തിരുവനന്തപുരം: കേരളം നാളെ വിധിയെഴുതുകയാണ്. വ്യാഴാഴ്ച രാവിലെ ഏഴു മുതല് വൈകിട്ട് ആറുവരെ സംസ്ഥാനത്തെ 30,495 ബൂത്തുകളിലായി 2,71,42,952 വോട്ടര്മാര് തങ്ങളുടെ സമ്മതിദാനാവകാശം വിനിയോഗിക്കും. നിശബ്ദ പ്രചാരണത്തിന്റെ അവസാന മണിക്കൂറുകളിലും വോട്ടര്മാരെ നേരില്ക്കണ്ട് ഉറപ്പിക്കാനുള്ള നെട്ടോട്ടത്തിലാണ് സ്ഥാനാര്ത്ഥികള്. മുമ്പൊരിക്കലുമില്ലാത്ത വിധം ശക്തമായ ത്രികോണ മത്സരത്തിന് സംസ്ഥാനം വേദിയാകുമ്പോള് മെയ് നാലിന് പുറത്തുവരുന്ന ഫലം കേരള രാഷ്ട്രീയത്തിന്റെ ഗതി മാറ്റുമെന്ന് ഉറപ്പാണ്.
ഇടതുമുന്നണിയെ സംബന്ധിച്ചിടത്തോളം ഇത് നിലനില്പ്പിന്റെയും ചരിത്രത്തിന്റെയും പോരാട്ടമാണ്. പിണറായി വിജയന്റെ നേതൃത്വത്തില് മൂന്നാം തവണയും അധികാരം നിലനിര്ത്തി ഹാട്രിക് വിജയം സ്വന്തമാക്കാനാണ് എല്ഡിഎഫ് ലക്ഷ്യമിടുന്നത്. സര്ക്കാരിന്റെ വികസന ക്ഷേമ പ്രവര്ത്തനങ്ങളും ജനകീയ അടിത്തറയും തങ്ങളെ തുണയ്ക്കുമെന്ന് ഇടത് ക്യാമ്പ് വിശ്വസിക്കുന്നു. ഭരണവിരുദ്ധ വികാരം മറികടക്കാന് താഴെത്തട്ടിലുള്ള പ്രവര്ത്തനങ്ങളിലാണ് സി.പി.എം കേന്ദ്രീകരിച്ചിരിക്കുന്നത്.
മറുവശത്ത്, പത്ത് വര്ഷത്തെ ഇടവേളയ്ക്ക് ശേഷം അധികാരം തിരിച്ചുപിടിക്കാന് സര്വ്വസജ്ജമായാണ് യുഡിഎഫ് രംഗത്തുള്ളത്. ഭരണവിരുദ്ധ തരംഗവും വിലക്കയറ്റം, അഴിമതി ആരോപണങ്ങള് തുടങ്ങിയ വിഷയങ്ങളും വോട്ടായി മാറുമെന്നാണ് കോണ്ഗ്രസ് നേതൃത്വത്തിന്റെ കണക്കുകൂട്ടല്. രാഹുല് ഗാന്ധിയുടെയും പ്രിയങ്ക ഗാന്ധിയുടെയും സാന്നിധ്യം അണികളില് വലിയ ആവേശം സൃഷ്ടിച്ചിട്ടുണ്ട്. ദേശീയ രാഷ്ട്രീയത്തിലെ മാറ്റങ്ങളും മതന്യൂനപക്ഷങ്ങളുടെ നിലപാടും തങ്ങള്ക്ക് അനുകൂലമാകുമെന്ന് യുഡിഎഫ് പ്രതീക്ഷിക്കുന്നു.
ഇത്തവണത്തെ തിരഞ്ഞെടുപ്പിലെ ഏറ്റവും വലിയ പ്രത്യേകത ബിജെപിയുടെ കരുത്താര്ന്ന മുന്നേറ്റമാണ്. സംസ്ഥാനത്തെ ഇരുപതോളം സീറ്റുകളില് ജയപ്രതീക്ഷ പുലര്ത്തുന്ന എന്ഡിഎ, ഒന്നിലേറെ സീറ്റുകളില് വിജയിച്ച് നിയമസഭയില് നിര്ണ്ണായക ശക്തിയാകുമെന്ന് ഉറച്ചു വിശ്വസിക്കുന്നു. കേന്ദ്ര സര്ക്കാരിന്റെ വികസന പദ്ധതികളും മോദി ഗ്യാരണ്ടിയും വോട്ടര്മാര്ക്കിടയില് സ്വാധീനം ചെലുത്തിയിട്ടുണ്ട്. പാലക്കാട്, തൃശൂര്, തിരുവനന്തപുരം ജില്ലകളിലെ മണ്ഡലങ്ങളില് ബിജെപി നടത്തുന്ന പോരാട്ടം ഇടത്-വലത് മുന്നണികളുടെ ഉറക്കം കെടുത്തുന്നതാണ്.
