ന്യൂഡല്ഹി: ശബരിമലയിലെ യുവതീപ്രവേശനവുമായി ബന്ധപ്പെട്ട കേസില് നിര്ണ്ണായക നീക്കവുമായി കേന്ദ്രസര്ക്കാര്. ശബരിമലയില് യുവതീപ്രവേശനം അനുവദിച്ച മുന്പത്തെ കോടതി വിധി തെറ്റാണെന്ന് ചൂണ്ടിക്കാട്ടി കേന്ദ്രം സുപ്രീം കോടതിയില് ശക്തമായ വാദങ്ങള് എഴുതിനല്കി. പത്ത് മുതല് അമ്പത് വയസ്സുവരെയുള്ള സ്ത്രീകളെ പ്രവേശിപ്പിക്കുന്നത് നൂറ്റാണ്ടുകളായി നിലനില്ക്കുന്ന ആരാധനാക്രമത്തെ ബാധിക്കുമെന്നും വിശ്വാസികളുടെ വികാരം മാനിക്കണമെന്നും കേന്ദ്രം ആവശ്യപ്പെട്ടു. സോളിസിറ്റര് ജനറല് തുഷാര് മേത്ത സമര്പ്പിച്ച ഈ വാദങ്ങള് നിര്ണ്ണായകമാണ്.
ശബരിമലയിലെ പ്രതിഷ്ഠ ‘നൈഷ്ഠിക ബ്രഹ്മചാരി’ ആണെന്ന സങ്കല്പ്പമാണ് വിലക്കിന് ആധാരമെന്ന് കേന്ദ്രം വാദത്തില് വ്യക്തമാക്കുന്നു. ‘ആരാധനാമൂര്ത്തിയുടെ വ്യക്തിത്വമോ സ്വത്വമോ പരിശോധിക്കാന് കോടതികള്ക്ക് അധികാരമില്ല. ദശലക്ഷക്കണക്കിന് ഭക്തര് പാലിച്ചുപോരുന്ന ഈ ആചാരത്തില് ഒന്നോ രണ്ടോ വ്യക്തികള്ക്ക് വേണ്ടി കോടതി ഇടപെടരുത്. യുവതീപ്രവേശനം അനുവദിച്ചാല് ശബരിമലയിലെ ആരാധനാസ്വഭാവം തന്നെ മാറിപ്പോകും,’ കേന്ദ്രം സുപ്രീം കോടതിയെ അറിയിച്ചു.
വിദേശ രാജ്യങ്ങളിലെ കോടതികള് പുറപ്പെടുവിക്കുന്ന വിധികള് അതുപോലെ ഇന്ത്യയില് പകര്ത്തുന്നത് ശരിയായ പ്രവണതയല്ലെന്ന് കേന്ദ്ര സര്ക്കാര് നിരീക്ഷിച്ചു. ശബരിമലയിലെ യുവതീപ്രവേശനം അനുവദിച്ച വിധിയെയും കേന്ദ്രം ശക്തമായി വിമര്ശിച്ചു. പഞ്ചാബില് രജിസ്റ്റര് ചെയ്ത ഒരു സംഘടനയാണ് യുവതീപ്രവേശനത്തിനായി കോടതിയെ സമീപിച്ചതെന്നും അവര്ക്ക് ശബരിമലയുടെ പാരമ്പര്യത്തെക്കുറിച്ച് കൃത്യമായ ധാരണയില്ലെന്നും കേന്ദ്രം ചൂണ്ടിക്കാട്ടി.
ശബരിമല യുവതീപ്രവേശന വിധി പുനഃപരിശോധിക്കുന്നതിനായുള്ള ഒമ്പതംഗ ഭരണഘടനാ ബെഞ്ച് കേസില് വാദം കേള്ക്കാനിരിക്കെയാണ് കേന്ദ്രത്തിന്റെ ഈ നിര്ണ്ണായക നീക്കം. വിശ്വാസികള്ക്കൊപ്പം നില്ക്കുന്ന നയമാണ് നരേന്ദ്ര മോദി സര്ക്കാര് സ്വീകരിക്കുന്നതെന്ന സൂചനയാണിതിലൂടെ ലഭിക്കുന്നത്. ആചാര സംരക്ഷണത്തിനായി കേന്ദ്രം നല്കിയ ഈ രേഖാമൂലമുള്ള വാദങ്ങള് കേസിന്റെ വിധിയില് വലിയ സ്വാധീനം ചെലുത്തുമെന്നാണ് നിയമവിദഗ്ധര് കരുതുന്നത്. വരും ദിവസങ്ങളില് സുപ്രീം കോടതി സ്വീകരിക്കുന്ന നിലപാട് ശബരിമല വിഷയത്തില് അതിനിര്ണ്ണായകമാകും.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
നയതന്ത്രത്തില് ‘ഇന്ത്യ ഫസ്റ്റ്’; മോദി സര്ക്കാരിന് കൈയടിച്ച് കോണ്ഗ്രസ് പ്രമുഖന്; രാഹുലിന്റെ വിമര്ശനങ്ങള്ക്കിടെ പ്രതിപക്ഷം ഭിന്നിക്കുന്നു; മനീഷ് തിവാരിയും മോദിയ്ക്കൊപ്പം
