കൊച്ചി: അതീവ സുരക്ഷാ മേഖലയായ ശബരിമല ക്ഷേത്രത്തിന് മുകളിലൂടെ കോസ്റ്റ് ഗാര്ഡിന്റെ അത്യാധുനിക ഹെലികോപ്റ്റര് നിയമങ്ങള് കാറ്റില്പ്പറത്തി താഴ്ത്തിപ്പറത്തിയ സംഭവത്തില് കുറ്റക്കാരനായ ഉദ്യോഗസ്ഥനെതിരെ സ്വീകരിച്ച നടപടി തീര്ത്തും പരിഹാസ്യമാകുന്നു. ഗുരുതരമായ സുരക്ഷാ വീഴ്ചയും ഔദ്യോഗിക പദവി ദുരുപയോഗവും നടത്തിയ നെടുമ്പാശ്ശേരി എയര്ക്രാഫ്റ്റ് ഓപ്പറേറ്റിങ് യൂണിറ്റിലെ ഉന്നത ഉദ്യോഗസ്ഥന് ‘ശിക്ഷ’ എന്നോണം നല്കിയിരിക്കുന്നത് നെടുമ്പാശ്ശേരിയില് നിന്നും കൊച്ചിയിലെ റീജിയണല് ആസ്ഥാനത്തേക്കുള്ള സ്ഥലം മാറ്റം മാത്രം! വെറും മുപ്പത് കിലോമീറ്റര് ദൂര വ്യത്യാസമുള്ള, അതിനേക്കാള് വലിയ പദവികളിലേക്ക് എത്താന് സാധ്യതയുള്ള കൊച്ചി ആസ്ഥാനത്തേക്ക് മാറ്റിയതിനെ ശിക്ഷാ നടപടിയെന്ന് എങ്ങനെ വിശേഷിപ്പിക്കാന് കഴിയുമെന്നാണ് പരക്കെ ഉയരുന്ന ചോദ്യം.
കഴിഞ്ഞ മാസം 23നാണ് സന്നിധാനത്തെയും ഭക്തലക്ഷങ്ങളെയും ഒരുപോലെ ആശങ്കയിലാഴ്ത്തിക്കൊണ്ട് കോസ്റ്റ് ഗാര്ഡ് ഹെലികോപ്റ്റര് താഴ്ന്നു പറന്നത്. സംഭവത്തെക്കുറിച്ച് കോസ്റ്റ് ഗാര്ഡ് നടത്തിയ ആഭ്യന്തര അന്വേഷണത്തിലാണ് ഉദ്യോഗസ്ഥന്റെ സ്വകാര്യ ഭക്തിപ്രകടനത്തിന്റെ ഞെട്ടിക്കുന്ന വിവരങ്ങള് പുറത്തുവന്നത്. രാജ്യത്തിന്റെ തീരസംരക്ഷണത്തിനും അടിയന്തര രക്ഷാപ്രവര്ത്തനങ്ങള്ക്കും മാത്രം ഉപയോഗിക്കേണ്ട കോസ്റ്റ് ഗാര്ഡിന്റെ ഔദ്യോഗിക ഹെലികോപ്റ്റര്, ആകാശത്ത് നിന്ന് അയ്യപ്പനെ തൊഴുക എന്ന നിസ്സാരവും വ്യക്തിപരവുമായ ലക്ഷ്യത്തോടെയാണ് താഴ്ത്തിപ്പറത്തിയതെന്ന് അന്വേഷണ റിപ്പോര്ട്ടില് വ്യക്തമായി പറയുന്നു. ഈ നിയമവിരുദ്ധമായ കൃത്യത്തിന് നിര്ദേശം നല്കിയത് നെടുമ്പാശ്ശേരിയിലെ ഇതേ ഉന്നത ഉദ്യോഗസ്ഥനായിരുന്നു.