സംസ്ഥാനത്തെ വോട്ടര്മാരുടെ എണ്ണത്തില് ഇത്തവണ വലിയ വര്ദ്ധനവാണുള്ളത്. 2.71 കോടി വോട്ടര്മാരില് ഭൂരിഭാഗവും നിശബ്ദ വോട്ടര്മാരാണെന്നത് പ്രവചനങ്ങളെ അസാധ്യമാക്കുന്നു. ഹോം വോട്ടിംഗ് വഴി ഇതിനോടകം തന്നെ 98 ശതമാനം മുതിര്ന്ന പൗരന്മാരും വോട്ട് രേഖപ്പെടുത്തിക്കഴിഞ്ഞു. കന്നിവോട്ടര്മാരുടെയും യുവാക്കളുടെയും നിലപാട് ഭരണമാറ്റത്തിനോ ഭരണത്തുടര്ച്ചയ്ക്കോ വഴിതെളിക്കുമെന്ന് രാഷ്ട്രീയ നിരീക്ഷകര് കരുതുന്നു.
തിരഞ്ഞെടുപ്പ് കമ്മീഷന് ബൂത്തുകളില് വിപുലമായ സജ്ജീകരണങ്ങളാണ് ഒരുക്കിയിരിക്കുന്നത്. പ്രശ്നബാധിതമായ 2040 ബൂത്തുകളില് കേന്ദ്ര സേനയെ ഉള്പ്പെടെ വിന്യസിച്ച് സുരക്ഷ കര്ശനമാക്കിയിട്ടുണ്ട്. വോട്ടെടുപ്പ് സുതാര്യമാക്കാന് വെബ്കാസ്റ്റിംഗ് ഉള്പ്പെടെയുള്ള സാങ്കേതിക വിദ്യകളും ഉപയോഗിക്കുന്നു. പണം, മദ്യം തുടങ്ങിയവ ഉപയോഗിച്ച് വോട്ടര്മാരെ സ്വാധീനിക്കാന് ശ്രമിക്കുന്നവര്ക്കെതിരെ കടുത്ത നടപടിയുണ്ടാകുമെന്ന് കമ്മീഷന് മുന്നറിയിപ്പ് നല്കിയിട്ടുണ്ട്.
പരസ്യ പ്രചാരണം അവസാനിച്ചെങ്കിലും സാമൂഹിക മാധ്യമങ്ങളിലൂടെയും വീടുകള് നേരിട്ട് സന്ദര്ശിച്ചും വോട്ട് ഉറപ്പിക്കുന്ന തിരക്കിലാണ് പ്രവര്ത്തകര്. പാലക്കാട് ഉള്പ്പെടെയുള്ള മണ്ഡലങ്ങളില് അവസാന നിമിഷം ഉയര്ന്ന പണമിടപാട് വിവാദങ്ങള് വോട്ടര്മാരുടെ മനസ്സിനെ എങ്ങനെയൊക്കെ സ്വാധീനിക്കുമെന്ന് കണ്ടറിയണം. വിവാദങ്ങള്ക്കും ആരോപണങ്ങള്ക്കും ഇടയില് കേരളം ആരെ തുണയ്ക്കുമെന്നത് മെയ് നാലിന് മാത്രമേ വ്യക്തമാകൂ.
തിരഞ്ഞെടുപ്പ് ഫലം വരാന് ഒരു മാസത്തോളം കാത്തിരിക്കേണ്ടതുണ്ടെങ്കിലും നാളത്തെ പോളിംഗ് ശതമാനം രാഷ്ട്രീയ മാറ്റത്തിന്റെ സൂചനകള് നല്കും. കനത്ത വേനല്ചൂടിനെ അവഗണിച്ച് വോട്ടര്മാര് വലിയ തോതില് ബൂത്തുകളിലേക്ക് എത്തുമെന്നാണ് പ്രതീക്ഷിക്കുന്നത്. പോളിംഗ് ശതമാനം ഉയരുന്നത് സാധാരണയായി ഭരണവിരുദ്ധ വികാരത്തിന്റെ ലക്ഷണമായാണ് കാണാറുള്ളത്, എന്നാല് ഇത്തവണത്തെ ത്രികോണ പോരില് ആ സമവാക്യങ്ങള് മാറിയേക്കാം.
കേരളത്തിന്റെ മണ്ണില് താമര വിരിയുമോ അതോ അരിവാള് ചുറ്റിക നക്ഷത്രം ചരിത്രം ആവര്ത്തിക്കുമോ അതോ കൈപ്പത്തി തിരിച്ചു വരുമോ എന്ന ചോദ്യത്തിന് ഉത്തരം തേടുകയാണ് മലയാളികള്. കേരളം നേരിടുന്ന സാമ്പത്തിക പ്രതിസന്ധിയും തൊഴിലില്ലായ്മയും വികസന മുരടിപ്പും ഇത്തവണത്തെ പ്രധാന ചര്ച്ചാ വിഷയങ്ങളായിരുന്നു. ഇവയെല്ലാം വോട്ടിംഗ് യന്ത്രത്തില് എങ്ങനെ പ്രതിഫലിക്കുമെന്ന് നാളെ അറിയാം.
ആദ്യമായാണ് കേരളം ഇത്ര കടുത്ത ത്രികോണ പോരിന്റെ ചൂട് അനുഭവിക്കുന്നത്. അതുകൊണ്ട് തന്നെ പ്രവചനങ്ങള് അസാധ്യമാക്കുന്ന ഈ പോരാട്ടത്തില് ഓരോ വോട്ടും വിലപ്പെട്ടതാണ്.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
‘നടിയെ ആക്രമിച്ച കേസിലെ ശിക്ഷ റദ്ദാക്കണം’; ഒന്നാം പ്രതി പൾസർ സുനി ഹൈക്കോടതിയിൽ
