തിരുവനന്തപുരം: സി.എം.ആര്.എല് – എക്സാലോജിക് സാമ്പത്തിക ഇടപാടില് മുന് മുഖ്യമന്ത്രി പിണറായി വിജയന്റെ വസതികളിലടക്കം നടന്ന മിന്നല് റെയ്ഡിന് പിന്നാലെ അന്വേഷണം അതീവ നിര്ണ്ണായക ഘട്ടത്തിലേക്ക് കടത്തിവിട്ട് എന്ഫോഴ്സ്മെന്റ് ഡയറക്ടറേറ്റ് (ഇ.ഡി). റെയ്ഡില് പിടിച്ചെടുത്ത ഡിജിറ്റല് തെളിവുകളും ആധാരരേഖകളും വിശദമായി പരിശോധിച്ച ശേഷമാകും ഇ.ഡിയുടെ അടുത്ത ഘട്ട നിര്ണ്ണായക നീക്കങ്ങള്. ഇതിന്റെ ആദ്യപടിയായി മുഖ്യമന്ത്രി പിണറായി വിജയന്റെ മകള് വീണ വിജയന് ചോദ്യം ചെയ്യലിന് ഹാജരാകാന് ഇ.ഡി ഉടന് നോട്ടീസ് നല്കും. റെയ്ഡിന് പിന്നാലെ സി.എം.ആര്.എല് മാനേജ്മെന്റുമായും എക്സാലോജികുമായും ബന്ധമുള്ള വിവിധ ബാങ്ക് അക്കൗണ്ടുകളിലെ 18 കോടിയോളം രൂപ ഇ.ഡി മരവിപ്പിച്ചതായാണ് ഒടുവില് പുറത്തുവരുന്ന വിവരങ്ങള്.
കേരള രാഷ്ട്രീയത്തെ പിടിച്ചുലച്ച കരിമണല് കമ്പനിയിലെ പ്രതിമാസപ്പടി കേസില് ഹൈക്കോടതിയില് നിന്ന് അനുകൂല വിധി സമ്പാദിച്ചതിന് തൊട്ടുപിന്നാലെയാണ് ഇ.ഡി അപ്രതീക്ഷിതമായി വലിയ സ്രാവുകളിലേക്ക് വലയെറിഞ്ഞത്. തിരുവനന്തപുരത്ത് പിണറായി വിജയന് താമസിക്കുന്ന ബേക്കറി ജങ്ഷനിലെ വസതി, കണ്ണൂര് പിണറായിയിലെ വീട്, കോഴിക്കോട്ട് മരുമകനും മുന് മന്ത്രിയുമായ പി.എ. മുഹമ്മദ് റിയാസിന്റെ വസതി തുടങ്ങി ഒരേസമയം പത്തിലധികം കേന്ദ്രങ്ങളിലാണ് ഇ.ഡി ബുധനാഴ്ച റെയ്ഡ് നടത്തിയത്. വരും ദിവസങ്ങളില് വീണ വിജയനെ കൊച്ചിയിലെ ഇ.ഡി ഓഫീസിലേക്ക് നേരിട്ട് വിളിച്ചുവരുത്തി അറസ്റ്റ് ചെയ്യുന്നതിലേക്ക് കാര്യങ്ങള് നീങ്ങുമോ എന്നാണ് ഇപ്പോള് രാഷ്ട്രീയ വൃത്തങ്ങള് ഉറ്റുനോക്കുന്നത്.
റെയ്ഡ് വിവരം പുറത്തുവന്നതോടെ വലിയ തോതിലുള്ള പ്രതിരോധവും പ്രതിഷേധവുമാണ് സി.പി.എം സംസ്ഥാനത്തുടനീളം ഉയര്ത്തുന്നത്. തിരുവനന്തപുരത്ത് റെയ്ഡ് കഴിഞ്ഞ് മടങ്ങിയ ഇ.ഡി ഉദ്യോഗസ്ഥരുടെ വാഹനങ്ങള്ക്ക് നേരെ കല്ലേറും അക്രമവുമുണ്ടായി. വാഹനത്തിന്റെ ചില്ലുകള് തകര്ക്കപ്പെട്ടു. സി.പി.എം സംസ്ഥാന സെക്രട്ടറി എം.വി. ഗോവിന്ദന്, കേന്ദ്ര കമ്മിറ്റി അംഗങ്ങള് തുടങ്ങിയ പ്രമുഖ നേതാക്കള് നേരിട്ടെത്തിയാണ് തലസ്ഥാനത്ത് പ്രതിഷേധത്തിന് ചുക്കാന് പിടിച്ചത്. സംസ്ഥാനം ഭരിക്കുന്നത് യു.ഡി.എഫ് സര്ക്കാരാണെങ്കിലും, ക്രമസമാധാന പ്രശ്നം ചൂണ്ടിക്കാട്ടി കേന്ദ്ര ഏജന്സിയുടെ സുരക്ഷ പൂര്ണ്ണമായും സി.ആര്.പി.എഫ് പോലെയുള്ള കേന്ദ്ര സേനകള്ക്ക് കൈമാറി കടുത്ത നീക്കങ്ങളിലേക്ക് കടക്കാനാണ് ഇ.ഡി നീക്കം.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
ഇന്റലിജൻസ് മേധാവി പി. വിജയന്റെ പേരിൽ പണത്തട്ടിപ്പ്; സൈബർ പോലീസ് കേസെടുത്തു; പോലീസ് യൂണിഫോമിലുള്ള ചിത്രം വെച്ച് വ്യാജ ഐ.ഡി
