പെരുന്ന/കോട്ടയം: കേരളത്തിലെ യുഡിഎഫ് വിജയം ജനങ്ങള് ഭരണകൂടത്തോടുള്ള അമര്ഷം തീര്ക്കാന് നല്കിയ വോട്ടാണെന്നും ഇതില് ആരുടെയും വ്യക്തിപരമായ മിടുക്കില്ലെന്നും എന്എസ്എസ് ജനറല് സെക്രട്ടറി ജി. സുകുമാരന് നായര്. മുഖ്യമന്ത്രി സ്ഥാനത്തേക്ക് വി.ഡി. സതീശന്റെ പേര് സജീവമായി പരിഗണിക്കപ്പെടുമ്പോഴും അദ്ദേഹത്തോടുള്ള തന്റെ പഴയ വിയോജിപ്പ് മാറിയിട്ടില്ലെന്ന് സുകുമാരന് നായര് ആവര്ത്തിച്ചു. സതീശനെ മുഖ്യമന്ത്രിയാക്കിയാല് അത് കോണ്ഗ്രസിന്റെ തീരുമാനമെന്ന നിലയില് അംഗീകരിക്കുമെങ്കിലും എന്എസ്എസിന്റെ പൂര്ണ്ണ പിന്തുണ അദ്ദേഹത്തിന് ഉണ്ടാകില്ലെന്ന വ്യക്തമായ സൂചനയാണ് സുകുമാരന് നായരുടെ വാക്കുകളിലുള്ളത്.
ചില നേതാക്കള് തങ്ങളുടെ പ്രകടനം കൊണ്ടാണ് യുഡിഎഫിന് ഇത്ര വലിയ വിജയം ലഭിച്ചതെന്ന് അവകാശപ്പെടുന്നുണ്ട്. എന്നാല് ഇതൊരിക്കലുമല്ല യാഥാര്ത്ഥ്യമെന്ന് സുകുമാരന് നായര് പറഞ്ഞു. എല്ഡിഎഫ് ഭരണത്തില് ജനം പൊറുതിമുട്ടിയിരുന്നു. ഒരു മാറ്റം ആഗ്രഹിച്ച ജനങ്ങള് വോട്ട് ചെയ്തപ്പോള് അത് സ്വാഭാവികമായും കോണ്ഗ്രസിന് ലഭിച്ചു. വേറെ ആരുമില്ലാത്തതുകൊണ്ടാണ് ജനം കോണ്ഗ്രസിനെ തിരഞ്ഞെടുത്തത്. മന്ത്രിമാര് പരാജയപ്പെട്ടത് ജനവികാരം അടിച്ചുവീശിയതു കൊണ്ടാണെന്നും അദ്ദേഹം കൂട്ടിച്ചേര്ത്തു.
തിരഞ്ഞെടുപ്പ് കാലത്ത് വി.ഡി. സതീശനുമായി എന്എസ്എസ് പുലര്ത്തിയിരുന്ന അകല്ച്ച ഫലം വന്നശേഷവും കുറഞ്ഞിട്ടില്ല. സതീശനെതിരെ മുന്പ് ഉന്നയിച്ച വിയോജിപ്പുകള് ഇന്നും നിലനില്ക്കുന്നു. സതീശനെ മുഖ്യമന്ത്രിയാക്കണോ വേണ്ടയോ എന്നത് കോണ്ഗ്രസ് നേതൃത്വം തീരുമാനിക്കേണ്ട കാര്യമാണ്. കേന്ദ്ര നേതൃത്വം ഒരാളെ നിശ്ചയിച്ചാല് അത് അനുസരിക്കുകയല്ലാതെ വഴിയില്ല. എന്നാല് കഴിവുള്ളവരെയും പരിചയസമ്പന്നരായ നേതാക്കളെയും വേണം മുഖ്യമന്ത്രി സ്ഥാനത്തേക്ക് പരിഗണിക്കാന്.