സംഭവം നടന്ന ആദ്യ നാളുകളില് വന് വിവാദമായപ്പോള്, മോശം കാലാവസ്ഥയെത്തുടര്ന്ന് ഹെലികോപ്റ്ററിന് വഴിതെറ്റിയതെന്നായിരുന്നു കോസ്റ്റ് ഗാര്ഡ് ഔദ്യോഗികമായി നല്കിയ വിശദീകരണം. എന്നാല് ആഭ്യന്തര അന്വേഷണ റിപ്പോര്ട്ട് പുറത്തുവന്നതോടെ ഈ ന്യായീകരണങ്ങളെല്ലാം തരിപ്പണമായിരിക്കുകയാണ്. കാലാവസ്ഥാ വ്യതിയാനമല്ല, മറിച്ച് ഉദ്യോഗസ്ഥന്റെ വന് തിരിമറിയും ആസൂത്രിതമായ ലംഘനവുമാണ് നടന്നതെന്ന് തെളിഞ്ഞു. രാജ്യ സുരക്ഷ മുന്നിര്ത്തി പ്രവര്ത്തിക്കുന്ന ഒരു സേനാവിഭാഗം സ്വന്തം ഉദ്യോഗസ്ഥന്റെ തെറ്റായ നടപടിയെ മൂടിവെക്കാന് പൊതുസമൂഹത്തിന് മുന്നില് കള്ളം പ്രചരിപ്പിച്ചു എന്ന ഗുരുതരമായ ആക്ഷേപവും ഇതോടെ ശക്തമായി.
കണ്ടെത്തലുകള് അവിടെയും തീരുന്നില്ല. ഇതേ ഉദ്യോഗസ്ഥന് ഇതിനുമുന്പും സമാനമായ രീതിയില് കോസ്റ്റ് ഗാര്ഡ് ഹെലികോപ്റ്ററിനെ സ്വന്തം ആവശ്യങ്ങള്ക്കായി ദുരുപയോഗം ചെയ്തിട്ടുണ്ടെന്നാണ് അന്വേഷണത്തില് വ്യക്തമായിരിക്കുന്നത്. മുന്പ് പലതവണ ഇയാള് ഇതേ ഹെലികോപ്റ്ററില് ശബരിമലയിലേക്കും ഗുരുവായൂരിലേക്കും ആകാശയാത്രകള് നടത്തിയിട്ടുണ്ട്. ഔദ്യോഗിക കൃത്യനിര്വഹണത്തിന്റെ ലോഗ് ബുക്കുകളില് കൃത്രിമം കാണിച്ചാണോ അതോ സ്വന്തം അധികാരക്കരുത്ത് ഉപയോഗിച്ചാണോ ലക്ഷക്കണക്കിന് രൂപ പൊതുപ്പണം ചിലവഴിച്ചുള്ള ഇത്തരം വിനോദയാത്രകള് ഇയാള് മുന്പും നടത്തിയതെന്ന ചോദ്യം കോസ്റ്റ് ഗാര്ഡിന്റെ വിശ്വാസ്യതയെത്തന്നെ ചോദ്യം ചെയ്യുന്നതാണ്.
അപകടകരമായ രീതിയില് ഹെലികോപ്റ്റര് താഴ്ത്തിപ്പറത്തിയ ആ കറുത്ത ദിനത്തില് ഈ ഉദ്യോഗസ്ഥനൊപ്പം പ്രധാന പൈലറ്റും, സഹ പൈലറ്റും, ഒരു ക്യാമറ ക്രൂവും അടക്കം മൂന്ന് പേര് കൂടി ഹെലികോപ്റ്ററിലുണ്ടായിരുന്നു. ഉയര്ന്ന പദവിയിലിരിക്കുന്ന ഉദ്യോഗസ്ഥന് തെറ്റായ നിര്ദേശം നല്കുമ്പോള് അതിനെ ചെറുക്കാനോ സുരക്ഷാ ചട്ടങ്ങള് ഓര്മ്മിപ്പിക്കാനോ വിമാനത്തിലുണ്ടായിരുന്ന മറ്റ് ജീവനക്കാര് തയ്യാറായില്ല എന്നതും ഗൗരവതരമാണ്. ഇത്തരമൊരു നിയമവിരുദ്ധമായ യാത്രയ്ക്ക് കൂട്ടുനില്ക്കുകയും ദൃശ്യങ്ങള് പകര്ത്താന് ക്യാമറ സംഘത്തെപ്പോലും ഒപ്പം കൂട്ടുകയും ചെയ്ത ഈ ജീവനക്കാര്ക്കെതിരെ എന്ത് നടപടിയാണ് സ്വീകരിച്ചതെന്ന കാര്യത്തില് ഇപ്പോഴും നിഗൂഢത തുടരുകയാണ്.
