തിരുവനന്തപുരം: തലസ്ഥാനത്തെ സി.പി.എമ്മില് വന് അഴിച്ചുപണി. ഡി.വൈ.എഫ്.ഐ അഖിലേന്ത്യാ പ്രസിഡന്റും രാജ്യസഭാംഗവുമായ എ.എ. റഹീമിനെ സി.പി.എം തിരുവനന്തപുരം ജില്ലാ ആക്ടിംഗ് സെക്രട്ടറിയായി നിയമിച്ചു. ഞായറാഴ്ച ചേര്ന്ന ജില്ലാ സെക്രട്ടേറിയറ്റ് യോഗത്തിലാണ് നിര്ണ്ണായക തീരുമാനം. നിലവിലെ സെക്രട്ടറി വി. ജോയി എം.എല്.എയെ വരാനിരിക്കുന്ന നിയമസഭാ തിരഞ്ഞെടുപ്പില് വര്ക്കല മണ്ഡലത്തില് വീണ്ടും മത്സരിപ്പിക്കാനാണ് പാര്ട്ടി ലക്ഷ്യമിടുന്നത്. തിരഞ്ഞെടുപ്പ് ചുമതലകളിലേക്ക് ജോയി മാറുന്നതോടെയാണ് പാര്ട്ടിയുടെ സുപ്രധാന ചുമതല റഹീമിലേക്ക് എത്തുന്നത്.
തുടര്ഭരണം ലക്ഷ്യമിട്ടുള്ള സി.പി.എമ്മിന്റെ തന്ത്രപരമായ നീക്കമായാണ് ഈ നേതൃമാറ്റത്തെ രാഷ്ട്രീയ കേന്ദ്രങ്ങള് നോക്കിക്കാണുന്നത്. വര്ക്കലയില് വി. ജോയിയെ മാറ്റിനിര്ത്തിയാല് വിജയസാധ്യതയെ ബാധിക്കുമെന്ന വിലയിരുത്തലിനെത്തുടര്ന്നാണ് അദ്ദേഹത്തെ വീണ്ടും കളത്തിലിറക്കാന് പാര്ട്ടി തീരുമാനിച്ചത്. ഇതോടെ എ.എ. റഹീം ഇക്കുറി നിയമസഭയിലേക്ക് മത്സരിക്കില്ലെന്ന് ഉറപ്പായി. മുഖ്യമന്ത്രി പിണറായി വിജയന്റെ അതിവിശ്വസ്തനായ റഹീമിനെ സംഘടനാരംഗത്ത് സജീവമാക്കുന്നതിലൂടെ തലസ്ഥാനത്തെ വിഭാഗീയതയ്ക്ക് അറുതി വരുത്താമെന്നും നേതൃത്വം കണക്കുകൂട്ടുന്നു.
ആനാവൂര് നാഗപ്പന് ജില്ലാ സെക്രട്ടറി പദം ഒഴിഞ്ഞപ്പോള് വി. ജോയിക്കൊപ്പം വി.എസ്. സുനില്കുമാറിന്റെ പേരും ചര്ച്ചയായിരുന്നു. എന്നാല്, യുവനേതൃത്വത്തിന് മുന്ഗണന നല്കണമെന്ന പിണറായി വിജയന്റെ കര്ശന നിലപാടാണ് റഹീമിന് തുണയായത്. ആദ്യമായാണ് സി.പി.എമ്മിന്റെ ഇത്രയും നിര്ണ്ണായകമായ ഒരു പദവിയിലേക്ക് റഹീം എത്തുന്നത്. നിലവില് രാജ്യസഭാംഗമായി മികച്ച പ്രവര്ത്തനം നടത്തുന്ന റഹീമിന്, ജില്ലയിലെ പാര്ട്ടി സംവിധാനത്തെ തിരഞ്ഞെടുപ്പിന് സജ്ജമാക്കുക എന്ന വലിയ ഉത്തരവാദിത്തമാണ് ഇനി നിര്വ്വഹിക്കാനുള്ളത്. എല്ലാ വിഭാഗം നേതാക്കള്ക്കും സ്വീകാര്യനായ റഹീമിന്റെ വരവ് തലസ്ഥാനത്തെ ഇടതുപക്ഷ രാഷ്ട്രീയത്തിന് പുതിയ ഊര്ജ്ജം നല്കുമെന്നാണ് സി.പി.എം വൃത്തങ്ങളുടെ പ്രതീക്ഷ.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
സീറ്റുവിഭജന ചര്ച്ചകളിലേക്ക് എല്.ഡി.എഫ്; ഘടകകക്ഷികളുടെ വിധി നിര്ണ്ണയിക്കാന് സി.പി.എം; കേരള കോണ്ഗ്രസ് ബി-യ്ക്ക് തിരുവനന്തപുരം സെന്ട്രല്?
