തൃശൂര്: സ്ഫോടനത്തിന്റെ തീവ്രതയില് ചിന്നിച്ചിതറിപ്പോയ മനുഷ്യശരീരങ്ങള്… തിരിച്ചറിയാന് പോലും കഴിയാത്ത വിധം കത്തിയമര്ന്ന ഭൗതികാവശിഷ്ടങ്ങള് ചാക്കുകളില് കെട്ടിയാണ് തൃശൂര് ഗവ. മെഡിക്കല് കോളേജിലേക്ക് എത്തിച്ചത്. ചിലരുടെ ശരീരം പകുതിയേ ഉണ്ടായിരുന്നുള്ളൂ. ഓരോ ആംബുലന്സുകള് ചീറിപ്പാഞ്ഞു വരുമ്പോഴും ഉള്ളിലുള്ളത് ജീവനുള്ള മനുഷ്യനാണോ അതോ വെറും മാംസപിണ്ഡമാണോ എന്ന് തിരിച്ചറിയാനാകാതെ ആശുപത്രി അധികൃതര് പകച്ചുനിന്നു. ആംബുലന്സുകളില് നിന്ന് ഇറ്റുവീണ ചോരയില് മെഡിക്കല് കോളേജ് മുറ്റം തളംകെട്ടി നില്ക്കുന്ന കാഴ്ച ഹൃദയഭേദകമായിരുന്നു.
ദുരന്തത്തിന്റെ ഭീകരതയില് മരവിച്ച അവസ്ഥയിലായിരുന്നു മെഡിക്കല് കോളേജ് പരിസരം. അത്യാഹിത വിഭാഗത്തില് എത്തിച്ച ശരീരഭാഗങ്ങള് വേഗത്തില് മോര്ച്ചറിയിലേക്ക് മാറ്റാനുള്ള നെട്ടോട്ടത്തിലായിരുന്നു ജീവനക്കാര്. ഇടതടവില്ലാതെ അഞ്ചും ആറും ആംബുലന്സുകള് ഒരുമിച്ച് എത്തിയതോടെ ആശുപത്രി അങ്കണം അക്ഷരാര്ത്ഥത്തില് ഒരു യുദ്ധക്കളത്തിന് സമാനമായി. രാഷ്ട്രീയ നേതാക്കളും ദേവസ്വം ഭാരവാഹികളും പൂരപ്രേമികളും ഒരുപോലെ വിങ്ങലോടെ ഈ കാഴ്ചകള്ക്ക് സാക്ഷിയായി.
തിരുവമ്പാടി വിഭാഗത്തിന്റെ മുണ്ടത്തിക്കോടുള്ള വെടിക്കെട്ട് നിര്മ്മാണശാലയില് 110 തൊഴിലാളികളാണ് ജോലി ചെയ്യുന്നത്. ഇതില് 40 ഓളം തൊഴിലാളികളാണ് ചൊവ്വാഴ്ച പണിക്കെത്തിയിരുന്നത്. ഉച്ചയ്ക്ക് 35 പേര്ക്ക് ഭക്ഷണം ആവശ്യപ്പെട്ടിരുന്നതായാണ് വിവരം. സ്ഫോടനം നടക്കുമ്പോള് ചിലര് ചായ കുടിക്കാന് പുറത്തുപോയതും പണി കഴിഞ്ഞ് ഏതാനും പേര് മടങ്ങിയതും വലിയൊരു കൂട്ടമരണം ഒഴിവാക്കി. എങ്കിലും അവിടെ ശേഷിച്ചവര്ക്ക് രക്ഷപ്പെടാന് കാലം സമയം നല്കിയില്ല.
അപകടസമയം വെടിപ്പുരയിലുണ്ടായിരുന്ന ലൈസന്സി സതീഷ് ഗുരുതരാവസ്ഥയില് മെഡിക്കല് കോളേജ് ആശുപത്രിയില് ചികിത്സയിലാണ്. സതീഷിന്റെ പിതാവടക്കം തലമുറകളായി വെടിക്കെട്ട് ലൈസന്സിയായി പ്രവര്ത്തിക്കുന്ന കുടുംബമാണ് ഇവരുടേത്. കരിമരുന്നിന്റെ ലോകത്ത് ജീവിതം കരുപിടിപ്പിച്ചവര് അതേ മരുന്നിന്റെ ഇരകളായി മാറിയത് നഗരത്തിന് താങ്ങാവുന്നതിലും അപ്പുറമാണ്. സതീഷിന്റെ ആരോഗ്യനിലയില് ആശങ്ക തുടരുകയാണ്.