മുഖ്യമന്ത്രിയെ തിരഞ്ഞെടുക്കുമ്പോള് വ്യക്തികളെക്കാള് ഉപരിയായി പരിചയസമ്പത്തിന് പ്രാധാന്യം നല്കണമെന്ന സുകുമാരന് നായരുടെ പ്രസ്താവന ചെന്നിത്തലയെയോ കെ.സി. വേണുഗോപാലിനെയോ ഉദ്ദേശിച്ചുള്ളതാണെന്ന് രാഷ്ട്രീയ കേന്ദ്രങ്ങള് വിലയിരുത്തുന്നു. സതീശനെ പരോക്ഷമായി തള്ളുന്ന നിലപാട് എന്എസ്എസ് സ്വീകരിച്ചത് മുഖ്യമന്ത്രി ചര്ച്ചകളില് വി.ഡി. സതീശന് തിരിച്ചടിയായേക്കാം. ഘടകകക്ഷികളുടെയും സമുദായ സംഘടനകളുടെയും പിന്തുണ മുഖ്യമന്ത്രി സ്ഥാനത്തേക്ക് ഏറെ നിര്ണ്ണായകമാണ്.
പുതിയ സര്ക്കാരിനോട് തങ്ങള്ക്ക് അര്ഹതപ്പെട്ട കാര്യങ്ങള് ആവശ്യപ്പെടും. അല്ലാതെ അനാവശ്യമായ സ്ഥാനമാനങ്ങള് നേടിയെടുക്കാന് എന്എസ്എസിന് താല്പ്പര്യമില്ല. അര്ഹതപ്പെട്ടത് പലപ്പോഴും തരാത്തതുകൊണ്ടാണ് കോടതിയില് പോയി നേടിയെടുക്കുന്നത്. പത്തനാപുരത്ത് ഗണേഷ് കുമാര് തോറ്റതിലും എന്എസ്എസിന് പങ്കില്ല. അവിടെ സമദൂര നിലപാടാണ് സ്വീകരിച്ചത്. ജയിപ്പിക്കണമെന്നോ തോല്പ്പിക്കണമെന്നോ ആരോടും നിര്ദ്ദേശിച്ചിട്ടില്ലെന്നും അദ്ദേഹം വ്യക്തമാക്കി.
എന്എസ്എസിന്റെ പരസ്യമായ വിയോജിപ്പ് നിലനില്ക്കുന്ന സാഹചര്യത്തില് വി.ഡി. സതീശനെ മുഖ്യമന്ത്രിയാക്കുന്നത് ഹൈക്കമാന്ഡിന് കീറാമുട്ടിയാകും. ഭരണം സുഗമമായി മുന്നോട്ടു കൊണ്ടുപോകാന് പ്രബല സമുദായ സംഘടനകളുടെ സഹകരണം കോണ്ഗ്രസ് ആഗ്രഹിക്കുന്നുണ്ട്. സുകുമാരന് നായരുടെ പ്രതികരണം വരാനിരിക്കുന്ന മുഖ്യമന്ത്രി പ്രഖ്യാപനത്തില് എത്രത്തോളം സ്വാധീനം ചെലുത്തുമെന്ന് വരും മണിക്കൂറുകളില് വ്യക്തമാകും.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
വായനക്കാരുടെ അഭിപ്രായങ്ങള് അവരുടേത് മാത്രമാണ്, വയർലെസ്സ് മീഡിയയുടെ അല്ല.
ഇവിടെ കുറിക്കുന്ന പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക.
സമൂഹത്തിൽ ഭിന്നതയോ സ്പർധയോ വളർത്തുന്നതോ, അധിക്ഷേപമാകുന്നതോ,
അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്.
അത്തരം പ്രതികരണങ്ങൾ നിയമനടപടി നേരിടേണ്ടി വരും.
സിനിമാ സെറ്റുകളില് ലഹരിയെത്തിക്കുന്ന ‘വന് സ്രാവ്’; കെവിന് ചില്ലറക്കാരനല്ല! പിന്നില് വന് ലോബി; ഉറവിടം തേടി പോലീസ്; ബിഗ് മാഡത്തെ കണ്ടെത്താന് അന്വേഷണം