തീവ്രവാദ ഭീഷണിയടക്കം നിലനില്ക്കുന്നതിനാലും ലക്ഷക്കണക്കിന് തീര്ത്ഥാടകര് എത്തുന്നതിനാലും ശബരിമലയും പരിസരവും അതീവ സുരക്ഷാ മേഖലയായാണ് സംസ്ഥാന പോലീസും കേന്ദ്ര ഏജന്സികളും കണക്കാക്കുന്നത്. മുന്പ് സന്നിധാനത്തിന് മുകളിലൂടെ ഡ്രോണ് പറത്തിയതുമായി ബന്ധപ്പെട്ട് കടുത്ത നിയമനടപടികള് സ്വീകരിച്ചിട്ടുള്ള ചരിത്രമാണുള്ളത്. അവിടെയാണ് രാജ്യത്തിന്റെ സൈനിക സ്വഭാവമുള്ള ഒരു ഹെലികോപ്റ്റര് ഇത്തരത്തില് ദുരൂഹമായ സാഹചര്യത്തില് നിയമം ലംഘിച്ച് പറന്നത്. സാധാരണക്കാരന് ചെയ്യുന്ന ചെറിയ തെറ്റുകള്ക്ക് പോലും കടുത്ത ശിക്ഷ ഉറപ്പാക്കുന്ന നിയമവ്യവസ്ഥയുള്ള നാട്ടിലാണ് ഈ വന് വീഴ്ചയ്ക്ക് വെറുമൊരു സ്ഥലം മാറ്റം കൊണ്ട് അധികാരികള് ഒതുക്കിത്തീര്ക്കാന് ശ്രമിക്കുന്നത്.
ഒരു മണിക്കൂര് ഹെലികോപ്റ്റര് പറത്തുന്നതിന് ലക്ഷക്കണക്കിന് രൂപയാണ് ഇന്ധനച്ചെലവായും മറ്റ് അറ്റകുറ്റപ്പണികള്ക്കായും വരുന്നത്. രാജ്യത്തെ സാധാരണക്കാരായ ജനങ്ങള് നല്കുന്ന നികുതിപ്പണമാണ് ഇതിനായി വിനിയോഗിക്കുന്നത്. ജനങ്ങളുടെ സുരക്ഷയ്ക്കായി ഉപയോഗിക്കേണ്ട ഈ പണമാണ് ഉദ്യോഗസ്ഥന് സ്വന്തം ഭക്തിപ്രകടനത്തിനും സുഖവാസത്തിനുമായി ആകാശത്ത് ധൂര്ത്തടിച്ചത്. അത്രമേല് ഗുരുതരമായ സാമ്പത്തിക നഷ്ടവും നിയമലംഘനവും വരുത്തിവെച്ച ഒരു ഉദ്യോഗസ്ഥന് മാതൃകാപരമായ ശിക്ഷ നല്കുന്നതിന് പകരം സംരക്ഷിക്കുന്ന നിലപാടാണ് അധികൃതരുടെ ഭാഗത്തുനിന്നുണ്ടായിരിക്കുന്നത്.
