കേരള രാഷ്ട്രീയത്തിലെ ‘അരാഷ്ട്രീയ’ പരീക്ഷണത്തിന് അതിജീവനത്തിനായുള്ള ചുവടുമാറ്റമോ? ഇഡി ഭീഷണിയും തിരിച്ചടിയും ട്വന്റി ട്വന്റിയെ താമരയരികെ എത്തിച്ചോ?

കൊച്ചി: കേരള രാഷ്ട്രീയത്തിലെ ‘അരാഷ്ട്രീയ’ പരീക്ഷണമായിരുന്ന ട്വന്റി ട്വന്റി ഒടുവില്‍ എന്‍ഡിഎ പാളയത്തില്‍. ഒറ്റയ്ക്ക് നിന്ന് കേരളം പിടിക്കുമെന്ന് പ്രഖ്യാപിച്ച കിറ്റക്‌സ് എം.ഡി സാബു എം. ജേക്കബ്, തന്റെ രാഷ്ട്രീയ നിലപാടുകള്‍ പാടേ മാറ്റിമറിച്ചാണ് ബിജെപിയുമായി കൈകോര്‍ക്കുന്നത്. വിദേശനാണ്യ വിനിമയ ചട്ടലംഘനം (ഫെമ) ആരോപിച്ച് എന്‍ഫോഴ്സ്മെന്റ് ഡയറക്ടറേറ്റ് (ഇഡി) കമ്പനിക്കെതിരെ അന്വേഷണം ശക്തമാക്കിയതിന് തൊട്ടുപിന്നാലെയുള്ള ഈ രാഷ്ട്രീയ നീക്കം സംശയത്തിന്റെ നിഴലിലാണ്.

ഇഡി നോട്ടീസും രാഷ്ട്രീയ പ്രവേശനവും വിദേശത്തേക്ക് പണമയച്ചതുമായി ബന്ധപ്പെട്ട കേസുകളില്‍ സാബു എം. ജേക്കബിന് ഇഡി രണ്ടുതവണ നോട്ടീസ് നല്‍കിയിരുന്നുവെങ്കിലും അദ്ദേഹം ഹാജരായിരുന്നില്ല. കേന്ദ്ര ഏജന്‍സികളുടെ അന്വേഷണത്തില്‍ നിന്ന് രക്ഷപ്പെടാനുള്ള ‘സുരക്ഷിത താവളം’ എന്ന നിലയിലാണ് എന്‍ഡിഎ പ്രവേശനത്തെ രാഷ്ട്രീയ എതിരാളികള്‍ കാണുന്നത്. എന്നാല്‍ വികസനത്തിന് വേണ്ടിയുള്ള സ്വാഭാവിക സഖ്യം മാത്രമാണിതെന്നാണ് സാബു ജേക്കബിന്റെ വിശദീകരണം. ഒറ്റയ്ക്ക് നിന്നാല്‍ കേരളത്തെ മാറ്റിയെടുക്കാന്‍ കഴിയില്ലെന്ന തിരിച്ചറിവാണ് സഖ്യത്തിന് പിന്നിലെന്ന് അദ്ദേഹം അവകാശപ്പെടുന്നു.

തിരിച്ചടിയേറ്റ തട്ടകം തദ്ദേശ തിരഞ്ഞെടുപ്പിലേറ്റ കനത്ത പ്രഹരമാണ് ട്വന്റി ട്വന്റിയെ മാറ്റി ചിന്തിപ്പിച്ച മറ്റൊരു ഘടകം. നാല് പഞ്ചായത്തുകളിലെ ഭരണം ഉണ്ടായിരുന്ന പാര്‍ട്ടിക്ക് ഇത്തവണ രണ്ടെണ്ണം നഷ്ടമായി. കിഴക്കമ്പലത്തും ഐക്കരനാടും ഭരണം നിലനിര്‍ത്തിയെങ്കിലും കുന്നത്തുനാട്, മഴുവന്നൂര്‍ പഞ്ചായത്തുകള്‍ കൈവിട്ടുപോയി. ബ്ലോക്ക്-ജില്ലാ പഞ്ചായത്ത് ഡിവിഷനുകളിലും പാര്‍ട്ടിക്ക് കാര്യമായ മുന്നേറ്റമുണ്ടാക്കാന്‍ കഴിഞ്ഞില്ല. നിലനില്‍പ്പ് തന്നെ ഭീഷണിയിലായ സാഹചര്യത്തിലാണ് സാബു ജേക്കബ് തന്റെ രാഷ്ട്രീയ അയിത്തം വെടിഞ്ഞ് മുന്നണി രാഷ്ട്രീയത്തിലേക്ക് പ്രവേശിച്ചത്.

എറണാകുളത്തെ നിര്‍ണ്ണായക കൂട്ടുകെട്ട് എറണാകുളം ജില്ലയിലെ വോട്ടുബാങ്കില്‍ ട്വന്റി ട്വന്റിക്ക് ഇപ്പോഴും സ്വാധീനമുണ്ട്. ബിജെപിയുമായി ചേരുന്നതോടെ ജില്ലയിലെ ചില നിയമസഭാ മണ്ഡലങ്ങളില്‍ നിര്‍ണ്ണായകമായ മൂന്നാം ശക്തിയാകാന്‍ ഈ കൂട്ടുകെട്ടിന് കഴിയുമോ എന്നാണ് രാഷ്ട്രീയ കേരളം ഉറ്റുനോക്കുന്നത്. എറണാകുളത്ത് ബിജെപിക്ക് വോട്ട് വിഹിതം കൂട്ടാന്‍ ഈ സഖ്യം സഹായിച്ചാല്‍ സാബു ജേക്കബിന് എന്‍ഡിഎയില്‍ കരുത്ത് കൂടും. മറിച്ച്, വോട്ടുകള്‍ ചോര്‍ന്നുപോകുകയും ബിജെപിക്ക് ഗുണം ലഭിക്കാതിരിക്കുകയും ചെയ്താല്‍ സാബു ജേക്കബിന്റെ രാഷ്ട്രീയ പ്രസക്തി എന്നെന്നേക്കുമായി അവസാനിക്കാനുള്ള സാധ്യതയുമുണ്ട്.