മരിച്ചവരില് പലരെയും കണ്ട് തിരിച്ചറിയുക അസാധ്യമാണ്. ചിന്നിച്ചിതറിയ ശരീരഭാഗങ്ങള് ആരുടേതാണെന്ന് കണ്ടെത്താന് ഫോറന്സിക്, ഡിഎന്എ പരിശോധനകള് നടത്താനാണ് അധികൃതരുടെ തീരുമാനം. ബന്ധുക്കളെ തിരഞ്ഞെത്തിയവര്ക്ക് മുന്നില് പലപ്പോഴും പൊലീസിനും ഡോക്ടര്മാര്ക്കും മറുപടിയില്ലായിരുന്നു. മരിച്ചവരുടെയും പരിക്കേറ്റവരുടെയും വിവരങ്ങളറിയാന് മെഡിക്കല് കോളേജില് പ്രത്യേക കണ്ട്രോള് റൂം തുറന്നിട്ടുണ്ട്.
സ്ഫോടനസ്ഥലത്തേക്ക് തുടക്കത്തില് ആര്ക്കും അടുക്കാനാകാത്ത സ്ഥിതിയായിരുന്നു. സ്ഫോടനങ്ങള് തുടര്ച്ചയായി നടന്നുകൊണ്ടിരുന്നതിനാല് പോലീസ് ഡ്രോണ് ഉപയോഗിച്ചാണ് പ്രാഥമിക നിരീക്ഷണങ്ങള് നടത്തിയത്. അഗ്നിരക്ഷാസേന തീയണച്ച ശേഷമാണ് രക്ഷാപ്രവര്ത്തകര്ക്ക് ഉള്ളിലേക്ക് കടക്കാനായത്. നേരം ഇരുട്ടിയതോടെ ജനറേറ്ററുകള് എത്തിച്ച് വെളിച്ചം സജ്ജമാക്കിയാണ് കരിയും പുകയും നിറഞ്ഞ പാടശേഖരത്തില് തിരച്ചില് തുടര്ന്നത്.
മണിക്കൂറുകള്ക്ക് മുന്പ് കണ്ടവരും സംസാരിച്ചവരും എവിടെയെന്നറിയാത്ത വിങ്ങലിലാണ് സഹപ്രവര്ത്തകര്. ‘അവന് ചായ കുടിക്കാന് പോയതാ, തിരിച്ചു വന്നോന്നറിയില്ല’ എന്ന് പറഞ്ഞ് കരയുന്ന തൊഴിലാളികള് ഓരോ മലയാളിയുടെയും കണ്ണുനിറയ്ക്കുന്നു. പലരും തലനാരിഴയ്ക്കാണ് മരണത്തിന്റെ കൈകളില് നിന്ന് കുതറിമാറിയത്. തിരുവമ്പാടി ദേവസ്വം കമ്മിറ്റി അംഗങ്ങളും നാട്ടുകാരും കാണാതായവര്ക്കായി ആശുപത്രി വാര്ഡുകള് തോറും തിരച്ചില് നടത്തുന്നുണ്ട്.
മൃതദേഹങ്ങള് വരിവരിയായി മോര്ച്ചറിക്ക് മുന്നില് കിടത്തിയപ്പോള് അത് തൃശൂര് പൂരത്തിന്റെ ആഘോഷങ്ങളെ കരിനിഴലിലാക്കുന്ന കാഴ്ചയായി. വടക്കുന്നാഥന്റെ മണ്ണില് പൂരപ്പൊലിമ പടര്ത്തേണ്ടവര് ഇന്ന് നിശ്ചലമായി കിടക്കുന്നു. തിരിച്ചറിയാന് കഴിയാത്ത ഭൗതികാവശിഷ്ടങ്ങള് ഓരോന്നായി പരിശോധിക്കുമ്പോഴും പുതിയൊരു പേര് കൂടി മരണപ്പട്ടികയില് ചേരുമോ എന്ന ഭീതിയിലാണ് തൃശൂര്.
