മലപ്പുറം: ഭരണത്തുടര്ച്ച തേടുന്ന എല്ഡിഎഫിനെ ഞെട്ടിച്ചുകൊണ്ട്, 2026-ലെ നിയമസഭാ തിരഞ്ഞെടുപ്പില് യുഡിഎഫ് വന് ഭൂരിപക്ഷത്തോടെ അധികാരത്തിലെത്തുമെന്ന് പി.വി. അന്വറിന്റെ സര്വേ റിപ്പോര്ട്ട്. ബേപ്പൂരിലെ യുഡിഎഫ് സ്ഥാനാര്ത്ഥിയും മുന് എംഎല്എയുമായ പി.വി. അന്വര് തന്റെ ഫേസ്ബുക്ക് പേജിലൂടെ പുറത്തുവിട്ട പോഡ്കാസ്റ്റിലാണ് ഇടതുമുന്നണിയുടെ പതനം പ്രവചിക്കുന്ന കണക്കുകള് നിരത്തിയത്. സംസ്ഥാനത്ത് ആകെ 140 മണ്ഡലങ്ങളില് 89 സീറ്റുകള് നേടി യുഡിഎഫ് ഭരണം തിരിച്ചുപിടിക്കുമെന്നാണ് അന്വറിന്റെ അവകാശവാദം.
മലബാര് മേഖലയില് യുഡിഎഫ് തൂത്തുവാരുമെന്നാണ് അന്വര് നല്കുന്ന സൂചന. മലബാറിലെ 60 സീറ്റുകളില് 40 എണ്ണവും യുഡിഎഫ് സ്വന്തമാക്കും. മുഖ്യമന്ത്രി പിണറായി വിജയന്റെ മണ്ഡലമായ ധര്മ്മടത്ത് പോലും ഇത്തവണ ഭൂരിപക്ഷം 10,000-ത്തിന് താഴെയായി ചുരുങ്ങുമെന്നും, മുഖ്യമന്ത്രി പരാജയപ്പെട്ടാല് പോലും അതില് അത്ഭുതപ്പെടാനില്ലെന്നും അന്വര് തുറന്നടിച്ചു. മലബാറില് ആഞ്ഞുവീശുന്ന ‘ആന്റി പിണറായി’ തരംഗം ഇടതുപക്ഷത്തിന്റെ കോട്ടകളെ തകര്ക്കുമെന്നും അദ്ദേഹം കൂട്ടിച്ചേര്ത്തു.
മലപ്പുറം, വയനാട് ജില്ലകളില് എല്ഡിഎഫിന് ഇത്തവണ അക്കൗണ്ട് തുറക്കാന് പോലുമാകില്ലെന്നും എല്ലാ സീറ്റുകളും യുഡിഎഫ് തൂത്തുവാരുമെന്നുമാണ് സര്വേ വ്യക്തമാക്കുന്നത്. എന്നാല് പേരാമ്പ്ര, ബാലുശേരി, എലത്തൂര് തുടങ്ങിയ മണ്ഡലങ്ങളില് ഇരുമുന്നണികളും തമ്മില് ശക്തമായ പോരാട്ടമാണ് നടക്കുന്നത്.
മധ്യ-തെക്കന് കേരളത്തിലും യുഡിഎഫ് മുന്നേറ്റം
സംസ്ഥാനത്തിന്റെ എല്ലാ മേഖലകളിലും യുഡിഎഫിന് അനുകൂലമായ കാറ്റാണ് വീശുന്നതെന്ന് സര്വേ റിപ്പോര്ട്ട് അടിവരയിടുന്നു:
മധ്യകേരളം: ആകെ 32 സീറ്റുകളില് 21 എണ്ണവും യുഡിഎഫ് നേടുമെന്ന് റിപ്പോര്ട്ട് പറയുന്നു.
തെക്കന് കേരളം: എല്ഡിഎഫിന് കഴിഞ്ഞ തവണ വലിയ മുന്തൂക്കം ലഭിച്ച തെക്കന് കേരളത്തില് 48-ല് 25 സീറ്റുകള് യുഡിഎഫ് പിടിച്ചെടുക്കും.
താന് മത്സരിക്കുന്ന ബേപ്പൂര് മണ്ഡലത്തില് മികച്ച വിജയം ഉറപ്പാണെന്ന് അന്വര് പറയുന്നു. അതേസമയം, പാലക്കാട് ജില്ലയിലെ മലമ്പുഴ മണ്ഡലത്തില് എസ്. സുരേഷ് വിജയിക്കുമെന്ന പ്രവചനവും അന്വറിന്റെ സര്വേയിലുണ്ട്. ഇത് രാഷ്ട്രീയ കേന്ദ്രങ്ങളില് പുതിയ ചര്ച്ചകള്ക്ക് വഴിമരുന്നിട്ടിരിക്കുകയാണ്.
മുഖ്യമന്ത്രി പിണറായി വിജയനെതിരെയും അദ്ദേഹത്തിന്റെ ഭരണശൈലിക്കെതിരെയും ജനങ്ങള്ക്കിടയിലുള്ള കടുത്ത അമര്ഷമാണ് ഈ ഫലത്തിലേക്ക് നയിക്കുന്നതെന്ന് അന്വര് തന്റെ പോഡ്കാസ്റ്റില് വിശദീകരിച്ചു. തിരഞ്ഞെടുപ്പ് ഫലം പുറത്തുവരുമ്പോള് കേരളം വലിയൊരു രാഷ്ട്രീയ മാറ്റത്തിന് സാക്ഷ്യം വഹിക്കുമെന്ന ആത്മവിശ്വാസത്തിലാണ് പി.വി. അന്വറും യുഡിഎഫ് ക്യാമ്പും.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
അശോകിനെ ഡിസ്മിസ് ചെയ്യാന് പിണറായി; പക്ഷേ ഭരണമാറ്റ റിപ്പോര്ട്ടുകള് ഇടതിനെ തളര്ത്തുന്നു; പുതിയ സര്ക്കാര് വന്നാല് അശോക് ഉന്നയിച്ച അഴിമതികളില് അന്വേഷണം ഉറപ്പ്
