിജാനി. ഭിന്നതകളുള്ള വിവിധ അധികാര കേന്ദ്രങ്ങളെ ഒന്നിപ്പിച്ചു നിർത്തിയിരുന്ന പാലമായാണ് അദ്ദേഹം അറിയപ്പെട്ടിരുന്നത്. ഉന്നത സൈനിക കമാൻഡർമാരെ ലക്ഷ്യമിട്ടുള്ള ആക്രമണങ്ങളിൽ നിന്ന് മാറി, രാജ്യത്തിന്റെ സുപ്രധാന രാഷ്ട്രീയ-സുരക്ഷാ നേതൃത്വത്തെ നേരിട്ട് ഇല്ലാതാക്കുന്ന പുതിയ യുദ്ധതന്ത്രത്തിലേക്കാണ് ഇസ്രയേലും യുഎസും കടന്നിരിക്കുന്നത്. എന്നാൽ ഒരൊറ്റ വ്യക്തിയുടെ സാന്നിധ്യമോ അഭാവമോ ഇറാന്റെ രാഷ്ട്രീയ-സാമ്പത്തിക ഘടനയെ ബാധിക്കില്ലെന്ന് വിദേശകാര്യ മന്ത്രി സയ്യിദ് അബ്ബാസ് അരാഗ്ചി ആവർത്തിച്ചു. മേഖലയെ യുദ്ധത്തിലേക്ക് വലിച്ചിഴച്ചതിനും മാനുഷിക-സാമ്പത്തിക പ്രത്യാഘാതങ്ങൾക്കും ഉത്തരവാദി യുഎസ് ആണെന്നും അദ്ദേഹം കുറ്റപ്പെടുത്തി.

ലാറിജാനിയുടെ വധം ഇറാന്റെ സുരക്ഷാ സംവിധാനത്തിന് വലിയൊരു ആഘാതമാണ് നൽകിയിരിക്കുന്നത്. എങ്കിലും തങ്ങളുടെ ആദർശങ്ങളിൽ നിന്ന് പിന്നോട്ടില്ലെന്ന് വ്യക്തമാക്കിയ ഇറാൻ, ഇതിനോടകം തന്നെ ടെൽ അവീവിനും മേഖലയിലെ യുഎസ് താല്പര്യങ്ങൾക്കും നേരെ തിരിച്ചടി ആരംഭിച്ചിട്ടുണ്ട്. പരമോന്നത നേതാവിന്റെ നേരിട്ടുള്ള മുന്നറിയിപ്പ് വന്നതോടെ പശ്ചിമേഷ്യയിൽ വരും മണിക്കൂറുകളിൽ വലിയ സൈനിക നീക്കങ്ങൾ പ്രതീക്ഷിക്കാം.