സ്ഫോടനത്തില് പരിക്കേറ്റ് ചികിത്സയില് കഴിയുന്നവരുടെ നില അതീവ ഗുരുതരമായി തുടരുകയാണ്. പൊള്ളലേറ്റവര്ക്കായി മെഡിക്കല് കോളേജില് പ്രത്യേകം ഐസിയു സംവിധാനങ്ങള് ഒരുക്കിയിട്ടുണ്ട്. വിദഗ്ധ ഡോക്ടര്മാരുടെ സംഘം പരിക്കേറ്റവര്ക്ക് അരികിലുണ്ടെങ്കിലും സ്ഫോടനത്തിന്റെ ആഘാതം പലരുടെയും ആന്തരിക അവയവങ്ങളെയും ബാധിച്ചിട്ടുണ്ട്. ഇതും ആശങ്ക വര്ദ്ധിപ്പിക്കുന്നു.
നഗരം കണ്ട ഏറ്റവും വലിയ വെടിക്കെട്ട് ദുരന്തമായി മുണ്ടത്തിക്കോട് മാറുകയാണ്. പൂരത്തിന് വിരിയിക്കാന് വച്ചിരുന്ന അമിട്ടുകളും ഗുണ്ടുകളും അകാലത്തില് പൊട്ടിത്തെറിച്ചത് ഒരു നാടിന്റെ പ്രതീക്ഷകള്ക്ക് മേലാണ്. തൃശൂര് പൂരത്തിന് ഇനി ദിവസങ്ങള് മാത്രം ബാക്കി നില്ക്കെ, ആ തട്ടകത്തിന്റെ ആവേശം ഇപ്പോള് നിശ്ശബ്ദമായ തേങ്ങലായി മാറിയിരിക്കുന്നു.
പൂരപ്രേമികളുടെ ഇടയില് ഈ അപകടം വലിയ ആഘാതമാണ് സൃഷ്ടിച്ചിരിക്കുന്നത്. കരിമരുന്നുമായി ബന്ധപ്പെട്ട സുരക്ഷാ ചര്ച്ചകള് വീണ്ടും സജീവമാകുമ്പോഴും നഷ്ടപ്പെട്ട ജീവനുകള്ക്ക് എന്ത് പകരം നല്കുമെന്ന ചോദ്യം അവശേഷിക്കുന്നു. മരിച്ചവരുടെ കുടുംബാംഗങ്ങളുടെ നിലവിളി മെഡിക്കല് കോളേജ് പരിസരത്തെ ഭീതിദമായ അന്തരീക്ഷമാക്കുന്നു.
ഡിഎന്എ പരിശോധന ഫലം വരുന്നത് വരെ തങ്ങളുടെ പ്രിയപ്പെട്ടവരുടെ മൃതദേഹത്തിനായി ബന്ധുക്കള്ക്ക് കാത്തിരിക്കേണ്ടി വരും. ആ കാത്തിരിപ്പ് വേദനയുടേതാണ്. മുണ്ടത്തിക്കോടിന്റെ മണ്ണില് പടര്ന്ന ആ ചോരക്കറ തൃശൂരിന്റെ ചരിത്രത്തില് നോവാകുന്നു. ഈ പൂരക്കാലം കണ്ണീരോടെയല്ലാതെ ആര്ക്കും ഓര്ക്കാന് കഴിയില്ല. ഓരോ ജീവനും വിലപ്പെട്ടതാണെന്ന തിരിച്ചറിവില്, പ്രാര്ത്ഥനയോടെ വിറങ്ങലിച്ചു നില്ക്കുകയാണ് പൂരനഗരി.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
‘നിയമസഭാംഗം’ ബോര്ഡ് വിവാദം: വാച്ച് ആന്ഡ് വാര്ഡിന് സ്പീക്കറുടെ താക്കീത് കിട്ടും; എം.എല്.എമാരെ തിരിച്ചറിയാന് പ്രത്യേക ക്ലാസ്; ഉദ്യോഗസ്ഥനെതിരെ തല്ക്കാലം കൂടുതല് നടപടിയില്ല
