വാഷിങ്ടന്/ഇസ്ലാമാബാദ്: ലോകം ഉറ്റുനോക്കിയ മിഡില് ഈസ്റ്റ് സമാധാന ചര്ച്ചകള് തുടങ്ങും മുന്പേ പാളി. ചര്ച്ചയ്ക്കായി പാക്കിസ്ഥാനിലേക്ക് പുറപ്പെടാനിരുന്ന യുഎസ് സംഘത്തെ അവസാന നിമിഷം പ്രസിഡന്റ് ഡൊണാള്ഡ് ട്രംപ് തിരിച്ചുവിളിച്ചു. ഇറാന് വിദേശകാര്യ മന്ത്രി അബ്ബാസ് അരാഗ്ചി പാക്കിസ്ഥാനിലെ ചര്ച്ചകള് പൂര്ത്തിയാക്കി യുഎസ് സംഘം എത്തും മുന്പേ മടങ്ങിയതാണ് ട്രംപിനെ ചൊടിപ്പിച്ചത്. ‘എല്ലാ കാര്ഡുകളും ഞങ്ങളുടെ കയ്യിലാണ്, വേണമെങ്കില് അവര് ഇങ്ങോട്ട് വിളിക്കട്ടെ’ എന്നായിരുന്നു ട്രംപിന്റെ പ്രതികരണം.
യുഎസ് പ്രതിനിധികളായ സ്റ്റീവ് വിറ്റ്കോഫും ജാരെഡ് കുഷ്നറും ഇസ്ലാമാബാദിലേക്ക് പറക്കുമെന്നായിരുന്നു വൈറ്റ് ഹൗസ് നേരത്തെ അറിയിച്ചിരുന്നത്. എന്നാല് വെള്ളിയാഴ്ച പാക്കിസ്ഥാന് പ്രധാനമന്ത്രി ഷെഹ്ബാസ് ഷെരീഫുമായി ചര്ച്ച നടത്തിയ ഇറാന് വിദേശകാര്യ മന്ത്രി ശനിയാഴ്ചയോടെ രാജ്യം വിട്ടു. യുഎസ് സംഘം വാഷിങ്ടനില് നിന്ന് വിമാനം കയറാന് ഒരുങ്ങുമ്പോഴായിരുന്നു ഇറാന്റെ ഈ അപ്രതീക്ഷിത പിന്വാങ്ങല്. ഇതോടെ 18 മണിക്കൂര് പറന്ന് പാക്കിസ്ഥാനിലെത്തി ‘വെറുതെ ഇരിക്കാന്’ തന്റെ പ്രതിനിധികളെ വിടില്ലെന്ന് ട്രംപ് പ്രഖ്യാപിച്ചു.ഇറാന്റെ ഈ നടപടിയെ ട്രംപ് തന്റെ സോഷ്യല് മീഡിയ പ്ലാറ്റ്ഫോമായ ‘ട്രൂത്ത് സോഷ്യലില്’ കടുത്ത ഭാഷയില് വിമര്ശിച്ചു.
‘യാത്ര ചെയ്ത് സമയം കളയാനില്ല, ഒരുപാട് ജോലികള് തീര്ക്കാനുണ്ട്. ഇറാന് നേതൃത്വത്തിനിടയില് കടുത്ത പോരും ആശയക്കുഴപ്പവുമാണ്. അവിടെ ആര്ക്കാണ് നിയന്ത്രണമെന്ന് അവര്ക്ക് പോലും അറിയില്ല. ഞങ്ങളുടെ കയ്യിലാണ് എല്ലാ അധികാരവുമുണ്ട്. അവര്ക്ക് സംസാരിക്കണമെന്നുണ്ടെങ്കില് ഞങ്ങളെ ഫോണ് വിളിച്ചാല് മതി.’ – ട്രംപ് കുറിച്ചു. അതേസമയം, പാക്കിസ്ഥാന് സന്ദര്ശനം ഫലപ്രദമായിരുന്നുവെന്നാണ് ഇറാന് വിദേശകാര്യ മന്ത്രി അബ്ബാസ് അരാഗ്ചി പ്രതികരിച്ചത്. എന്നാല് അമേരിക്ക നയതന്ത്ര കാര്യത്തില് എത്രത്തോളം ഗൗരവത്തിലാണെന്ന് തനിക്ക് ബോധ്യപ്പെട്ടിട്ടില്ലെന്നും അദ്ദേഹം കുറിച്ചു. ഹോര്മുസ് കടലിടുക്കിലെ അമേരിക്കന് ഉപരോധത്തെക്കുറിച്ച് ഇറാന് കടുത്ത മുന്നറിയിപ്പാണ് നല്കുന്നത്. അമേരിക്കന് ഉപരോധം തുടര്ന്നാല് സൈനികമായ തിരിച്ചടി നല്കുമെന്നാണ് ഇറാന്റെ ഭീഷണി.
ഒരു വശത്ത് ചര്ച്ചകള് വഴിമുട്ടുമ്പോള് മറുവശത്ത് യുദ്ധഭീതി ഒഴിയുന്നില്ല. ലെബനനില് ആക്രമണം: വെടിനിര്ത്തല് മൂന്നാഴ്ചത്തേക്ക് കൂടി നീട്ടിയെങ്കിലും ലെബനനില് ഇസ്രയേല് ആക്രമണം തുടര്ന്നു. നബാത്തിയ ജില്ലയിലുണ്ടായ ആക്രമണത്തില് നാലു പേര് കൊല്ലപ്പെട്ടു. ഇവര് ഹിസ്ബുല്ല ഭീകരരാണെന്നാണ് ഇസ്രയേല് വാദം. ലോക്ക്ഡ് ആന്ഡ് ലോഡഡ്: ഇറാന്റെ അടിസ്ഥാന സൗകര്യങ്ങളെ ലക്ഷ്യം വെച്ച് യുഎസ് സൈന്യം സജ്ജമാണെന്ന് പ്രതിരോധ സെക്രട്ടറി പീറ്റ് ഹെഗ്സെത്ത് മുന്നറിയിപ്പ് നല്കി.
വൈദ്യുതി നിയന്ത്രണം: രാജ്യത്തെ അടിസ്ഥാന സൗകര്യങ്ങള് ശത്രുക്കള് തകര്ക്കുകയാണെന്നും ജനങ്ങള് വൈദ്യുതി ഉപയോഗം കുറയ്ക്കണമെന്നും ഇറാന് പ്രസിഡന്റ് മസൂദ് പെസെഷ്കിയാന് ആവശ്യപ്പെട്ടു. പത്ത് ലൈറ്റിന് പകരം രണ്ട് ലൈറ്റ് ഇട്ടാല് എന്താണ് കുഴപ്പമെന്നും അദ്ദേഹം ചോദിച്ചു. വാഗ്വാദങ്ങളും വെല്ലുവിളികളും മുറുകുമ്പോള് പശ്ചിമേഷ്യയില് സമാധാനം എന്നത് ഇപ്പോഴും വിദൂര സ്വപ്നമായി തുടരുകയാണ്.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
‘ഇന്ത്യ സുഹൃത്ത്,ഇന്ത്യൻ കപ്പലുകൾക്ക് ഹോർമുസ് കടക്കാം’; ഇന്ത്യ ഉൾപ്പെടെ അഞ്ചു രാജ്യങ്ങൾക്ക് ഇറാന്റെ യാത്രാനുമതി