ഈ നാടകീയമായ സ്ഥലംമാറ്റ നടപടി കോസ്റ്റ് ഗാര്ഡിനുള്ളില് തന്നെ വലിയ ചര്ച്ചകള്ക്ക് വഴിവെച്ചിട്ടുണ്ട്. നെടുമ്പാശ്ശേരിയില് നിന്നും കൊച്ചിയിലേക്കുള്ള മാറ്റം ശിക്ഷയല്ല, മറിച്ച് ഉദ്യോഗസ്ഥന് സുഖപ്രദമായ മറ്റൊരു താവളം ഒരുക്കിക്കൊടുക്കലാണെന്നാണ് പരക്കെയുള്ള ആക്ഷേപം. നെടുമ്പാശ്ശേരി വിമാനത്താവളത്തിലെ കടുത്ത ജോലിഭാരത്തില് നിന്നും നിയന്ത്രണങ്ങളില് നിന്നും മാറി, കൊച്ചിയിലെ സുഖസൗകര്യങ്ങളുള്ള റീജിയണല് ആസ്ഥാനത്ത് ഇരുന്ന് കാര്യങ്ങള് നിയന്ത്രിക്കാനുള്ള അവസരമാണ് ഈ നടപടിയിലൂടെ ഇയാള്ക്ക് കൈവന്നിരിക്കുന്നത്. തെറ്റ് ചെയ്തവന് മെച്ചപ്പെട്ട സൗകര്യം ഒരുക്കി നല്കുന്ന ഈ ശൈലി മറ്റ് ഉദ്യോഗസ്ഥര്ക്കും തെറ്റായ സന്ദേശമാണ് നല്കുന്നത്.
സംഭവം വിവാദമായതോടെ ഉദ്യോഗസ്ഥനെതിരെ കര്ശനമായ അച്ചടക്ക നടപടികള് സ്വീകരിക്കണമെന്ന ആവശ്യം വിവിധ കോണുകളില് നിന്നും ശക്തമാവുകയാണ്. വെറുമൊരു സ്ഥലം മാറ്റത്തില് ഈ കേസ് ഒതുക്കാന് അനുവദിക്കില്ലെന്നാണ് ഉയരുന്ന പൊതുവികാരം. മുന്പ് ഇതേ ഉദ്യോഗസ്ഥന് നടത്തിയ സമാനമായ യാത്രകളെക്കുറിച്ചും അതിനായി വിനിയോഗിച്ച പൊതുപ്പണത്തെക്കുറിച്ചും കണ്ട്രോളര് ആന്ഡ് ഓഡിറ്റര് ജനറലിന്റെ (ഇഅഏ) നേതൃത്വത്തില് സമഗ്രമായ സാമ്പത്തിക-സുരക്ഷാ ഓഡിറ്റിംഗ് നടത്തണമെന്ന ആവശ്യവും ഉയര്ന്നു കഴിഞ്ഞു.
ആഭ്യന്തര അന്വേഷണ റിപ്പോര്ട്ട് പുറത്തുവന്ന സ്ഥിതിക്ക് ഇനിയും ഈ വിഷയത്തില് കേന്ദ്ര പ്രതിരോധ മന്ത്രാലയം പുലര്ത്തുന്ന മൗനം ചോദ്യം ചെയ്യപ്പെടേണ്ടതാണ്. ഉന്നത ഉദ്യോഗസ്ഥന്റെ സ്വാധീനവലയത്തിന് വഴങ്ങിയാണോ കോസ്റ്റ് ഗാര്ഡ് ഇത്തരമൊരു മൃദുസമീപനം സ്വീകരിച്ചതെന്നത് വരും ദിവസങ്ങളില് വ്യക്തമാകും. രാജ്യസുരക്ഷയെയും പൊതുമുതലിനെയും തമാശയായി കാണുന്ന ഇത്തരം ഉദ്യോഗസ്ഥ പ്രഭുക്കന്മാര്ക്കെതിരെ ശക്തമായ കോടതി ഇടപെടലുകളോ ഡിസ്മിസ്സല് അടക്കമുള്ള കടുത്ത ശിക്ഷാനടപടികളോ ഉണ്ടാകുമോ എന്ന് രാജ്യം ഉറ്റുനോക്കുകയാണ്.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
ഷോൺ ജോർജിന്റെ വാഹന റാലിക്കിടെ ബിജെപി നേതാവ് കുഴഞ്ഞുവീണ് മരിച്ചു
